Župy, towarstwa a skupiny njech so z narodnym prócowarjom zaběraja

Budyšin (SN/at). Lěto 2016 budźe Smolerjowe lěto. Z tym dopomina Domowina na wodźacu wosobinu serbskeho narodneho hibanja Jana Arnošta Smolerja składnostnje jeho 200. narodnin klětu 3. měrca, kaž je to Zwjazkowe předsydstwo Domowiny na posedźenju sobotu w Budyšinje wobzamknyło. We wobzamknjenju dale rěka, zo měli so Domowinjenjo tež na župnej, towarstwowej a skupinskej runinje ze žiwjenjom a skutkowanjom Smolerja bliže zeznajomić. Projekty z dźěćimi a młodostnymi zwjazkowe předsydstwo wosebje wita.

Centralne zarjadowanja budu 3. a 5. měrca 2016. Domowina, župa „Jan Arnošt Smoler“ Budyšin, dźěłowy kruh za serbske naležnosće města Budyšina a Serbski gymnazij wopominaja Smolerja 3. měrca při jeho Budyskim pomniku, Spěchowanske towarstwo Smolerjec kniharnje přeprosy na čitanski wječor do kniharnje. Wěnc połožić chcedźa na wobnowjenym rownišću Smolerjec swójby na Hrodźišku 5. měrca, přizamknyć ma so swjedźenske zarjadowanje w Serbskim muzeju. To přihotujetej Maćica Serbska a Domowina.