Šulerjo a wučerjo Serbskeho gymnazija Budyšin (SGB) 2 800 eurow naběželi
Při rjanym słónčnym wjedrje wotmě so kónc septembra hižo 11. Budyski běh z wutrobu we hłownej organizaciji Ludoweje banki Budyšin. Znowa nastajichu wobdźělnicy wjacore rekordy. Sprěnja překročichu běharjo Budyskich gymnazijow kaž tež Wjelečanskeho a Biskopčanskeho gymnazija a powołanskeje šule za hospodarstwo a techniku magisku hranicu wot 2 000 sportowcow. Zdruha zmištrowachu šulerjo a wučerjo wulkotne 14 040 kołow, kóžde někak 700 metrow dołhe. Jednotliwy team wobsteješe z třoch běharjow, kotřiž so wotměnjejo jednu hodźinu za dobry zaměr angažowachu. Lětsa za zjednoćenstwo bawuki (Bautzener Wunsch Kiste), kotrež podpěra ćělnje, duchownje a psychisce wróćostajenych dźěći a młodostnych. Třeći rekord běše naběžana suma z wjac hač 25 000 eurow, to je dotal najwyša. Z njeje nałožuja 80 procentow za projekty zjednoćenstwa bawuki. Zbytne pjenjezy sobuskutkowacym šulam rozdźěla.