Chce do Južneho Tirola

štwórtk, 07. januara 2016
artikl hódnoćić
(0 )
Pětr Domaška, kapitan Sokoła Ralbicy/Hórki  Foto: Markus Brüss Pětr Domaška, kapitan Sokoła Ralbicy/Hórki Foto: Markus Brüss

Wo tuchwilnym stawje prěnjeho zastupnistwa koparjow Sokoła Ralbicy/Hórki, wo dotalnej bilancy hrajneje doby a wo někotrych dalšich temach je so Maik Brězan z kapitanom mustwa Pětrom Domašku rozmołwjał.

Pětrje, tuchwilu widźimy koparjow Sokoła Ralbicy/Hórki časćišo na halowym parkeće hrać. Wo prěnjej połseriji z Delan hišće bilancu nimamy.

P. Domaška: Stejimy na štwórtym městnje tabulki. Njemóžemy pak z pokazanymi wukonami spokojom być. Hrajachmy chětro njestajnje. Zhubichmy wosebje přećiwo po zdaću słabšim kontrahentam wažne dypki. Stajnje hrajachmy njerozsudnje. Jeničce w pokalnym kole smy nadawk spjelnili.

Zymska přestawka je lětsa jara krótka. Kak wupada waš přihotowanski plan?

P. Domaška: 12. januara započnjemy trenować. Nimo toho wobdźěla so wjacori moji sobuhrajerjo kaž tež ja na treningowym lěhwje Serbskeje koparskeje wubranki w Rabenbergu wot jutřišeho do njedźele. Za přećelskej zetkani zdobychmy sej sylnej cyłkaj z krajneje klasy. Hrajemy ze Sokołom 17. januara pola Biskopičanskeje rezerwy a tydźeń pozdźišo přećiwo Mužakowskim koparjam na kumštnym trawniku w Kamjencu. A nadźijam so, zo potom přećiwo Kinsporkej do 2. połserije wuspěšnje startujemy.

Ma Sokoł nowopřichady, abo je něchtó mustwo wopušćił?

P. Domaška: Nowopřichady nje­změ­je­my. Fabian Bejma dźe do krajneje stolicy k cyłkej Drježdźany-Laubegast. Jako při­stajeny Drježdźanskeje powołanskeje wohn­joweje wobory ma so nětk lóšo.

Što su zaměry Sokoła Ralbicy/Hórki za přichodne měsacy?

P. Domaška: Chcemy aktraktiwnu kopańcu pokazać, wosebje w domjacym Stadionje přećelstwa. Rjenje by było, by-li na kóncu sezony 3. městno wuskočiło.

Sy prjedy treningowe lěhwo w Rabenbergu za koparsku europeadu narěčał. Što su Twoje wosobinske cile za nju?

P. Domaška: Nadźijam so, zo sym mjez tymi, kotřiž list z nominowanjom dóstanu. Hdyž sobu hraju, potom chcu serbski lud na europeadźe wotpowědnje zastupować a dobre wukony pokazać. Přećiwniske mustwa posudźować tak prawje njemóžu. Rjenje by było w Južnym Tirolu zaso štwórćfinale docpěć a snano­ tež jónu přetrać (so směje).

Dźakuju so za rozmołwu!

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND