Dotal najrjeńša partija sezony z dypkomaj mytowana

póndźela, 11. januara 2016
artikl hódnoćić
(0 )
Worklečanska volleyballowa trójka Šćěpan Wjeńka, Ludwig Eckert a Marcel Rjelka (wotlěwa) čaka koncentrowanje na přichodne nadaće přećiwnika. Přećiwo mustwu ST Kupoj Nowa Łuka, načolnikej wobwodneje ligi, serbscy volleyballisća z 3:2 dobychu. Foto:  Jörg Stephan Worklečanska volleyballowa trójka Šćěpan Wjeńka, Ludwig Eckert a Marcel Rjelka (wotlěwa) čaka koncentrowanje na přichodne nadaće přećiwnika. Přećiwo mustwu ST Kupoj Nowa Łuka, načolnikej wobwodneje ligi, serbscy volleyballisća z 3:2 dobychu. Foto: Jörg Stephan

ST Kupoj/Nowa Łuka

– Viktoria Worklecy 2:3

(25:22, 25:23, 22:25, 23:25, 13:15)

Druha połserija bě so za muži-volleyballistow Viktorije Worklecy ze šlagrowej hru započała. Přećiwnik bě načolnik ST Kupoj/Nowa Łuka. Z dobyćom bychu nadźije na mišterstwo we wobwodnej lize­ zaso wutk dóstali. Nowe lěto běchu sej Worklečanscy hólcy po intensiwnym treningu a nadrobnych rozmołwach předewzali, zo chcedźa so z dypkami z wonkowneje partije nawróćić. Hnydom wot prěnjeho nadaća bě hra wurunana. Wšitcy w hali widźachu, zo stejitej na parkeće najlěpšej teamaj ligi. Wo kóždy bul so horco wojowaše. Na kóncu prěnjeje sadźby móžachu hosćo zastatk hišće skrótšić, přiwšěm ju z 22:25 přěhrachu. Njere­zignowachu pak, ale wojowachu dale. Wosebje přiwzaće bulow a pólne wotwobaranje nětko wo wjele lěpje fungowaštej. Při stawje 22:21 bě wukónc dospołnje wotewrjeny. Zo měješe přećiwnik nós z dwěmaj dypkomaj prědku, bě škoda, ale žana drama.

Tež w třećej sadźbje akterojo mócnje za sportowu družinu při wysokim saku wabjachu. Kuriozum bě dypk čisło 14 za Worklecy. Marko Smoła bě nadaće do prózdneho přećiwniskeho pola smoknył, jako dźěchu volleyballisća z Kupoje/Noweje Łuki k přetorhnjenju hry z pola, te pak njebě sudnik hišće dowolił. Přiwšěm chabłaše hra hač do 21:20 tam a sem. Tu pak dožiwichu Młodźi dźiwi z 25:22 zbožowniši wukónc.

Tež sadźba čisło štyri bě napjata. Serbscy hólcy so pohonjachu a z 25:23 dobychu. W tiebreaku njemóžeše jich přećiwnik zadźeržeć. Cyłu sadźbu nawjedowaše a doby ju z 15:13. Wonkowny triumf 3:2 bě myto za fantastiski mustwowy wukon. Wšitkich dyrbimy na tutym městnje pochwalić. Tež eksperiment, z liberom hrać, štož njebě cyle bjez rizika, prima fungowaše.

OSC Lubij njemóžeše Worklečanam w boju wo načolnu poziciju w tabulce pomhać. Kupoji/Nowej Łuce podleža tón 1:3. Na čole tabulki wostanje tuž wšitko při starym.

Za Viktoriju Worklecy hrajachu: Marko­ Brězan, Milan Budar, Jan Bětnar, Ludwig Eckert, Stefan Gedik, Jurij Lipič, Marcel Rjelka, Marko Smoła a Šćěpan Wjeńka;

poradźowar mustwa: Mato Eckert

Tabulka

1. ST Kupoj/Nowa Łuka 10 28:11 25

2. Viktoria Worklecy 92 9 23:10 21

3. TSV Kundraćicy 9 17:16 14

4. VfB Zhorjelc 10 21:22 14

5. Módro-běli Wojerecy II 9 17:17 12

6. TuS Niska  7 14:14 11

7. OSC Lubij 9 15:19 10

8. TSG Hamor Běła Woda 8 9:21 6

9. Traktor Mittelherwigsdorf 7 5:19 4

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND