Volleyballistki SGB znowa w sakskim finalu

póndźela, 18. januara 2016
artikl hódnoćić
(0 )
W regionalnym volleyballowym finalu wubědźichu sej holcy 8. a 9. lětnika Serbskeho gymnazija Budyšin złotu medalju. Wone pojědu 17. měrca na sakske finale do Dippoldiswaldy. Stejo wotlěwa sportowy wučer Měrko Korjeńk, Nele Pjetašec, Wibke Zickmüller, Helena Hejduškec, Tadeja Šeferec, Luise Garbe, Lea Krječmarjec a najlěpša hrajerka turněra Luiza Šubertec. Foto: Měrko Korjeńk W regionalnym volleyballowym finalu wubědźichu sej holcy 8. a 9. lětnika Serbskeho gymnazija Budyšin złotu medalju. Wone pojědu 17. měrca na sakske finale do Dippoldiswaldy. Stejo wotlěwa sportowy wučer Měrko Korjeńk, Nele Pjetašec, Wibke Zickmüller, Helena Hejduškec, Tadeja Šeferec, Luise Garbe, Lea Krječmarjec a najlěpša hrajerka turněra Luiza Šubertec. Foto: Měrko Korjeńk

W swójskej hali dobychu volleyballistki Serbskeho gymnazija Budyšin (SGB) regionalne finale starobneje skupiny III pod hesłom „Młodźina trenuje za olympiju“. Hižo třeći raz docpěchu holcy, kotrež widźimy na wobrazu, kónčne sakske wurisanje. Wone budźe 17. měrca w Dippoldiswaldźe.

Minjenu srjedu krótko do 9 hodź. wote­wrě šulski nawoda SGB René Wjacławk regionalne volleyballowe finale holcow a hólcow štyrjoch najlěpšich šulow wuchodneje Sakskeje w sportowni Serbskeho šulskeho a zetkawanskeho centruma Budyšin. Šěsć hodźin pozdźišo radowaše so wón nad wospjetnym rjanym wuspěchom holcow SGB. Tež sobušulerjo mjeńšich lětnikow so jako sylny fanowy blok z nimi wjeselachu a dźiwachu so, kak wuběrnje zamóža gymnaziastki-volleyballistki při wysokim saku z bulom wobchadźeć.

Serbski gymnazij Budyšin

– Wyša šula Kulow 2:0

Zazběh do turněra je so serbskim gymnaziastkam optimalnje poradźił. Z trěbnej motiwaciju přesadźichu so we woběmaj přechodomaj jasnje z 25:11 a 25:13 přećiwo ćělnje wulkim, ale technisce słabšim holcam z Kulowa. W tutej starobnej sklasy hraja stajnje štyrjo přećiwo štyrjom, a to na mjeńšim volleyballnišću.

Serbski gymnazij Budyšin

– Wyša šula Kodersdorf 2:0

Technisce słabše hrajerki z Kodersdorfa spytachu z bojownosću dypkować, njemějachu pak přećiwo wěstemu natwarej a sylnym nadběham gymnaziastkow žanu šansu na dobyće. Tu podle­ža přećiwnik we woběmaj sadźbomaj z 10:25 a 21:25.

Serbski gymnazij Budyšin

– Christiana Weisowy gym. Žitawa 2:0

Wulosowanje chcyše, zo wojowaštej w poslednjej hrě najsylnišej mustwje wo cyłkowne dobyće. W kwalitatiwnje jara dobrej partiji dominowachu holcy SGB w prěnim přechodźe z přeswědčiwym 25:10. Žitawčanki pak so njepodachu, tak zo bě druha sadźba njesměrnje napjata. Prěni raz w běhu turněra běchu serbske holcy z 15:17 a pozdźišo z 22:23 w zastatku. Dramatika so stopnjowaše, ale hrajerki wokoło wusahowaceje Luizy Šubertec z Kamjenca wobchowachu měr a přechod hišće z 25:23 za sebje rozsudźichu. Kajki to happyend! Po mytowanju ze złotej medalju wuznamjenichu hišće Luizu Šubertec, kaž hižo tydźenja Mateja Cyža z Chrósćic, jako najlěpšu hrajerku wuchodosakskeho volleyballoweho finala w Budyšinje. Tež jej wutrobnu gratulaciju. Po lětomaj 2013 a 2015 pojědu holcy Serbskeho gymnazija kaž hólcy SGB starobneje klasy II třeći raz na sakske finale. Před třomi lětami wróćichu so z bronzowej medalju; snano zešlachći so jim w měrcu podobny wuspěch.

Kónčna tabulka:

Serbski gymnazij Budyšin 6:0 6

Gymnazij Žitawa 4:2 4 

Wyša šula Kulow 2:5 2 

Wyša šula Kodersdorf 1:6 0

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND