Pančicy-Kukow (BW/SN). Po štyrjoch lětach bjez nawody ma Domowinska skupina Pančicy-Kukow z Pětrom Korjeńkom zaso předsydu. Jeho, dalšeju dotalneju čłonow předsydstwa Marju Ošikowu a Pětra Šołtu kaž tež nowych čłonow Marianu Koklic, Wóršu Rabec a Mariana Wjeńku wuzwoli něhdźe 30 skupinarjow wčera na swojej hłownej zhromadźiznje do předsydstwa.

W rozprawje rysowaše Pětr Korjeńk aktiwity skupiny z 90 čłonami w zašłym lěće. Mjez druhim so poradźi, hladanje pomnika Jakuba-Barta Ćišinskeho w Lipju pisomnje w formje zrěčenja zrjadować. Tak je zaručene, zo staraja so nimo čłonow Domowinskeje skupiny tež Šula Ćišinskeho, dźěłarnje za zbrašenych swj. Michała a klóšter Marijina hwězda wo teren w Lipju. Tam planuja lětsa do jutrow a w juniju rjedźenskej akciji. Kaž Alfons Kuring informowaše, su tež nastupajo přichod wopomnišća Ćišinskeho w šuli na dobrym puću. Štóž chce sej muzej wobhladać, dóstanje za to kluč pola nawodnicy šule abo w gmejnskim zarjedźe.