W Budyskej župje so na wšelake wašnje Janej Arnoštej Smolerjej wěnuja

Budyšin (SN/at). 200. narodniny Jana Arnošta Smolerja su Budyskej župje, kotraž jeho mjeno nosy, wosebity zawjazk. W jeje zamołwitosći wotměje so při pomni­ku Smolerja na Lubijskej w Budyšinje 3. měr­ca wopominanje. Župne předsydstwo je wčera na swojim posedźenju w Budyskim Serbskim domje wotběh swjatočnosće a cyły rjad aktiwitow we wobłuku Smolerjoweho lěta rozjimało.

Na přikład je čłon župneho předsydstwa a zahorjeny filatelist Klaws Petrenc wo tym informował, zo přihotuje Budyske towarstwo filatelistow składnostnje Smolerjoweho jubileja wosebitu přehladku listowych znamkow w Serbskej kulturnej informaciji. „Wustajeńcu kónc februara natwarimy. Přistupna budźe wona hač do meje“, wón rjekny. Budyscy filatelisća­ pak so hišće z dalšim projektom 200. narodninam serbskeho prócowarja wěnuja. „Post modern wuda k tomule jubilejej wosebitu listowu znamku Smolerja“, praješe wčera Klaws Petrenc.