Poměr RCW a SŠT njezrozumjenje w zwjazkowym předsydstwje zbudźił
Choćebuz (SN/JaW). Kubłanskopolitiske naležnosće Serbow w Hornjej a Delnjej Łužicy postajachu sobotne wuradźowanje Zwjazkoweho předsydstwa Domowiny w Choćebuzu.
Nawodnica Rěčneho centruma WITAJ dr. Beata Brězanowa předstaji dźěławosć zarjadnišća minjeneho lěta, kotrež wona pozitiwnje hódnoća. Tež wo lětušich ćežišćach so wupraji. RCW hotuje so na prěnju fachowu konferencu ke konceptej 2plus. Wotpohladaja ju 22. oktobra w Chrósćicach přewjesć. Zdobom planuja pilotowy projekt w Delnjej Łužicy. Tak chcedźa docpěć, zo na jednej šuli wšitke dźěći serbšćinu wuknu. Tuchwilu běža jednanja z móžnymi kubłanišćemi.