Chór Lipa a přećeljo z lóštnym wječorom do čorneho trjechili

Haslow (CRM/SN). Zastupne lisćiki za pisany program chóra Lipa z Pančic-Kukowa a jeho přećelow běchu hižo dočasa rozpředate. Po lońšim přemóžacym wuspěchu běše tuž dobra nalada póstnisku sobotu znowa w nabitej połnej žurli Haslowskeho Bizoldec hosćenca předprograměrowana. Z owacijemi hižo při zaćahu serbskeho lajskeho cyłka pod nawodom Jadwigi Kaulfürstoweje wočakowachu potajkim tež lětsa zaso lóštny wječor serbskeho spěwa na wysokim wuměłskim niwowje. To so spjelni, přetož poskići so zaso program, kiž běše derje přihotowany a z lóštno-pryzlojtymi mysličkami překisany, wotpowědujo tak słodej nic cyle njekritiskeho publikuma.