Kónc tydźenja wotměja so 25. serbske jutrowne wiki w Budyšinje
Serbske jutrowne wiki, to je dźensa runje tajka kruta instanca w Budyskej kulturnej protyce, kaž słušeja pisane serbske jejka dźensa k woblubowanym typiskim turistiskim darikam z regiona. Hdyž přeproša tónle kónc tydźenja Spěchowanski kruh za serbsku ludowu kulturu zaso na nje do Budyskeho Serbskeho domu, zhladuja na 25. jubilej.
Na 1. serbske jutrowne wiki 1992 móže so Eberhard Zobel hišće derje dopomnić: „Prěni dźeń bě tajki nawal ludźi a wosebje dźěći, kotrež chcychu jejka debić. A to sym z nimi na žurli Budyskeho Serbskeho domu tež činił. Wšitko bě improwizowane. W nocy do toho běch hišće jednory nastroj z do běrny tyknjenymaj łžicomaj zhotowił.“ Pozdźišo njeje wón nastroj jenož na bosěrowanski karusel z wosom barbami technisce dale wuwił, ale je jako předsyda Spěchowanskeho kruha za serbsku ludowu kulturu tež wuwiće tychle jutrownych wikow aktiwnje sobu přewodźał.