Tak prawje so wuslědki k połstatym narodninam koparskeho kluba Energije Choćebuz njehodźa. Přećiwo Fortunje Köln hrajachu Łužičenjo doma 0:0, z Osnabrücka wróćichu so ze samsnym wuslědkom a njedźelu podležachu doma samo 1:2 přećiwo Stuttgartskim kickeram. Jenož jubilejne swjedźenske zarjadowanje, kotrež wotmě so w Statnym dźiwa­dle Choćebuz, je tróšku měra a spokojnosće do zjednoćenstwa přinjesło. Jako wuběrneho bywšeho hrajerja w rjadach FC Energije wuznamjenichu tam Detlefa Irrganga, kotrehož wrota wjedźechu w meji 1997 k postupej do druheje ligi Němskeje. Tež Eduard Geyer bu za swój žiwjenski skutk wuznamjenjeny. Dźesać a poł lěta bě wón z Energiju po puću. Wusahowacy bě wězo postup do prěnjeje zwjazkoweje ligi w lěće 2000. Po tym hraješe Energija tři lěta w koncerće najlěpšich koparskich mustwow Němskeje. W oktobrje 2000 poradźi so jej legendarne dobyće 1:0 doma přećiwo FC Bayernej Mnichow, a tónle wuspěch přećiwo Bayeram w měrcu 2008 so hišće raz zešlachći. W dalšej dobje přisłušnosće k zwjazkowej koparskej lize wot lěta 2006 do 2009 přewinychu Choćebuženjo Bayerow z 2:0.