Měšćanosta dr. Robert Böhmer zasłužby wótčinca za Budyšin wustajił
Budyšin (SN/at). Domowina a město Budyšin stej wčera 200. narodniny Jana Arnošta Smolerja wopominałoj. Na počesćenju při pomniku wuznamneho zastupjerja serbskeho narodneho wozrodźenja wobdźěli so wjace hač 60 ludźi. Mjez nimi běchu zapósłanc Sakskeho krajneho sejma Hajko Kozel (Lěwica), měšćanscy radźićeljo frakcijow CDU, Lěwicy a SPD, społnomócnjena za serbske naležnosće Budyskeho wokrjesa Regina Krawcowa, zastupjerjo serbskich institucijow, Domowinjenjo z Budyskeje a Kamjenskeje župy kaž tež němscy měšćenjo. Chór 1. serbskeje kulturneje brigady pod nawodom Friedemanna Böhmy zarjadowanje hódnje wobrubi.