Wopominanje při Smolerjec rownišću a Maćična swjedźenska akademija

Budyšin (SN/at). Ze zarjadowanjomaj Maćicy Serbskeje su we wopominanju Jana­ Arnošta Smolerja składnostnje jeho 200. narodnin sobotu w Budyšinje pokročowali. Při rownišću Smolerjec swójby na Hrodźišku rjekny předsyda serbskeho wědomostneho towarstwa, superintendent Jan Malink, po zhromadnym spěwanju pěsnje „Ja Słowjan sym“, zakantorjeneje wot Přezpólnych: „To bě jeho duch. Wón by so wjeselił.“ Předsyda Maśicy Serbskeje dr. Pětš Šurman dźakowaše so do toho wšitkim, kotřiž běchu na wobnowjenju rownišća wobdźěleni byli. Z wěnčami a kwěćelemi počesćichu Smolerja Maćica Serbska, Ludowe nakładnistwo Domowina, towarstwo Přećeljo Smolerjec kniharnje, Domowina, Towarstwo Cyrila a Metoda, Zwjazk serbskich rjemjeslnikow a předewzaćelow kaž tež Serbski muzej a jeho spěchowanske towarstwo. Ze serbskej hymnu so wopominanski akt při rowje zakónči.