Pjeć serbskich starterow na podestnych městnach

Hač do lěta 2013 wjedźechu jednotliwe čary wšitke po pućikach krasneho Hušćanskeho hrodoweho parka, a tam běštej zdobom tež start a cil. Dokelž pak sej to wobsedźer hrodu a parka wjace njepřeje, stej započatk a kónc wšitkich běhow nětko na hłownej wjesnej dróze při wulkej Hušćanskej sportowni.

Cyłkownje je lětsa 281 běharkow a běharjow na 1,0 km, 2,0 km, 7,3 km a 14,6 km swoju spěšnosć a wutrajnosć měri­ło. Wjetšina aktiwnych běše ze Sakskeje, někotři z Braniborskeje. Wubědźowanja hódnoćachu so za rjadnu lisćinu Wopačanski cup běharjow.

Na 7,3 km rěkaštaj cyłkownaj dobyćerjej Malte Kreibich z Riesy a Annett Schröter-Heideläufer. Ze serbskimi starterami wuwojowachu sej na tejle distancy w swojej starobnej skupinje złote po­destne městno Manuela Jurkowa z Łu­poje (sk 30-34) a Jurij Nuk z Budyšina bronzowe městno (sk 80-84). Wón běše druhi najstarši běhar; nimo toho běše to hižo jeho 27. start w stawiznach Hušćanskeho běha­.