Tež serbske baje čitali

štwórtk, 13. decembera 2018 spisane wot:
Byrnjež Grodkowska Domowinska skupina ze swojimi 20 čłonami skerje mała była, sej jeje předsydka Petra Koark (srjedźa z knihu w rukomaj) stajnje něšto noweho wumysla a tak zhromadnosć čłonow přisporja. Tak wotměchu njedawno zaso swoju adwentničku. Nimo swjedźensce wuhotowaneje kofejoweje tafle překwapi Petra Koark, kotraž Grodkowsku Domowinsku skupinu hižo 28 lět nawjeduje a hromadźe dźerži, wšitkich z čitanjom adwentnych stawiznow kaž tež serbskich bajow. Hižo nětko mysla skupinarjo na přichodne­ swoje předewzaća. Tak wobdźěla so zajutřišim na zhromadnym spěwanju Choćebuskeho Delnjoserbskeho gymnazija ze Serbskim ludowym ansamblom w Choćebuzu, dźeń pozdźišo wopytaja adwentny koncert w Slepjanskim Serbskim kulturnym centrumje. Nowe lěto zahaja z wopytom Choćebuskeho zapusta. Foto: Martin Arlt

Sama kursy serbšćiny wopytowała

srjeda, 12. decembera 2018 spisane wot:

Hižo do załoženja Witaj-skupiny w Hochožanskej pěstowarni „Tyca“ je so wona wo dalekubłanje w serbšćinje starała a kursy na Choćebuskej Šuli za delnjoserbsku rěč a kulturu wopytowała. Tak je swój słowoskład delnjoserbšćiny ro­z­šě­riła a nawuknyła w serbskej rěči pi­sać a běžnje čitać. Tak přiswojene za­móž­nosće nałožuje rodźena Hochožanka Resi­ Lotrina dźensa we wšědnym dźěle z Wi­taj-dźě­ćimi w tamnišej pěstowarni. Za swoje skutkowanje na polu kubłanja a zasadźenje w Domowinskej skupinje bu wona lětsa z Čestnym znamješkom Domowiny wu­znamjenjena.

Horce lěćo na swjatku towarstwow

wutora, 11. decembera 2018 spisane wot:

Ćisk (JT/SN). Rejwanska skupina z Ćiska je tamniši lětuši swjatk towarstwow wuhotowała, a to pod hesłom „Horce lěćo w Ćisku“. W běhu wječora pokazachu přitomnym to, štož najlěpje zamóža: rejwać.

Koncept bě Waltraud Hartmann, kotraž wot lětušeho awgusta skupinje předsyduje, zestajała. „Chcychmy pokazać, zo so naše rejwarki a naši rejwarjo tež po swjedźenju k 20lětnemu wobstaću stajnje hišće fit a seksi čuja“, wona měnješe. W swojej lochkej drasće rejwarki a rejwarjo tež na lětuše horce lěćo dopominachu a pokazachu mjez druhim potpurij šwarnych Staroberlinskich rejow, kotrež běchu sej něhdy serbske holcy ze swojeje słužby w němskej stolicy sobu přinjesli.

Po programje přewodźeštaj Gabriela Linakowa w serbskej dźěłanskej drasće a Hans Groba, woblečeny tradicionalny kupanski woblek z 1920tych lět, sydacy w drjewjanym sudźe a jěducy w drjewjanym čołmje po žurli, z čimž bě jemu wutrobny posměwk a přiklesk wěsty. W dalšich moderacijach wonaj tež tón abo tamny podawk z wokoliny z posměwkom kritizowaštaj a njeběštaj sej ani přeškoda před swójskimi durjemi mjesć.

Česća sej angažement w Krabatowym młynje

póndźela, 10. decembera 2018 spisane wot:

Załožba łužiskeje jězoriny podpěruje dožiwjenski statok Krabatowy młyn z 50 000 eurami. „Tak chcemy wob­sahowe dźěło na městnje skrućić“, podšmór­ny čłon załožboweje rady Uwe Blazej­czyk sobotu na přepodać­u symboliskeho šeka Tobiasej Čižikej, jednaćelej wobhospodarjerki Krabatowy młyn Čorny Chołmc ptzwr.

Wo nowych pomnikach na wsach

pjatk, 07. decembera 2018 spisane wot:

Budyšin (ML/SN). Koslowčenjo chcedźa pomnik postajić, kotryž ma na zničenje wsy w horcych bojach kónc apryla 1945 dopominać. Wón měł formu žorawja měć, wšako je to symbol Koslowa. Na pomniku maja so jewić mjena třinaće we wójnje morjenych wjesnjanow a dweju nućeneju dźěłaćerjow. Pomnikowy wuběrk Maćicy Serbskeje zaběraše so na swo­jim njedawnym wuradźowanju z mjenowanym a dalšimi předewzaćemi. Jeho čłonojo wočakuja, zo ma pomnik na kóždy pad tež na akciju „Natwarjamy Koslow“ Serbskeje młodźiny 1946 skedźbnjeć. Předsydka wuběrka Trudla Malinkowa měnješe, zo by 75. róčnica zničenja wsy w lěće 2020 hódny datum za jeho poswjećenje była.

Trudla Kuringowa chce klětu z in­wentarizaciju serbskich katolskich nabožnych pomnikow w Chróšćanskej wosa­dźe pokročować. Planowane ma to w Nuknicy, Chrósćicach, Swinjarni, Prawoćicach, Časecach, Lejnje, Zejicach, Jaworje a Kopšinje.

Z přednoškom wo Korli Bohuwěru Šěcy

pjatk, 07. decembera 2018 spisane wot:

Budyšin (SN/at). Kónclětne zarjadowanje Domowinskeje župy „Jan Arnošt Smoler“ je tradicionelnje zwjazane ze zhlado­wanjom na wjerški nachilaceho so lěta. Župa pak přihotuje swoju hłownu zhromadźiznu 21. januara 2019. Tak nochcychu so na bjesadźe wčera w Budyskim Serbskim domje z naležnosćemi zaběrać, kotrež hižo měsac pozdźišo w rozprawje wo skutkowanju župneho předsydstwa tak a tak wuhódnoća, kaž rjekny to županka Jana Pětrowa přitomnym čłonam Domowinskich skupin.

Zajimcy witani

štwórtk, 06. decembera 2018 spisane wot:

Drježdźany (SN/JaW). Přihoty na wu­radźowanje Zwjazkoweho předsydstwa Domowiny 14. decembra w Chrósćicach běchu jedne z ćežišćow wčerawšeho posedźenja prezidija zwjazkoweho předsydstwa w Drježdźanach. Wažny je dypk, dokelž­ maja čłonojo zwjazkoweho předsydstwa wuzwolić z hornjoserbskimi rjadnymi čłonami a jich zastupjerjemi cyłkownje wosom wosobow do noweje rady Załožby za serbski lud na lěta 2019 do 2023. Wo tym informuje předsyda Domowiny Dawid Statnik. „Dnjowy dypk je zjawny, hosćo a zajimcy su tuž wu­trobnje witani“, Statnik wšěm přistupne wu­zwolenje wuzběhny.

Dale rozjimachu wčera naležnosć, de­le­gować dweju zastupjerjow Domowiny do kuratorija za Myto Ćišinskeho na dobu 2019 do 2025. Rozsudźić ma wo tym zwjazkowe předsydstwo tohorunja na po­sedźenju w Chrósćicach.

Zetkanje w sakskej stolicy wužichu čłonojo prezidija za wopyt Zeleneho wjelba, hdźež wšak poskićeja wodźenja z awdijoguidom tež w serbskej rěči (SN rozprawjachu). „Mam to za zajimawosć a zdobom za znamjo runohódnosće našeje maćeršćiny“, hódnoćeše předsyda Domowiny prócowanje muzeja.

Čłonojo Zwjazka za serbski kulturny turizm ducy po kraju tysac křižow w katolskej Hornjej Łužicy

Jónu wob lěto podadźa so sobustawojo Zwjazka za serbski kulturny turizm na ekskursiju do Hornjeje, srjedźneje abo Delnjeje Łužicy. Lětsa wjedźeše čłonow wšelakich serbskich towarstwow, kaž Rownjanskeho Njepilic dwora, nawodow wjesnych a domizniskich muzejow, kaž z Ptačec, zamołwitych Slepjanskeho Serbskeho kulturneho centruma, za­stupjerjow Domowiny a dalšich do katol­skeje Hornjeje Łužicy. Ekskursija wotmě so w kooperaciji z Towarstwom za wu­wiće hornjołužiskeje kónčiny hole a hatow. Wšako chce tež serbski turistiski cyłk přichodnje wjace ludźi na slědźensku turu do „kraja 1000 křižow“ wabić. Tema rěka „Serbja – wěra – nałožki“.

„Je dobra duša pčołarjow“

srjeda, 05. decembera 2018 spisane wot:

Lětace insekty jeho hižo jara dołho zajimuja. Přewšo wulki zajim w nim zbudźiło pak je najpilniše zwěrjatko, mjenujcy pčołka. Tak tež njezadźiwa, zo je Chróšćan Jan Wawrik hižo wot lěta 1974 swěrny­ sobustaw tamnišeho towarstwa Serbska pčólnica a aktiwny serbski pčołar. Za angažement na polu pčołarjenja wu­znamjeni jeho třěšny zwjazk Łužiskich Serbow lětsa z Čestnym znamješkom Domowiny.

„W lěće 1994 přewza Jan Wawrik nadawk pokładnika w Chróšćanskej Serbskej pčólnicy a nadawk mjeztym hižo 24 lět spušćomnje a swědomiće spjelnja“, zwurazni předsydka Mytowanskeho wuběrka Domowiny Leńka Thomasowa na počesćenju w Budyskim Serbskim do­mje­. Nimo zapisowanja wudawkow a dochodow nałožuje wón tójšto časa za zběranje čłonskeho přinoška, za čož chodźi dom wot domu a pěstuje tak zdobom wuski zwisk mjez pčołarjemi tež w času mjez zarjadowanjemi. „Jan Wawrik je dobra­ duša a předewšěm zwjazowacy element serbskich pčołarjow“, rěka tuž w lawdaciji.

Mnohostronski a horliwy prócowar był

pjatk, 30. nowembera 2018 spisane wot:

Žiwjenje móže rjane być, jara rjane. Ale móže tež hrozne być, a často je to jedne tomu tamnemu jara bliske. Dožiwić dyrbješe to Bjarnat Rjentš z Choćebuza. 5. oktobra bě Domowina jeho z Mytom Domowiny počesćiła. Hižo krótko po tym pak, 14. nowembra, je wón po krótkej ćežkej chorosći wumrěł. Z Hornjeje Łužicy pochadźacy angažowaše so wot młodych lět za delnjoserbsku rěč a kulturu, za wuspěšne wuwiće a skrućenje Domowiny w Delnjej Łužicy. Činješe to kaž mnozy dalši, kotřiž běchu w 50tych lětach minjeneho lětstotka z Budyskeje a Kamjenskeje kónčiny do Delnjej Łužicy přišli. Bjarnat Rjentš – za to błyšćacy přikład – narodźi so 3. julija 1937 do skałarskeje swójby w Miłoćicach. Do šule zastupił je hišće za čas Druheje swětoweje wójny. Jako młodźenc sta so z wučerjom. Wosomnaćelětny praji swojej domiznje 1955 božemje. Pósłachu jeho kaž tež dalšich młodych hornjoserbskich pedagogow do Delnjeje Łužicy, zo bychu tam serbsku wučbu sobu natwarili a spěchowali. Jeho prěnja stacija běchu Długi (Fleißdorf) pola­ Wětošowa. Njebě lochko, zdobyć sej dowěru wjesnjanow a dźěći.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND