Štó, hdyž nic my!

štwórtk, 19. oktobera 2017 spisane wot:

Wšitke prócowanja wo serbskosć su zakład za traće Serbow

Čestnohamtske skutkowanje trjeba wjace připóznaća. To žada sej župan župy „Jakub Lorenc-Zalěski“ w Zhorjelskim wo­krjesu Manfred Hermaš. Z jasnymi słowami na wuznamjenjenskim zarjadowanju Domowiny minjeny pjatk w Budyskim Serbskim domje, a tym, zo njeje čestnohamtske skutkowanje jenož z přikleskom, kwětkami a rjanymi zarjadowanjemi zwjazane, pohnu lawreat Myta Domowiny 2017 mnohich k rozmyslowanju.

Zakład za traće Serbow

Hladaš-li na to, kelko prócy a časa nałožuješ, kotryž móhł hinak wužiwać a hladajo na we wušomaj klinčacych mudračkow, kotřiž jeno swarja, što měło lěpje abo hinak być, njezadźiwa, zo so časćišo tež raz prašeš: „Čehodla sej tole wšitko hišće načinješ? A na kóncu so prašam, štó da hewak?“, tak župan. Dźe wo rěč, kulturu, naše nałožki a puć do přichoda. „Tuž praju cyle jasnje: Wšitke tele prócowanja so zadanja. Wone su zakład za traće Serbow“, podšmórny Hermaš w swojich dźaknych słowach.

Tójšto nazběrał a dokumentował

srjeda, 18. oktobera 2017 spisane wot:

Před něšto dnjemi roznjese so powěsć, zo je Erich Plack 9. oktobra zemrěł. Wón bě wot lěta 1959 čłon Rownjanskeje Domowinskeje skupiny.

Plack narodźi so 20. januara 1934 w Rownom. Čas žiwjenja wón na wšelakich runinach a w rozdźělnych zamołwitosćach za serbsku kulturu skutkowaše. Mjez druhim słuša wón k załožićelam Slepjanskeje swaŕby, Serbskeho kulturneho centruma w Slepom a Njepilic dwora w Rownom. Wjele lět bě sam z čłonom předsydstwa tychle cyłkow kaž tež župneho předsydstwa. Wosebite zasłužby bě sej ze swojim akribiskim přeslědźowanjom wjesnych stawiznow zdobył. Tež knihu wo wokrjesu Delnjošleska-Hornja Łužica bě sobu spisał a hišće naposledk dźěłaše jako wjesny chronist sobu na Rownjanskej chronice. Tuchwilu ju ćišća, tuž ju hotowu hižo widźeć njemóže.

W pomjatku nam wostanje, kak je Erich Plack jako Slepjanski družba-braška skutkował, wopytowarjow po Rownjanskej domizniskej stwě wodźił a so wo nju starał. Wobdźiwajomne bě, kak je hosćom zajimawosće posrědkował. Za swój angažement dósta lěta 2005 Myto Domowiny.

Baje a bajki rězbarili

wutora, 17. oktobera 2017 spisane wot:

Spěchowanski kruh za serbsku ludowu kulturu dźěłarničku přewjedł

Žuricy (aha/SN). Spěchowanski kruh za serbsku ludowu kulturu ma nimale 40 čłonow z Hornjeje a Delnjeje Łužicy. Do wobšěrneje palety předewzaćow su zapřijate sparty molowanje, grafika, wušiwanje narodneje drasty, keramika kaž tež debjenje jutrownych jejkow. Nimo toho wěnuja so hižo wjacore lěta rězbarjenju. Pjaty raz je spěchowanski kruh ze swojim agilnym předsydu Eberhardom Zobelom minjeny kónc tydźenja zajimcow na rězbarsku dźełarničku k wuměłcej Alojsej Šołće do Žuric přeprosył. Hesło rěkaše tónraz „Serbske baje a bajki“. Najmłódša mjez dźesać wobdźělnikami bě wnučka předsydy, hakle dźewjećlětna Angelina Zobelec. Wona pospyta so na tafličce, kotruž móžeš sej při zachodnych durjach přičinić.

Dźiwadło a chórowa hudźba

wutora, 17. oktobera 2017 spisane wot:
Zo hodźitej so dźiwadło a chórowa hudźba derje hromadźe, dopokazaštej njedźelu Lajska dźiwadłowa skupina Chrósćicy a Ralbičanski cyrkwinski chór Lilija pod nawodom Bernadet Šołćineje (srjedźa při pulće) w Haslowje. Dźiwadźelnicy přeswědčichu z třomi skečemi a Lilija z mnohimi serbskimi a słowjanskimi pěsnjemi. Wo připowědź postara so Weronika Bulankowa (nalěwo), kotraž tež publikum, kotryž bě najebać słónčne wjedro mnoholičbnje přichwatał, zapřijimaše. Foto: Feliks Haza

Wuznamneho molerja sej zbližili

srjeda, 04. oktobera 2017 spisane wot:

Łaz (AK/SN). Serbski ludowy moler Horst Šlosar (1903–1964) je fachowcam hišće přemało znaty a přemało wobkedźbowany. Za swoje mnohostronske skutkowanje zasłuža sej wón wjace připóznaća, tež mjez Serbami. Tole podšmórny Jurij Łušćanski minjeny pjatk w swojim přednošku we Łazowskim Domje Zejlerja a Smolerja na přeprošenje tamnišeho spěchowanskeho towarstwa. Łušćanski je so ze žiwjenjom a skutkowanjom Horsta Šlosarja dokładnje zaběrał. W listach, nowinskich wozjewjenjach, dokumentach a jeho zawo­stajenstwje je bywši hudźbny redaktor a pozdźiši referent Domowiny za Šlosarjom slědźił a tak jeho zajimawe žiwjenje wotkrył.

W Krabatowym młynje domchowanku swjećili

póndźela, 02. oktobera 2017 spisane wot:

Čorny Chołmc (SiR/SN). Kónc tydźenja je so Čornochołmčanski Krabatowy młyn jako městnosć zańdźenosće, přitomnosće a přichoda prezentował. Krabatowe towarstwo a Wojerowska župa „Handrij Zejler“ přeprošowaštej na domchowanku. Publikumej lubješe so wotměnjawy program, do kotrehož běchu 1. rjemjeslniske a chłóšćenske wiki zapřijate.

Z wulkej lubosću k detailej su nawoda Krabatoweho towarstwa Tobias Čižik, jeho mustwo a mnozy dalši čestnohamtscy pomocnicy k tomu přinošowali, zo je so tradicionalne zarjadowanje poradźiło. Dwaj dnjej bě młyn wosebje zetkanišćo tradicijow a serbskich nałožkow. Grobic swójba z Čorneho Chołmca bě organizatoram domchowanki samo swoje priwatne kukuricnišćo za „wurubjenje“ přewostajiła. „Žně“ w formje stykanych a splećenych majsowych potačow, lóštnych słomjanych snopowcow a ze sadom a zeleninu regiona bohaće kryte blido wopokazachu so jako wulkotna symbioza. Derje­ wopytane běchu tež prěnje rjemjeslniske a chłóšćenske wiki, na kotrychž je dwaceći regionalnych wikowarjow swoje wudźěłki poskićało.

Přihoty za schadźowanku zahajene

srjeda, 27. septembera 2017 spisane wot:

Namysłów (dd/SN). Serbscy studenća a šulerjo nawróćichu so njedźelu z Pólskeje. Na wuprawu přeprosył bě Zwjazk serbskich studowacych – župa „Jan Skala“. Cil wulěta 29 młodostnych bě městačko Namysłów, w kotrymž bě Jan Skala něhdy skutkował a ke kotremuž Serbja dobre zwiski wudźeržuja. Nimo wopyta susodneho kraja přihotowachu młodostni lětušu schadźowanku. Prěni króć běchu studenća šulerjow Budyskeho Serbskeho gymnazija přeprosyli, zo bychu so lěpje mjez sobu zeznali. Po přijězdźe powita pólski partner Mateusz Magda serbsku skupinu a zhromadnje dachu wječor wuklinčeć. Nazajtra wotměchu studenća a šulerjo chórowu probu a pisachu kabaretne přinoški. W derje zdźeržanym tykowanym domje Izba regionalna, hdźež je muzej zaměstnjeny, bu samsny dźeń wustajeńca wotewrjena. Hudźbny kwartet serbskich studentow wobrubi ju ze serbskimi a słowjanskimi ludowymi spěwami, za kotrež žněješe wutrobny aplaws. Pozdźišo informowaše čłon towarstwa přećelow Serbow Pro Lusatia prof. Piotr Pałys młodostnych wo skutkowanju Jana Skale a wo mjezsobnych stykach.

Na zetkanju k přihotam wšosokołskeho zlěta w Praze

póndźela, 25. septembera 2017 spisane wot:

Děčín (mfu/SN). W přihotach na XVI. wšoskołski zlět 2018 w Praze pobyštaj čłonaj předsydstwa Serbskeho Sokoła, starosta Milan Funka a Józef Šwon njedawno na přepodaću stafety Serbskeho Sokoła w Děčínje. Přeprosyła bě Česka obec sokolska (ČOS). Na zetkanju, kotrež wotmě so w bliskosći pomnika załožerja sokołskeho hibanja Miroslava Tyrša, při hrodźe a na Děčínskim campje, wobdźělichu so zastupjerjo wšitkich sewjeročěskich župow Sokoła.

Dagmar Toncarová, městopředsydka ČOS, je hosći z Budyšina witała a dźakowaše so Milanej Funce, kiž postrowi hosći, přećelow a čłonow Čěskeho Sokoła. Wón wupřa jim wuspěch za zbywacy přihot klětušeho swětoweho sokołskeho zetkanja w čěskej stolicy.

Přepodata stafeta Serbskeho Sokoła, wot Józefa Šwona zhotowjena, wobsa­howaše wšelakore spisy wo sportowych wjerškach a aktiwitach Serbskeho So­koła w tu- a wukraju. Wosebity zajim zbudźi kniha „Europeada 2012“.

„Přećiwo namjetej ničo nimam“

srjeda, 20. septembera 2017 spisane wot:

W šěsć fachowych wuběrkach chce Zwjazkowe předsydstwo Domowiny wobsahowe dźěło po 18. hłownej zhromadźiznje třěšneho zwjazka serbskich župow a towarstwow zmištrować. Dospołnje wobsadźene pak wone hišće njejsu, w jednym padźe je samo městno nawody dotal njewobsadźene.

Hospodarski přichod Łužicy tež tema Serbow

póndźela, 18. septembera 2017 spisane wot:

Domowina budźe so dokładnišo ze strukturnym wuwićom we Łužicy zaběrać. K tomu zarjaduje klětu konferencu, kaž je jeje zwjazkowe předsydstwo nětko jednohłósnje wobzamknyło.

nawěšk

nowostki LND