„Sundowner“ma platforma być
Budyšin (SN/at). Nowa jednaćelka Domowiny Judit Šołćina je so na wčera hybridnje wotmětym wuradźowanju čłonam předsydstwa župy „Jan Arnošt Smoler“ předstajiła. Kaž přisłušna regionalna rěčnica třěšneho zwjazka Katja Liznarjec zdźěli, su wobdźěleni z njej wo serbskorěčnym dorosće diskutowali, na přikład nastupajo kubłarki za serbske pěstowarnje. Jewješe so tež prašenje: „Kajki mamy zwisk ze staršimi pěstowarskich dźěći?“
Znowa rozjimało je župne předsydstwo tematiku serbskich akcijow w měsće Budyšinje. Kak prezentuja so Serbja na Romantice abo we wobłuku tudyšeho staroměšćanskeho festiwala, so čłonojo prašachu. Měnja, zo měli baru „Sundowner“ na zahrodźe Serbskeho ludoweho ansambla bóle jako platformu za serbske poskitki a akcije wužiwać. Tu móhli Serbja a Němcy zhromadnje swjećić, a to ze serbšćinu jako runohódnej rěču. Beno Brězan, kiž baru wobhospodarja, je so na wuradźowanju wobdźělił a předsydstwu wo swojich idejach přednošował. Tak sej přeje, zo Serbja zhromadne akcije wuhotuja, a wón za to prawu městnosć skići.
Nadal nowych čłonow wabić
Žadanje na hłownej zhromadźiznje towarstwa Njepilic dwór
Rowno (AK/SN). Projektowe dny z pěstowarskimi dźěćimi a šulerjemi chce Rownjanske towarstwo Njepilic dwór tež dale přewjedować. To wuzběhny předsyda Manfred Nikel minjeny pjatk na hłownej zhromadźiznje. Při tym maja sej mali wopytowarjo temy kaž ratarstwo, nałožki a serbske tradicije w běhu lěta zbližić. „Runočasnje dožiwja woni dźěło na krosnach a předźěłanje lenu“, Nikel rozłoži. Loni su tajki projekt z Rownjanskej pěstowarnju „Milenka“ přewjedli a mjez druhim běrny zběrali.
Towarstwu Njepilic dwór přisłuša tuchwilu 39 čłonow ze Slepjanskeho regiona, ale tež z Wojerec, Niskeje a Drježdźan. Jako nowačka witachu Reinharda Hausdinga z Grodka. Korony dla dyrbjachu loni wulki dźěl planowanych terminow wotprajić kaž swinjorězanje, pjerjodrěće, kermušu a adwentničku. Wupadow dla mějachu něhdźe 6 000 eurow mjenje dochodow, a předsydstwo dyrbješe rozmyslować, kak móhli lutować.
Tydźenski serbski medijowy klub
Ze zabawnym póstniskim filmom přeswědčili
Lipsk (JBo/SN). „Powěsće wo powědkach – bědźenja bajkowych bytosćow“ rěkaše titul lětušich digitalnych póstnic studentskeho towarstwa Sorabija Lipsk. Za to běchu serbscy studenća něhdźe hodźinski film na wšelakich městnach we Łužicy kaž tež w Lipsku natočili. Oficialnje předstajichu jón předwčerawšim, sobotu, na widejowej platformje YouTube. Wobhladali su sej digitalny program tež mnozy přećeljo Sorabičanow z Lipska. Dohromady zličichu něhdźe 1 000 přihladowarjow.
Šulski zarjad widźi „historisku šansu“ šulow
Kubłanska politika je prěnje lětuše posedźenje předsydstwa župy Delnja Łužica postajała. Wobdźěleni běchu z Choćebuskeho statneho šulskeho zarjada nawoda Uwe Mader a za zakładne a spěchowanske šule wokrjesa Sprjewja-Nysa kaž tež za město Choćebuz přisłušnaj šulskaj radźićelej Frank Nedoma a dr. Heike Drobner.
Choćebuz (SN/at). Župan dr. Pětš Šurman mjenowaše hybridnje wotmětu połdra hodźinsku wuměnu nazhonjenjow „wotewrjenu a konstruktiwnu. Smy započeli zhromadnje za rozrisanjom pytać“. Sobu za blidom sedźachu dale zastupjerjo Rěčneho centruma WITAJ (RCW), braniborskeje Rady za naležnosće Serbow, Serbskeho šulskeho towarstwa a přisłušna referentka Domowiny.
Ze serbskej rěču a kulturu so zaběrał
Dnja 1. februara zemrě bywši hrabja z Worcyna, knjez Alfred zu Solms-Sonnenwalde na sćěhi njezboža.
Wón bě čłon našeje Domowinskeje skupiny. Zhubimy z nim Serbow česćaceho, zdźěłaneho a přećelneho čłona. Jako swěrny křesćan da sebi samo hišće tachantskeho serbskeho fararja Wita Sćapana k sebi zwołać. Wón bě dobry znajer słowjanskich rěčow, na přikład pólskeje a ruskeje.
Krótko po přichadźe do Worcyna prošeše mje, jemu serbšćinu zbližić. Chcyše serbskej ludnosći blisko być a so z njej serbsce rozmołwjeć. Dlěje hač 20 lět zaběrachmoj so tydźensce ze serbšćinu. Swěrnje chodźeše tež na zeńdźenja našeje skupiny, hdźež z nami wosebje rady serbske spěwy spěwaše. Móžeše wšak derje teksty čitać. Rady zaběraše so Alfred zu Solms-Sonnenwalde tež ze serbskej kulturu. Nazymske, cyrkwinske koncerty kaž tež dalše zarjadowanja rady wopytowaše. Při tym zajimowachu jeho wosebje kulturne zarjadowanja w Delnjej Łužicy. Wšako wottam pochadźeše. Wuske styki měješe hišće do Groźišća (Sonnewalde). Tam steješe jeho staršiski hród, kotryž pak bu 1947 zničeny.
Projektowe dny pola „Kocora“
Budyšin (SN/at). Na prěni raz online přewjedźenym posedźenju su čłonojo předsydstwa župy „Jan Arnošt Smoler“ Budyšin wčera lětuše projekty skonkretizowali a schwalili. Tak chcedźa w meji na nalětni koncert w Malešanskej cyrkwi a w juniju znowa na dźeń wotewrjenych duri w Domje Měrćina Nowaka w Njechornju přeprosyć. A to pod aspektom, zo budźe nazymu dosć terminow nastupajo „lěto Zejlerja a Kocora“, kaž přisłušna regionalna rěčnica Domowiny Katja Liznarjec wuzběhny. Župne předsydstwo kritizowaše zarjadowanje 1. februara před Zejlerjowym pomnikom we Łazu jako njehódne, měło-li to zahajenje wulce připowědźeneho jubilejneho lěta Zejlerja a Kocora być. Gremij parowaše tam zastupjerjow kultury, kulturne ćělesa, basnje a spěwy a tak počesćenje wobšěrneho kulturneho herbstwa Zejlerja a Kocora.
Projektowe dny za serbske zakładne šule a šule z wučbu B-serbšćiny přewjedu lětsa hromadźe z towarstwom Radiška w Stróžanskim Šulskim muzeju „Korla Awgust Kocor“. Tam chcedźa wuknjacym žiwjenje a tworjenje wuznamneho serbskeho komponista zbližić.
Nadźijeja so bóle zwjeselaceho lěta 2022
Łaz (AK/SN). Kulturne dźěło je tuchwilu we Łazowskim Domje Zejlerja a Smolerja lědma móžne. Wot srjedź decembra minjeneho lěta je w tamnišej zarjadowanskej rumnosći testowanski centrum za koronu zaměstnjeny. Tež gmejnska biblioteka w domje je hižo wot 24. nowembra zawrjena. „Naše towarstwo je kaž mnohe dalše w ćežkim połoženju. Łazowskej gmejnje słušacy Dom Zejlerja a Smolerja je zawrjeny“, rozłožuje předsyda spěchowanskeho towarstwa zetkanišća Dom Zejlerja a Smolerja Reinhardt Schneider.
Towarstwo Radiška zhladuje na 25lětne skutkowanje
Stróža (sk/SN). Domizniske towarstwo Radiška w Stróži, wjesnym dźělu Malešanskeje gmejny, wobsteji mjeztym 25 lět. Po prěnim pospyće 1993 w tehdyšej gmejnje Zubornička dóńdźe w januaru 1997 skónčnje k załoženju kulturneho towarstwa, kotrež je sej wot wšeho spočatka hajenje tež serbskeje kultury a serbskich tradicijow na chorhoj zapisało. Domizniske towarstwo steji w tradiciji serbskeho žiwjenja a lěta 1848 załoženeho serbskeho towarstwa. Jedyn z mnohich nadawkow noweho cyłka bě natwarić a wudźeržować šulski muzej, naslědnje nazymu k 100. róčnicy wobstaća noweje šule zjawnosći přepodaty muzej. Tón wěnowachu tam wot lěta 1842 do 1852 wuwučowacemu komponistej a wučerjej Korli Awgustej Kocorej.
W swojim statuće ma towarstwo zapisane, kulturne žiwjenje w němsko-serbskej wsy ze stoapołsta wobydlerjemi spěchować, domiznisku identitu skrućić kaž tež přirodźe tyjacy turizm wuwić.
Projektne dny k lětu Zejlerja a Kocora
Kamjenska župa „Michał Hórnik“ je sej za lěto 2022, kotrež wšak je zdobom lěto Zejlerja a Kocora, tójšto předewzała.
Chrósćicy (SN/JaW). Předsydstwo župy „Michał Hórnik“ Kamjenc je so na swojim wčerawšim wuradźowanju w Chrósćicach jednohłósnje za wurjadnu Hłownu zhromadźiznu Domowiny a doskónčne zrjadowanje wustawkow třěšneho zwjazka wuprajiło. To zdźěli nowinski rěčnik Domowiny Marcel Brauman.
