Digitalizacija a certifikowanje

štwórtk, 12. januara 2017 spisane wot:

Choćebuz (SN/JaW). Přihoty posedźenja zwjazkoweho předsydstwa 28. januara a 18. hłowneje zhromadźizny Domowiny w měrcu stejachu w srjedźišću wčera­wšeho wuradźowanja prezidija třěšneho zwjazka w Choćebuzu.

Kaž Domowina w nowinskim wozjewjenju zdźěla, rozjimachu tež rozprawje dźěławosće zarjada Domowiny a Rěčneho centruma WITAJ (RCW) w zašłymaj lětomaj. A wěnowachu so naćiskomaj dźěłowych ćežišćow za lěto 2017. „Temje digitalizacija a certifikowanje serbskeje rěče stej skutkowanje RCW postajałoj“, zdźěli předsyda Domowiny Dawid Statnik na naprašowanje našeho wječornika. Zdobom wón zdźěli, zo dźěło nastupajo certifikowanje serbšćiny derje postupuje. Přiwšěm dyrbjeli „spěchowanje rěčnych naprawow a certifikowanje jasnišo priorizować“.

Dorostowe myta wupisane

štwórtk, 12. januara 2017 spisane wot:

Budyšin (SN/CoR). Maćica Serbska je znowa a mjeztym hižo štwórty raz wupisała tři dorostowe myta za fachowe dźěło na polu serbskeje rěče a literatury, serbskich stawiznow, serbskeho kulturneho slědźenja abo wuměłstwa, kaž dr. Anja Pohončowa w mjenje předsydstwa Maćicy Serbskeje zdźěla. Tak wusměrja so Myto Michała Hórnika na šulerjow hornjołužiskich gymnazijow, Myto Bogumiła Šwjele na šulerjow delnjołužiskich gymnazijow a Myto Arnošta Muki na studentow a absolwentow wysokeje šule resp. uniwersity w prěnim lěće po zakónčenju studija.

Za Myto Michała Hórnika móža zajimcy dźěło hač do 30. junija wotedać, za Myto Bogumiła Šwjele hišće hač do 15. nowembra. Mytowy pjenjez wučinja we woběmaj padomaj 150 eurow; je-li dźěło w serbskej rěči napisane, zwyši so na 250 eurow. Za Myto Arnošta Muki je posledni termin zapodaća 30. awgust. Tule dóstanje awtor najlěpšeho dźěła 500 eurow. Myto zwyši so na 700 eurow, hdyž je wone serbsce napisane.

Zo njeby nichtó hłódny wostał

srjeda, 11. januara 2017 spisane wot:
W kuchni Rownjanskeho Njepilic statoka přihotowachu wčera swinjorězanje, kotrež budźe tam sobotu, 14. januara. Rěznik Christian Vieweg (prědku) njeje dźěło jenož rozdźělił, ale so wězo tež sam gratu přimał a mjez druhim kołbasu měšał. Pomhałoj staj jemu Ronny Zehring, Rudi Krawc (zady wotlěwa) a dalši. Sobotu w 10 hodź. započnu kołbasu, mjaso, połćik, kisykał, rjebleška a dalše słódne dobroty předawać. Kaž organizatorojo wobkrućeja, budźe wšeho dosć, tak zo nichtó z wopytowarjow hłódny wostać njetrjeba. Foto: Joachim Rjela

Biskopa informowałoj

srjeda, 11. januara 2017 spisane wot:

Drježdźany (SN). Předsyda Domowiny Dawid Statnik a předsyda Towarstwa Cyrila a Metoda (TCM) Jurij Špitank staj biskopa Heinricha Timmereversa wčera w jeho Drježdźanskim sydle wopytałoj. Wizita wotmě so w zwisku ze zapokazanjom Timmereversa jako Drježdźansko-Mišnjanskeho biskopa loni w awgusće w Drježdźanskej Dwórskej cyrkwi.

„Zaměr wopyta běše, biskopa wo dźěle třěšneho zwjazka serbskich towarstwow, wo skutkowanju TCM a wo połoženju Serbow informować“, zdźěli předsyda Domowiny po zetkanju. Hosćej z Łužicy staj dale wu­znam cyrkwje jako rěčny rum a wažnosć wosadow při zachowanju serbskeje rěče a identity wuzběhnyłoj. „Wjeselu so na dalše zhromadne dźěło“, běchu słowa Statnika po wopyće.

Biskop Timmerevers poby hakle minjeny pjatk w Budyšinje, hdźež swjećeše wón sobu swjatočnu ekumenisku Božu słužbu w cyrkwi swj. Pětra k zahajenju jubilejneho lěta reformacije w Sakskej. Loni kónc lěta bě so ze serbskimi duchownymi w Radworju rozmołwjał.

Stara rěč z rjanymi wobrazami

wutora, 10. januara 2017 spisane wot:

Lajska dźiwadłowa skupina Kulowskeho Bratrowstwa za swoju přichodnu premjeru pilnje zwučuje. Komedija z pjera Aleksandra Fredra njeje jenož hrajerske, ale tež rěčne wužadanje.

Sulšecy (AK/SN). Z premjeru komedije „Jědźk a lěnjoch“ zahaji serbska lajska dźiwadłowa skupina Bratrowstwa nowe lěto a zdobom 25. lěto swojeho wobstaća. „Je to bulwarna komedija. Typiska za nju je stara serbšćina 1920tych lět“, podšmórnje dźiwadźelnik Budyskeho Němsko-Serbskeho ludoweho dźiwadła Měrko Brankačk, kiž je mjeztym tři lěta wuměłski nawoda a režiser skupiny. Wot spočatka septembra minjeneho lěta lajscy wuměłcy pilnje zwučuja. Premjera budźe sobotu, 14. januara, w 19 hodź. w Sulšečanskim kulturnym domje.

Kandidaća pytani

póndźela, 09. januara 2017 spisane wot:

Budyšin (SN). Prezidij zwjazkoweho předsydstwa Domowiny namołwja w přihotach­ 18. wólbneje hłowneje zhromadźi­zny Domowiny wšitke župy a čłonske towarstwa, kandidatki a kandidatow za nowowólby­ organow Domowiny zaměrnje wabić. Hłowna zhromadźi­zna wotměje so sobotu, 25. měrca, we Wojerecach. Delegaća wola za wólbnu dobu 2017–2021 předsydu Domowiny, městopředsydow a čłonow zwjazkoweho předsydstwa, rewizijneho wuběrka kaž tež změrcowskeho wuběrka. Prezidij prosy wo to, namjety hač do 31. januara za­rjadej Domowiny w Budyšinje posrěd­kować.

„Nadźijamy so, zo znowa tež zajimcy z Delnjeje Łužicy na runinje předsydy a/abo městopředsydow kandiduja“, praji předsyda Domowiny Dawid Statnik. Kóždy kandidat trjeba podpěru znajmjeńša jedneje župy resp. jednoho sobustawskeho towarstwa Domowiny. Do dźěławosće słuša sobuskutkowanje na posedźenjach zwjazkoweho předsydstwa kaž tež w fachowych wuběrkach, štož wučinja na lěto hač do dwanaće wuradźowanjow. Tež naslědni kandidaća maja so nastajić.

Bóle zhromadnje

štwórtk, 05. januara 2017 spisane wot:
Budyšin (SN). Na wčerawšej nowolětnej rozmołwje w Budyskim Serbskim domje mjez zastupjerjemi Domowiny a Załožby za serbski lud mějachu spěchowanje rěče a rěčnych naprawow za jedyn z najwažnišich nadawkow přichoda. Předsydka rady Załožby za serbski lud Susann Šenkec, předsyda Domowiny Dawid Statnik, direktor załožby Jan Budar a jednaćel Domowiny Marko Kowar dorozumichu so na to, zo měli so gremije wobšěrnišo do procesa diskusije a rozsudow zapřijeć. Wuchadźišćo ma być, dokładnišo rozjimać cile a nadawki, do kotrychž chcedźa wšitkich akterow, komuny, towarstwa a ini­ciatiwy, zapřijeć a tak serbske zajimy zhromadnje zastupować.

Přaza kaž w starych časach

štwórtk, 05. januara 2017 spisane wot:

Grodkowska Domowinska skupina so tež pola předsydki doma zetkawa

Grodk (FAG/SN). Čłonojo Grodkowskeje Domowinskeje skupiny pod nawodom swojeje předsydki Petry Koarkoweje maja kaž přeco hižo spočatk noweho lěta swój dźěłowy plan nastajeny. Přetož wot časa přewróta stara so Petra Koarkowa wo wotměnjawy program skupiny. Tak přewostaja wona za zarjadowanja hdys a hdys swoje bydlenje, hdźež tež přazu přewjeduja. Mjeztym dwě lěće činja to čłonki Domowinskeje skupiny zhromadnje z Grodkowskimi žonami, kotrež so rady k tajkej zhromadnosći zetkawaja. „Staroby dla su naše skupiny lěto wot lěta mjeńše. Tohodla smy so rozsudźili přazu zhromadnje přewjesć“, předsydka wuswětla. W lěću sydaja wonka w carporće, w zymje wězo nutřka w tepjenej stwě. Tak so na najwšela­koriše wašnje ručnemu dźěło wěnuja, hłownje pak dźe wo to, z kołwrótom přasć a tule staru tradiciju zachować. „Za zwučowanje bjerjemy wołmjanu nitku. Komuž tele dźěło hižo lěpje wot rukow dźe, předźe z wowčej wołmu“, Petra Koarkowa powěda.

Plahowar z wosebitym receptom

wutora, 03. januara 2017 spisane wot:

Jako su kónc lěta 2016 w Chróšćanskej wjacezaměrowej hali wokrjesnu wustajeńcu rasowych nukli přewjedli, měješe aktiwny čłon Chróšćanskeho towarstwa S 901, Jurij Šiman z Dobrošic, wulki podźěl na tym. Hižo 40 lět wón nukle plahuje. Wusměrił je so při tym na družinu Němskich wulkich šakow (Deutsche Riesenschecke). Jeho najrjeńši eksemplar bě tohorunja w „Jednoće“ wustajeny. Jako fachowc plahowanja je pak lědma k tomu přišoł, swojeho wuchača pomajkać, dokelž měješe organizaciju wustajeńcy na starosći. Nimo toho bě jako fachowc požadany rozmołwny partner.

Spočatna ideja prawa była

wutora, 03. januara 2017 spisane wot:

Rowno (JoS/SN). Z tradicionalnymi a staj­nje wospjetowacymi so zarjado­wanjemi w běhu lěta spěchowanske ­to­warstwo Njepilic dwór wot swojeho ­załoženja 17. meje 1999 wopytowarjow do Rownoho přeproša. Stajnje to samsne, móhł sej čłowjek myslić. To pak tak nje­trjechi, měni předsyda towarstwa Manfred Nikel. „Pokazujemy wězo, zo běchu­ burske tradicije w běhu lěta kaž tež dźěło na polach a swjedźenje, kaž ­nazymu kermuša a w zymje swinjorě­zanje, stajnje samsne. Ličby wopytowarjow pak su nam dopokaz, zo bě naša poprawna spočatna ideja prawa.“ 41 čłonow towarstwa tuž ničo noweho wunamakać njetrjeba, je sej předsyda wěsty.

nawěšk

nowostki LND