Hdyž so w delnjołužiskim Gołbinje (Gulben) něšto hiba, je tež wona pódla. Ale nic, zo by jeno sobu swjećiła. Ně, zamołwitosć we wsy je jej wjac hač jenož na swjedźeń přińć. Takle a podobnje wopisuja Gołbinčanki a Gołbinčenjo Astrid Šraminu. Towaršnostne žiwjenje na wsy je pokazane na angažowane wosoby, kotrež zamóža tež dalšich zahorić. Tajka wosoba je Astrid Šramina w swojej ródnej wsy Gołbinje. „Wona njeda sej dwójce kazać, dźe-li wo to, něšto na nohi stajić. Při čimž je wšojedne, hač jedna so wo dwurěčne kemše, wo kursy delnjoserbšćiny, wo delnjoserbske čitanja, wo spěwne wječorki, wo přednoški abo wo informaciske zarjadowanja k serbskim stawiznam, swójbnym mjenam abo k wopřijećomaj ‚Sorben a Wenden‘ – Astrid Šramina njeje jenož wšudźe pódla, ně, wona je zdobom za mnohe z naličenych a njenaličenych aktiwitow motor we wsy“, zwurazni Heike Apeltowa w lawdaciji k počesćenju Delnjoserbowki z Čestnym znamješkom Domowiny spočatk oktobra w Budyskim Serbskim domje.
Elektroniska hudźba je z jeho mjenom wusko zwjazana. Wšako w Fredersdorfje pola Berlina bydlacy a skutkowacy Jan Bělk po swojim studiju hudźby a hudźbneje pedagogiki na Berlinskej Wysokej šuli za hudźbu „Hanns Eisler“ 1985 nadawk dóstał, nowy studijny směr Elektroniska hudźba natwarić.
Wona hori so za serbskosć a rady spěwa. Njeličomne lěta hižo je wona čłonka Domowinskeje skupiny w Židźinom a wot załoženja tamnišeho chóra tež z jeho horliwej spěwarku. Rěč je wo Weronice Boswankowej, kotraž zasadźuje so wo skrućenje a wuwiwanje serbstwa w swojej domiznje njedaloko Wojerec.
Weronika Boswankowa je jara aktiwna w 1986 załoženym spěwnym cyłku. „Tak stara so wona wo internetnu stronu chóra, kotryž so wosebje hajenju serbskich pěsnjow wěnuje“, rjekny w lawdaciji k spožčenju Čestneho znamješka Domowiny spočatk oktobra w Budyšinje Zala Cyžowa. „Spěwarjo a publikum sej městopředsydku chóra zdobom jako zabawnu a šarmantnu moderatorku koncertow česća, kotrež wona serbsce a němsce připowědźa.“
Mjeztym dwanaće lět syda rodźena Židźinjanka w zymskich měsacach tydźensce jónu na šulskej ławce. To wopytuje wona „serbsku bjesadu“ na Horach a so z dalšimi zajimcami w serbšćinje wukmanja. „Ze swojim starym Židźinskim dialektom a swojej wobšěrnej wědu wo nałožkach Serbow w kónčinje je wona kruty stołp serbstwa w našim regionje“, rěka we wobkrućenju počesćenja.
Zły Komorow (SN). Domowina a wokrjes Hornje Błóta-Łužica budźetej w přichodźe hišće wušo na dobro serbskosće w zjawnosći hromadźe dźěłać. To je wuslědk połdrahodźinskeje rozmołwy krajneho rady Siegurda Heinze (njestronjan), wokrjesneje społnomócnjeneje za naležnosće Serbow Hanki Rjelcyneje, předsydy Domowiny Dawida Statnika a regionalneje rěčnicy za teritorij župy Delnja Łužica Heiki Apeltoweje wčera w Złym Komorowje, kaž třěšny zwjazk zdźěli. Do rozmołwy wopytachu Statnik, Rjelcyna a Apeltowa domizniski dwór w Lěskej pola Wjelceje, hdźež je jim Cornelia Schnippa staw saněrowanja kładźiteho domu rozkładła. Tež z předsydu Złokomorowskeje Domowinskeje skupiny Günterom Pawlišom sej mysle wuměnichu, kotryž so za wožiwjenje serbskeje rěče we wokrjesnym měsće a wokolnych wsach jara angažuje. Do programa, kotryž je Hanka Rjelcyna organizowała, słušeše dale wodźenje po Złokomorowskej twjerdźiznje.
Hižo jutře chce so předsyda Domowiny z krajnym radu wokrjesa Sprjewja-Nysa Haraldom Altekrügerom (CDU) w Baršću zetkać.
Spěchowanske towarstwo zetkanišća Łazowskeho Domu Zejlerja a Smolerja dźěła tež pod ćežkimi wuměnjenjemi koronoweje pandemije dale. Kak chcedźa to konkretnje činić, wo tym su jeho čłonojo minjeny pjatk porěčeli.
Łaz (AK/SN). Dom Zejlerja a Smolerja we Łazu wostanje najebać wobmjezowanja koronoweje pandemije dla kulturny magnet regiona. To podšmórny předsyda spěchowanskeho towarstwa Reinhardt Schneider minjeny pjatk na hłownej zhromadźiznje towarstwa. Wone pod krizu chětro ćerpi. Dlěši čas žane zarjadowanja wotměć njemóžachu. Trajne wustajeńcy dyrbjachu zawrjene wostać, nowe dyrbjachu přestorčić. „Jako smědźachu jednotliwcy a swójby zaso přichadźeć, bu to lědma wužiwane“, Schneider rjekny.
Serbski muski chór Delany zhladuje lětsa na 50. róčnicu swojeho załoženja. Planam muskeho spěwneho cyłka je dotal koronapandemija zadźěwała, nětko pak chcedźa swjećić.
Konjecy (SN). Serbski muski chór Delany hotuje so na swjedźeń składnostnje 50lětneho wobstaća ćělesa a na jubilejny koncert. To zdźěli předsydstwo spěwneho cyłka na naprašowanje. „Poprawom chcychmy hižo 30. januara ze spěwarjemi, bywšimi spěwarjemi a jich mandźelskimi kaž tež ze sponsorami w Šunowskej Fabrikskej hospodźe swjećić a tež za februar bě koncert předwidźany. To pak ze znatych přičin móžno njebě“, wobžaruje předsyda Konječanskeho ćělesa Janek Wowčer. Nětko swjedźeń 6. nowembra nachwataja a tež zjawny koncert chcedźa 14. nowembra wuhotować, a to wšitko pod prawidłami 3G.
Lipsk (jbo/SN). Swoju kóždolětnu kermušku su minjeny štwórtk studenća towarstwa Sorabije Lipsk w swojej „Centrifuze“ woswjećili. Po tradicionalnym wašnju přiwzachu zdobom zaso nowačkow do serbskeho studentskeho zwjazka. Tónkróć witachu jich dźewjatnaće, dweju wjace hač loni. Mjez nimi stej dwě delnjoserbskej studentce.
Studowacy staršich semestrow běchu wšelake stacije spřihotowali. Na nich předstajichu nowačkam stawizny a skutkowanje 1716 załoženeje Sorabije Lipsk, ale tež dalše studentske cyłki, z kotrymiž tu dobre přećelstwo haja. Předsyda Sorabije Michał Donat a městopředsyda Matej Mark wuzběhnyštaj, zo su styki mjez serbskimi studentami zwonka Łužicy wažne. Tak móža tež w dalinje serbske wašnja hajić a sej tróšku domizny wobchować. Runje studentam prěnjeho semestra je tajka zhromadnosć často jara spomóžna, wosebje hladajo na organizatorisku a zarjadnisku podpěru.
Budyšin/Schleswig (SN/JaW). 25 serbskich wučerjow a studentow wučerstwa, čłonojo a čłonki předsydstwa Serbskeho šulskeho towarstwa kaž tež kubłanska referentka Domowiny Katrin Suchec-Dźisławkowa wotkrywaja sej hišće hač do jutřišeho mjeńšinowe kubłanje Frizow a Danow w Južnym Schleswigu.
W srjedźišću kubłanskeje wuprawy SŠT, kotruž je sakske kultusowe ministerstwo financowało a krajny zarjad za šulu a kubłanje zhromadnje ze Serbskim šulskim towarstwom přihotował, steji wuměna nazhonjenjow mjez narodnymi mjeńšinami, předewšěm kubłanje nastupajo. Wšako zetkawaja so na wuprawje Serbja z Frizami a Danami w Němskej. Program zestajała je předsydka rady Załožby za serbski lud Susann Šenkec, kotraž w Južnym Schleswigu njedaloko Flensburga ze swójbu bydli a skutkuje. Wona serbsku delegaciju na kubłanskej jězbje přewodźa. „Nimo nastorkow za wuwučowanje serbšćiny a skrućenje našeje rěče na šulach dźe wězo tež wo wuměnu myslow mjez serbskimi wučerjemi a studowacymi wučerstwa wšelakich šulskich formow“, wuswětla předsydka SŠT Katharina Jurkowa.