Problemy njewobešli

štwórtk, 30. měrca 2017 spisane wot:

Ze stron knježerstwow a parlamentow tójšto připóznaća Domowinje

Dołha bě lisćina postrownych rěčnikow na spočatku hłowneje zhromadźizny. Wjele bě wo tym słyšeć, kak sej zwjazkowe, sakske a braniborske knježerstwo, ale tež parlamentownicy zhromadne dźěło z Domowinu waža. Na jich zakładźe móžachu­ delegaća a hosćo schadźowanišćo z krutym přeswědčenjom wopušćić, zo je třěšny zwjazk serbskich župow a towarstwow knježerstwam a parlamentam w mjeńšinowych prašenjach akceptowany a připóznaty partner.

„Mnohotnosć serbskich towarstwow a zwjazkow, nałožki, rěč, pěsnje a drastu – prosće přisłušnosć k domiznje – pěstować je jimace“, rěka w lisće prezidenta zwjazkoweho sejma Norberta Lammerta, kotryž je zapósłanča Marja Michałkowa (wobaj CDU) předčitała. Njebě Lammertej tuž připad, „zo wuzwolichu sej Serbja před nimale 105 lětami mjeno Domowina za swój třěšny zwjazk najwše­lakorišich zjednoćenstwow a towarstwow“.

Na hłownej a wólbnej zhromadźiznje su čłonojo Slepjanskeho folklorneho ansambla 3. měrca 29lětnu Stephanie Bierholdtec za nowu předsydku wuzwolili. Wona naslěduje Wolfganga Kotiseka. „Mi je wědome, zo změju tójšto dźěła a zamołwitosće. Njebudźe lochko wšitko tak zmištrować kaž mój předchadnik. Je tuž derje, zo wostanje wón dale w předsyd­stwje a mi tak pomocliwje poboku“, Slep­janka podšmórnje.

Gmejna měła wjac zajima za kulturu pokazać

štwórtk, 30. měrca 2017 spisane wot:

Rozmołwa z kulturnikom Wolfgangom Kotisekom

Slepjanski folklorny ansambl měješe spočatk měrca hłownu a wólbnu zhromadźiznu. Alfons Wićaz je so z jeho wjelelětnym organizatoriskim nawodu Wolfgangom Kotisekom rozmołwjał.

Kajku bilancu je ansambl sćahnył?

W. Kotisek: Wot lěta 1973, potajkim wot załoženja našeho ansambla, hač do kónca 2016 mějachmy 1 247 wustupow. K tomu přińdźe tójšto internych programow, kaž na jubilejach. Tehdy běchu wšitcy naši čłonojo ze Slepjanskeje wosady. Dźensa su woni tež ze zdalenišich kónčin, z 18 wšelakich wsow a městow. Najdale jězdźitaj trubkar a basist z Hamburga a Lipska. Z Ćisowa je swójba Zahrodnikec z klarinetu, huslemi a dudami zastupjena. Mamy studentow a wukubłacych. Dyrbimy tuž tójšto wobkedźbować, zo móhli tež zhromadne proby přewjesć. Loni wuhotowachmy pjeć wustupow. Smjerće mojeje mandźelskeje dla smy wjetšu přestawku zapołožili. Nětko chcemy aktiwity zaso zesylnić.

Kak radźi so wam najebać tele zdalenosće ansambl hromadu dźeržeć?

Zwiski ke korjenjam pohłubšić

wutora, 28. měrca 2017 spisane wot:

Krabatowe towarstwo za regionalne wuwiće dwurěčneje Łužicy chce swoje zwiski do domizny Krabata, chorwatskeho a słowjenskeho regiona Žum­berak zesylnić.

Chrósćicy (AK/SN). „Ze swojej wobstejacej syću partnerow a ze swojimi nazhonjenjemi chcemy mjez turistikarjemi we Łužicy a w Žumberakskim regionje po­srědkować“, podšmórny předsyda Krabatoweho towarstwa Reiner Deutschmann wčera na hłownej zhromadźiznje towarstwa w Chrósćicach. „Zaměr je dołhodobny kooperaciski projekt přez europski spěchowanski program Leader mjez łužiskim Krabatowym regionom a chorwatsko-słowjenskej namjeznej kónčinu. To je wulke wužadanje, ale móžemy je zmištrować.“ Prócować chcedźa so tohorunja wo zwiski mjez Budyskim wokrjesom a komunami w regionje Žumberak. Tole měła předewšěm iniciatiwa wjesnjanostow być.

Pospyt by so wudanił

wutora, 28. měrca 2017 spisane wot:
Dźensa wozjewjene měnjenja k namjetej Křesćana Krawca, wuhotować „serbski dźeń“, wujewjeja zajimawy rozdźěl. Na jednej stronje móhła sej wjetšina ze wšěch kóncow Łužicy tajke zarjadowanje předstajić, zdźěla bychu samo zwólniwi byli orga­nizatoriske nadawki přewzać. Na tamnej stronje njejsu přećiwo namjetej, skedźbnjeja pak na docpěte resp. na kopjenje serbskich zarjadowanjow. To wosebje płaći za kónčinu zarjadniskeho zwjazka Při Klóšterskej wodźe, hdźež je serbstwo hišće najkompaktniše. Tam najwšelakoriše cyłki dosć spomóžnje skutkuja, serbska bjesada – hdyž přeco ju chceš – je zaručena. A dokelž Serbja druhdźe we Łužicy tajki wobšěrny poskitk nimaja, trjebaja přiležnosće, zo bychu so zetkawali, so přez hranicy župow a towarstwow wuměnjeli a tuž swój narodny rjap skrućili. Na regionalnej runinje so to hižo radźi, na wšoserbskej by so pospyt snano wudanił. Axel Arlt

Na stawizny wokoliny zhladowali

wutora, 28. měrca 2017 spisane wot:

Pěskecy (JK/SN). Zo móže před wjace hač 30 lětami spisany roman tež dźensa hišće ludźi zahorić, pokaza so na spodobne wašnje zawčerawšim w Pěskečanskim sportowym domje. Nimale 50 wjesnjanow a hosći z wokolnych wsow je přeprošenje Pěskečanskeje sportoweje jednotki na čitanje Křesćana Krawca sćěhowało. Spisowaćel z Hrubjelčic bě so hižo před dlěšim časom z čłonom sportoweje jednotki Křesćanom Žurom na to dojednał, ze swojeho romana „Wočakńmy nalěćo“ w Pěskecach čitać. Pozadk bě, zo hraje roman tež bjesposrědnje w Pěskecach a wokolinje. Čiły zajim za čitanje zbudźichu přidatnje wobrazy ze stawiznow Pěskec, kotrež běštaj Siegfried Althaus a Jurij Pjetaš zestajałoj. Před wobrazowej sćěnu stejo sej wjesnjenjo dopomnjenki wuměnichu, wuwědomjejo sej wažnosć tajkich dokumentow.

Dźěći najlěpši byli

póndźela, 27. měrca 2017 spisane wot:
Dawid Statnik nawjeduje tež přichodne štyri lěta Domowinu. To mam za jednu z dobrych powěsćow sobotneje hłowneje a wólbneje zhromadźizny we Wojerecach. Dalši pozitiwum je, zo njeje so Domowina wotmjezowała, ale pokazała, zo je jej, kaž sama stajnje potwjerdźa, dialog wažny. Tak mějachu tež iniciatiwnicy składnosć so wuprajić. Njedobry signal pak je, zo přednjese mysle iniciatiwy „němsce rěčacy Serb“, kaž Měrćin Krawc sam wo sebi praji. Mnozy so prašachu, što je poprawom słowo­ „serbski“ w zapřijeću Serbski sejm hódne, hdyž tola swoje mysle hižo nětkole němsce předstajeja. Prašenje dale steji. Wšako błyšćachu so iniciatorojo sejmi­koweje mysle z njepřitomnosću. Najlěpša powěsć­ z Wojerec pak za mnje je, kak derje dźěći zakładneje šule „Handrij Zejler“ serbšćinu wobknježa! Bě wulkotne jich program sćěhować. Wulka chwalba přede­wšěm jich wučerkam! Janek Wowčer

Za wobstaće so jasnje wuprajili

póndźela, 27. měrca 2017 spisane wot:

Na pjatkownym rozmołwnym zetkanju Koła serbskich spisowaćelow (KSS) informowaše jeho předsyda Benedikt Dyrlich přitomnych čłonow spočatnje wo połoženju Zwjazka serbskich wuměłcow a jeho kołow.

Budyšin (SN/DoŠ). Tak njeje bracha kruteje přistajeneje mocy dla organizacija projektow zwjazka tuchwilu zaručena. Tohodla leži mjez druhim čitanski projekt „na lodźe“, a cyle wohroženy je lětuši 39. swjedźeń serbskeje poezije na česć Jurja Chěžki. „Přiwšěm je so přihotowanski wuběrk swjedźenja trójce zetkał, wjacore rozmołwy z mnohimi partnerami wjedł. Koncept je Załožbje za serbski lud zapodaty“, rjekny Dyrlich.

Přidatny serwis k „hłownej“

pjatk, 24. měrca 2017 spisane wot:

Wšitkim na dźěle Domowiny zajimowanym skići třěšny zwjazk serbskich towarstwow přidatny serwis. Jutřiša 18. hłowna a wólbna zhromadźizna budźe přez livestream wusyłana.

Namjety župow a towarstwow

štwórtk, 23. měrca 2017 spisane wot:

Zajutřišim wuzwola delegaća 18. hłowneje zhromadźizny Domowiny we Wojerecach nowe zwjazkowe předsydstwo třěšneho zwjazka. Čłonske župy a towarstwa su tychle kandidatow namjetowali:

Župa „Jakub Lorenc-Zalěski“ z. t. 

1. Manfred Hermaš

2. Diana Maticowa

3. Stephanie Bierholdtec

4. Maria Pěčkec

Župa Delnja Łužica z. t.  

1. William Janhoefer

2. Jenifer Dünnbierowa

3. Maximilian Hassatzky

4. Kito Ela

5. Kathrin Šwjelina

6. Collett Šampatisowa

Župa „Handrij Zejler“ Wojerecy  

1. Enrico Šołta

2. Marcel Brauman

Župa „Jan Arnošt Smoler“ Budyšin

Jana Pětrowa

Župa „Michał Hórnik“ Kamjenc   1. Zala Cyžowa

2. Bjarnat Cyž

3. Marko Kliman

Maćica Serbska/Maśica Serbska z. t.

Marka Cyžowa

Serbske młodźinske towarstwo Pawk z. t.

1. Franciska Grajcarekec

2. Alena Pawlikec

Serbske šulske towarstwo z. t.

Marlis Młynkowa

Serbski Sokoł z. t.  

Milan Funka

Spěchowanski kruh za serbsku ludowu kulturu z. t. 

dr. Fabian Jacobs

Towaršnosć za spěchowanje Serbskeho ludoweho ansambla z. t.

Katrin Suchec-Dźisławkowa

Towarstwo Cyrila a Metoda z. t.

1. Marja Michałkowa

2. Jan Nuk

nawěšk

nowostki LND