Wo dramatiskim połoženju zhonili
Prěni prezencny kongres Federalistiskeje unije europskich narodnych mjeńšin (FUEN) po nanuzowanej přestawce kononapandemije dla su wčera w italskim Triesće zakónčili. Wjetšina přitomnych měješe jón za přewšo spomóžny, předewšěm wuměnu myslow a nazhonjenjow nastupajo.
Triest (SN/JaW). Kubłanje w jednotliwych narodnych mjeńšinach Europy kaž tež jich aktualne połoženje běštej hłownej temje prěnjeho kongresa FUEN po wulkich wobmjezowanjach koronapandemije dla w italskim Triesće. Kaž su jako hłowny facit kongresa zwěsćili, stej w mnohich europskich mjeńšinach kubłanje a tam zdobywanje dorosta tučasnje najwjetši problem. „To je woprawdźe nimale we wšěch mjeńšinach ćeža. Tuž njeje to prašenje statusa, ale skerje koncepcije kaž tež wulkosće mjeńšin“, rozłoži na naprašowanje předsyda Domowiny Dawid Statnik jako nawoda serbskeje delegacije na kongresu.
Přizjewjenja hišće móžne
Budyšin (SN/at). Za nimale dwě njedźeli, 25. septembra, budźe kubłanska jězba Domowinskeje župy „Jan Arnošt Smoler“ Budyšin do Łaza, a to z widom na Lěto Zejlerja/Kocora 2022. Župne předsydstwo je wčera znowa přihoty na wuprawu rozjimało a posledni termin přizjewjenja postajiło. Hač do 11. septembra njech zajimcy z Domowinskich skupin a župje přisłušacych towarstwow swoje wobdźělenje pola regionalneje rěčnicy Domowiny za teritorij Budyskeje župy Katje Liznarjec přizjewja. Klětu je jězba do ródneje wsy Korle Awgusta Kocora, Zahorja pola Budestec, a do jeho skutkowanišća Ketlic planowana.
Předmjet posedźenja běchu dale nazymske koncerty. Wone su wjerški w lětnym skutkowanju Domowinskich skupin runje tak kaž w kulturnym žiwjenju komunow. Tohodla wuprajichu so čłonojo předsydstwa za to, lětsa hišće w Budyšinje, Bukecach a Malešecach nazymski koncert přewjesć. Tamniši skupinarjo nochcedźa so dlěje z tym wotnamakać, zo so zamołwitym w zarjedźe Załožby za serbski lud njeradźi, w jich komunach tajki kulturny wjeršk znowa organizować.
Zajim je wulki
Budyšin (SN/JaW). Zjawne posedźenja Zwjazkoweho předsydstwa Domowiny měli dale tež jako livestream poskićić, njewotwisnje wot wuwića koronapandemije. To poruča gremijej jeho prezidij, kotryž je naležnosć na swojim prěnim wuradźowanju po hłownej wólbnej zhro- madźiznje w Budyšinje a online rozjimał. „Rezonanca z hač do 170 přihladowarjemi pokazuje na wulki zjawny zajim“, informuje medijowy rěčnik Domowiny Marcel Brauman w nowinskej zdźělence.
Jako noweho čłona najwyšeho dźěłoweho gremija třěšneho zwjazka mjez wuradźowanjemi zwjazkoweho předsydstwa witachu wčera městopředsydu za Delnju Łužicu dr. Hartmuta Leipnera. Dale přisłušataj prezidijej předsyda a hornjołužiski městopředsyda Domowiny Dawid Statnik a Marko Hančik. „Dalšeju čłonow woli zwjazkowe předsydstwo na namjet předsydy“, rěka w zdźělence.
Nadźiju čerpać
„Soraborum saluti“ Benej Bělkej
Na hłownej a wólbnej zhromadźiznje Towarstwa přećelow Serbow předwčerawšim w Praze witachu tež hosći z Łužicy. Bywšeho rozhłosownika Bena Bělka su wuznamjenili, a kuratorka Budyskeho Serbskeho muzeja Andrea Pawlikowa je wo přihotach na planowanu wustajeńcu w Čěskej rozprawjała.
Praha (SN). W Praskim Serbskim seminarje wotmě so sobotu hłowna a wólbna zhromadźizna Towarstwa přećelow Serbow (SPL). Benej Bělkej, wjelelětnemu rozhłosownikej a wot lětušeho čłonej Zwjazkoweho předsydstwa Domowiny, spožčichu wuznamjenjenje Soraborum saluti za „dołholětne spěchowanje čěskeje kultury w serbskej Łužicy a za njesebičnu pomoc čěskim přećelam Serbow, hdźežkuli bě a je trěbna“.
Kuratorka Serbskeho muzeja w Budyšinje Andrea Pawlikowa informowaše wo planowanej wustajeńcy wo serbsko-čěskich poćahach, kotruž chcedźa z partnerami za dwě lěće na Praskim hrodźe zwoprawdźić.
Njech so poradźi
Tež łužiske wino w poskitku
Pěskečanske sportowe towarstwo přihotuje druhi winowy swjedźeń
Pěskecy (SN/MWj). Po wuspěšnej premjerje před lětomaj wotměje Pěskečanske sportowe towarstwo jutře za tydźeń, 11. septembra, swój druhi winowy swjedźeń. Prěnje tajke zarjadowanje 2019 měješe přewšo dobry wothłós. „Loni je bohužel přewjesć njemóžachmy. Lětsa so nas mnozy prašachu, hač drje to zaso budźe. Ćim bóle so woni wjesela, a my wězo tež, zo móžemy swój winowy swjedźeń wotměć“, praji sobuorganizator Xaver Smoła z Njebjelčic. Wón a dalši sobuwojowarjo z přihotowanskeje skupiny běchu minjene lěta wjacore razy na wopyće w Strážnicy a Dolnich Bojanovicach na Morawje a su so wot tamnišich swjedźenjow tajkeho razu natyknyć dali. Skónčnje chcychu pospytać tajke něšto doma na nohi stajić. A to je so jim před lětomaj wulce poradźiło.
Wo přichod serbskeho ludu so starosćił
Zrudźaca powěsć je nas dosćahnyła, zo je swěrny čłon Zwjazka serbskich rjemjeslnikow a předewzaćelow (ZSRP), knjez Florian Šołta z Worklec, po sćerpnje znjesenej chorosći, na wustrowjenje so nadźijejo 24. awgusta zemrěł. Znajachmy jeho wšitcy jako optimistiskeho, wjesołeho a přeco přećelneho sobustawa.
Jara wažny wopyt rěčneho monitoringa dla
Žylow/Dešno (SN/at). „Wosebje so wjeselu, zo móžemy za cyły serbski lud zastupujujo my w Delnjej Łužicy wo politiskich ramikowych wuměnjenjach a našej aktualnej situaciji rozprawjeć.“ To rjekny wčera městopředsyda Domowiny dr. Hartmut Leipner, witajo čłonow poradźowaceho wuběrka za ramikowe zrěčenje wo škiće narodnych mjeńšin na monitoringowy wopyt. W rozmołwje z našim wječornikom charakterizowaše Leipner wčerawšu wuměnu jako „jara wažnu“. Předsydce wuběrka Marie B. Hagsgård ze Šwedskeje a jeje přewodźerjam rozjasnichu serbscy zastupjerjo dosć dobre prawniske połoženje Serbow w Němskej. „Najebać to njeje situacija tajka róžojta“, Leipner wuzběhny. Hosćo zhonichu tež wo tym, zo so Delnjoserbja wo fungowacu šulsku syć prócuja.
Swójbne pućowanje a swjedźeń na nowym městnje
Hrubjelčicy. Po lońšej nanuzowanej přestawce korony dla přeprošujetej Serbske ewangelske towarstwo a Maćijec swójba wšitkich Serbow a dalšich zajimcow sobotu, 11. septembra, na lětnje pućowanje a serbski swjedźeń. Po tym zo je Krygarjec swójba hač do lěta 2019 dohromady 15 razow tele zarjadowanje we Wuježku organizowała, wotměje so wone nětko prěni raz na nowym městnje w Hrubjelčicach. Zajimcy zetkaja so w 13 hodź. při pomniku za padłych Prěnjeje swětoweje wójny w Bělšecach (GPS 51.136793, 14.446996) na kóncu Pomnikoweje dróhi. Wottam pućuja zhromadnje po Šćežce sydom serbskich kralow. Judit Heroldowa, kotraž je ideju z mandźelskim a kamjenjećesarjom wuwiła, chce wobdźělnikow přewodźeć a jim zajimawostki wo kralach a kamjenjach powědać. Krute črije su na kóždy pad trěbne. Po puću njech so kóždy sam ze swojeho nachribjetnika zastara.
