Bolostne połoženje w Miłorazu

pjatk, 04. septembera 2020 spisane wot:
Sakski statny minister za energiju, škit klimy, wobswět a ratarstwo Wolfram Günther (Zeleni, srjedźa) je so dźensa wo połoženju w Miłorazu informował. Tam su minjenu pón­dźelu započeli za Wochožansku jamu twarjenja na dwěmaj ležownosćomaj torhać, kotrejž bě energijowy koncern LEAG kupił. Zo steji wjes nadobo zaso w srjedźišću zjawneho zajima, wjesnjanow jara poćežuje. Tohodla předsyda Domowiny Dawid Statnik (napr.) namołwi „diferency w energijowej politice na domoródnu ludnosć njewotwaleć. Domo­wina aktiwnje w gremijach sobu skutkuje, kotrež aktualnu změnu strukturow přewodźeja, a to za dobu bjez tučasneje bolostneje roztorhanosće.“ Foto: Domowina

Konkretnje wotmołwjeli

pjatk, 04. septembera 2020 spisane wot:

Wojerecy (SN/at). Domowinska župa „Handrij Zejler“ je wotmołwy na swoje wólbne kopolaki štyrjoch kandidatow za nje­dźelne wólby wyšeho měšćanosty we Wojerecach zajimcam w interneće pod https://www.domowina.de/mitgliedschaft/mitgliedsvereine/regionalverband-der-domowina-hoyerswerda/spřistupniła.

Po słowach regionalneje rěčnicy Domo­winy za župny teritorij Sonje Hrje­ho­­rjoweje „su štyrjo z pjeć požadarjow na naše prašenja jara dokładnje a konkretnje wotmołwili“. Za zwjeselace Hrjehorjowa ma, „zo su so wšitcy pozitiwnje do směra na přichodnje znajmjeńša dźělnu hłownohamtskosć dźěłoweho městna społnomócnjeneje za serbske naležnosće zwuraznili“. W župje su wćipni na wólbny wuslědk, „dokelž přicpěwaja wšitcy serbstwu wuznam za přichod regiona a chcedźa je w swojim skutkowanju wotpowědnje wobkedźbować“.

Župne gremije su wo wotmołwach Dorit Baumeister (wólbny zwjazk), Dirka Nazdale (kandidat-jednotliwc), Torstena Rubana-Zeha (SPD) a Claudije Florian (CDU) informowali, kaž z nowinskeje zdźělenki Domowiny dale wuchadźa.

Z gigantom we łožu

pjatk, 04. septembera 2020 spisane wot:
Najskerje najznaćišej njeknježerstwowej organizaciji (NGO) běštej dotal Amnesty International a Lěkarjo bjez hranicow. W samsnej lize hraje wotnětka tež Domowina – znajmjeńša, dźe-li po definiciji Microsoft. Byrnjež angažement ameriskeho giganta na dobro čłowjeskich prawow, strowotniskeho zastaranja a nětko samo Serbow chwalobny był, partnerstwo z de-facto-monopolistom njeje njeproblematiske. Je dźě Microsoft paradny přikład za dobreho kapitalista, kotrehož priorita je wotwisnosće wutworić. Wjetšina toho, štož wšědnje na digitalnym polu wužiwamy – programy za pisanje, wobdźěłanje wobrazow abo za komunikaciju – hodźi so mjeztym z tak mjenowanej open­source-software zwoprawdźić, a to principielnje zadarmo, hačrunjež so wotpowědni programěrarjo nad tym abo tamnym darom zawěsće wjesela. Pola nich je na kóždy pad móžno jeno za to płaćić, štož woprawdźe trjebaš. Bosćan Nawka

Přihladowarjo smědźa palcy tłóčić

pjatk, 04. septembera 2020 spisane wot:

Lubowarjo konjaceho sporta smědźa so wjeselić. Na nich čakaja jutře a njedźelu sakske mišterstwa w mnohostronskim jěchanju w Hórkach. W času korony je to wšo druhe hač samozrozumliwe.

Hórki (BeW/SN). Dołho su čłonojo Pančičanskeho jěchanskeho towarstwa Při Klóšterskej wodźe wuradźowali, prjedy hač bě rozsudźene, zo smědźa w Hórkach nětko kónc tydźenja wo medalje a wo titul sakskeho mištra abo mišterki jěchać. A přihladowarjo smědźa jim při tym palcy tłóčić!

Nimo jěcharjow z wjacorych zwjazkowych krajow, mjez druhim z Braniborskeje, Durinskeje a Saksko-Anhaltskeje chce tež tójšto młodych sportowcow Paničanskeho towarstwa ze swojimi konjemi pokazać, što zamóža. Bobkec młodźina z Worklec a Miłoćic budźe zastupjena. Mjez druhim chce Jakub Bobka ze swojim Conanom wo titul sakskeho mištra U 21 wojować. Tež 15lětna Hilke Hetmankec ze swojej kobłu Dakota budźe so sobu wubědźować. Wona bě mjez druhim lětsa hižo we Warendorfje na zwjazkowym championaće za dorost, hdźež je sej ze sakskim mustwom třeće městno zawěsćiła.

Poskitk dale płaći

štwórtk, 03. septembera 2020 spisane wot:

Wojerecy (SN/at). Po zetkanju zastu­pje­rjow Domowiny a Serbskeho sejma minjenu póndźelu bě swět, hromadźe za serbski lud skutkować chcyć, hišće w porjadku. Dźensa to hinak wupada. W nowinskej zdźělence Serbskeho sejma wo rozmołwje je wuprajenje „poskitk Domowiny, po přistupje sejma Domowinje diskusiju wo wjace samo- a sobupo­stajowanju znutřka třěšneho zwjazka dale­ wjesć, njehodźi so w tej formje při­wzać­, mjez druhim tohodla, dokelž njeje parlament žane towarstwo a dyrbi swoju njewotwisnosć wobchować“ na wče­ra­wšim posedźenju prezidija třěšneho zwjazka zamylenje zbudźiło, a mějachu to za wotpokazanje. „Iniciatiwje Serbski sejm přiwšěm dale poskićamy, jako cyłk Domowinje přistupić.“ Takle so předsyda Dawid Statnik znowa na sejm wobroća.

Hač drje lětsa znowa dobudu?

štwórtk, 03. septembera 2020 spisane wot:

Wjesne towarstwo Domizna zaso žnjowu krónu wije

Chrósćicy (SN/MWj). Stajnje srjedu a štwórtk wječor knježi nětko na Chróšćanskej farje čiłe žiwjenje. Wjesne towarstwo Domizna wije tam krónu za 27. wubědźowanje Sakskeho zwjazka wjesnych žonow wo najrjeńšu žnjowu krónu. Wčera, mjeztym pjaty raz, bě wjace hač dwaceći žonow a muži při dźěle.

Hižo wot spočatka julija su Jurij Kokla a dalši pomocnicy z dowolnosću ratarjow rožku, pšeńcu, wows, nalětni ječmjeń a triticalu domoj wozyli a w bróžni Bosćija Wjesele sušili. 19. awgusta so ­čłonojo towarstwa a dalši zajimcy prěni raz zetkachu, započachu jednotliwe stwjelca rjedźić, na wěstu dołhosć přitřihać a je do małych kwěćelkow po třoch do pjeć stwjelcach wjazać. Hdyž maja dosć tajkich ­kwěćelkow, započina je Hana Grutcyna na přihotowane krosno wjazać, wězo cyle akuratnje a jednotliwe družiny žita wotměnjejo. Dwě pomocnicy cyły čas sobu ličitej a kwěćelki podawatej. Druhdy wšak so stanje, zo dyrbja čwak króny znowa wić, dokelž je so zmylk zasunył.

Wšitko pilnje z kameru dokumentował

srjeda, 02. septembera 2020 spisane wot:

Zrudźaca powěsć je so předewšěm po Rownom a wokolinje roznjesła. Njedźelu tydźenja bě znaty čłon towarstwa Njepilic dwór Rudi Krawc njenadźicy zemrěł. Minjeny tydźeń štwórtk hižo su jeho na kěrchowje w ródnej wsy Rownom k rowu přewodźeli.

Rudi Krawc narodźi so „třeći dźeń hód“ 1937 w Rownom. Hač do lěta 1943 chodźeše we wsy tež do šule. Samo wučbu serbšćiny je tam pola wučerja Ericha Schurmana a jeho mandźelskeje měł. ­Hižo we wjesnej młodźinje bě jara aktiwny. Wuchodźiwši 8. lětnik da so na póstownika wukubłać, runje tak kaž jeho nan. Jeho mać bě stajnje burska chodźiła, wo čimž je Rudi Krawc tež w delnjoserbskim tydźeniku Nowy Casnik rozprawjał. Wo tym, zo bu spočatk 1950tych lět ze stron pósta jako wěcywustojny za serbske naležnosće zasadźeny, wón tohorunja pisaše.

Za dialog čas trěbny

wutora, 01. septembera 2020 spisane wot:
Najwažniši wuslědk wčerawšeho zetkanja Domowiny a Serbskeho sejma je fakt, zo chcetej wobě stronje oficialnje zahajeny dialog dale wjesć. Rozmołwa je wuwědomiła, zo hlada jimaj na wšelakich polach tójšto dźěła do rukow. Jedna strona so tuchwilu zaměrnje wo rěč stara. Tamna nałožuje swoje mocy za nowy zakonski zakład serbskeho samopostajowanja. Štóž strózbje na nadawkaj hlada, tón njemóže prěć, zo stej wobaj wažnej. Wotpohladany dalši dialog na jednej runinje je jenički puć, zo njebychu so narodne mocy brojili. Tak doraznje, kaž so Domowina za zachowanje a dalewuwiće serbšćiny zasadźa, tak nachwilne je woknješko w koaliciskim zrěčenju Sakskeje nastupajo samopostajowanje. Tu spyta Serbski sejm nawjazać. Hdyž bě z kruhow wobdźělnikow słyšeć, zo ći jedni při jednej tematice hišće tak daloko njejsu kaž tamni, njech dóstanu trěbny čas, zo bychu so zanurili – tohorunja w dialogu. Axel Arlt

Zajimawy wulět dožiwi minjenu sobotu nimale 40 čłonow spěchowanskeho towarstwa Łazowskeho Domu Zejlerja a Smolerja. Woni dojědźechu sej do klóštra Marijineje hwězdy w Pančicach-Kukowje, hdźež mějachu wodźenje. Dalša stacija bě w Žuricach dźěłarnja rězbarja Alojsa Šołty (prědku), kiž wo swojim skutkowanju rozprawješe. Foto: Michał Law

Wuběrk přihotuje „Lěto župow“

srjeda, 19. awgusta 2020 spisane wot:

Budyšin (SN/at). Z „Lětom župow“ chce serbski třěšny zwjazk Domowina wuměnu regionow po cyłej Łužicy spěchować, wšako je po słowach předsydy Dawida Statnika „naš serbski swět wjetši hač je nam to wšědnje wědome“.

Za planowanje lěto trajaceje naprawy su wčera w Budyskim Serbskim domje přihotowanski wuběrk Domowiny skonstituowali. Kaž třěšny zwjazk informuje, bu start jeho dźěławosće koronapandemije dla wo něšto měsacow přestorčeny. Gremij ze zastupjerjow župow, Domowinskeho zarjada a Serbskeho instituta ma w nadawku zwjazkoweho předsydstwa stoćiny załoženja prěnich župow Budyšin, Kamjenc, Wojerecy 24. julija 1921 organizować. Domowina z toho wuchadźa, zo wobstejnosće za masowe swjedźenje na dotal zwučene wašnje korony dla klětu wjele hinaše njebudu. Tuž su so po słowach Statnika na to dojednali, „zo zahaji so ,Lěto župow‘ 24. julija 2021 a traje hač do lěća 2022. Wjeršk budźe na kóncu we Wojerecach, wšako su tehdy w tamnišej radnej pincy župy załožili.“ Přichodne wuradźowanje wuběrka budźe 15. decembra.

Serbska debata

nowostki LND