Słownik ma w awgusće wuńć

póndźela, 29. februara 2016 spisane wot:

Towarstwo Njepilic dwór loni tójšto projektow přewjedło

Rowno (AK/SN). Za pěstowanje Slepjanskeje serbšćiny kaž tež kultury, nałožkow a tradicijow tamnišeho regiona je towarstwo Njepilic dwór ze swojim hesłom „Kak jo to bylo?“ njeparujomne.

„Loni zličichmy 4 350 wopytowarjow, organizowachmy 95 jednotliwych zarjadowanjow a přewjedźechmy 34 wodźenjow, mjez nimi někotre za mjeńše skupiny hač do tři wosoby“, podšmórny Manfred Nikel, wot załoženja lěta 1999 předsyda towarstwa, minjeny pjatk na jeho hłownej zhromadźiznje. W rozprawje wuzběhny wón angažowane dźěło towarstwa z dźěćimi a młodostnymi. Tak organizowachu loni projektowy dźeń běrnyzběranja z Rownjanskej pěstowarnju „Milenka“. Ze Slepjanskej zakładnej šulu zaběrachu so we wobłuku projektoweho dnja z předźěłanjom lena. Tež Běłowodźanski Gymnazij Lewa Landauwa wotměwa tule hižo tři lěta projektowy dźeń. Za to so Nikel wšitkim čłonam a pomocnikam dźakowaše.

ZSW reaguje na ekstremizm

pjatk, 26. februara 2016 spisane wot:

Budyšin (AW/SN). Swój razny protest přećiwo antiazylowym akcijam a zapa- lenju planowaneho domu za ćěkancow w Budyšinje zwurazni wčera na swojim posedźenju předsydstwo Zwjazka serbskich wuměłcow. W tym zwisku wone wobzamkny, hłowne zarjadowanje 38. swjedźenja serbskeje poezije, Budysku nóc poezije 24. junija při Budyskej Starej wodarni, stajić pod hesło „Budyšin je swětej wotewrjeny, wjacerěčny a tolerantny“. Wšitcy awtorojo w nakładni- stwje Pop wušłeje antologije ze serbskej temu „Bawülon“ su tón wječor do sprjewineho města přeprošeni, zo bychu ze swojich přinoškow čitajo prawicarskemu ekstremizmej znapřećiwili. „Takle wotpowědujemy tež serbskemu patriotej Janej Arnoštej Smolerjej, kiž bě tolerancu mjez ludami a kulturami pěstował a kotremuž je naš swjedźeń składnostnje jeho 200. narodnin wěnowany“, zwurazni předsyda ZSW István Kobjela.

Pěstuja dale serbsku zhromadnosć

pjatk, 26. februara 2016 spisane wot:

Radworski chór Meja je wčera swoju hłownu a wólbnu zhromadźiznu přewjedł. W towarstwowym domje „Słodeńk“ móžachu čłonojo spěwneho cyłka na tři wuspěšne lěta zhladować.

Radwor (SN/MkWj). Předsydka Angelika Häneltowa naliči cyły rjad zarjadowanjow, kotrež je chór minjeny čas zmištrował. Tak běchu spěwarki a spěwarjo lěta 2013 w nowym oratoriju „Serbske jutry“ sobu zastupjeni. Lěta 2014 předstajichu w Róžeńće a Budyšinje Pasion po swjatym Janu. Samsne lěto wulećachu sej k partnerskimaj spěwnymaj cyłkomaj do morawskeje Baški a do Krakowa. Nimo toho witachu chór z Južneho Tirola.

Tež loni mějachu Mejenjo tójšto dźěła. Wuhotowachu nalětni koncert we Worcynje, spěwachu na Radworskim wjesnym swjedźenju, rozžohnowachu wosadneho fararja Šćěpana Delana a witachu noweho fararja Bena Jakubaša a přewjedźechu kaž kóžde lěto swój hodowny koncert. Za njón žnějachu tónraz wjele chwalby, wšako běchu so na někotre moderniše sadźby zwažili. Tež lětnje koncerty za Starej cyrkwičku su dobra tradicija.

W Barće wučba serbšćiny wohrožena

štwórtk, 25. februara 2016 spisane wot:

Budyšin (kl/SN). Kubłanske naležnosće předsydstwo Budyskeje župy „Jan Arnošt Smoler“ dale wužaduja. Zakładna šula Bart ma za nowe šulske lěto 2015/2016 tuchwilu jeničce dwě přizjewjeni za rozšěrjenu wučbu serbšćiny. Porno tomu je sydom dźěći, kotrež su serbšćinu dotal w Malešanskej Witaj-pěstowarni w nošerstwje Serbskeho šulskeho towarstwa wuknyli, za šulu w Hućinje přizjewjenych. Tam pak serbšćinu njepodawaja. Wuhlad, w Barće skupinu serbšćiny wu­tworić móc, dotal dobry njeje. Na wuradźowanju wčera w Budyšinje čłonojo župneho předsydstwa připowědźichu, zo chcedźa ze zamołwitymi znowa rěčeć a wospjet na wohroženu serbskorěčnu wučbu w Barće skedźbnić.

Tež wo Smolerjowych 200. narodninach je předsydstwo rěčało. Swjatočnosć budźe štwórtk, 3. měrca, w 14 hodź. při pomniku Smolerja w Budyšinje.

Póstowa znamka z jejkami

srjeda, 17. februara 2016 spisane wot:

Kónc tydźenja wotměja so 25. serbske jutrowne wiki w Budyšinje

Serbske jutrowne wiki, to je dźensa runje tajka kruta instanca w Budyskej kulturnej protyce, kaž słušeja pisane serbske jejka dźensa k woblubowanym typiskim turistiskim darikam z regiona. Hdyž přeproša tónle kónc tydźenja Spěchowanski kruh za serbsku ludowu kulturu zaso na nje do Budyskeho Serbskeho domu, zhladuja na 25. jubilej.

Na 1. serbske jutrowne wiki 1992 móže so Eberhard Zobel hišće derje dopomnić: „Prěni dźeń bě tajki nawal ludźi a wosebje dźěći, kotrež chcychu jejka debić. A to sym z nimi na žurli Budyskeho Serbskeho domu tež činił. Wšitko bě improwizowane. W nocy do toho běch hišće jednory nastroj z do běrny tyknjenymaj łžicomaj zhotowił.“ Pozdźišo njeje wón nastroj jenož na bosěrowanski karusel z wosom barbami technisce dale wuwił, ale je jako předsyda Spěchowanskeho kruha za serbsku ludowu kulturu tež wuwiće tychle jutrownych wikow aktiwnje sobu přewodźał.

Přihotuja jubilejny koncert

srjeda, 17. februara 2016 spisane wot:

Konjecy (SN). Serbski muski chór Delany chce swoje 45lětne wobstaće z jubilejnym koncertom woswjećić. Mužojo wuhotuja jón njedźelu, 1. meje, w Šunowskej Fabrikskej hospodźe. Na to su so čłonojo předsydstwa dojednali a wčera w Konjecach dalše konkretnosće wobrěčeli.

Mjez druhim chcedźa na koncerće po­dać mały přehlad spěwneho składa, kotryž je sej chór w běhu štyriapoł lětdźesatka wobstaća přiswojił. Nimo pěsnjow ze spočatkow chcedźa tež nowe kruchi předstajić. „Planujemy tohorunja tu abo tamnu překwapjenku z wobrazami a filmowymi sekwencami“, přeradźi městopředsyda Daniel Wjesela našemu wječornikej. Přeprosyć chcedźa sej za program hóstnych sobuskutkowacych. Koho, njebě z předsydstwa zhonić. Wozrodźenej małej skupinje muskeho chóra chcedźa zmóžnić so předstajić. Tuchwilu přihotuje předsydstwo zastupne lisćiki, kotrež budu wot apryla na předań. Nowosć lětsa budźe, zo poskića po koncerće wječer.

Na šulskich konferencach pódla

štwórtk, 11. februara 2016 spisane wot:

Zastupnicy Domowiny smědźa w šulskich konferencach sobu skutkować. Tole dowola braniborski Serbski zakoń.

Choćebuz (HA/SN). Wot lěta 2014 płaćiwy ponowjeny serbski zakoń w Braniborskej postaja mjez druhim, zo móža zastupjerjo Domowiny w župje Delnja Łužica w šulskich konferencach sobu skutkować. Tele konferency su najwažniše zjawne gremije na šulach. Župa tuž móžnosće derje wužiwa. Na Delnjoserbskim gymnaziju a na šěsć zakładnych šulach, na kotrychž wuwučuja serbšćinu z pomocu projekta Witaj, su wot lońšeho čłonojo předsydstwa a dalši Domowinjenjo zastupjeni. Jich bě sej župne předsydstwo na wčerawše wuradźowanje w Cho­ćebuzu přeprosyło.

Protyka 2016 jako zhromadny projekt šulerjow

srjeda, 10. februara 2016 spisane wot:

Wojerecy (WS/SN). Přirada za serbske naležnosće města Wojerec je loni w septembrje molowanske wubědźowanje za wšitke 4. lětniki Wojerowskich šulow wupisała. Wotpohlad bě, zo so šulerjo ze žiwjenjom Serbow we Wojerecach na wuměłske wašnje zaběraja. Jara aktiwnje dźěłachu na tutym projekće w Zejlerjowej šuli z podpěru rjadowniskeje wučerki Sylwije Wjeńcyneje. Zahoritosće dźěći dla wutworichu dźěłowu skupinu šulerjow rjadownjow 4a a 4b, kotraž zetkawaše so dźesać króć pjatk po regularnej wučbje. Šulerjo zhromadnje rozmyslowachu, na kotre wašnje móhli nazběrane serbske temy zwobraznić a kotre techniki bychu so k tomu hodźeli. Za wobraz „Serbske napisy“ podachu so samo z kameru na rešeršu. Dale wužiwachu internet a započachu kónc lěta 2015 twórby we wšelakich technikach zhotowjeć. Nimo toho zestajachu 26 šulerjow jako zhromadny projekt protyku za lěto 2016 z mólbami a tekstami k wjerškam kóždeho měsaca, poćahujo so na Wojerecy. Cyłkownje bě 36 šulerjow wobdźělenych.

Hižo něhdźe 70 čłonow

wutora, 09. februara 2016 spisane wot:

Góry (HA/SN). Domowinska skupina na Górach je jedna z najmłódšich mjez cyłkownje 40 skupinami župy Delnja Łužica. Hakle před něhdźe třomi lětami bu wona znowa załožena, po tym zo bě tajka hižo za čas NDR w serbskej wsy Bórkowskeho zarjada skutkowała. Z něhdźe dwaceći čłonami je so wona lěta 2013 wutworiła, předewšěm młodźi wobydlerjo jej přistupichu. Mjeztym liči tale Domowinska skupina hižo něhdźe 70 sobustawow. Su to zwjetša młodostni, tola tež srjedźna a starša generacija stej zastupjenej. Górska skupina liči z tym, zo lětsa hišće dalšich čłonow do njeje zdobudu.

Najwjetšu zasłužbu na tymle wuwiću na Górach ma studentka sorabistiki w Lipsku Jennifer Dünnbierojc. Młoda Delnjoserbowka, kotraž chce so ze serbskej wučerku stać, je zdobom předsydka skupiny a zastupuje ju w Zwjazkowym předsydstwje Domowiny. Domowinska skupina na Górach je so mjez druhim wo to postarała, zo haja we wsy po lětach přestawki zaso delnjoserbski nałožk zabiwanja kokota.

Zabjeru stejišćo k změnje zakonja

srjeda, 03. februara 2016 spisane wot:

Choćebuz/Budyšin (SN/JaW). Prezidij Zwjazkoweho předsydstwa Domowiny chce so 24. februara z namjetami za ponowjenje sakskeho šulskeho zakonja zaběrać. Wo tym je předsyda Domowiny Dawid Statnik zwjazkowe předsydstwo na posedźenju minjenu sobotu w Choćebuzu informował. Byrnjež so tuchwilu žane widźomne wuskutki za Serbow njewujewili, chcyłoj so Domowina kaž tež Rada za serbske naležnosće Sakskeje k namjetam wuprajić, zdźěli Statnik. Krótkodobnosće dla – hač do 7. měrca maja so přispomnjenja zapodać – chcyli wo tym w prezidiju Domowiny wuradźować a namjet za zapodaće z nawodnicu kubłanskeho wuběrka dr. Beatu Brězanowej wothłosować. Dr. Brězanowa skedźbni na to, namjety dokładnje pruwować, hač so mjez druhim změny spěchowanja šulerjow snano na serbskej internataj w Budyšinje a Choćebuzu njewuskutkuja. Zdobom wona rjekny, zo měła Domowina w swojim stejišću wupady wučby tež na serbskich šulach wobkedźbować a tematizować. Runje tak měli pruwować, w kotrej měrje móhli so personalne ćeže, potajkim njedostatk wučerjow, na wučbu serbšćiny wuskutkować.

nawěšk

nowostki LND