Budyšin (SN/JaW). Zhromadne dźěło čłonskich słowjanskich narodnych mjeńšin w Federalistiskej uniji europskich mjeńšin FUEN so krok po kroku norma­lizuje. Wo tym informuje Domowina w medijowej zdźělence.

Zastupnicy dźěłoweje skupiny słowjanske mjeńšiny (ASGM) wuradźowachu tón tydźeń online. Jedne z ćežišćow wuradźowanja běchu přihoty na FUEN-kongres a zetkanje dźěłoweje skupiny słowjanskich mjeńšin w oktobrje. „Matic Germovšek, korutanski Słowjenc a ko­ordinator dźěłoweje skupiny, rozprawješe tež wo postupach noweje internet­ne­je strony a brošurce wo słowjanskich mjeńšinach w Europje, kotraž leži nětko w rukach FUEN“, w zdźělence dale rěka. Zdobom dźakowachu so na digitalnym wuradźowanju wuraznje Serbam, Do­mowinje a předewšěm Bjarnatej Cyžej, „kiž je lěta dołho jako rěčnik skupiny jeje dźěławosć bytostnje přewodźał a zmóžnjał“. Referent Domowiny za kulturu a wukraj Clemens Škoda so wjeseli, „zo je normalne skutkowanje Słowjanow w FUEN pod wuměnjenjemi pandemije zaso zahajene.“

Slepo (SN/JaW). Nastupajo zbliženje Domowiny a Serbskeho sejma počina so pomału něšto hibać. To wujewi minjene wuradźowanje Zwjazkoweho předsydstwa Domowiny w Slepom. Kaž předsyda třěšneho zwjazka Dawid Statnik informowaše, přihotuja zetkanje. Poprawom chcychu je přichodny měsac wotměć, štož pak njepóńdźe. Wšako maja tež w Do­mowinje koronapandemije dla nastate zastatki w dźěle nachwatać. „Přihotujemy tuž zetkanje ze zastupnikami sejma skerje za awgust“, předsyda připowědźi.

Tež přichodne lěto – lěto župow – nastupajo ma třěšny zwjazk zastatk nachwatać. Kaž referent Domowiny za nutřkowne naležnosće Werner Sroka zdźěli, „móžachmy proces powołanja čłonow do přihotowanskeho wuběrka zakónčić. Prěnje wuradźowanje bě hižo planowane, njejsmy pak je korony dla přewjedli. Mamy je tuž ručež móžno nachwatać.“

Serbske wólbne kopolaki přihotuje předsydstwo župy „Handrij Zejler“, zo móhło pozicije kandidatow k wólbam wyšeho měšćanosty Wojerec nastupajo serbske naležnosće sčasom zhonić.

Wojerecy (pi/SN). Domowinska župa „Handrij Zejler“ chce kandidatam za wólby wyšeho měšćanosty Wojerec 6. septembra sčasom zjawne prašenja k serbskim naležnosćam sposrědkować. Zajimcy maja hišće chwile hač do štwórtka, 2. julija, zo bychu swoju kandidaturu přizjewili. Najebać wulke šulske prózdniny chcedźa čłonojo župneho předsydstwa na posedźenju 22. julija serbske wólbne kopolaki rozjimać a schwalić. Kaž župa informuje, je so gremij na tele postu­powanje na wuradźowanju wčera wječor w bróžni domu Domowiny we Wojerecach dorozumił.

Zwjazkowe předsydstwo Domowiny je so na swojim zetkanju minjeny pjatk w Slepom tež kubłanskim temam wěno­wało a dwě personalnej naležnosći zrjadowało.

Slepo (SN/JaW). Prezidij Zwjazkoweho předsydstwa Domowiny je zaso kompletny. Minjeny pjatk wuzwolichu z jeničkim hłosawzdaćom Delnjoserba Maksimiliana Hasackeho do gremija. „Wjeselu so, zo sym młodeho čłowjeka za sobudźěło zdobyć móhł. To budźe zawěsće wobohaćenje za gremij a wšitkich jeho čłonow“, rjekny předsyda Domowiny Dawid Statnik. Hasacki dźěła jako referent w Choćebuskim kompetencnym centrumje zwjazkoweho wobswětoweho ministerstwa za škit klimy w industriji, kotraž wjele energije přetrjebuje. „Sym jara wjesoły, zo sym we Łužicy dźěło našoł. Nětko chcu tež wjac zamołwitosće přewzać“, Delnjoserb zwurazni.