István Kobjela zaso w funkciji předsydy ZSW

pjatk, 02. septembera 2016 spisane wot:

Budyšin (AW/SN). Wot 1. septembra wukonja István Kobjela zaso aktiwnje dźěło předsydy Zwjazka serbskich wuměłcow. Čłonojo předsydstwa su tomu na swojim wčerawšim wuradźowanju jednohłósnje přihłosowali. Priwatnych přičin dla bě wón 24. meje wo nachwilne wuswobodźenje ze zastojnstwa prosył.

Zdobom zaběraše so předsydstwo ZSW z tym, zawěsćić dalše krute přistajenje swojeje projektoweje managerki. Wone­ kónc lěta pobrachowacych srědkow dla wuběži. Tak staja nětko Załožbje za serbski lud pisomnu próstwu wo połne, stoprocentowske financne zaručenje tohole za dalše wobstaće ZSW wažneho koordinaciskeho dźěłoweho městna. Dotal­ měješe je zwjazk po 40 procentach sam financować a dyrbješe so stajnje z wulkim napinanjom wo sponsorow starać. Tući pak klětu wjace k dispoziciji njebudu. Wotpokaza-li załožba próstwu, chce so předsydstwo na wotpowědnych zapósłancow zwjazkoweho a krajneju sejmow Sakskeje a Braniborskeje wobroćić.

Šulski rap hordosć budźi

štwórtk, 01. septembera 2016 spisane wot:

Dźěći Handrija Zejlerjoweje šule hosći swójbneho popołdnja zawjeselili

Wojerecy. Wopytowarjo lětušeho swójbneho popołdnja župy „Handrij Zejler“ zańdźenu sobotu so njemało dźiwachu. Na ležownosći Domowinskeho domu na Drježdźanskej dróze zasłyšachu woni njewšědne zynki w serbskej rěči. „Sym Lilli. Sym Nieke. Mimi to sym ja“, rapowachu­ šulerjo 3. a 4. lětnika Wojerowskeje Handrija Zejlerjoweje zakładneje šule.

Serbšćinu chcetej dale wuknyć

štwórtk, 01. septembera 2016 spisane wot:

Jónu wob tydźeń, stajnje pjatk, trenujetej Katharina Steuer a Bonnie Niemz w rejwanskej skupinje Łužičanka Serbskeho ludoweho­ ansambla. Alexandra Wagner a Jan Kozelnický wuwučujetaj jej a dalše dźěći w rytmiskim pohibowanju na parkeće. „To namaj wulke wjeselo wobradźa. Smój hižo jako lutkaj na swjedźenju k při- wzaću šulskich nowačkow na našej šuli wustupiłoj a na wjesnym swjedźenju w Brětni“, powědatej Katharina (9) z Němcow a Bonnie (10) z Wojerec. Wobě stej šulerce rjadownje 4 A Wojerowskeje Handrija Zejlerjoweje zakładneje šule.

Ličbu njepraja

štwórtk, 01. septembera 2016 spisane wot:

Wojerecy (SN). Přihoty přichodneho posedźenja Zwjazkoweho předsydstwa Domowiny stejachu w srjedźišću wuradźowanja jeho prezidija wčera we Wojerowskim župnym domje.

Kaž předsyda Domowiny Dawid Statnik zdźěli, je gremij mjez druhim namjet namakanskeje komisije wobjednał, kotraž poda rozprawu druheho wupisanja wo městno jednaćelki/jednaćela Domowiny. Ličbu požadanjow nochcyše předsyda do zjawnosće dać. Rozsud wo powołanju twori zwjazkowe předsydstwo. Dale přihotowachu namjet za wotběh 18. hłowneje a wólbneje zhromadźizny Domowiny klětu 25. měrca we Wojerecach, na kotrejž ma so dźěławosć nětčišeje wólbneje periody wuhódnoćić. Tam maja so tež gremije třěšneho zwjazka wolić. Na wědomje wzał je prezidij 28 stejišćow třěšneho zwjazka, kotrež zapodachu so nastupajo próstwy wo zwěsćenje přisłušnosće komunow k serbskemu sydlenskemu teritorijej w Braniborskej. Zdźěłali běchu je na namjet župy Delnja Łužica.

Přichodne posedźenje zwjazkoweho předsydstwa budźe 17. septembra w Choćebuzu – zajimcy su witani.

Mobilizuje demokratiju při forumje

póndźela, 29. awgusta 2016 spisane wot:

Njebjelčicy (AW/SN). Přihot na zjawny forum „Demokratiju sej zwažić – Serbski sejm: prěni parlament Serbow“ steješe w srjedźišću sobotneje klawsury iniciatiwneje skupiny w Njebjelčicach. Zarja­dowanje, kotrež wotměje so we wobłuku 1. Budyskich tydźenjow demokratije 5. septembra we 18 hodź. w tamnišim Kamjentnym­ domje, ma wobdźělnikam sposrědkować puć k Serbskemu sejmej a wo jeho móžnosćach informować.

Tak dorěčachu sej inciatiwnicy dokładny programowy wotběh Budyskeho foruma. Jeho wobdźělnicy dóstanu při zastupje wólbny lisćik do rukow, z kotrymž wuzwola sej najwažniše temy za zjawnu diskusiju. Přitomnym předstaja koncepciju sejma, kotruž su na Njebjelčanskej klawsurje hišće raz skonkreti­zowali. Tak pokaza tutón puć k Serbskemu sejmej, kotryž wjedźe wot konsti­tuowanja rady starostow kónc tohole lěta k wólbam předparlamenta nazymu 2017 a přez njeho k wuzwolenju eksekutiwneho wuběrka. Serbski sejm ma potom předparlament wotměnić.

Kubłanska jězba do čěskeje stolicy

póndźela, 29. awgusta 2016 spisane wot:

40 wobdźělnikow wšěch generacijow poda so sobotu na kubłansku jězbu župy „Michał Hórnik“ do Prahi. Jězbu je župne předsydstwo z pomocu hibićiweho tamnišeho Towarstwa přećelow Serbow (Společnost přátel Lužice) organizowało.

Chrósćicy/Praha (KJu/SN). Zastupjerjo „Společnosće“ z předsydu Lukášom Novosadom su wopyt Praskich zajimawostkow zestajili, kotrež hewak na programje njesteja. Prěnja stacija wuprawnikow bě jedne z najznaćišich hrodźišćow Čěskeje Vyšehrad, hdźež pobychu w cyrkwi swjateju Pětra a Pawoła. Wobhladachu sej tež znaty kěrchow. Tam su wuznamne wosobiny Čěskeje pochowane, kaž Bedřích Smetana a Antonín Dvořák.

Wulka chwalba za poskitk šulerjow

póndźela, 29. awgusta 2016 spisane wot:

Wojerecy (UH/SN). Ze swójbnym ­popoł- dnjom na zahrodźe Wojerowskeho Domowinskeho domu su sobotu ­z woblubowanej tradiciju Domowinskeje župy „Handrij Zejler“ pokročowali. Jónu wob lěto w lěću přeproša předsydstwo župy hromadźe ze serbskej přiradu měšćanskeje rady na zabawne zetkanje. Regionalna rěčnica Christina Šołćina jako hłowna organizatorka kaž tež zamołwita města za serbske naležnosće Gabriela Linakowa­ a Werner Sroka so wjeselachu, zo je najebać hor­cotu nahladna ličba wopytowarjow­ přichwatała­.

Na pisanym měšćanskim swjedźenju we wendlandskim Lüchowje je so minjenu sobotu nimo dalšich ansamblow Ćišćanska rejwanska skupina předstajiła. Na jubilejnym programje składnostnje 40lětneho wobstaća ćělesa De Öwerpetters wobdźělištej so tež skupinje z Litawskeje a Nižozemskeje. Wjele ludźi sej jich přinoški wobhlada, wobdźiwujo pisanu narodnu drastu a krasne reje. Njedźelu wustupichu kulturne cyłki w muzeju-kulowcu Lübeln. Foto: Róža Domašcyna

To bě prawa městnosć

póndźela, 22. awgusta 2016 spisane wot:
Janšojske towarstwa a wšitcy dalši pomocnicy su so jako dobri hosćićeljo Festiwala serbskeje kultury w Delnjej Łužicy wopokazali. Atmosfera bě přijomna, swójbna. Wulki swjedźenski ćah z nimale 50 wobrazami a pisane programy kulturnych ćělesow z Delnjeje, srjedźneje a Hornjeje Łužicy dožiwić je so wudaniło. Rozsud předsydstwa župy Delnja Łužica za Janšojce njebě jenož tohodla prawy, dokelž su tamniši Domowinjenjo tónle swjatk namjetowali, ale dokelž je nawjes z wysokimi štomami idealne městno za swjedźenjowanje pod awgustowskim słóncom. Swjedźenska mila z Němsko-Serbskim domizniskim muzejom, cyrkwju a farskim statokom na jeje jednym kóncu a nawsu z wulkim jewišćom a Młynkec statokom na tamnym kóncu bě wuběrna. Škoda, zo njejsu na wulkich dróhach do Janšojc­ bóle za festiwal wabili, jenički stejak w Turjeju bě přemało mjez Choćebuzom a Janšojcami. Axel Arlt

Dobra nalada w miłej nocy

póndźela, 22. awgusta 2016 spisane wot:

Serbske ewangelske towarstwo 12. dworowy swjedźeń wotměło

Wuježk (RLc/SN). „Wy wuhotujeće mjeztym najrjeńši swjedźeń w tutej kónčinje!“ Tajku chwalbu wězo kóždy zarjadowar rady słyši, tež Mato Krygaŕ a Serbske ewangelske towarstwo, kotrajž zhro­madnje wot lěta 2005 Pawlikec statok we Wuježku­ dwójce wob lěto k małemu ­centrumej kulturneho žiwjenja ewangelskeje serbskeje Hornjeje Łužicy wožiwjataj. Wjace hač sto ludźi wšitkich genera­cijow z Wuježka, Bukečanskeje wosady a z cyłeje Hornjeje Łužicy je so tam so­botu zetkało.

nawěšk

SERBSKE NOWINY podpěruja:

Novi Sad – kulturna stolica Europy

  • Serbska lajska dźiwadłowa skupina Šunow-Konjecy je swoju nowu komediju "Ludźo njedźiwaće so" 9. nowembra prapremjernje w Šunowskej Fabrikskej hospodźe předstajiła. tule namakaće někotre impresije z inscenacije. 

Tohorunja tón kónc tydźenja su w Ketl

nowostki LND