Njewučerpany potencial wužiwać

pjatk, 13. nowembera 2015 spisane wot:

Budyski wyši měšćanosta Alexander Ahrens (njestronjan) porěči we wobłuku počesćenja Jana Arnošta Smolerja. To je wón je wčera na posedźenju Budyskeho župneho předsydstwa přilubił.

Budyšin (kl/SN). Přeprošenje na wuradźowanje z předsydstwom Budyskeje župy „Jan Arnošt Smoler“ staj Budyskaj wyši měšćanosta Alexander Ahrens a měšćanosta za hospodarstwo, kubłanje a socialne dr. Robert Böhmer (njestronjanaj) wčera do Serbskeho domu sćěhowałoj. Županka Jana Pětrowa skedźbni na to, zo měł kóždy sobudźěłaćer města dwurěčnosć wot spočatka wobkedźbować, hdyž projekty přihotuje a přewjeduje.

Přitomni rozjimachu wopomnjenske zarjadowanje na česć 200. narodnin Jana Arnošta Smolerja. Jako nošerka jeho mjena wuhotuje Budyska župa 3. měrca 2016 počesćenje při Smolerjowym pomniku na Lubijskej dróze w Budyšinje. Kulturnje wobrubić budźe zarjadowanje 1. serbska kulturna brigada. Alexander Ahrens přilubi na zarjadowanju porěčeć.

Zhromadny list reformy dla

pjatk, 13. nowembera 2015 spisane wot:

Choćebuz (HA/SN). Rada za serbske naležnosće Braniborskeje a Domowina chcetej nětko aktiwnje zapřimnyć do di­skusije wo předwidźanej strukturnej a wokrjesnej reformje w Kraju Braniborskej. Wobě instancy pósćeletej w přichodnych dnjach do Podstupima wotpowědny list braniborskemu ministrej za nutřkowne naležnosće Karlej-Heinzej Schröterej (SPD). Předsydstwo župy Delnja Łužica­ je so na swojim wčerawšim wu­radźowanju w Choćebuzu ze spisom zaběrało.

Hotuja so na 500. róčnicu reformacije

štwórtk, 12. nowembera 2015 spisane wot:

Za dwě lěće swjećimy 500. róčnicu reformacije. Martin Luther bě ju z wozjewjenjom 95 tezow přećiwo njedostatkam w tehdyšej cyrkwi 31. oktobra 1517 we Wittenbergu zahajił. Jubilej wuznamneho historiskeho podawka je tež za Serbow wažna naležnosć. Sćěhi žadanja reformatora za Božu słužbu w maćernej rěči běchu, zo je naš lud swoje pismowstwo dóstał, ječitać a pisać nawuknył. Ewangelscy Serbja su tuž hižo w přihotach reformaciskeho jubileja na swojim lětušim cyrkwinskim dnju w Bukecach, na farje w Slepom a na namši 31. oktobra w Janšojcach Lutherowe lipy sadźeli. Štom za reformatora su w septembru tež wobdźělnicy tradicionalneje wuprawy Serbskeho busa we Wittenbergu sadźili.

Stejišćo k regio- nalnemu planej wobzamknjene

štwórtk, 05. nowembera 2015 spisane wot:

Wojerecy (SN/JaW). Prezidij Domowiny je na swojim wčerawšim posedźenju we Wojerecach přichodne wuradźowanje zwjazkoweho předsydstwa 21. nowembra w Budyšinje přihotował. Wo tym informowaše předsyda třěšneho zwjazka Dawid Statnik na naprašowanje našeho wječornika.

Smolerjowe lěto jedne z ćežišćow

štwórtk, 05. nowembera 2015 spisane wot:

Budyšin (mkc/SN). Předsydstwo Maćicy Serbskeje dojedna so na swojim posedźenju wčera w Budyšinje na přihoty a wotběh zarjadowanja, kotrež wěnuje 3. měrca 1816 we Łuću rodźenemu sobuzało­žićelej Janej Arnoštej Smolerjej.

Serbske wědomostne towarstwo přihotuje k dwustotym narodninam wótčinca swjedźensku akademiju. Wona wotměje so sobotu, 5. měrca 2016, w Budy­šinje a rozpřestrěwa so na tři městna: Dopołdnja budźe spominanje při Smolerjowym rowje na Hrodźišku z narěču předsydy Maćicy, superintendenta Jana Malinka, a z kładźenjom kwětkow. Na žurli Serbskeho muzeja přepodadźa na to Maćičnej myće Michała Hórnika a Bogumiła Šwjele. Přizamknjetej so Jana Arnošta Smolerja počesćacej přednoškaj. Akademija skónči so z přijećom w hosćencu „Burghof“. Tam poskići so tež składnosć k swjedźenskim postrowam hosći.

Samsny dźeń popołdnju změja Maćicarjo swoju hłownu a wólbnu zhromadźiznu.

Pomnikowy wuběrk wuradźował

wutora, 03. nowembera 2015 spisane wot:

Budyšin (ML/SN). Rownišćo Jana Arnošta Smolerja a jeho potomnikow na Budyskim Hrodźišku bu lětsa nalěto dowobnowjene a je tuž za klětuše 200. narodniny narodneho prócowarja, nakładnika a šefredaktora Serbskich Nowin spřihotowane. Předsydka pomnikoweho wuběrka Maćicy Serbskeje Trudla Malinkowa zdźěli tole tydźenja na zeńdźenju wuběrkownikow. Maćičny gremij bě restawraciju poslednjeho wotpočinka Smolerjec swójby hižo před lětami nastorčił. Pismo na kamjenjach bu znowa wobarbjene, płót wokoło rownišća zwuporjedźany, kwětki nasadźane a na zemi namakany křiž zaso nad narownym kamjenjom připrawjeny. Wjace hač 15 000 eurow za restawrowanje su město Budyšin, Załožba za serbski lud a Maćica podźělnje zapłaćili.

Serbske lipy k 500. jubilejej reformacije

póndźela, 02. nowembera 2015 spisane wot:

Slepo (ML/SN). Klětu wočakuja ewangelskich Serbow zaso někotre wjerški, kaž budźetej to tež 70. serbski cyrkwinski dźeń 28. a 29. meje w Slepom a 20. awgusta dworowy swjedźeń we Wuježku. Hižo 27. februara zetkaja so čłonojo Bjesadow k prěnjej klětušej dźěłarničce w Bukecach, na kotruž su dalši Serbja wutrobnje witani. Zetkanje młodych serbskich ewangelskich swójbow planuja wot 1. do 3. oktobra w Mužakowje z dwurěčnymi kemšemi w Slepom.

Čłonojo Serbskeho ewangelskeho towarstwa schwalichu tele a dalše přede­wzaća na swojej hłownej zhromadźiznje sobotu w Slepom. Tamniša fararka Jadwiga Malinkowa bě schadźowanje na reformaciskim dnju z nutrnosću w cyrkwi zahajiła. Wona skedźbni na wuznam dnja, na kotrymž bě před 498 lětami reformator Martin Luther swoje 95 tezow přećiwo njedostatkam w tehdyšej cyrkwi wozjewjał. Wobdźělnicy nutrnosće zanjesechu kěrluše, kaž Lutherowu hymnu reformacije „Jed’n twjerdy hród“. Fararka Malinkowa rozłoži tež wulki wuznam tohole do wjace hač 25 rěčow přełožowaneho kěrluša, kotryž křesćanow we wěrje zesylnja a pozbudźa.

Wjesnjanosta wšu prócu podpěruje

pjatk, 30. oktobera 2015 spisane wot:

Předsydstwo župy „Jan Arnošt Smoler“ Budyšin je so wčera na gmejnskim zarjedźe w Rakecach schadźowało, zo by so wo serbskej rěči w zjawnosći tamnišeje gmejny dorozumiło. Přitomny wjesnjanosta Sven Nowotny (CDU) podpěruje wšu prócu, zachować serbsku rěč w Rakečanskej gmejnje.

Rakecy (kl/SN). W pěstowarni w nošer­stwje Křesćansko-socialneho kubłan­skeho skutka maja we Witaj-skupinje 14 dźěći zwjetša z němskich swójbow. Pěstuja serbske nałožki, kaž mejemjetanje, hdźež dźěći serbsku drastu woblěkaja. Starši su kubłarce dobry partner, rozprawještej zastupowaca wjednica Carmen Wolf a kubłarka Lejna Šołćina. Dorozumichu so na to, na nazymskim informaciskim zarjadowanju zarjadnišća staršim wuknjenje rěčow pola dźěći rozłožić a dalši zajim za serbšćinu budźić.

Přihoty na lětušu schadźowanku běža

srjeda, 28. oktobera 2015 spisane wot:

Budyšin (SN/bl). Na mjeztym hižo 141. schadźowanku hotuja so tuchwilu studenća z Drježdźan, Lipska a dalšich uniwersitnych městow. Woni pisaja načasne kabarety, studentski chór pilnje zwučuje, dalši pasla rekwizity. Tež najwšelakoriše zarjadniske a organizatoriske dźěła maja so hišće wukonjeć.

Syman Hejduška je dirigent studentskeho chóra a chcył přihladowarjow tež lětsa zaso z potpurijom pěsnjow zwjeselić. Wjace hač třiceći studentow je so dotal přizjewiło, zo bychu program lětušeje schadźowanki sobu wuhotowali.

Wo program pak njestara so jeničce studentski chór. Tež šulerjo Serbskeho gymnazija Budyšin tam swoje zamóžnosće pokazaja. Chór 1. serbskeje kulturneje brigady pod nawodom Friedemanna Böhmy chce na schadźowance wuběr spěwow z lětsa nahrawaneho oratorija „Wětrnik a časy“ z pjera Měrćina Weclicha a Madleny Nasticcyneje zanjesć. Rejwanska skupina gymnazija za swój lětuši přinošk tydźensce trenuje.

Biskopicy (SN). Wo dźěćace wozyčki, zymsku drastu a črije prosy Towarstwo Cyrila a Metoda (TCM) ze swojej akciju „Łužica pomha“ za ćěkancow, kotřiž buchu­ we Łužicy zaměstnjeni. Po naprašowanjach, hdźe móhli pomhać, bu TCM na to skedźbnjene, so w Biskopicach na Čerwjeny křiž wobroćić. Tam zdźěli dispatcher Torsten Haufe, zo trjebaja w Biskopičanskej přebywarni za ćěkancow předewšěm dźěćace wozyčki, „dokelž wjele dźěći sobu přichadźa. Nimo toho je zymska drasta za dźěći a dorosćenych, za muži kaž za žony, trěbna, runje tak črije­ we wšěch wulkosćach.“ Wotedać hodźa so dary w běrowje Čerwjeneho křiža w Biskopicach, Póckowska (Putzkauer Straße) 12 stajnje wot póndźele hač do štwórtka wot 9 do 11.30 hodź. kaž tež wutoru wot 13 do 16 hodź. Dale móžeće pod telefonowym čisłom 0 35 94/ 70 31 34 indiwiduelnje wujednać, hdy hodźeli so dary nimo toho wotedać, informuje předsyda TCM Jurij Špitank.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND