Přihotuja jubilejny koncert

srjeda, 17. februara 2016 spisane wot:

Konjecy (SN). Serbski muski chór Delany chce swoje 45lětne wobstaće z jubilejnym koncertom woswjećić. Mužojo wuhotuja jón njedźelu, 1. meje, w Šunowskej Fabrikskej hospodźe. Na to su so čłonojo předsydstwa dojednali a wčera w Konjecach dalše konkretnosće wobrěčeli.

Mjez druhim chcedźa na koncerće po­dać mały přehlad spěwneho składa, kotryž je sej chór w běhu štyriapoł lětdźesatka wobstaća přiswojił. Nimo pěsnjow ze spočatkow chcedźa tež nowe kruchi předstajić. „Planujemy tohorunja tu abo tamnu překwapjenku z wobrazami a filmowymi sekwencami“, přeradźi městopředsyda Daniel Wjesela našemu wječornikej. Přeprosyć chcedźa sej za program hóstnych sobuskutkowacych. Koho, njebě z předsydstwa zhonić. Wozrodźenej małej skupinje muskeho chóra chcedźa zmóžnić so předstajić. Tuchwilu přihotuje předsydstwo zastupne lisćiki, kotrež budu wot apryla na předań. Nowosć lětsa budźe, zo poskića po koncerće wječer.

Na šulskich konferencach pódla

štwórtk, 11. februara 2016 spisane wot:

Zastupnicy Domowiny smědźa w šulskich konferencach sobu skutkować. Tole dowola braniborski Serbski zakoń.

Choćebuz (HA/SN). Wot lěta 2014 płaćiwy ponowjeny serbski zakoń w Braniborskej postaja mjez druhim, zo móža zastupjerjo Domowiny w župje Delnja Łužica w šulskich konferencach sobu skutkować. Tele konferency su najwažniše zjawne gremije na šulach. Župa tuž móžnosće derje wužiwa. Na Delnjoserbskim gymnaziju a na šěsć zakładnych šulach, na kotrychž wuwučuja serbšćinu z pomocu projekta Witaj, su wot lońšeho čłonojo předsydstwa a dalši Domowinjenjo zastupjeni. Jich bě sej župne předsydstwo na wčerawše wuradźowanje w Cho­ćebuzu přeprosyło.

Protyka 2016 jako zhromadny projekt šulerjow

srjeda, 10. februara 2016 spisane wot:

Wojerecy (WS/SN). Přirada za serbske naležnosće města Wojerec je loni w septembrje molowanske wubědźowanje za wšitke 4. lětniki Wojerowskich šulow wupisała. Wotpohlad bě, zo so šulerjo ze žiwjenjom Serbow we Wojerecach na wuměłske wašnje zaběraja. Jara aktiwnje dźěłachu na tutym projekće w Zejlerjowej šuli z podpěru rjadowniskeje wučerki Sylwije Wjeńcyneje. Zahoritosće dźěći dla wutworichu dźěłowu skupinu šulerjow rjadownjow 4a a 4b, kotraž zetkawaše so dźesać króć pjatk po regularnej wučbje. Šulerjo zhromadnje rozmyslowachu, na kotre wašnje móhli nazběrane serbske temy zwobraznić a kotre techniki bychu so k tomu hodźeli. Za wobraz „Serbske napisy“ podachu so samo z kameru na rešeršu. Dale wužiwachu internet a započachu kónc lěta 2015 twórby we wšelakich technikach zhotowjeć. Nimo toho zestajachu 26 šulerjow jako zhromadny projekt protyku za lěto 2016 z mólbami a tekstami k wjerškam kóždeho měsaca, poćahujo so na Wojerecy. Cyłkownje bě 36 šulerjow wobdźělenych.

Hižo něhdźe 70 čłonow

wutora, 09. februara 2016 spisane wot:

Góry (HA/SN). Domowinska skupina na Górach je jedna z najmłódšich mjez cyłkownje 40 skupinami župy Delnja Łužica. Hakle před něhdźe třomi lětami bu wona znowa załožena, po tym zo bě tajka hižo za čas NDR w serbskej wsy Bórkowskeho zarjada skutkowała. Z něhdźe dwaceći čłonami je so wona lěta 2013 wutworiła, předewšěm młodźi wobydlerjo jej přistupichu. Mjeztym liči tale Domowinska skupina hižo něhdźe 70 sobustawow. Su to zwjetša młodostni, tola tež srjedźna a starša generacija stej zastupjenej. Górska skupina liči z tym, zo lětsa hišće dalšich čłonow do njeje zdobudu.

Najwjetšu zasłužbu na tymle wuwiću na Górach ma studentka sorabistiki w Lipsku Jennifer Dünnbierojc. Młoda Delnjoserbowka, kotraž chce so ze serbskej wučerku stać, je zdobom předsydka skupiny a zastupuje ju w Zwjazkowym předsydstwje Domowiny. Domowinska skupina na Górach je so mjez druhim wo to postarała, zo haja we wsy po lětach přestawki zaso delnjoserbski nałožk zabiwanja kokota.

Zabjeru stejišćo k změnje zakonja

srjeda, 03. februara 2016 spisane wot:

Choćebuz/Budyšin (SN/JaW). Prezidij Zwjazkoweho předsydstwa Domowiny chce so 24. februara z namjetami za ponowjenje sakskeho šulskeho zakonja zaběrać. Wo tym je předsyda Domowiny Dawid Statnik zwjazkowe předsydstwo na posedźenju minjenu sobotu w Choćebuzu informował. Byrnjež so tuchwilu žane widźomne wuskutki za Serbow njewujewili, chcyłoj so Domowina kaž tež Rada za serbske naležnosće Sakskeje k namjetam wuprajić, zdźěli Statnik. Krótkodobnosće dla – hač do 7. měrca maja so přispomnjenja zapodać – chcyli wo tym w prezidiju Domowiny wuradźować a namjet za zapodaće z nawodnicu kubłanskeho wuběrka dr. Beatu Brězanowej wothłosować. Dr. Brězanowa skedźbni na to, namjety dokładnje pruwować, hač so mjez druhim změny spěchowanja šulerjow snano na serbskej internataj w Budyšinje a Choćebuzu njewuskutkuja. Zdobom wona rjekny, zo měła Domowina w swojim stejišću wupady wučby tež na serbskich šulach wobkedźbować a tematizować. Runje tak měli pruwować, w kotrej měrje móhli so personalne ćeže, potajkim njedostatk wučerjow, na wučbu serbšćiny wuskutkować.

Čłonstwo w FUEN so wudani

wutora, 02. februara 2016 spisane wot:

Choćebuz (SN/JaW). Čłonstwo Domowiny w Federalistiskej uniji europskich narodnych mjeńšin (FUEN) so za Serbow wulce wudani. Tole je facit rozprawy wo skutkowanju jednaćela třěšneho zwjazka w prezidiju organizacije narodnych mjeńšin. „Serbja wjace z dźěławosće profituja, hač za to nałoža“, rozłoži jednaćel Domowiny Bjarnat Cyž, kiž je zdobom wiceprezident FUEN, minjenu sobotu na wuradźowanju Zwjazkoweho předsydstwa Domowiny w Choćebuzu. „Němcy drje nas tak jara na wědomje njebjeru, wukraj za to ćim bóle“, Cyž podšmórny. Wuhotować wulkoprojekty kaž mjez druhim dwulětnje mjezynarodny folklorny festiwal, to žněje po jeho słowach wulku kedźbnosć na swěće. „Nimo toho smy sej jako Serbja w FUEN wulku kompetencu a připóznaće zdobyli, zo nam rady financy za wšelke projekty přewostajeja.“ Tež němske instancy su za tym přišli, kaž Cyž rjekny.

Stare filmy a nowe nazhonjenja

póndźela, 01. februara 2016 spisane wot:

Radwor (BHR/SN). Na zabawny wječor w „Słodeńku“ je minjeny pjatk Radworski chór Meja přeprosył. Organizator Beno Bělk powita tam něhdźe 50 zajimcow. Takrjec „wuhrjebał“ bě wón rjad starych filmow a filmowych sekwencow z poćahom k Radworjej abo k Serbam. ­Bělk rozprawješe, po kotrych zdźěla njelochkich pućach je tele časowe ­dokumenty nadešoł: na přikład film ­italskeje telewizije RAI z lěta 1985, w kotrymž předstajichu čłonojo chóra Meja serbski kwas. Wulki zajim zbudźi mjez wopytowarjemi pask z časa NDR, jako ­nawjerćachu pola Hantušec swójby w Radworju sceny wo ptačim kwasu. Tam sobu skutkowacy su zwjetša hišće žiwi, byrnjež dźensa ně­hdźe 60 lět starši byli. Tež pask z Chrósćic z lěta 1972 zbudźi kedźbnosć a posměwk mjez přihladowarjemi.

Mjez předstajenjom filmow bě rozprawa Jana Nuka wo jeho lońšim přebytku w Južnej Africe zapołožena. Z fotami rysowaše wón swoje dźěło w misionskej staciji, hdźež wšědnje wjacore sta ludźi z jědźu zastaruja. Tež wo ludźoch, wo jich formach zwuraznjenja a pěstowanja wěry, wo přirodźe a wo zwěrjatach Nuk nazornje přednošowaše.

Prěnje terminy hižo jasne

pjatk, 29. januara 2016 spisane wot:

Chrósćicy (KJu/SN). Na swojej wčerawšej prěnjej zhromadźiznje w nowym lěće je předsydstwo Kamjenskeje župy „Michał Hórnik“ zarjadowanja a projekty, kotrež bě sej do dźěłoweho plana zapisało, skonkretizowało a terminy postajiło.

Tak planuje župa hižo za 28. februar prěni wjeršk. Zhromadnje z Rěčnym centrumom WITAJ přeprošuje wona dźěći, starši, dźědow a wowki na mjeztym 6. swójbnu schadźowanku do Chróšćanskeje „Jednoty“. Tam chcedźa nimo popołdnja ze serbskim kuzłarjom tež paslenske a sportowe zaběry, čitanski stan, krosnowanje a rejwanje, strowe zežiwjenje kaž tež zabawu z wu­knjenskimi a kompjuterowymi hrami skićić. Starši móža při kofeju a tykancu bjesadować. Zežiwjenska poradźowarka Rafaela Wićazowa wěnuje so k temje „Strowa snědań“.

W měrcu wotměje župa dźěłarničku za młode žony a holcy „Kak so sama katolsku narodnu drastu woblěkam“. Tuchwilu župa hišće wo konkretnym terminje jedna. Ručež budźe tón jasny, jón tež na facebookowej stronje župy wozjewja.

Čas bjez předsydy wužitny był

srjeda, 27. januara 2016 spisane wot:

Po štyrjoch lětach přestawki ma Domowinska skupina Pančicy-Kukow zaso předsydu. Na hłownej zhromadźiznje minjenu srjedu su skupinarjo Pětra Korjeńka do zastojnstwa wuzwolili. Před pjeć lětami bě so Kukowčan do skupinskeho předsydstwa wolić dał a chcyše najprjedy raz počuchać, kotre struktury w předsydstwje knježa a štó ma kotre nadawki zmištrować. Mjeztym je sej 65lětny dobry přehlad stworił a zwěri sej nawodnistwo přewzać. „Hdyž widźu, kak je Beno Paška funkciju wjele lět tak derje wukonjał, mam wěsty respekt před nadawkom. Nětko chcu jeho dźěło w dobrej kwaliće dale wjesć“, praji Korjeńk.

Z nowym předsydu na čole

štwórtk, 21. januara 2016 spisane wot:

Pančicy-Kukow (BW/SN). Po štyrjoch lětach bjez nawody ma Domowinska skupina Pančicy-Kukow z Pětrom Korjeńkom zaso předsydu. Jeho, dalšeju dotalneju čłonow předsydstwa Marju Ošikowu a Pětra Šołtu kaž tež nowych čłonow Marianu Koklic, Wóršu Rabec a Mariana Wjeńku wuzwoli něhdźe 30 skupinarjow wčera na swojej hłownej zhromadźiznje do předsydstwa.

W rozprawje rysowaše Pětr Korjeńk aktiwity skupiny z 90 čłonami w zašłym lěće. Mjez druhim so poradźi, hladanje pomnika Jakuba-Barta Ćišinskeho w Lipju pisomnje w formje zrěčenja zrjadować. Tak je zaručene, zo staraja so nimo čłonow Domowinskeje skupiny tež Šula Ćišinskeho, dźěłarnje za zbrašenych swj. Michała a klóšter Marijina hwězda wo teren w Lipju. Tam planuja lětsa do jutrow a w juniju rjedźenskej akciji. Kaž Alfons Kuring informowaše, su tež nastupajo přichod wopomnišća Ćišinskeho w šuli na dobrym puću. Štóž chce sej muzej wobhladać, dóstanje za to kluč pola nawodnicy šule abo w gmejnskim zarjedźe.

nawěšk

SERBSKE NOWINY podpěruja:

Novi Sad – kulturna stolica Europy

  • Serbska lajska dźiwadłowa skupina Šunow-Konjecy je swoju nowu komediju "Ludźo njedźiwaće so" 9. nowembra prapremjernje w Šunowskej Fabrikskej hospodźe předstajiła. tule namakaće někotre impresije z inscenacije. 

Tohorunja tón kónc tydźenja su w Ketl

nowostki LND