Wobstajny angažement trěbny

srjeda, 18. meje 2016 spisane wot:

Slepo. Na mjeztym 7. dźěłarničce přichoda „8 wsow – 1 wosada“ je so 30 zastupjerjow ze wšelakich towarstwow a institucijow wobdźěliło. Mjez nimi běštaj tež Slepjanski wjesnjanosta Reinhard Bork (CDU) a Měrćin Nowak, čłon serbskeje přirady wokrjesa Zhorjelc.

Župa „Jakub Lorenc-Zalěski“ bě hromadźe ze socialnej syću a Serbskim institutom Budyšin minjenu srjedu do Slepjanskeho Serbskeho kulturneho centruma přeprosyła. W srjedźišću steještej projektaj Witaj a 2plus. Jeju dotalne wuwiće w pěstowarnjach a šulomaj gmejny Slepo su wobdźělnicy wuhódnoćili a wužadanja přichoda rozjimali.

Porjedźenka We wudaću Serbskich Nowin dźens tydźenja je so zmylk zadobył. W gratulaciji k 65. narodninam jednaćela Domowiny Bjarnata Cyža smy mylnje pisali, zo bě wón 1987 prěni sekretar zwjazkoweho předsydstwa. To njetrjechi, zastojnstwo zastawaše tehdy Jurij Grós. Prawje ma rěkać, zo bě Cyž prěni sekretar Domowiny, kiž njebě čłon strony SED. Prosymy wo wodaće za misnjenje. Redakcija SN

Je najskerje lědma domjacnosće, kotraž dźensa płokansku mašinu nima. Techniski­ nastroj z tójšto elektroniku nam žiwjenje wolóža. Zo běchu tež hinaše­ časy, zhoniš nětko w zajimawej wustajeńcy.

Łaz (AK/SN). Trjenčka zmawuja na powjazu při Łazowskim Domje Zejlerja a Smo­lerja. Z jednotliwych pismikow wučitaš „płokanski dźeń“. „Chcemy pokazać, kak sprócne domjace dźěło bě, što su hospozy wšo wobkedźbować dyrbjeli a kak wobšěrny tajki płokanski dźeń bě“, podšmórnje předsyda spěchowanskeho towarstwa Domu Zejlerja a Smolerja Reinhardt Schneider. Dźensa su tam nowu wustajeńcu „Šudrawa, čwor a mydło – płokanski dźeń za čas wowkow“ wotewrěli.

Bjarnat Cyž (nalěwo) swjeći dźensa 65ćiny. Najmłódše stawizny Domowiny su z jeho mjenom kruće zwjazane. 1987 bě wón prěni sekretar jeje zwjazkoweho předsydstwa. W přewrótowym času zastupowaše Cyž Domowinu za kulojtym blidom Drježdźanskeho­ wobwoda. Wurjadny kongres Domowiny 17. měrca 1990 wuzwoli jeho za předsydu, wot lěta 1992 nawjeduje wón Domowinski zarjad. Mjez gratu­lantami z třěšneho zwjazka a serbskich institucijow bě dopołdnja w Serbskim domje­ tež bywši direktor Załožby za serbski lud Marko Suchy. Foto: Jurij Helgest

Serbskemu spěwej 45 lět swěrni

póndźela, 02. meje 2016 spisane wot:

Na połnej žurli Šunowskeje Fabrikskeje hospody je Serbski muski chór Delany wčera popołdnju 45lětne wobstaće swjećił a wopytowarjam ze spěwnym koncertom dušu zhrěł.

Šunow (bn/SN). Serbski muski chór Delany je wčera ze swjatočnym swjedźenskim koncertom w Šunowskej Fabrikskej hospodźe 45. narodniny swjećił. Mjez něhdźe 130 zahorjenymi wopytowarjemi bě nimo čestnych čłonow a něhdyšich dirigentow chóra tež předsyda Domowiny Dawid Statnik, kiž spěwarjam w mjenje třěšneho zwjazka a Kamjenskeje župy wutrobnje gratulowaše. „Dźak wam za swěru, z kotrejž serbski spěw posrědkujeće. Wostańće dale w mysli a wutrobje serbscy“, Statnik rjekny. Zastupowacy wjesnjanosta Tomaš Bjeńš přepoda chórej­ pjenježny dar a zwurazni přeće, „zo tež přichodnje našu hudźbu z wjeselom dale pěstujeće“. Tomu so zastupjerjo lajskeje dźiwadłoweje skupiny Konjecy-Šunow a chóra Lipa přizamknychu. Kapała­ Horjany hosćićelow a publikum z lóštnymi štuckami překwapi, zapiska na kóncu „Chcył něhdy w holi Mužakec“ a cyła žurla sobu spěwaše.

Zhromadnje z pólskimi hosćimi ze Żar su dźensa při pomniku na Chróšćanskej Fulkec­ hórce padłych pólskich wojakow wopominali.­ Předsyda Domowiny Dawid Statnik, županka Zala Cyžowa, wjesnjanosta Marko Kliman (CDU) a dalši połožichu tam kwětki. Wopomnjensku swjatočnosć wobrubištej chór z Pólskeje a Chróšćanska zakładna šula. Foto: Feliks Haza

Dźewjeć Sokołow na europeadu nominowanych

štwórtk, 28. apryla 2016 spisane wot:

Hnydom dźewjeć koparjow Sokoła Ralbicy/Hórki je nominowanych za Serbsku koparsku wubranku muži, kotraž pojědźe w juniju na 3. europeadu do Južneho Tirola. To zdźěli předsyda sportoweho towarstwa Dirk Šewc na wčerawšej hłownej zhromadźiznje w Ralbicach. Tale ličba je wjetšinu přitomnych pozitiwnje překwapiła.

Ralbicy (jh/SN). Zhromadźizna najwjetšeho sportoweho towarstwa w Delanach ze wšěmi zamołwitymi wotrjadow kopańca, volleyball, gymnastika a kehelowanje bě nuznje trěbna, dokelž bě spočatk lěta finacny zarjad ćišć na towarstwo wukonjał, žadajo sej rozprawu za lěto 2015. Dirk Šewc rysowaše aktiwity minjeneho lěta a skedźbni hišće raz na přewšo poradźenu jubilejnu sportowu wuměnu ze Sokolom Spálené Poříčí a na partnerske styki gmejny Ralbicy/ Róžant z městom Spálené Poříčí. Prěni raz móžeše Šewc volleyballistej Sokoła gratulować. Ingolf Rachel bě minjeny tydźeń D-licencu za sudnika wobstał. Rodźeny Šunowčan smě nětko jako prěni sportowc Sokoła Ralbicy/Hórki winowatostne volleyballowe hry hač do wobwodneje ligi sudźić.

Budyšin (kl/SN). Předsydstwo župy „Jan Arnošt Smoler“ Budyšin je so na swojim wuradźowanju wčera znowa wo šulskich prašenjach dorozumiło. Tak poskića wot šulskeho lěta 2016/2017 serbšćinu na zakładnej šuli w Hućinje, za čož hižo wjacore přizjewjenja předleža. Na Bartskej zakładnej šuli podawaja serbšćinu jako cuzu rěč a nic kaž dotal w rozšěrjenym modelu. Šulerjo wuknu ju tam w 1. lětniku jednu hodźinu tydźensce. Župnemu předsydstwu je dźěło ze staršimi a z pěstowarnju w Malešecach wažne, runje tak tež dalša podpěra Bartskej šuli. Staršim ma so wuwědomić, zo je serbskorěčne kubłanje w pěstowarni zwjazane z tym, zo dźěći po tym tež w šuli rěč dale wuknu. Tele wědomje ma so dale skrućeć. Wučbny poskitk serbšćiny hodźi so z cyłodnjow­skim poskitkom w popołdnišim času wudospołnić. Župne předsydstwo chce so wo wosobu prócować, kotraž móže tónle zaměr podpěrać, a budźe ju zamołwitym posrědkować.

Program za nadobny zaměr

póndźela, 25. apryla 2016 spisane wot:

Beneficny koncert Towarstwa swj. Filomeny z nahladnym wuslědkom

Łazk (aha/SN). Mjeztym 12. beneficny koncert dožiwi wčera 380 wopytowarjow před wulkotnej kulisu Łazkowskeho niwoweho lěsa. Organizowało bě jón znowa Towarstwo swjateje Filomeny ze swojim agilnym předsydu Geratom Róblom. Moderatorka programa Diana Fryčec-Grimmigowa je po spodobnym hudźbnym zazběhu dujerskeje kapały Horjany tež zastupjerjow maćerno-dźěćaceho domu swj. Wincenca z čěskeho Dolneho Podluží kaž tež předsydku towarstwa Odysseé z bołharskeho města Razgrada Sylwiju Walewu witała. Wjedro drje bě zymne a měnjate, znajmjeńša dešćowało pak so za čas programa njeje.

Chlěb pjekli

póndźela, 25. apryla 2016 spisane wot:
W 115 lět starej pjecy pječeny chlěb bě sobotu jedyn z wjerškow nalětnjeho swjedźenja na Ćišćanskim statoku. Pjekar Nico Thäle tam hromadźe z pomocnikami štyri razy wob lěto staru pěc zapyrja. Foto: Katrin Demczenko

nawěšk

SERBSKE NOWINY podpěruja:

Novi Sad – kulturna stolica Europy

nowostki LND