Žórła kěrlušow lěpje dodnić

štwórtk, 24. januara 2019 spisane wot:

W času kaž dźensa, hdyž swět za poprawnymi žórłami slědźi, je načasu tež žórła serbskich kěrlušow lěpje dodnić. Toho běchu sej wčera wječor w Budyskim Serbskim­ domje zhromadźeni přezjedni.

Budyšin (mkc/SN). Michał Jan Wałda – serbski kěrlušer? Z tym prašenjom zaběrachu so čłonojo sekcije hudźba Maćicy Serbskeje wčera wječor w Budyšinje. Wjace­ hač 90 melodijam je w nětčišim Wosadniku za katolskich Serbow jako žórło Michał Jan Wałda 1787 připokazane. Wony Serb a Budyski tachant wuda 1787 pod titulom „Spěwawa Jězusowa Wincza“ jako zběrku serbskich katolskich kěrlušowych 659 tekstow. K nim přirjadowaše we wosebitym wudaću samsne lěto 238 melodijow, a za praktisku po­trjebu jako třeće dźěło nad kěrlušemi wustaji wón melodije z generalnym basom. W podtitulu Choralneje knihi Michał­ Jan Wałda sam wuzběhnje, zo je melodije nahromadźił a wudał.

Wobzamknjenje

štwórtk, 24. januara 2019 spisane wot:

Župna hłowna zhromadźizna namjetuje 19. hłownej zhromadźiznje Domowiny nastorčić ewaluaciju wučby serbšćiny w najšěršim zmysle w serbskim sydlenskim rumje w Sakskej, zo by wučba serbšćiny za kóžde dźěćo na wysokim niwowje dale zaručena była.

Delegaća hłowneje a wólbneje zhromadźizny župy „Jan Arnošt Smoler“

Budyšin, dnja 19. januara 2019

Serbscy čłonojo rady Załožby za serbski lud su přezjednje za nowotwar Serbskeho instituta (SI) a Serbskeho kulturneho archiwa (SKA) na terenje Lawskich hrjebjow hłosowali. W předłoze wobzam­knjenja rěka, zo ma so nimo SI a SKA tež Serbska kulturna informacija (SKI) potom do noweho twarjenja přesydlić a zo ma wone potom jako zetkanišćo Serbow a Němcow słužić.

Serbski dom steji w tradiciji towarstwoweho domu Maćicy Serbskeje a bu jako tajki po Druhej swětowej wójnje na druhim městnje znowa natwarjeny. Wose­bje Serbja ze wsy su sej z dźěłom a swójskimi pjenjezami tak swój towarstwowy dom wutworili. Zničeny Maćičny dom běše woprawdźity duchowno-kulturny centrum Serbow. A tomu měješe tež nowy Serbski dom na Budyskim Póstowym naměsće wotpowědować.

Wuwiće w nowšim času – hižo z tym, zo běchu Serbsku kofejownju a do toho tež klubownju w domje zawrěli –, je narok domu zanjechało. Loni nětko je rozhłós MDR přizjewił, zo ma jeho kom­pletne studijo ze Serbskeho domu wućahnyć. To rěka, zo budźe wot klětušeho wjace hač cyła etaža prózdna stać.

Tež Serbski dom je rěčny rum

štwórtk, 24. januara 2019 spisane wot:

Wěcowna a na aktualne problemy poća­howana bě diskusija na hłownej a wólbnej zhromadźiznje Domowinskeje župy „Jan Arnošt Smoler“ sobotu w Budyskim Serbskim domje.

„Fakt je, zo su zjawne móžnosće, serb­šćinu wužiwać, dźeń a wobmjezowaniše a zo němčina wosebje w słabšich kón­činach našeje župy dale přiběra.“ Sada z rozprawy předsydstwa hłownej a wólbnej zhromadźiznje župy „Jan Arnošt Smoler“ minjenu sobotu w Budyšinje pokazuje na njespokojace rěčne połoženje. Župa chce sej přiběrajcy „wosebje ze stron komunalnych a statnych zamołwitych wužadać“, telko kaž móžno składnosćow za nałožowanje maćeršćiny tworić.

W Budyskim Serbskim domje stej wčera generalna konsulka Čěskeje republiki w Drježdźanach dr. Markéta Meissnerová (srjedźa)­ a jeje zastupnica Lenka Konšelová (2. wotlěwa) dźěłowu rozmołwu ze zastupnikami Domowiny přewjedłoj. Nimo hižo dołho wobstejacych čěsko-serbskich stykach a kubłanju bě tež rěč wo serbskim kulturnym lěće w Liberecu. Na rozmołwje wobdźělichu­ so předsyda Domowiny Dawid Statnik (nalěwo) jednaćel Marko Kowar (2. wotprawa) a nawodnica RCW dr. Beata Brězanowa (naprawo). Foto: Matej Dźisławk

Zasadnje reagować

srjeda, 23. januara 2019 spisane wot:
Ze žadanjom, ewaluěrować tež serbskorěčne kubłanje w Sakskej, su so wobdźělnicy wólbneje zhromadźizny župy „Jan Arnošt­ Smoler“ na 19. hłownu zhroma­dźiznu Domowiny wobroćili. Wčera je zapósłanc Hajko Kozel, kiž bě na zarjadowanju přitomny, naležnosć jako politikar te­matizował. Wobě reakciji stej najnowšej wójmidle w rjećazu njespokojnosće z wuslědkami serbskeho kubłanja w Sakskej. Njedostatk tomu polěkuje, zo so tež składnosće rěč nałožować pozhubjeja. Nimaš-li hižo dosć wulku ličbu maćernorěčnikow, je rěč ćim wohroženiša. Wona so wosebje tam spěšnišo pominje, hdźež njeje kubłanišća. Tohodla ma kwalita wučby serbšćiny w Sakskej tež něšto z dźeń a mjenje serbskorěčnymi rumami činić, kaž su načolnicy serbskich institucijow přisłušnym ministram pisali. UNO je 2019 jako „lěto indigenych rěčow“ woznamjeniła. 19. hłowna zhromadźizna Domowiny změje tuž nadawk, na njespokojacy staw zasadnje reagować. Axel Arlt

Swěrnej čłonce so dźakowali

wutora, 22. januara 2019 spisane wot:

Malešecy (SN/at). Čitanske popołdnjo z Róžu Domašcynej w oktobrje bě wjeršk w lońšim skutkowanju Malešanskeje Domowinskeje skupiny. Zarjadowanje njeje jeno skupinarjow přiwabiło, ale žněješe runje tak mjez seniorami wulki wothłós. Tohodla su sej lětsa znowa tajke čitanje do dźěłoweho plana zapisali, kaž bě wčera na hłownej wólbnej zhromadźiznje cyłka zhonić. Prěni raz běchu so Malešanscy Domowinjenjo loni nazymu na grilowanje zetkali. A wšitkim je so tak spodobało, zo budu to lětsa wospjetować. Zwjetša starše čłonstwo wjeseli so hižo na 13. mjezynarodny folklorny festiwal „Łužica“ w Budyšinje a Chrósćicach. Kruće do protyki zapisane su zarjadowanja kaž ptačokwasny program Malešanskeje Witaj-pěstowarnje 3. februara we „Wódnym mužu“, předstajenje SLA w Bukecach, lěćny koncert we Worcynje, nazymski koncert w Bukecach a předstajenja NLSDź.

Předsydstwo bu hač na Elke Gerthowu wobkrućene. Dotalna skupinska městopředsydka je zastojnstwo z wosobinskich přičin po 20 lětach złožiła. To skupinarjo jara wobžarowachu. Za jeje angažement su so jej z prezentom dźakowali.

Rozsud wolóžił

póndźela, 21. januara 2019 spisane wot:
Wjesne młodźinske kluby su dotal předewšěm w Kamjenskej župje „Michał Hórnik“ puć pod třěchu Domowiny namakali. Zo je tajki angažement na wužitk młodostnych a zdobom župy, je so mjeztym wokoło powědało. Wězo kiwa podpěra ze župneje pawšale. Wěste financy pak prosće trjebaš za zajimawe młodźinske skutkowanje. Loni su tajke spomóžne nazhonjenja Radworski młodźinski klub docpěli – a to z rozmołwy ze zastupjerjom Chróšćanskeho kluba, kaž Tobias Wencl wobdźělnikam hłowneje a wólbneje zhromadźizny Budyskeje župy „Jan Arnošt Smoler“ rozprawješe. Wón přizna tež powabnosć pjenježneho aspekta. A zo je tón čłonam Radworskeho młodźinskeho kluba rozsud wolóžił, próstwu wo přistup k župje „Jan Arnošt Smoler“ zapodać. Nětko je Radworski klub prěni tajki w Budyskej župje a ma runja Domowinskim skupinam a towarstwam prawo na podpěru ze župneje pawšale. Sym wćipny, za kotry projekt chcedźa ju wužiwać. Axel Arlt

Plan rozjimali

štwórtk, 17. januara 2019 spisane wot:

Budyšin (Łu/SN). Maćica Serbska pře­wje­dźe swoju lětušu hłownu zhromadźiznu 9. měrca na žurli Budyskeho Serbske­ho muzeja. To je předsydstwo towarstwa na swo­jim zašłym wuradźowanju rozsudźiło a zhromadźiznu přihotowało. Kaž z předsydstwa dale rěka, chcedźa Maći­carjo do toho na bywšeho spomóžnje skutkowaceho předsydu Maćicy Serbskeje Michała Hórnika při jeho rowje na Mikławšku spominać. Hórnik je 22. februara 1894 w Budyšinje zemrěł.

Rozjimali su předwčerawšim tohorunja lětny plan. Tak wobdźěla so 30. měrca na „hłownej“ Domowiny a chcedźa diskusiju wo směrnicach třěšneho zwjazka přisporjeć. Dale chcedźa so w Choćebuzu nadrobnje wo serbskosći wobhonić.

Chróšćanska lajska dźiwadłowa sku­pina­ hotuje so na premjeru. Za tři njedźele chce komediju „Čeplski recept“ prěni raz pokazać. Po tuchwilnym stawje­ planuja cyłkownje dźewjeć před­sta­jenjow, mjez druhim w Chrósćicach, Radworju a Njebjelčicach.

Chrósćicy (ZC/SN/bn). Prěni raz po wo­swjećenej 40. róčnicy znowa­za­łoženja towar­stwa Serbska lajska dźiwa­dłowa skupina Chrósćicy před lětomaj steja hrajerjo zaso na jewišću. „Čeplski recept“ rěka nowa komedija, z kotrejž chcedźa tež tónraz zaso směch wuwabić, kaž w zdźělence ćělesa rěka.

Serbska debata

nowostki LND