Aus der aktuellen Ausgabe vom Dienstag, 25 Juli 2017

Na prěni pohlad zda so system logiski być: Štóž so sam pola statneho rěčnistwa přizjewi a njeskutk přiznaje, móže so snadnišeho chłostanja nadźijeć hač tón, kiž to nječini. Što pak je, hdyž je tajki njeskutk, kaž w padźe wulkich němskich awtotwarcow, na wšě 20 lět trał? Lětdźesatkaj su so VW, Daimler, Audi a druzy zetkawali, zo bychu so wo najwšelakorišich techniskich nadrobnosćach, ale přede­wšěm wo płaćiznach dorěčeli. Mnozy drje nětko zhonja, zo su swoje awto předroho zapłaćili. A politikarjo kaž přeco twjerdźa, zo njejsu wo ničim wědźeli. Hižo so někotři boja, zo móhło dobre mjeno němskich awtotwarcow škodu poćerpjeć. To je so po mojim měnjenju dawno stało: Bajka wo čistych dieselowych awtach je so runje tak sypnyła kaž bajka wo raznym konkurencnym boju mjez awtotwarcami, kotryž stajne inowacije wunjese a nam kupcam pječa tyje. Marko Wjeńka

Delnjołužisku drastu zachować a wědu wo njej přichodnym generacijam zachować – tomule nadawkej wěnuje so Carola Geppertowa z Choćebuza. Při tym móže to nałožować, štož je jako wušiwarka nawuknyła. Mjeztym je Žylowsku kemšacu drastu kaž tež Mužakowsku drastu ponowiła. „Bohužel ludźo serbsku drastu wjace tak často njenoša.“ Carola Geppertowa na žadyn pad nochce, zo so wěda wo narodnej drasće jako wobstatk serbskeje kultury pozhubi. Foto: Joachim Rjela

Berlin (dpa/SN). Wjace hač 100 000 ludźi je peticiju podpisało, z kotrejž sej žadaja konjace zapřahi w Berlinje zakazać. Peticiju su mjeztym justicnemu senatorej Dirkej Behrendtej (Zeleni) přepodali, kiž chcył zakaz nětko přesadźić.

Jurij Koch wupraja so k dopisej Uwe Gutschmidta w SN z 19. julija:

Hdy budźe skónčnje zaso prawe lěćo. Tak abo podobnje mysli zawěsće tež tónle rys w Biskopičanskim zwěrjencu. Chětro skeptisce dźě hlada wón ze swojeho hajnišća k njebju, štož wšak při tuchwilnym měnjatym wjedrje z mróčelemi, dešćom a wětřikom njezadźiwa. Tež přichodne dny ma njewobstajne wostać. Foto: Steffen Unger

W swojej lětušej dowolowej seriji předstajamy wosoby, kotrež na někajkežkuli wašnje stawizny zachowuja, zo starožitnosće zběraja a je zdźěla zjawnosći spřistupnjeja.

Wokrjes poskića městu Kamjencej płuwansku halu za symbolisku płaćiznu

Kamjenc (UM/SN). Wokrjes Budyšin je Lessingowemu městu Kamjencej poskićił, jemu płuwansku halu na Macherowej hasy za jenički euro předać. To wuchadźa z lista 1. přirjadnika Budyskeho krajneho rady Uda Wićaza (CDU) Kamjenskemu wyšemu měšćanosće Rolandej Dantzej (njestronjan), kotryž tež Serbskim Nowinam předleži. W lisće skedźbnja Wićaz hišće raz na to, zo hospodarski plan Budyskeho wokrjesa „wot šulskeho lěta 2018/2019 hižo žane etatowe srědki za dalše wobhospodarjenje kupjele njewopřijima“. Nimo toho su wšitke dalše płuwarnje w zamołwitosći jednotliwych městow­, komunow abo zaměrowych zwjazkow.

„Wuchadźejo ze zamołwitosće města Kamjenca a wobkedźbujo jeho dalše wuwiće poskićamy wam kup płuwanskeje hale za płaćiznu jednoho eura“, piše 1. přirjadnik krajneho rady mjez druhim Kamjenskemu wyšemu měšćanosće Rolandej Dantzej.

Něhdźe 50 potomnikow kublerskeje swójby von Loebenstein je minjenu sobotu Łaz wopytało. Při tym storčichu zas a zaso na slědy swojich prjedownikow, mjez druhim tež w tamnišim Domje Zejlerja a Smolerja, w cyrkwi, na kěrchowje a ćěłowni kaž tež na bywšim rownišću swójby. Najstarši wobdźělnicy swójbneho zetkanja běchu 87lětna Gisela von Loebenstein, 71lětny Robert von Loebenstein a 81lětna Alice von Loebenstein (wotlěwa). Łaz bě jedna stacija cyłodnjowskeho wulěta zetkanja swójby von Loebenstein, kotrež wotměchu z cyłkownje 120 wobdźělnikami minjeny kónc tydźenja w Smochčanskim Domje biskopa Bena. Foto: Andreas Kirschke

Budyšin (SN). Při Budyskim Cyhelowym nasypje kładu tuchwilu dalokoćopłotnu trasu. Z teje přičiny wostanje dróha při Cyhelowym nasypje hač ke křižowanišću při inženjerskej šuli hač do 2. awgusta zawrjena. Přijěducy ze Strowotneje studnje móža šoferojo wobjězdku Thomasa Müntzerowu–B 156 – Lubijsku –Kamjentnu wužiwać. Busowe linije pojědu do wobeju stron po Liebknechtowej–Stieberowej–Müntzerowej.

Handy wažniši był hač wobchad

Rakecy. Policija prosy wo pomoc při wujasnjenju njezboža. Na Rakečanskej Zahrodowej bě sobotu kolesowar do Daewoowa zrazył – wón bě so bóle handyjej wěnował hač wobchadej – a ćeknył. Na awće nasta škoda něhdźe tysac eurow. Policija pyta za něhdźe 25lětnym 1,75 metrow wulkim mužom z krótkimi čornymi włosami. Koleso měješe tak mjenowane buwołowe wodźidło. Informacije přijimuje Wojerowski policajski rewěr.