Dostudowani wučerjo móža bórze intensiwnje serbšćinu wuknyć
Drježdźany/Budyšin (SN/MiR). Prěni wobsahowy poskitk za natwar noweje serbskeje rěčneje šule steji. Tole wobkrući zapósłanc Sakskeho krajneho sejma Marko Šiman (CDU). Wot 1. awgusta 2017 ma so přewjesć jednolětne wuwučowanje serbšćiny. Poskitk je za wučerjow bjez kwalifikowanych znajomosćow rěče kaž tež za tajkich, kotřiž ju dotal scyła njewobknježa. „Z tymle poskitkom narěči sakske ministerstwo za kultus (SMK) dostudowanych wučerjow z tu- a wukraja, kotřiž chcyli rěč wuknyć a ju za lěto šulerjow na serbskich a serbšćinu wuwučowacych šulach wuwučować“, Šiman rozłoži. Poskitk je konkretny wupłód njedawneje rozmołwy sakskeho ministerskeho prezidenta Stanisława Tilicha (CDU) a jeho čěskeho kolegi Bohuslava Sobotki w Praze. Wabić ma so wotpowědnje připrajenju mjez Čechami. „Wočakujemy, zo přińdu ze susodneje Čěskeje zajimcy a zo so nam radźi na wuměnjenja, kotrež wobdźělnicy sobu přinjesu, přiměrjeny poskitk natwarić“, potwjerdźi nawodnica Rěčneho centruma WITAJ (RCW) dr. Beata Brězanowa.
