Berlin (SN/bn). „Elf Mal Morgen: Berlinale Meets Fußbal“ je „kompilaciski“ film, portretowacy „jědnaće přewšo rozdźělnych dorostowych koparskich mustwow“, kotryž nasta w nadawku tuchwilu wotměwaceho so najwjetšeho filmoweho festiwala Němskeje jako „přinošk kulturneho programa Berlinale za lětuše europske koparske mišterstwo w Němskej“. Studentki a studenća Wysokeje šule za telewiziju a film Mnichow běchu za njón najwšelakoriše mustwa z kameru přewodźeli a na tymle zakładźe dokumentariski film zestajeli. Mjez druhim portretowachu cyłki FC Español Mnichow, Türkiyemspor Berlin 1978, KS Polonia Hamburg, Maccabi Mnichow a SJ Chrósćicy. Zaměr bě pokazać „inkluziwnu diwersitu kopańcy w Němskej, zapřijimujcy mustwa žonow kaž tež zbrašenych a cyłki z migraciskim a/abo mjeńšinowym pozadkom“. Hłowny pjenjezydawar projekta je załožba Phillipa Lahma, bywšeho koparskeho profija a čłona mustwa Němskeho koparskeho zwjazka, kotrež wudoby sej titul swětoweho mištra championata 2014 w Brazilskej. Předwčerawšim bu pask prapremjernje we wobłuku festiwala předstajeny.