Aus der aktuellen Ausgabe vom Freitag, 17 Februar 2017

Wobkedźbuja čłonow AfD

Drježdźany. Wustawoškit někotrych čłonow AfD w Sakskej wobkedźbuje. Tući njesteja pod dohladom swojeho čłonstwa w stronje dla, ale dokelž su aktiwni w prawicarskoekstremnej scenje, zdźěli sakski nutřkowny minister Markus Ulbig (CDU) nowinarjam. Čłonojo AfD běchu stajnje zaso ze swojimi narěčemi abo ze zwiskami k prawicarstwu napadnyli.

Pumpak móhł přežiwić

Rěčicy. Šansy dwulětneho wjelka Pumpaka, přežiwić, z kóždym dnjom přiběraja. Zajutřišim, njedźelu, so doba za jeho móžne zatřělenje skónči. Dokelž pak wjelka minjene tydźenje nihdźe wjace widźeli njejsu, njebudźe Zhorjelski wo­krjes wo podlěšenje doby prosyć, informuje rěčnica krajnoradneho zarjada Marina Michel. Wjelk bě so stajnje zaso sy­dlišćam bližił a tam za picu pytał.

Wjesne wobchody zachować

Najwšelakoriše družiny kamelijow móžeće sej nětko w Kinsporku wobhladać, a to stajnje njedźelu wot dopołdnja w dźesaćich. Tři najwjetše w tamnišim kamelijowym domje su tam njedawno kćěć započeli. Tež kamelijowej posołce města Sophia Rudolph a Caprice Zickler (wotlěwa), kotrejž wopytowarjow na 18. kamelijowy rozkćěw witatej, stej zwjeselenej. Foto: Peter Sonntag

Měrćin Weclich

Spočatk februara su w Budyskim Serbskim domje mjeztym třeće wubědźowanje Rady za serbske naležnosće „Rěčam přichilena komuna – Serbska rěč je žiwa“ zahajili. Rozprawjachmy wo tym 6. februara na 1. stronje. Napadnyło mi je, zo sedźeše wjele ludźi na derje wobsadźenej žurli – dyrbjachu samo stólcy přistajeć. Bě pak jich jenož mało komunalnych politikarjow. Woni dźě su zastupjerjo a rěčnicy městow a gmejnow serbskeho sydlenskeho ruma Swobodneho stata Sakskeje, na kotrychž so wubědźowanje poprawom wusměrja.

Serbske kubłanske srjedźišćo LIPA zetkanišćo generacijow

Smjerdźaca (SN/MiR). Swójbne a kubłanske srjedźišćo LIPA je w minjenym semestrje wjace hač 300 zajimcow ze swo­jimi poskitkami přiwabiło. Zapřijeći do ličby njejsu ani hišće ći, kotřiž přeby­wachu na swójbnym kóncu tydźenja loni w decembru w Smochćicach.

„Smy jara wjeseli, zo mamy telko wobdźělnikow na našich poskitkach. Wšako maš po wšej Łužicy atraktiwny wuběr na mnohich polach“, rozłožuje nawodnica LIPY Lucija Handrikowa, „smy tuž stajnje zaso překwapjeni, zo su nam naši kursisća tak swěrni.“ Wosebje požadane, kaž nazhonjenja mnoholětneho skut­kowanja pokazuja, su strowotniske kursy. A tych maja cyłkownje jědnaće wob tydźeń. Wosebje woblubowane su tajke za maćerje z małymi dźěćimi. W času, kaž maćerje w kulturnym domje sportuja, su jich dźěći w LIPJE zastarane. Derje wužiwanej stej tež dźěćacej sportowej kursaj w Smjerdźacej a Chrósćicach. Rejwanska skupina za chowancow pěstowarnje w Smjerdźacej je tohorunja wob­lubowana.

Budyšin (SN). W Ludowym nakładnistwje Domowina stej dźensa dalšej dźělej rjadu zwjazkow historiskich čornoběłych wobrazow łužiskich fotografow wušłoj. Hižo něšto lět Budyski fotograf Jürgen Maćij tajke zestaja. Nastork, rjad dale wjesć, bě wustajeńca Budyskeho Serbskeho muzeja „Wotmolowane – Mit Licht gemalt“. Zwjazkaj wěnujetej so historiskej fotografiji Łužicy wot spočatkow hač do 1930tych lět, jedyn Hornjej a tamny Delnjej Łužicy.

Saněrowanska łódź Łužiskeje a srje­dźoněmskeje towaršnosće hórnistwoweho zarjadnistwa (LMBV) z mjenom „Klara“ stara so wot lońšeho septembra na Parcowskim jězorje wo dobru kwalitu­ wody.

Lejno (AK/SN). Saněrowanska łódź wopokazuje so w praksy jako dobra. Tole podšmórny nawoda wotrjada projektoweho managementa LMBV Michael Matthes. „Wot wšeho spočatka zasadźamy bjez wuwzaća palene wapno. Za Parcowski jězor­ trjebachmy dotal cyłkownje 8 500 tonow kalka“, wón rozkładuje. Lětsa chcedźa něhdźe 40 000 tonow paleneho kalka do wody sypać, štož pak je jeno při wotpowědnych wjedrowych wuměnjenjach docpějomne. Tole potwjerdźa nowinski rěčnik LMBV dr. Uwe Steinhuber.

Choćebuz (SN/MiR). Postupowanju braniborskeho ministerstwa za kubłanje, młodźinu a sport zběha so spřećiwjenje. Na rjadnym posedźenju serbskich institucijow wčera wječor w Choćebuzu su nawodźa wo móžnych akcijach wuradźowali. Prěni wupłód zetkanja su protestne póstowe karty, kotrež nětko internetnje rozšěrjeja, bórze tež na papjerje. Zajimcy móža je wupjelnić a MBJS pósłać. „Z minimalnej ličbu dwanaće šulerjow za lětniki přesahowacu wučbu w třoch rjadowniskich schodźenkach njeby na wjetšinje šulow wučba serbšćiny kaž tež bilingualna wučba serbšćiny hižo móžna była. Knježe ministro Baaske, prošu starajće so wo to, zo so postajenje njezwoprawdźi!“, rěka­ tekst na pohladnicy. Rěčny centrum WITAJ­ přihotuje podpismowu lisćinu. Ta ma přichodne dny we wšěch šulach z delnjoserbskorěčnym poskitkom předležeć. Wšitcy su namołwjeni wutoru,­ 21. februara, wot 13 hodź. na wurjadnym­ posedźenju braniborskeje serbskeje rady w Mozaikowej zakładnej šuli Picno swój protest zwuraznić.

Washington (dpa/SN). Po štyrjoch tydźenjach w zastojnstwje je prezident USA Donald Trump přewšo pozitiwnu bilancu sćahnył. Na nowinarskej konferency wón twjerdźeše, zo je dotal wšitke wólbne přilubjenja dodźeržał. Prawdźepodobnje njeje hišće žadyn prezident do njeho w tak krótkim času tak wuspěšny był kaž wón. Ze wšěch stron nazhonja přihłosowanje. Mjez dźěławymi knježi „žołma optimizma“. Medijam Trump wumjetowaše, zo su njesprawne a zo njedźěłaja w zajimje ameriskeho ludu.

Schulz jasnje před Merkel

Berlin (dpa/SN). Na wšě 49 procentow ludźi w Němskej by sej kandidata SPD Martina Schulza za zwjazkoweho kanclera přało, Angelu Merkel (CDU) jenož hišće 38 proc. Tole je wuslědk najnowšeho „politbarometra“ sćelaka ZDF, kotryž su dźensa wozjewili. Kónc januara měješe Merkel ze 44 procentami hišće wjace přiwisnikow hač Schulz, za kotrehož bě so 40 procentow wuprajiło.

Wopačnosće přećiwo wojakam

Na dwórnišću Griesheim w Frankfurće nad Mohanom je minjenu nóc njewobsadźena lokomotiwa spěšnika ICE z kolijow wuskočiła a hač na nastupišćo zjěła. Na zbožo so nichtó njezrani, ćěridłowy wóz pak je chětro wobškodźeny. Mjeztym su započeli, jón za wottransport přihotować. Sobudźěłaćerjo železnicy dyrbjachu najprjedy milinowód nad ćahom wotstronić. Přičiny njezboža přepytuja. Foto: dpa/Arne Dedert

Mnichow (dpa/K/SN). Wonkowna politika noweho ameriskeho knježerstwa prezidenta Donalda Trumpa steji w srjedźišću Mnichowskeje wěstotneje konferency. Zahajiłoj staj dźensa najwažniše swětowe zarjadowanje na temu wěstota němska ministerka za zakitowanje Ursula von der Leyen (CDU) a jeje ameriski kolega James Mattis. Hač do njedźele wuradźuje 30 šefow statow a knježerstwow kaž tež něhdźe 80 wonkownych a zakitowanskich ministrow wo tejle wažnej naležnosći. Nimo skerje často kusaceje so wonkowneje politiki USA zaběraja jich dalše palace temy kaž napjatosće z Ruskej, wójna w Syriskej, ukrainski konflikt a přichod Europskeje unije.