Aus der aktuellen Ausgabe vom Dienstag, 28 März 2017

Budyšin (SN). Spěchowanske towarstwo wopomnišćo Budyšin njesmě so na Budyskim forumje w meji wobdźělić. Woprawnjene přičiny za to žane njejsu. Tole wuchadźa z nowinskeje zdźělenki towarstwa, kotraž SN předleži. „Z njesměrnym zadźiwanjom smy list jednaćela załožby Sakske wopomnišća Siegfrieda Reipricha předsydźe Budyskeho komiteja Alexanderej Latotzkemu na wědomje brali, zo njesmě so Budyske wopomnišćo na zarjadowanju wobdźělić“, rěka w zdźělence. Spěchowanske towarstwo je zludane, zo załožba takle jedna, wšako njesmědźa so ći ludźo na forumje wobdźělić, kotřiž so wot lěta 1989 za wopomnišćo angažuja. Zarjadowanje so samo hišće w bywšim jastwje přewjedźe. Rěčeć budu tam wopory Budyskich jastwow.

Wuchadźišćo rozkory mjez spěchowanskim towarstwom a załožbu Sakske wopomnišća je po zdaću dołholětne rozestajenje wo rehabilitaciju sobudźěłaćerki Budyskeho wopomnišća.

Wosebite myta LEX wěnuja lětsa rjemjesłu

Choćebuz (SN/BŠe). Dalše koło Łužiskeho myta załožerjow eksistency (LEX) je zahajene. Wotnětka móža so załožerjo firmow a młodźi předewzaćeljo wo nje prócować a su tuž namołwjeni, so ze swojej wobchodnej ideju wo štyri myta požadać. Za to je cyłkownje 10 000 eurow k dispoziciji. Dobyćerjej prěnjeho myta kiwa 4 000 eurow, druhi dóstanje 2 500 eurow a třeći smě so nad 1 500 eurami wjeselić. Lětuše wosebite myto chce Łužiska hospodarska iniciatiwa (WiL) z 2 000 eurami hódnoćić a wěnuje je konceptej z rjemjeslniskeho wobłuka. Darićeljo wosebiteho myta stej Drježdźanska a Choćebuska rjemjeslniska komora. Předewšěm pak dóstanu wšitcy wobdźělnicy wubědźowanja přistup k darmotnym poradźowanjam, kotrež su wu­směrjene na załožerjow eksistency. Dale zmóžnja jim WiL darmotny coaching a wažne pokiwy fachowcow k zapodatym wobchodnym planam.

Dźensa wozjewjene měnjenja k namjetej Křesćana Krawca, wuhotować „serbski dźeń“, wujewjeja zajimawy rozdźěl. Na jednej stronje móhła sej wjetšina ze wšěch kóncow Łužicy tajke zarjadowanje předstajić, zdźěla bychu samo zwólniwi byli orga­nizatoriske nadawki přewzać. Na tamnej stronje njejsu přećiwo namjetej, skedźbnjeja pak na docpěte resp. na kopjenje serbskich zarjadowanjow. To wosebje płaći za kónčinu zarjadniskeho zwjazka Při Klóšterskej wodźe, hdźež je serbstwo hišće najkompaktniše. Tam najwšelakoriše cyłki dosć spomóžnje skutkuja, serbska bjesada – hdyž přeco ju chceš – je zaručena. A dokelž Serbja druhdźe we Łužicy tajki wobšěrny poskitk nimaja, trjebaja přiležnosće, zo bychu so zetkawali, so přez hranicy župow a towarstwow wuměnjeli a tuž swój narodny rjap skrućili. Na regionalnej runinje so to hižo radźi, na wšoserbskej by so pospyt snano wudanił. Axel Arlt

Praha (ČŽ/K). Z wulkim žarowanskim ćahom bu w čěskej stolicy kardinal Miloslav Vlk, kiž bě 84lětny 18. měrca na sćěhi raka zemrěł, pochowany. Wjace hač 2 000 ludźi so w katedrali swj. Wita z nim rozžohnowa, mjez nimi někotři čłonojo knježerstwa z ministrom za kulturu Danielom Hermanom na čole. Rekwiem swjećeše w přitomnosći mnohich kardinalow cyłeje Europy Praski arcybiskop, kardinal Dominik Duka. „Rozžohnujemy so z arcybiskopom Prahi, kotremuž bě nadawk wurostł, natwarić cyrkej w swobodnym, suwerenym a demokratiskim staće“, wón rjekny. Prědowanje do chowanja přednjese emeritowany Plzeňski biskop František Radkovský, hódnoćacy Vlkowe skutkowanje za čas socializma. Na poslednim puću přewodźeše njeboćičkeho nimo modlitwow a Swjatowjacsławskeho chorala zwonjenje zwona „Zikmund“, najwjetšeho na wěži katedrale kaž tež Čěskeje. Swój posledni wotpočink ma kardinal Vlk – wón bě tež dobry přećel Serbow – w krypće Praskich arcybiskopow poboku swojich předchadnikow a rjada čěskich kralow.

We wčerawšim ćišćanym wudaću SN je k zmylkej dóšło. Tekst hłowneho wobraza na prěnjej stronje njebu techniskeho zmylka dla ćišćerni sobu pósłany. Tam měło slědowace stać: Wuzwolenju za městopředsydu Domowiny, wobkrućenju jako předsyda a znowawuzwolenju za městopředsydu gratulowaše Wiliamej Janhoeferej, Dawidej Statnikej a Markej Hančikej tež sakska ministerka za wědomosć a wuměłstwo dr. Eva-Maria Stange (SPD, na lěwym wobrazu wotlěwa). Wulke připóznaće a sylny přiklesk žnějachu dźěći Wojerowskeje zakładneje šule „Handrij Zejler“ za swój kulturny program na sobotnej hłownej a wólbnej zhromadźiznje. Prosymy wo wodaće za misnjenje. Dalše fota pod www.serbske-nowiny.de SN

Štož je poprawom romantiska naležnosć, načinja na Budyskim Mosće měra starosće. Tam wisa nimale 50 zamkow, kotrež maja wěčnu lubosć młodych porikow symbolizować. Zamki pak poněčim zerzawjeja, štož wobhrodźenju mosta scyła njetyje. Toho­dla přichodne dny wšitke zamki wotstronja. Wěstota je na tymle městnje wažniša. Město Budyšin prosy lubosćinske poriki wo zrozumjenje, je wšak tež druhich móžnosćow, sej swoju wěčnu lubosć wopokazać. Foto: André Wucht

Pěskecy (JK/SN). Zo móže před wjace hač 30 lětami spisany roman tež dźensa hišće ludźi zahorić, pokaza so na spodobne wašnje zawčerawšim w Pěskečanskim sportowym domje. Nimale 50 wjesnjanow a hosći z wokolnych wsow je přeprošenje Pěskečanskeje sportoweje jednotki na čitanje Křesćana Krawca sćěhowało. Spisowaćel z Hrubjelčic bě so hižo před dlěšim časom z čłonom sportoweje jednotki Křesćanom Žurom na to dojednał, ze swojeho romana „Wočakńmy nalěćo“ w Pěskecach čitać. Pozadk bě, zo hraje roman tež bjesposrědnje w Pěskecach a wokolinje. Čiły zajim za čitanje zbudźichu přidatnje wobrazy ze stawiznow Pěskec, kotrež běštaj Siegfried Althaus a Jurij Pjetaš zestajałoj. Před wobrazowej sćěnu stejo sej wjesnjenjo dopomnjenki wuměnichu, wuwědomjejo sej wažnosć tajkich dokumentow.

Wo šerjenju na kofeju

Budyšin. Tež lětsa organizuje Budyski Serbski muzej za swojich wopytowarjow kwartalnje „Kofej w třoch“. Prěnje tajke lětuše zetkanje wotměje so jutře, srjedu, w 15 hodź. w Serbskim muzeju. Sobudźěłaćer za muzejowu pedagogiku a zjawnostne dźěło Měrćin Brycka přednošuje wo Budyskim šerjenju z lěta 1684 a kak so wo nim we wšelakich chronikach rozprawja. Wobdźělenje płaći dwaj euraj přidatnje k zastupej. Zajimcy njech so při kasy přizjewja.

Akademija wo ludowej reji

Budyšin. Přichodne zarjadowanje Maćičneje akademije budźe štwórtk, 30. měrca, w 19.30 hodź. w Budyskim „Wjelbiku“. Tam přednošuje wědomostna sobudźěłaćerka Serbskeho instituta dr. Theresa Jacobsowa na temu „Serbska ludowa reja – imaterielne kulturne herbstwo“. Přednošk budźe w serbskej rěči, zastup je darmotny.

Warić z pyšnym kobołkom

E-bike pokradnyli

Kamjenc. Z prěnimi słónčnymi nalětnimi dnjemi přiběraja zaso padustwa kolesow. Při tym měrja so skućićeljo tež na drohe groćane koniki, kaž w nocy na minjenu njedźelu w Kamjencu. Na tamnišej Šěrokej hasy je so ze zachoda wjaceswójbneho domu nowy e-bike zhubił. Wobsedźer powobliča jeho hódnotu na něhdźe 2 400 eurow. Kriminalna policija za kolesom z elektriskim motorom nětko pyta.

Prěni twarski wotrězk Budyskeho policajskeho rewěra přepodaty

Budyšin (CS/SN). Kluč wčera hišće dóstali njejsu, jenož plaketu jako klučowy přiwisk. Přetož při přetwarje Budyskeho policajskeho rewěra napřećo dwórnišću je hakle prěni twarski wotrězk zmištrowany. Za 993 000 eurow su bywšu rejwansku žurlu a hosćenc Kalinka přetwarili. Hdźež je něhdy rejwanska hudźba zaklinčała, móža nětko sobudźěłaćerjo policajskeho rewěra w swětłych běrowowych rumnosćach dźěłać. Při tym su dotalnu rumnostnu strukturu změnili a samo jedyn schód wotstronili. W přizemju nastaštej rumnosć za EDV-techniku kaž tež brónjowa komora, w kotrejž móža zastojnicy­ swoje pistole zamknyć.

Z přetwarom so dźěłowe wuměnjenja na policajskim rewěrje polěpša. Płonina so wo 300 kwadratnych metrow powjetši. Dalša lěpšina je, zo móže 30 sobudźěłaćerjow z cyłkownje 39 kolegow kriminalneje słužby z Hasy Käthy Kollwitz na Tuchorsku přećahnyć. Tamni dźewjećo přećahnu do Biskopic. Dohromady maja w Budyskim rewěrje 160 sobudźěłaćerjow, mjez nimi Serbaj.