Aus der aktuellen Ausgabe vom Freitag, 21 Juli 2017

Minjene dny rozžohnowachu so dźěći a pěstowarki z kubłarku dnjoweho přebywanišća „Chróšćan kołć“ Marju Pašcynej (nalěwo), kotraž je so na wuměnk podała. Započawši swój powołanski puć w Kamjencu skutkowaše wona we Wětrowje, na Horje, we Worklecach a zašłe 27 lět w Chrósćicach. Mjez hosćimi na małym swjedźenju běchu Marlis Młynkowa jako zastupjerka nošerja pěstowarnje Serbskeho šulskeho towarstwa, zastupjerjo staršich a staršiskeje přirady. Foto: Daniela Ćemjerowa

Pjatk 21. do 23.7.  Gig-festiwal w Róžeńće

   Wjesny swjedźeń w delnich Sulšecach  

Sobotu 22. a 23.7.  Dworowy swjedźeń w Halštrowskej Hollandec hornčerni

   Neptunowy swjedźeń w Nižej Wsy

 22. do 30.7.  Prózdninske lěhwo SŠT we Wodowych Hendrichecach

  9:00 Kak nawuknu z kosu syc – seminar w Dołhoboršćanskej přirodoškitnej staciji

  10:00 1. wiki jězoriny w Kóšynskej jězorinowej hali

  17:00 Počesćenje Jurja Chěžki składnostnje 100. po­smjertnych narodnin při jeho ródnym domje w Hórkach

  19:00 Nóc tysac swěčkow w Pančičansko-Kukowskim klóštrje Marijinej hwězdźe

  19:00 Serbske bajowe čołmikowanje w Bórkowach (start: na Zelenym róžku w Kuparskich Bórkowach)

  20:00 Ruska čołmikowanska nóc w Lubnjowje

Njedźelu 23. do 28.7.  Putnikowanje do Krupki

  10:00 Wodźenje po wustajeńcy jantarow w Hórnikečanskej energijowej fabrice

  14:30 Serbski koparski supercup składnostnje 60lětneho wobstaća SJ Njebjelčicy

  15:00 Němskorěčne wodźenje po wosebitej wustajeńcy „Pjeć lětstotkow – Serbja a reformacija“ w Budyskim Serbskim muzeju

Póndźelu 24.7. 14:00 Filmowy projekt „3eck Soccer“ na Budyskich Žitnych wikach

njedźelu hornjoserbsce

11:00 Łužica tónle tydźeń z powěsćemi tydźenja a wo Gig-festiwalu w Róžeńće

11:20 Slědy Jurja Chěžki w basnistwje

11:45 SJ Njebjelčicy 60 lět – Zajimawostki ze stawiznow

12:00 Katolske nabožne wusyłanje

 (farar Beno Jakubaš)

po tym zbožopřeća

delnjosersce

12:30  Aktualny magacin, mjez druhim wo lětnim swjedźenju Delnjoserbskeho gymnazija

13:00 Portret Bjarnata Rjentša

13:30 Nabožne wusyłanje

 (Cyril Pjech)

po tym zbožopřeća

Na Gig-festiwal

Róžant. Hač do njedźele wotměje so w Róžeńće Gig-festiwal (God is good), kotryž so dźensa w 19 hodź. z Božej mšu w hnadownej cyrkwi zahaji. Po kemšach pokazaja film „Qutcasts“, rozprawjacy wo dźěle franciskanow wobnowjenja z New Yorka. Jutře wot 14 hodź. su tež serbscy młodostni na workshopy ze sobu skutkowacymi hudźbnikami a dalšimi wuměłcami přeprošeni. Za kóždeho budźe na slědowacych koncertach něšto pódla: pop, soul, rap, rock a gospelspěwanje z Londona. Swjatočnu Božu mšu njedźelu, 23. julija, w 10 hodź. Radijo Horeb originalnje wusyła.

Swjećić hač do njedźele

Sulšecy. Po tym zo změja dźensa w delnich Sulšecach piwo natočene, su nimo wjesnjanow wosebje hosćo zbliska a zdaloka wot 21 hodź. na „Čornohalštrowski special“ přeprošeni. Jutře wotměje so wot 13 hodź. wubědźowanje w třělenju jědnatkow z mustwami wokolnych wsow. W 21 hodź. budu reje WiesenBeats. Zajutřišim, njedźelu, wot 11 hodź. wubědźuja so dźěći a po kofejpiću z dujerskej hudźbu zahaji so w 16 hodź. wulki swjedźenski program „bachtanje na nawsy“, a to zaso z překwapjenkami.

Morjo swěčkow dožiwić

Prěni serbski supercup

SJ Njebjelčicy swjeći 60 lět wobstaća. Składnostnje jubileja wuhotuje wona njedźelu, 23. julija, wot 14.30 hodź. prěni koparski turněr z mjenom serbski supercup. Za njón je sćěhowace cyłki zdobyła: SJ Chrósćicy (krajna klasa), Sokoł Ralbicy/Hórki (wokrjesna wyša liga), ST Marijinu hwězdu (wokrjesna liga) a swójske mustwo (wo­krjesna liga). Po wulosowanju budu semifinalej, hra wo třeće městno a finale. Kóžda partija ma 45 mjeńšin trać. Zastup je darmotny.

Po Kulowcu nětko Pančicy

4. beachvolleyballowa tura Radija Satkula je na cilowej čarje a wuhraje póndźelu dalši turněr, a to w Pančicach. Potom sćěhujetej hišće wurisani w Radworju (31. julija) a w Budyšinje (7. awgusta). Finale budźe 28. awgusta w Miłoćicach.

Talk z „Ede“ a „Zimmijom“

W Kamjenskim měšćanskim dźiwadle wotměje so 7. septembra koparski talk z Eduardom „Ede“ Geyerom a Gertom „Zimmijom“ Zimmermannom. Započatk budźe w 19 hodź. Zastupne lisćiki za 10 eurow předawaja w sportowym wobchodźe na Pfortenstraße 3 w Kamjencu.

Testowe koparske hry

21.7. 19:00 ST Radwor – FSV Łuty

22.7. 11:00 Jednota Kamjenc

  – LSV Nowe Město

22.7. 14:00 BSV Sebnitz

  – SJ Chrósćicy

Hórki (SN/MiR). W słowakskej gmejnje Terchová wotměja wot 3. do 6. awgusta „Jánošíkove dni“. Tam chcedźa sej mnozy Serbja z busom dojěć, mjez nimi sobustawojo skupiny Čłonstwo za integraciju ludoweje akordeonoweje kultury. Mjeztym 55. mjezynarodny folklorny festiwal je pomjenowany po rubježniku Juraju Jánošíku­ (1688–1713), kotrehož maja Słowacy za narodneho rjeka.

Jězbu přihotujetaj mandźelskaj Brita a Volkmar Šołćic z Hórkow. „Předewšěm chcemy sej folklorne poskitki na festiwalnišću wobhladać. Za runje tak wažne wšak mamy, tež našu serbsku kulturu z hudźbu a spěwom prezentować.“ We wobłuku wuprawy chcedźa sej pućowacy hrodaj Oravskí a Bojnice kaž tež rězbarjeny Slovenský betlehem w Rajeckej Lesnej wobhladać. Přenocować budu w hotelu „Slovakia“ w Žilinje.

Hišće su někotre swobodne městna. Płaćizna za jězbu nima 150 eurow přesahać. Zajimcy, kotřiž chcyli sobu jěć, móža so pola Šołćic pod telefonowym čisłom 035796/ 95 012 přizjewić.

Washington (dpa/SN). Bywši diplomat a telewizijny komentator Richard Grenell ma so po informacijach medijow z nowym wulkopósłancom USA w Němskej stać. Prezident Donald Trump je 50lětnemu zastojnstwo pječa minjeny tydźeń na zetkanju w Běłym domje poskićił, piše New York Times w swojim wčerawšim wudaću. Oficialnje wobkrućene pak to ze stron knježerstwa njeje. Grenell je jedyn z prěnich a najsylnišich podpěraćelow Trumpa we wonkownej politice.

Islamistiscy wohrožerjo strašni

Frankfurt n. M. (dpa/SN). Najwjetše wěstotne riziko w Němskej wuchadźa dale ze stron islamistiskich wohrožerjow. Wo tym je šef Zwjazkoweho kriminalneho zarjada Holger Münch přeswědčeny. 690 ludźi tuchwilu do tuteje kategorije zastopnjuja, piše Münch dźensa w Frankfurter Rundschau. Kónc lěta 2016 bě jich hišće 549, w měrcu hižo 616. Porno tomu je strach ze stron lěwicarskich a prawicarskich ekstremistow w Němskej „přewidny“. Wočakować wšak je, zo prawicarjo skerje teroristiske struktury wu­tworja, štož přiběraca ličba nadpadow na domy požadarjow azyla pokazuje.

Turistaj žiwjenje přisadźiłoj

Před prezidentskim palastom we Waršawje je so wčera něhdźe 50 000 ludźi zhromadźiło, žadajo sej wot prezidenta Andrzeja Dudy, zo by swój weto přećiwo planowanemu noworjadowanju najwyšeho sudnistwa zapołožił. Mnozy wobydlerjo Pólskeje maja demokratiju w kraju za wohroženu. Foto: dpa/Jan A. Nicolas

Waršawa (dpa/SN). Dźesaćitysacy su wčera přećiwo justicnej reformje pólskeho narodnokonserwatiwneho knježerstwa protestowali. Před prezidentskim palastom zhromadźi so po informacijach města něhdźe 50 000 ludźi. Policija­ rěčeše porno tomu wo 14 000 wobdźělnikach. Demonstranća namołwjachu prezidenta Andrzeja Dudu, swój weto přećiwo wčera wot sejma wobzamknjenemu noworjadowanju najwyšeho sudnistwa kraja zapołožić. Mnozy wobydlerjo maja z reformowymi planami knježaceje strony Prawo a sprawnosć (PiS) njewotwisnosć pólskeje justicy za wohroženu. Woni­ wołachu „Za swobodnu europsku Pólsku“ a „My chcemy weto“. Justicneje reformy dla hrozy EU mjeztym ze sank­cijemi přećiwo Waršawje.

Šćipata wóń horceje mašiny za rězanje železa je třoch paduchow přeradźiła. Policistam w Kölnje bě při kontroli awto z třomi chětro nerwoznymi mužemi napadnyło. Jedyn z nich bě dospołnje přepoćeny. Mjez jeho nohomaj ležachu baliki pjenjez. W awće bě nimo toho wšelki grat k zadobywanju. Po prěnich zwěsćenjach běchu mužojo w starobje 24 do 31 lět trezor wobchodniskeje rumnosće rozrězali a z njeho pjećcyfrowu sumu pjenjez spakosćili.

Z pjeć wukazami zajeća pytaneho muža je policija w Choćebuzu zajała, po tym zo běchu jeho w ćahu bjez jězdźenki lepili. Při kontroli personalijow so wukopa, zo statne rěčnistwa w Berlinje, Hamburgu, Frankfurće nad Wódru a Braunschweigu muža wšelakich padustwow a njepłaćenych chłostankow dla pytaja. Nětko ma 617 dnjow w jastwje wotsedźeć.