To a tamne (28.08.15)
Na wšě 130 kilogramow wotbył je pony Idefix w Freibergskim zwěrjencu minjene 20 měsacow. Ze 190 kilogramami ma wón nětko idealnu wahu, kaž nawodnistwo zwěrjenca pisa. Mjez wopytowarjemi woblubowany Idefix bě zas a zaso chłóšćenki ludźi brał, byrnjež picowanje zakazane było. Tak wažeše spočatk lěta 2014 wjace hač 320 kilogramow. Wot toho časa ma kruty dietny plan a ponyjowu damu Palomu poboku.
Prěnje hodowne pječwo ma hižo přichodne dny we wobchodach ležeć, štyri měsacy do hód. Tak je sezona poprjancow, spekulaciusa a cymtowych hwěžkow zahajena. Pječa so ludźo hižo nětko za tajkimi wudźěłkami naprašuja, kaž nawoda němskeje wotnožki předewzaća Bahlsen, Michael Hähnel, medijam w Berlinskim zawodźe firmy rjekny.
To a tamne (27.08.15)
Z podpismom přeradźił je so 29lětny muž, kiž bě bjez jězdźenki z ćahom po puću. Kaž zwjazkowa policija zdźěli, bě železnicar muža w ćahu z Magdeburga do Frankfurta nad Wódru bjez jězdźenki lepił a sej na to personalije čornojězdźerja žadał. Tón pak wupjelni formular spočatnje z wopačnymi datami. Jako na kóncu ze swojim prawym mjenom podpisa, so wěc wukopa. Nětko wočakuje jeho tež hišće skóržba wobšudnistwa dla.
Nic Pisa, ale Wellington: W awstralskej stolicy Wellingtonje chcedźa nowy běrowowy dom twarić, kotryž so po zdaću do tam zwučeneho sylneho sewjerneho wětra chila. Pobóčne sćěny 32 metrow wysokeho twarjenja budu 12,5 stopnjow nachilene, kaž rěkaše. Špundowanja su přiwšěm rune, hinak hač w Pisaskej wěži. Dowolnosć za twar mjeztym předleži. Klětu chcedźa z nim započeć.
To a tamne (26.08.15)
Zakaz krótkich holčich cholowčkow (hotpants) w šuli badensko-württembergskeho města Horb chcedźa přichodnje w Bonnskim Domje stawiznow dokumentować. Šulske wjednistwo bě so před tydźenjemi z listom na staršich wobroćiło, prošo jich na dostojnu drastu swojich dźowkow hladać. Dale a wjac holcow dźě so „chětro zwažliwje“ hotuje. Šula chcyše tohodla wosebje wulke T-shirty jako šulsku drastu zawjesć. Tole bě w interneće tójšto kritiki, ale tež směcha zbudźiło.
2 000 lět stare škleńčane sudobjo je mała holca w Jerusalemskim muzeju rozbiła. Při tym jedna so tež hišće wo požčonku z New Yorka. Holčka bě do witriny storčiła, na čož w njej wustajene drohotne sudobjo padny a so rozbi. Fachowcam pak je so mjeztym poradźiło, črjopy zaso zlěpić, kaž muzej zdźěla.
To a tamne (25.08.15)
Tři tydźenje za swojim awtom pytał je Norwegčan w Hannoveru. 78lětny bě na jězbje z Andorry do Osla w delnjosakskej krajnej stolicy pozastał. Awto parkowaše wón w pódlanskej hasy a poda so pěši do centruma. Tam pak zhubi papjerku, na kotrejž bě sej mjeno hasy napisał. 73lětna wobydlerka mužej při pytanju pomhaše a jeho samo doma hospodowaše. Hakle namołwa w nowinje bě wuspěšna. Čitarka informowaše, zo hižo dlěši čas awto ze spodźiwnej čisłowej tafličku před jeje domom parkuje.
Wjace hač 12 000 eurow namakał je 87lětny zběrar prózdnych blešow we wotpadkowym kontejneru we Wuppertalu. Muž donjese tři wobalki z pjenjezami na policajsku stražu, „byrnjež je sam zawěsće derje trjebać móhł“, rěčnik policije zdźěli. Nětko pruwuja, komu móhli pjenjezy słušeć a hač ma muž prawo na myto.
To a tamne (24.08.15)
Přez swoju rubiznu zakopnył je so paduch njedaloko Ludwigsburga. 23lětny bě we wobchodźe piwowej tyzy zapłaćił. W cholowach pak měješe dalše žiwidła schowane, kaž policija zdźěli. Přistajenaj wobchoda běštaj tole wobkedźbowałoj a dźěštaj za paduchom. Wón ćekny, při čimž so jemu pokradnjene wěcy z cholowow sunychu, na čož so zakopny a padny. Nawoda wobchoda wopiteho a wobaraceho so muža kruće dźeržeše, doniž policija njedojědźe.
Z 20 000 eurami pjelnjenu nohajcu je porik na něhdyšim nakładnym dwórnišću w Kamjenicy namakał. Spočatnje wuhladaštaj papjerjane pjenjezy při kolijach, pozdźišo wołmjanu nohajcu z pjenjezami. Porik namakanku policiji přepoda. Ta je sej wěsta, zo bě nichtó na něhdyšim dwórnišću čapor ilegalnje wotkładował a z njej mylnje tež nohajcu.
To a tamne (21.08.15)
Starše mandźelstwo je agresiwity a nadpadow kóčki dla dyrbjało wohnjowu woboru zawołać. 67lětna žona a wosom lět starši mandźelski buštaj wot kóčki nadpadnjenaj a mjezmoči ćežko zranjenaj, tak zo dyrbještaj do chorownje. Po zawołanju policije nadeńdźechu zastojnicy kóčku w stwě zawrjenu. Bydlenje bě z kreju popryskane. Kóčku dowjezechu do zwěrjatownje. Čehodla bu tak agresiwna, je policiji njejasne.
Benedikt XVI. je Kolpingowemu skutkej w Kölnje swoje čerwjene črije darił. Emeritowany bamž reagowaše z tym na hromadźensku akciju katolskeho socialneho zwjazka. Kolpingowy skutk bě Kölnjanow namołwił, 15 000 porow čriji na dobro socialneho projekta přewostajić. Benediktowe črije pak su dale dali z certifikatom do muzeja w jeho ródnym domje we wsy Marktl w Hornjej Bayerskej.
To a tamne (20.08.15)
Na pobrjohu kupy Amrum su nadešli wjac hač sto lět staru jendźelsku blešu z póštu. Kaž online-nowina Amrum News wčera zdźěli, je dowolnica blešu namakała a w njej tčacu kartu wotpósłarjej bleše připósłała. Blešu su mjez 1904 a 1906 do Sewjerneho morja ćisnyli, napisa wotpósłar we wotmołwje. Bleša bě dźěl eksperimenta, w kotrymž su wjace hač 1 000 blešow do morja ćisnyli.
W trezorje Berlinskeje Čerwjeneje radnicy su namakali zarjadniski rjećaz něhdyšeho wyšeho měšćanosty wuchodneho Berlina Erharda Kracka. Tutu bě wón w lěće 1987 składnostnje 750. róčnicy załoženja Berlina zhotowić dał. Rjećaz bě z časa politiskeho přewróta zhubjeny. Nětko da amtěrowacy měšćanosta Michael Müller trezor wočinić. Nosyć pak rjećaz njebudźe, byrnjež sam žadyn njeměł.
To a tamne (19.08.15)
Awstralski jaty je swoju swobodu po ćeknjenju po filmowym přikładźe z pomocu płachtow móhł jenož skrótka wužiwać. Hižo dźeń po ćeknjenju z wysokowěstotneho jastwa jeho policija po 100 kilometrach honjeńcy zaso zaja. Zastojnikam bě wón napadnył, dokelž jědźeše z pokradnjenym awtom. Muž ma dwanaće lět wotsedźeć dla wobrónjeneho nadpada. Wutoru bě zwjazane płachty přez jastwowu murju ćisnył a so po nich horje sćahnył.
W Indiskej je policija papagaja podhlada křiwdźenja dla na stražu skazała. 75lětna žona bě swojeho susoda wobwinowała, zo je papagaja nawučił, ju wuswarjeć. Jeje přiwzaty syn je susodej pomhał. Wšitcy štyrjo běchu na policajski zarjad w Maharashtra prošeni. Papagaj pak je mjelčał. Jeho su lěsnistwu přepodali, zo bychu jeho do přirody pušćili.
To a tamne (18.08.15)
Zhubjene belgiske praliny su w jendźelskim hrabinstwje Nottinghamshire policiju zaběrali. Žona bě so na běrow namakankow wobroćiła, dokelž bě słódki dowolowy nakup zhubiła. Mjeztym pak je sprawny muž praliny namakał a je wotedał. Dokelž pak njejsu sej zastojnicy personalije z Belgiskeje so nawróćeneje žony napisali, ju nětko z pomocu facebooka pytaja. Wona ma so prošu pola nich přizjewić: Praliny čakaja!
Njeznaći zadobywarjo su w napojowych wikach w Mülheimje nad Rynom wjac hač1 000 piwowych bleškow zwočinjeli, pytajo za schowanym losom k wulkemu dobyću. Bleše wěsteje piwarnje su wočinili, zo bychu so dóstali k we wěkach blešow schowanym losam, kaž policija wčera zdźěli. Dwanatki wěkow bjez prawych losow wostajichu we wikach ležo. Piwa sameho so skućićeljo přimali njejsu.
To a tamne (17.08.15)
Napity 18lětny je so w durinskim Stadtrodźe direktnje na kolijach spać lehnył. Krótko do přijězda ćaha su jeho njedźelu rano wubudźili a jemu pomhali, spanske městno wopušćić, kaž policija zdźěli. Młody muž z Jeny je po nawróće z party w Erfurće prawe dwórnišćo zapasł a dale do Stadtroda jěł. Tam jeho na swój ćah čakaca žona wuhlada a policiju zawoła, kotraž pola njeho 0,6 promilow alkohola w kreji zwěsći.
Přechodźowar ze swojim psom je na grjekskej kupje Korfu zadźěwał ćeknjenju wjacorych jatych z jastwa. Psyk bě swojeho knjeza skedźbnił na zwuki pod powjerchom zemje. Muž je reagował a stražnikow informował. Woni namakachu po hnydom zahajenej kontroli zastup do tunla, kiž bě wjace hač 30 metrow dołhi. Jeći su pozdatnje wjacore měsacy na nim dźěłali, bjez wuspěcha.
