Jasny rozsud: Region so za składowanje atomowych wotpadkow njehodźi
Peine/Budyšin (SN/mb). „Dobra powěsć za Budyski wokrjes: Sakska je z pytanja za stejnišćom kónčneho składa atomowych wotpadkow won, a z tym tež dotal přepytowane kónčiny w Budyskim wokrjesu“, so krajny rada Udo Witschas (CDU) wčera wjeseleše. Zdobom na to skedźbni, zo ma region hinaše perspektiwy: podzemski labor Astrocentruma Łužica a zaměstnjenje Einsteinoweho teleskopa, europskeho slědźerskeho projekta z globalnym wuznamom, wo kotryž so zhromadnje ze Sardiniskej přidatnje prócuja. Sakski minister za wědomosć Sebastian Gemkow (CDU) je wospjet wuzběhnył, zo by skład atomowych wotpadkow resp. wjacelětne podzemske twarnišćo astrofyzikarjow wottrašiło, kotřiž su sej łužiski zornowc za přeslědźenje grawitaciskich žołmow swětnišća wuzwolili, dokelž w nim absolutny měr knježi.
Wobydlerjo a kubłarjo internata a dalši hosćo zhromadźichu so wčera na premjerne knižne předstajenje noweje zběrki LitMiks‘26 w internaće Serbskeho gymnazija Budyšin. Madlenka Cyžec (naprawo) jich wutrobnje witaše a z jednaćelom Ludoweho nakładnistwa Domowina Symanom Pětrom Cyžom předstajenje zahaji. Milena Šołćic, Rejzka Wjeńcyna a Jan Bogusz přitomnym swoje twórby předstajichu. Tež někotři wobydlerjo internata smědźachu ze zběrki předčitać. Šulerjo a šulerki gymnazija čitanje hudźbnje wobrubichu. Dalše čitanje z LitMiksa wotměje so zajutřišim, pjatk, w 19.30 hodź. w Chróšćanskim młodźinskim klubje. Foto: Michaela Hrjehorjowa
SJ Njebjelčicy – HZ Hórnikečanski jězor/Kulow II 0:0Zestawa SJ Njebjelčicy: Weclich – Hanuza, Hrjehor, Korjeńk, Wjerš, Čornak R. (75. Marticke), Krawčik, Rudolf, Statnik, Lehmann (55. Wjacławk), ZarjeńkMinjeny kónc tydźenja poby hrajne zjednoćenstwo Hórnikečanski jězor/Kulow II w Njebjelčicach. Přećiwnik steješe z jenož třomi dypkami podobnje derje kaž Njebjelčenjo w tabulce wokrjesneje ligi stafla II. Hosćo běchu z jara nazhonitym mustwom do Njebjelčic přijěli.Hra bě chětro wurunana, wjele wothrawaše so w srjedźnym polu. Nadběhi njehodźachu so porjadnje zakónčić, dokelž steještej škitaj wobeju mustwow jara disciplinowanej. Tuž mustwo hrajneho zjednoćenstwa w prěnjej połojcy prawje před Njebjelčanske wrota njepřińdźe. A tež domjacy móžachu sej wothladajo wot toho abo tamneho róžka lědma šansy wuhrać.
Cuira (SN). Kak wužiwanje swojeje rěče tež w digitalnym swěće zmóžnimy? Tole tež druhe mjeńšiny w Europje zaběra. Pod hesłom „kumštna inteligenca a mjeńšiny“ wotmě so minjeny pjatk a sobotu forum europskich regionow FUEN, tutón raz w Cuira (retoromansce za Chur) w Šwicarskej. Retoromanska třěšna organizacija Lia Rumantscha bě nimo FUEN hłowna organizatorka. Ze stron Serbow je so nawodnica Rěčneho centruma WITAJ dr. Beata Brězanowa na fachowej wuměnje wobdźěliła.
Horce lěćo a falowacy dešć stej přičinje za snadne žněŁazk, Pančicy-Kukow (SN/StŠ). Wo nimale meter niši špihel wody, temperatury bjezmała hač do 40 stopnjow, jenož mało dešća a potom hišće čapla a wudra – wšitko to su přičiny za to, zo su w hatach, kiž su we wobsydstwje klóštra Marijina hwězda a kiž klóšter wobhospodarja, lětsa jenož mało rybow wułójili. Bjez dźiwa tuž, zo je hajnik Guido Budar skerje njespokojom. „Wosebje w hatach, kotrež nimaja žadyn přiliw, tak mjenowanych njebjeskich hatach, mějachmy lětsa wulke straty. Na přikład w Handrikec haće, prěnim za Worklecami směr Horni Hajnk, běše situacija nimale cyłe lěćo tajka, zo mějachmy tam meter přemało wody. To je za rubježnikow wězo lochko, sej w tajkej łužičce rybičku popadnyć.“
Z projektom změny strukturow „Lausitz.Connect“ wabja Wojerecy hač do 2034 wo wukrajnych fachowcowKulturny šok je šulerka Ngo Thi Duyen w juniju dožiwiła. „Moje prěnje tydźenje we Wojerecach běchu kaž jězba na seklowej čarje. Rěč, kultura, jědź, wšědny dźeń – wšitko bě za mnje nowe“, młoda Vietnamjanka běžnje němsce wo swojich dožiwjenjach rozprawja. Z jědnaće dalšimi Vietnamjanami je we Wojerowskej Kulturnej fabrice składnostnje zahajenja projekta strukturneje změny Lausitz.Connect swoje wuswědčenja přijała. Dźesać tydźenjow intensiwneho wuknjenja němčiny maja za sobu. Z pilnosću, mjezsobnej podpěru a dobrej wolu su wšitcy pruwowanje B2 w němčinje z ćežišćom hladanja pola wučerja Stefana Endresa wotzamknyli. Z tym je so projekt přiwabjenja wukrajnych fachowcow oficialnje zahajił. Z partnerami kaž posrědkowacej firmu Akadia tzwr Drježdźany, městom Wojerecy, wokrjesom Budyšin, Sakskej agenturu za wuwiće struktury, diakoniju a dalšimi firmami, zarjadnišćemi a zwjazkami AWO projekt zw ...
Dźensa swjeći slawist dr. Hync Rychtaŕ w Slepom swoje pjećasydomdźesaćiny. Šwity bywšich studentow na Instituće za sorabistiku Lipšćanskeje uniwersity dopominaja so na njeho jako wučerja z rozsahłej wědu, wulkim humorom a z kmanosću, jim maćiznu wo serbskich a słowjanskich rěčach kaž tež rěčespytne nuansy ze zahoritosću a sćerpnosću posrědkować. Mnohim bě wón mentor a je jim durje k maćeršćinje wočinjał.Legendarne su tež jeho ekskursije do bliskich a dalokich kónčin wot přibrjohow Solawy a Unstrut hač do Tatrow. Hync Rychtaŕ je wuběrny organizator a „žiwy słownik“, štož wšak hnydom za wjacore słowjanske rěče přitrjechi. Wjele lět je za sorabistow w Lipsku hóstne čitanja a seminary organizował, tak zo mějachu studenća składnosć, wjetšinu serbskich wědomostnikow zeznać.
Marek Krawc rozprawja wo aktualnje rozjimanych temach w ČěskejPraha. Po wótrej nócnej debaće minjenu sobotu je čěski dom zapósłancow namjet, popłatk za telewiziju a rozhłós wotstronić, do druheho koła wuradźowanja pósłał. Po nim ma stat zasadnje financowanje zjawnoprawniskich medijow přewzać, zdobom pak srědki wo 15 procentow skrótšić. Sobotu rano, krótko po napoł pjećich, su zapósłancy namjet z hłosami knježerstwoweje koalicije přiwzali. Žadanje opozicije, jón wotpokazać abo znajmjeńša předźěłać, bě koalicija prosće ignorowała. Opoziciske frakcije tohodla připowědźichu, naćiskej wotstronjenja popłatkow ze wšěmi parlamentariskimi srědkami zadźěwać. Knježerstwo bě wuradźowanje wo zakonskim namjeće jara krótkodobnje do dnjoweho porjada přiwzało, štož zbudźi mócny protest.
