Wiesbaden (dpa/SN). Podźěl dźělnje při­stajenych je dale a wjetši a dźěłowy čas połnje přistajenych woteběra, zdźěli dźensa zwjazkowy statistiski zarjad ze sydłom we Wiesbadenje. Po dopóznaćach z najnowšeho mikrocensusa dźěłachu połnje přistajeni loni 39,8 hodźinow wob tydźeń. To je nimale hodźina mjenje hač w lěće 2011, jako přerěznje hišće 40,7 hodźinow dźěłachu. Dźěłowy čas dźělnje přistajenych pak je wot 18,2 na 21,2 hodźin wob tydźeń přiběrał.

Pjenjezy a złoto pod chorownju

Tel Aviv/Beirut (dpa/SN). Proiranska milica Hisbollah je po informacijach israelskeho wójska w bunkeru pod chorownju libanonskeje stolicy Beiruta pjenjezy a złoto­ w hódnoće wjacorych stow milionow dolarow schowała. Rěčnik wójska Daniel Hagari libanonske knježerstwo a mjezynarodne organizacije na to skedźbni, zo wužiwa Hisbollah tute zamóženje za teror a nadpady přećiwo ­Israelej. Israel ležownosć al-Sahel-kliniki na juhu Beiruta dokładnje wobkedźbuje.

Na Brics-zetkanje přeprosył

Rom (B/SN) Zakónčace dokumenty wšěch sydom kontinentalnych konferencow k synodalnemu pućej su nětko zjawnje w interneće na stronje Němskeje biskopskeje konferency přistupne. Wobkedźbowali su so mjez druhim přinoški ze 40 europskich krajow z konserwatiwnymi a progresiwnymi pozicijemi pod hesłom „Jednota w mnohotnosći“.

Ortodoksne jutry

Kijew/Moskwa (B/SN). Jutry w ortodoksnych cyrkwjach běchu minjeny kónc tydźenja. Terminy wobliča so po julianskim abo gregorianskim kalendrje, 2025 swjećimy zrowastanjenje na samsnym dnju. Ukrainjenjo smědźachu hakle njedźelu wot ranja swjećić, dokelž njesmědźachu w nocy dom wopušćić. Ruska je jutrońčku bjez přestawki wójnu w Ukrainje dale wjedła.

Samowólnosć Chiny

Vatikan (B/SN). Knježerstwo w Pekingu je bjez wothłosowanja ze Swjatym stołom biskopa Shen Bina do Shanghaija přesadźiło, hačrunjež wobsteji wot lěta 2018 zrěčenje mjez Chinu a Vatikanom wo zasadźenju biskopow, zdźěli rěčnik Vatikana Matteo Bruni.

Přećiwo přiběracej běrokratiji

Jónu sedźach wječor pola dobreho přećela doma, bě hišće ćopła nazyma a rozmołwjachmoj so wo žiwjenju. To su mi najdrohotniše wokomiki w Serbach – žane dźěło, jenož rozpominanje. To su takrjec moje serbske kemše, hdźež serbšćinu přirodnje wužiwam a wo wažnych temach rěču. Kaž něhdy pola Bena na Radworskej zahrodźe wo přičinach přehraća znateho čěskeho koparskeho mustwa Sparta we wubědźowanju wo europskim pokalu. Abo druhdźe w Budyšinje pola Dušana, hdźež sym jemu spytał w kuchni pokazać, kak so originalne spaghetti carbonara spřihotuja. Na kóncu pak prezentowachu jemu tola čěsku wersiju spaghetti carbonary (kotruž poprawom nichtó znać, widźeć a woptać njetrjebał).

CDU žada sej plan za Łužicu

Podstupim (dpa/SN). Opoziciska CDU w braniborskim sejmje je krajne knje­žerstwo namołwiła, strukturnu změnu we Łužicy pjenježnje podpěrać. „Štož pobrachuje, je plan za Łužicu“, wobžarowaše hospodarskopolitiski rěčnik CDU, Dierk Homeyer wčera w aktualnej hodźinje parlamenta­. „Trjebamy spěšnu a njebě­rokratisku pomoc za předewzaća, kotrež so na nowe wobłuki zwaža.“ Přiwšěm je jasne, zo je brunica hišće dołho za spušćomne a zapłaćomne zastaranje ludźi z milinu trěbna, Homeyer rozłoži. Braniborske knježerstwo pak měło wotwidźomneho kónca zmilinjenja dla strukturnu změnu zahajić. „Dźe wo industrijny zakład wšeho kraja“, wón napominaše.

Ochranowske hesła zestajane

Skurilna tafla ze zakazom na lětanišću w Neuseelandźe tuchwilu w socialnych syćach wulku kedźbnosć zbudźi. Pućowacy w pasmje lětanišća, hdźež swoje wačoki a kófry wotedadźa, smědźa so tam maksimalnje tři mjeńšiny wobjimać. „Za dlěše rozžohnowanje prošu parkowanišćo wužiwajće“, je na tafli napisane. Na lětanišćach je zakazane, dlěši čas we wěstych pasmach přebywać. Dotal pak njeje so ­tole kontrolowało. Taflu na lětanišću w Neuseelandźe maja ludźo za kurioznu.

Nawal ludźi, kotřiž chcedźa sej dorost pandy w Berlinskim zwěrjencu wobhladać, je jara wulki. Minjenu srjedu su tam dwójnikaj zjawnosći prezentowali. Srjedu, štwórtk a pjatk je stajnje něhdźe 5 000 wopytowarjow do zwěrjenca přišło, štož je rozrost wo 50 procentow.

Migracija je nadal tema, kotraž zjawny diskurs dominuje – na lokalnej runinje runje tak kaž na mjezynarodnym (politiskim) polu. Byrnjež lědma štó prěł, zo njehodźi so w přiběrajcy zestarjacej towaršnosći „prěnjeho swěta“ ličba pobrachowacych fachowych mocow bjez připućowanja wurunować, drěja sej za stajnymi blidami, w telewizijnych debatach a w parlamentach hubu, kak ludźom, kotřiž z najwšelakorišich a zrědka ryzy „hospodarskich“ přičinow domiznu wopušćeja, přestup mjezy najlěpje znjemóžnić.