Drježdźany (SN). Hladajo na přichodnu konferencu energijowych ministrow Zwjazka a zwjazkowych krajow, kotraž so wot 11. do 13. nowembra w Göttingenje wotměje, je sakski statny minister za energiju a hospodarstwo Dirk Panter (SPD) pakćik naprawow za zniženje energijowych kóštow za předewzaća a woby­dlerstwo předpołožił. W njedźelu wozjewjenej zdźělence swojeho ministerstwa žada sej wón wot zwjazkoweho knježerstwa „konsekwentniši postup w ener­gijowej změnje, kotrejež kóšty dyrbjeli so sprawnje w cyłej towaršnosći rozdźělić“. Nimo toho namjetuje Sakska tak mjenowany moratorij poćežowanja, kiž ma nowym, wot stata zawinowanym kóštam přechodnje zadźěwać.

Namócneho zadźerženja napřećo šulerjomaj dla steji Choćebuski wučer dźensa před tamnišim hamtskim sudnistwom. W lěće 2023 běše wón tehdy dwanaćelětneju hólcow ćělnje nadběhował. Při tym jednoho z njeju tak sylnje zrani, zo dyrbjachu jeho do chorownje dowjezć. Po informacijach towarstwa Perspektiwa wopora mataj šulerjej migraciski pozadk. Při přepytowanju pada so wujewi, zo měje­še nadpad wučerja tež rasistiski motiw.

Padaj z jehličkami preparowanych plackow, kiž běchu dźěći na swjedźenju Hallo­ween dóstali, je nětko tež sakska policija registrowała. Wo podobnych padach běchu minjene dny tež w druhich zwjazko­wych krajach, mjez druhim w Durinskej, Bayerskej abo Saksko-Anhaltskej, rozprawjeli.

Reformaciski dźeń je kruty termin w protyčce čłonow Serbskeho ewangelskeho towarstwa. Na tutym dnju přewjedu swoju lětnu hłownu zhromadźiznu. Zešli su so lětsa w Poršicach.

Poršicy (SN/MiP). Derje pjelnjena běše klasicistiska ewangelska cyrkej w Poršicach minjenu sobotu popołdnju. Ze zhromadnej nutrnosću, kotruž serbski superintendent Krystof Rummel nawjedowaše, zahaji Serbske ewangelske towarstwo (SET) tu swoje lětne zeńdźenje. Něhdźe 60 wobdźělnikow – we wjetšinje čłonojo SET z ewangelskich kónčin Hornjeje, srjedźneje a Delnjeje Łužicy, ale tež někotryžkuli hósć – poda so po tym do farskeho wosadneho domu.