Johanića w Zhorjelcu so zešli
To a tamne (24.09.26)
Štyrinohaty roboter je so w Južnej Koreji na marathonje wobdźělił. Po štyrjoch hodźinach a 19 mjeńšinach doběža do cila. Jeho aku je za cyłu čaru dosahał. Roboter z mjenom „Raibo2“ bě jasnje spěšniši hač druhe robotery ze štyrjomi nohami a móhł po marathonje hišće 25 kilometrow dale běžeć, zdźěla team slědźerjow, kotryž bě mašinu skonstruował.
Dohromady 600 konopjowych rostlinow je policija w plantaži w Saksko-Anhaltskej našła. Nimo toho sćazachu dohromady něhdźe 100 kilogramow kćenjow cannabisa, kotrež běchu hižo za předań spřihotowane. Z kćenjemi bychu plahowarjo něšto milionow eurow zasłužić móhli. Dalše objekty je policija tež w Sakskej a Braniborskej přepytała. Tam pak ničo njenamakachu.
Na 9. sakskej bohemiadźe znajomosće čěšćiny dopokazali
Wostrowc. Wot 17. do 18. septembra wotmě so w klóštrje Marijiny doł we Wostrowcu 9. sakska bohemiada – olympiada čěšćiny. Šwikawski krajny zarjad za šulu a kubłanje (LaSuB) ju kóžde druhe lěto organizuje. Dohromady wubědźowaše so w štyrjoch kategorijach 28 šulerkow a šulerjow ze sakskich gymnazijow, mjez nimi tež z našeho Budyskeho Serbskeho gymnazija. Wosebje zwjeselacy je wuspěch našeje šulerki Celine Häntzschel z rjadownje 9-2, kotraž wobsadźi w kategoriji A1+ druhe městno. Gratulujemy jej wutrobnje k wuběrnemu wukonej!
Wjac ludźi w Sakskej so zatepiło
Bad Nenndorf/Drježdźany (dpa/SN). W Sakskej je so lětsa wjace ludźi při kupanju zatepiło hač lěto do toho. Němska towaršnosć za wuchowanje žiwjenja (DLRG) wčera zdźěli, zo su w swobodnym staće w lětušej kupanskej sezonje 19 zatepjenych registrowali, loni bě jich dźewjeć. Najwjace znjezboženych je DLRG w starobnej skupinje 21- do 30lětnych zwěsćiła.
Žadaja sej pjeć procentow wjace
Wolfsburg (dpa/SN). Tarifowa komisija dźěłarnistwa IG metal je wčera jednohłósnje žadanje za zwyšenjom zasłužby dźěławych awtotwarca VW wo pjeć procentow wobzamknyła. Nimo toho žadaja sej přidatnu socialnu podpěru za niše mzdowe skupiny. Tak mjenowane domjace tarifowe zrěčenje – jedne z najwjetšich firmowych tarifowych zrěčenjow w Němskej – płaći za něhdźe 130 000 dźěławych na stejnišćach VW w Braunschweigu, Kamjenicy, Drježdźanach, Emdenje, Hannoveru, Kasselu, Salzgitteru, Wolfsburgu a Šwikawje.
Mnichow olympiski faworit
Róčnica w času wulkich změnow
Delegacija swobodneho stata a biskopstwa na wopyće pola bamža
Rom (SN/MG). „Katolska cyrkej budźe katolske serbske herbstwo zachować a je škitać. Swobodny stat katolsku cyrkej při tym po swojich móžnosćach podpěruje“, rěka w artiklu 10 zrěčenja swjateho stoła a Swobodneho stata Sakskeje, kotrež staj bywšej sakski ministerski prezident Kurt Biedenkopf a japoštołski nuncius w Němskej Giovanni Lajolo dnja 2. julija 1996 podpisałoj. Składnostnje 30. róčnicy podpisanja přebywa wot wčerawšeho sakska delegacija w Romje. Dźensa rano mějachu awdiencu pola bamža Leja XIV.
Nimo ministerskeho prezidenta Michaela Kretschmera (CDU) a administratora Drježdźansko-Mišnjanskeho biskopstwa Andreasa Kutschke staj mjez druhim tež serbski zapósłanc krajneho sejma Marko Šiman (CDU) a biskop emeritus Heinrich Timmerevers z čłonom delegacije. W nowinskej zdźělence Šiman zwurazni, zo „padnje róčnica do časa wulkich změnow za cyrkwinske žiwjenje w Hornjej Łužicy.“ Wosebje kurs lutowanja biskopstwa wón kritizuje.
Wěstotne zrěčenje podpisali
Dalša diskusija slěduje
Narěč Macrona rozhoriła
Tel Aviv/New York (dpa/SN). Israelski ministerski prezident Benjamin Netanjahu je wčerawšu narěč francoskeho prezidenta Emmanuela Macrona na generalnej debaće Zjednoćenych narodow (UN) w New Yorku kritizował a wopisuje jeho wuprajenja jako „wostrózbnjace“. Macron běše naspomnił, zo palestinska islamistiska organizacija Hamas w Zapadnojordanskim kraju „nihdy zachadźała njeje“.
Tež najwažniši politiski riwala Netanjahuwa w Israelu, něhdyši šef wójska Gadija Eisenkot, kritizowaše Macronowe wuprajenje, kotrež „nimaja z realitu na městnje ničo činić“, Hamas je tež w Zapadnojordanskim kraju jara aktiwna. „Wo našim boju přećiwo terorej njediskutujemy“, wón na platformje X podšmórny.
Berlinska Lěwica pod ćišćom
Berlin (dpa/SN). Po wuspěchu Berlinskeje Lěwicy we wólbach krajneho sejma jewi so dźeń a wjace kritiki na stronje w zwisku z antisemitiskimi pozicijemi kaž tež stykami z kriminelnym miljejom clanow jednotliwych čłonow. Poprawom wšak je načolna kandidatka Elif Eralp stronu Zelenych kaž tež SPD na koaliciske rozmołwy hišće w tutym tydźenju přeprosyła.
To a tamne (23.09.26)
Darmotne bydlenje w starowni ma 18lětna studentka Louna Guivarch w bretonskej stolicy Bresće. Młodostna podpěruje 15 hodźinow wob tydźeń sobudźěłaćerjow w rezidency seniorow Calypso. Za to přewostaja jej tam dwě stwě a wona smě płuwarnju a sportownju darmotnje wužiwać. Z poskitkom za młodych ludźi chcedźa zamołwići zwiski a komunikaciju mjez generacijemi w domje spěchować.
Šoferojo awtow marki Porsche su po statistice wobchadnych přeńdźenjow přirunowanskeho portala Verivox najhórši wobdźělnicy nadróžneho wobchada. Woni „nazběraja“ sej 71 procentow husćišo dypki w Flensburgu hač přerězk šoferow. Na druhim a třećim městnje negatiwneje statistiki su šoferojo awtow marki Range Rover z 29 procentami a marki Tesla ze 26 procentami.
