Podstupim (dpa/SN). Po předstawje ­Braniborskeho ministerskeho prezidenta Dietmara Woidke (SPD) měł Zwjazk financowanje wosebitych rentow za něhdyšich sobudźěłaćerjow wójska abo policije w NDR kompletnje přewzać. Tuchwilu sej wuchodne kraje a Zwjazk kóšty za wupłaćowanje dźěla. Financny ćišć wuchodoněmskich krajow tajkich wosebitych, přidatnych zastaranskich systemow dla je přewulki, praji Woidke w interviewje z nowinu Handelsblatt. „Widźu zamołwitosć jasnje w rukomaj Zwjazka“, podšmórny wón. Za čas NDR eksistowaše dohromady 27 systemow přidatneho zastaranja za jednotliwe powołanske skupiny. Wosebite renty dóstachu mjez druhim něhdyši přisłušnicy wójska abo policije, ale tež wědomostnicy, inženjerojo a lěkarjo. Po změnje přewzachu 60 procent kóštow za to wuchodoněmske kraje, 40 procentow Zwjazk. Spočatk 2021 zwyši Zwjazk swój podźěl na 50 procentow. Cyłkowna suma kóštow wšitkich wuchodoněmskich krajow wučinješe w lěće 2023 něhdźe 2,68 miliardow eurow. W koaliciskim zrěčenju dojednaštej so CDU/CSU a SPD na to, zo Zwjazk swój podźěl wo dalše dźesać procentow zwyši.

We woknje swojeje kupjele tčacy wostał je muž w Nürnbergu. Hornje ćěło sahaše z wokna, brjuch bě hišće w kupjeli. Wohnjowa wobora muža wuchowa. Wobornicy wokno wutwarichu a muža z runje 21 centimetrow wulkeho wokna wuswobodźichu. Muž po swojich mocach pomhaše a brjuch „do so sćahny“. Čehodla bě muž z woknom zalězć chcył, njeje znate.

Na wšěch 124,7 kilometrow wróćo storkało je elektriske nakładne awto na motorowym wubědźowanišću w Oscherslebenje w Saksko-Anhaltskej. Jězba traješe šěsć hodźin a 22 mjeńšin při spěšnosći 20 km/h. Čara wobsahowaše 476 křiwicow. Za wodźidłom sedźeše oficěr zwjazkoweje wobory Marco Hellgrewe. Dotalny rekord z lěta 2020 wučinješe 89 kilometrow. Z akciju chcychu na elektrifi­kowanje wobchada, wěstotu na dróhach a połoženje šoferow skedźbnić.

Berlin (dpa/SN). Zwjazkowy kancler Friedrich Merz (CDU) je do Washingtona dolećał. Tam wočakuje jeho dźensa popołdnju prezident USA Donald Trump na nastupny wopyt. Planowany bě zhromadny wobjed a termin z nowinarjemi. Rěčeć chcetaj wobaj wo skónčenju wójny w Ukrainje, wo reakciji NATO na wohroženja a wo zwadźe mjez USA a EU cłow dla. Merz je připowědźił, zo nochcył so Trumpej jako prošer prezentować, ale jako sebjewědomy zastupnik Europy.

Putin a bamž telefonowałoj

Moskwa (dpa/SN). Ruski prezident Wladimir Putin a bamž Leo XIV. staj so w prěnim telefonaće za pohłubšenje poćahow mjez Moskwu a Vatikanom wuprajiłoj. Putin dźakowaše so bamžej za toho prócowanja na dobro humanitarneje pomocy w Ukrainje. Leo XIV. prošeše Putina wo měrowy signal, zo móhli so rozmołwy wo skónčenju wójny wuspěšnje dale wjesć. Putin šwikaše zakaz ruskeje prawosławneje cyrkwje w Ukrainje.

Wobmjezowanja wukazane

Wohnjowi wobornicy a policisća rozhladuja so w Ulmskim měšćanskim dźělu Donaustetten w Badensko-Württembergskej. Tam bě wčera njewjedro cychnowało a tójšto škody zawostajiło. Fachowcy z toho wuchadźeja, zo bě to tornado. Sylny wichor je we wobkruhu tysac metrow wšitke domy wobškodźił a třěchi zdźěla dospołnje wotkrył. Foto: dpa/Jason Čepljakow