Běłowodźanam ponowjene dwórnišćo přepodali
Běła Woda (AK/SN). Hromadźe z tójšto wobydlerjemi a hosćimi je měšćanostka Běłeje Wody Katja Dietrich (SPD) minjeny pjatk saněrowane měšćanske dwórnišćo swjatočnje wotewrěła. Z tym je město swój prěni wulki projekt změny strukturow dokónčiło. Jón su w lěće 2023 zahajili. 90 procentow wot cyłkownje 8,2 milionow eurow twarskich kóštow dóstachu za to ze zwjazkoweho fondsa za sylnjenje strukturow. Nowe mjeno „Kulturne a wobydlerske dwórnišćo“ na to skedźbnja, zo njeje twar jenož proste dwórnišćo. W nim su tež měšćanska biblioteka z čitanskej kofejownju, žurla za zarjadowanja a bistro. Dźakowano liftej docpěja wopytowarjo biblioteku bjez barjerow.
W nowej bibliotece poskića dohromady 32 000 medijow. W jeje rumnosćach pak móžeš tež přednoški, čitanja, wustajeńcy, koncerty, dźěłarnički a seminary přewjesć. Čitarjo móža sej wotnětka medije samostatnje na elektroniskimaj terminalomaj wupožčić resp. je tam zaso wróćić. Přidatnje móža woni medije bórze tež hišće zwonka wotewrjenskich časow na dalšim terminalu wróćić.
To a tamne (05.10.26)
Tak mało wody kaž hišće ženje
Bonn (dpa/SN). Po europskich rěkach je lětsa wjele mjenje wody běžało hač je to poprawom normalne. Tole pokazuje bilanca klimoweje posłužby EU C3S. W lěću bě přerězne mnóstwo wody w rěkach na najnišim stawje po spočatku měrjenja w lěće 1992. W juliju a awgusće su we wulkich rěkach kaž w Rynje, Dunaju abo Loire tak mało wody registrowali kaž hišće ženje. Tole měješe wuskutki na zastaranje z pitnej wodu, chłódźenje reaktorow a krjepjenje polow.
Kampanja za šćěpjenje skotu
Drježdźany (dpa/SN). Swoje domjace zwěrjata a wužitny skót maja wobsedźerjo w Sakskej we wjetšim wobjimje šćěpić dać. Zaměr noweje kampanje je zwyšenje šćěpjenskeje kwoty małych zwěrjatow, pjerizny, swinjow, konjow kaž tež wulkich přežuwakow. Dale a mjenje ludźi da swoje skoćata šćěpić, rěka ze socialneho ministerstwa. Tohodla je tež zaso wjace chorosćow, kaž na přikład sćekłosć.
Šwikaja brojenje pjenjez
Generalnemu sekretarej NATO, Markej Rutte, su wčera, štwórtk, ...
Kredity njedosahaja
Sakska technika w kosmosu
Zakazaja dalše wětrniki?
W Sakskej njeje dosć płoninow za wětrniki wupokazanych
Drježdźany/Chrósćicy (SN/MiP). Spočatk tydźenja je sakske statne ministerstwo za infrastrukturu wozjewiło, zo wone tuchwilu „přechodny zakaz natwara nowych wětrnikow na wěstych přestrjenjach“ w kraju pruwuje. Připowědźenje tróšku zadźiwa, wšako leži swobodny stat z dotal 850 nastajenymi wětrnikami w zwjazkowym přerězku za Posaarskej na předposlednim městnje nastupajo wutwar zdobywanja energije z wětřika. Tute běše zwjazkowe knježerstwo w lěće 2022 wobzamknyło. Zakład za to pak je wupokazanje přestrjenjow, kotrež so w zwjazkowych krajach za natwar wětrnikow hodźa. Po směrnicach zakonjedawarja ma swobodny stat hač do kónca lěta 2027 znajmjeńša 1,3 procenty a hač do kónca lěta 2032 cyłkownje dwaj procentaj swojeje přestrjenje za twar wětrnikow wupokazać. Tuchwilu pak su w Sakskej hakle něhdźe 0,4 procenty płoniny za to wupokazane.
Skupina Astronawt w Praze wustupiła
Je hižo z tradiciju, zo so spočatk winowca w Praze Dźeń němskeje jednoty swjeći. Lětsa bě Sakska z hłownym hosćom swjatočnosće, kotruž su mjez druhimi tež Serbja reprezentowali.
Praha (SN/LuNo). Wčera su w Praskej rezidency němskeho wulkopósłanstwa Dźeń němskeje jednoty woswjećili. Na přeprošenje wulkopósłanca dr. Petera Reusse staj so na přijeću nimo druhich hosći z politiki a hospodarstwa tež čěski statny prezident Petr Pavel a sakski ministerski prezident Michael Kretschmer (CDU) wobdźěliłoj. Wobaj w swojimaj narěčomaj wuzběhnyštaj, kak wažne poćahi mjez bliskimi susodami su. Kretschmer zwurazni, zo je dźeń zjednoćenja Němskeje najrjeńši němski statny swjatk. Pavel rjekny, zo „trjeba Europa mócnu, wotewrjenu a aktiwnu Němsku“.
Milionyza slědźenje
Choćebuz (SN/MiR). Spěchowanske srědki we wobjimje něhdźe 64,5 milionow eurow su braniborski ministerski prezident dr. Dietmar Woidke (SPD), statna sekretarka za slědźenje Zwjazka dr. Silke Launert (CDU) a braniborska ministerka za wědomosć dr. Manja Schüle (SPD) wčera na zarywje za slědźenski campus w Choćebuzu přepodali. Inwesticija ma sewjernje wuwučowanskeho twarjenja 4B centralneho campusa Braniborskeje Techniskeje uniwersity nastać. Prezident a předsydźa Němskeho centruma za lětarstwo a swětnišćowe lětarstwo (DLR), Fraunhoferoweje towaršnosće a Leibnizoweho zhromadźenstwa chcedźa pjenjezy za přihot twarskeje płoniny wužiwać.
Campus, za kotryž Zwjazk a Braniborska něhdźe 325 milionow eurow nałožitej, ma swětłownja w strukturnej změnje we Łužicy być. Wón je dźěl přichodneho Parka wědomosće, kotryž so na něhdźe 420 hektarow wulkej přestrjeni na sewjerozapadźe města wuwiwa a kiž slědźenje, předewzaća, bydlenje a wólny čas zwjazuje. Hač do lěta 2030 ma na 55 000 kwadratnych metrow wulkim arealu pjeć twarjenjow za slědźenje nastać.
To a tamne (02.10.26)
Po nadpadźe 13lětneho na šulu w słowakskim Staškovje je nětko tež druha wosoba wudychała. Po wučerce je šulerka zemrěła, kotruž bě atentatnik z nožom zranił. Tole wozjewi prezident parlamenta Richard Rasi na plenarnym posedźenju w Bratisławje. Generalny statny rěčnik Maros Zilinka a minister za kubłanje Tomas Drucker zwurazništaj na Facebooku swoje wutrobne sobužarowanje. Wopor je 13lětna holca z mjenom Nela. Pozdatneho atentatnika bě policija krótko po njeskutku zajała. Wón je šuler 8. lětnika.
Namjet škitneho pasma za wjelryby w južnym Atlantiku je w awstralskim Hobarće znowa zwrěšćił. Argentinska, Brazilska a Uruguay sej je hižo wot 1990tych lět žadaja. To by po cyłym swěće třeće škitne pasmo za wjelryby było. Mjezynarodna komisija je namjet wotpokazała.
