Žane zniženje dawka na milinu
Berlin (dpa/SN). Wodźacy zastupnicy CDU/CSU a SPD njejsu so na to dojednali, zo dawk na milinu za wšitkich wobydlerjow kraja zniža. Tole je powěsćernja dpa po wčerawšim posedźenju koaliciskeho wuběrka z kruha wobdźělnikow zhoniła. Nastupajo milinu płaća najprjedy raz rjadowanja dale, kotrež bě zwjazkowe knježerstwo schwaliło. Kabinet bě wobzamknył, zo dawki za milinu w industriji, ratarstwje a lěsnistwje zniža. Zo njezniža dawk za wšěch wobydlerjow, je mjeztym šěroku kritiku zbudźiło. Zwjazkowy kancler Friedrich Merz (CDU) a financny minister Lars Klingbeil (SPD) staj tole z napjatym pjenježnym połoženjom zwjazkoweho etata wopodstatniłoj.
W koaliciskim zrěčenju běchu CDU/CSU a SPD zniženje dawka za milinu „za wšěch“ wobydlerjow zakótwili.
Zasadne prašenje je, kak falowace dochody stata zniženeho milinoweho dawkow dla wurunaja. Stat by dochody 5,4 miliardow eurow přisadźił. Tuž by koalicija na druhim městnje na njedobro ludźi lutować dyrbjała.
WHO: Alkohol raznje podróšić
Dale a wjace ludźi w Němskej za lěpši škit młodostnych před pićom
Genf/Berlin (dpa/SN). Swětowa strowotniska organizacija WHO zasadźuje so za wyše dawki na alkohol, tobak a jara słódke napoje. Wona namołwja kraje, zo płaćizny za tute strowoće škodźace wudźěłki hač do 2035 z pomocu dawkow wo znajmjeńša 50 procentow zwyša.
Z dochodami móhli zamołwići na přikład bój přećiwo schorjenjam wutroby, přećiwo rakej abo diabetes financować. Tute chorosće zawinuja mjeztym třećinu wšěch smjertnych padow na zemi. Iniciatiwa móhła přichodnych dźesać lět hač do tysac miliardow dolarow wunjesć.
Wjetšina wobydlerjow Němskeje přeje sej razniše zakonje, kotrež wosebje młodostnych před alkoholom škitaja. Tole je wuslědk naprašowanja instituta Forsa w nadawku chorobneje kasy KKH.
Tak je 65 procentow ludźi za to, zo tak mjenowane přewodne piće wot 14 lět wotstronja. Tuchwilu smědźa młodostni zhromadnje ze zamołwitym dorosćenym w zjawnosći piwo, wino a winowe napije kupić a pić. Na přikład zhromadnu škleńčku sekta na narodninach abo piwo z nanom a maćerju w hosćencu.
Pomoc sej wažić
Nabožny tydźeń w prěnim prózdninskim tydźenju kóždolětnje wulku ličbu ludźi zaběra. Duchowni, pomocnicy w kuchni, kubłarjo a kubłarki, sobudźěłaćerjo farskich běrowow, młodostni – wšitcy tući wopruja swój swobodny čas, zo bychu dźěćom rjane a zabawne dny połne wjesela skićili. Je to česćomne dźěło, kotrež měli sej na kóždy pad wažić. Přetož bjez wšěch tutych pomocliwych rukow njeby nabožny tydźeń móžny był. W běhu pjeć zhromadnych dnjow rozestaja so dźěći intensiwnje, hrajkajo a bjez ćišća z nabožnej temu. To šulska wučba nabožiny w tymle wobjimje hustodosć njezdokonja.
Tohorunja wuskutkuje so nabožny tydźeń rěčnje pozitiwnje na serbsku dźěćinu. Jim zaruča so tak rěčny rum, w kotrymž swoju maćeršćinu dźeń wote dnja pěstuja. Tež za dźěći, kotrež chodźa zwonka serbskeho rěčneho ruma do šule, je to wulkotna móžnosć přećelstwa nawjazać a rěčne kmanosće rozšěrić. Marta Měrćinkec
Sadźenki zachowaja namrěwstwo
Kónc tydźenja wjele wobchada
Mnichow (dpa/SN). Přichodny kónc tydźenja nadróžny wobchad na awtodróhach Němskeje zaso masiwnje přiběra. W Bremenje, Delnjosakskej, Hessenskej, Porynsko-Pfalcy, Posaarskej kaž tež na juhu Nižozemskeje započinaja so prózdniny. W Sakskej, Saksko-Anhaltskej a Durinskej su hižo prózdniny. Při rjanym wjedrje drje mnozy wulětnicy dróhi přidatnje zatykaja. Wosebje potrjechene su dróhi k morju, do horow a k jězoram. Tuchwilu je na awtodróhach Němskeje cyłkownje 1 200 twarnišćow.
Najwjetše haćenja hroža pjatk popołdnju, sobotu dopołdnja a njedźelu popołdnju. Štóž je fleksibelny, njech wužiwa měrnišu póndźelu abo wutoru za jězbu, po móžnosći nic za čas powołanskeho wobchada.
Na čarach do směra na juh hroža po dotalnych nazhonjenjach najsylniše haćenja. Strach haćenjow wobsteji před wšěmi tunlemi pod Alpami, ale tež na Brennerowej awtodróze z Awstriskeje do Italskeje, dokelž tam móst ponowjeja. Šoferojo po puću do Prahi njech so na to nastaja, zo na čěskim boku wjacore tunle awtodróhi D8 do směra na čěsku stolicu wuporjedźa.
To a tamne (03.07.25)
Wulka horcota je za železnicu techniske defekty a zapozdźenja zawiniła. Najčasćišo bědźachu so sobudźěłaćerjo ze sćehnjenymi wuhibkami a horcymi motorami. Sapace słónco bě wocl kolijow zezhibowało. Motory ćahow njejsu so dosć chłódźili a su wupadnyli. Nimo toho so podłu kolijow stajnje zaso kerčiny palachu, štož zawrjenje čarow zawinowaše – mjez druhim w Delnjosakskej, Saksko-Anhaltskej a w Hamburgu.
Přepjany, zo móhł do awta zalězć, bě muž w Jenje. Swědkojo prócowanja 33lětneho wobkedźbowachu a policiju informowachu. Jako zastojnicy přijědźechu, njebě muž přeco hišće dale. Policisća zwěsćichu, zo je wón z awtom hač tam dojěł a při zaparkowanju druhe awto wobškodźił. Alkoholowemu testej pak so muž zasakle spjećowaše. Skónčnje jeho sputachu a na stražu sobu wzachu.
Rěča wo dawku na milinu
Berlin (dpa/SN). Wodźacy zastupnicy CDU/CSU a SPD su dźensa w koaliciskim wuběrku wo móžnym zniženju dawka na milinu za priwatne domjacnosće wuradźowali. Zwjazkowy kancler Friedrich Merz je do zahajenja posedźenja nadźiju na rozrisanje zbudźił: „Jeli móžemy wjace za priwatne domjacnosće wuzbytkować, potom to činimy“, rjekny předsyda CDU w sćelaku ARD. Hłownje wuradźuja wo tym, kak zniženje dawkow za domjacnosće a industriju ze stron stata wurunaja.
EU předstaja klimowe zaměry
Brüssel (dpa/SN). Komisija EU dźensa swój namjet za zawjazowacy klimowy zaměr hač do lěta 2040 předstaješe. Kaž bě hižo do toho z naćiska znate, maja čłonske kraje EU produkciju maćiznow, kotrež klimje škodźa, přirunujo z lětom 1990 wo znajmjeńša 90 procentow znižić. Móžne su pak tež mjezynarodne projekty za zniženje wuhlikoweho dioksyda. EU chce po swójskich wuprajenjach hač do 2050 klimoneutralna być.
Pušćenje İmamoğla sej žadali
