Kontrolu nad awtom zhubiła

Bluń. Po wšěm zdaću wulke dźiwje zwěrjo bě njedźelu wječor přičina wobchadneho njezboža pola Blunja. Na B 156 bě 19lětna wodźerka awta ze Zabroda přijěła, jako zwěrjo puć přeprěči. Młoda žona spyta so jemu instinktiwnje wuwinyć, zhubi při tym kontrolu nad jězdźidłom a zrazy do telefonoweho sćežora. Tón padny na awto a te so na kromje puća zwróći. 19lětna so na zbožo njezrani, na awće pak nasta něhdźe 16 000 eurow škody. Dale wona z nim hižo jěć njemóžeše, tak zo dyrbjachu je wotwlec. Dróha bě nachwilnje dospołnje zawrjena.

Jutrownej jeji pokradnyłoj

Budyšin. Paduchow jutrowneje dekoracije je policija w nocy na srjedu w Budyšinje lepiła. Młodostnaj w starobje 17 a 18 lět běštaj po wšěm zdaću měnjenja, zo su jutry nimo, a spakosćištaj při Bohatej ­wěži něhdźe meter wulkej dekoraciskej jeji w hódnoće sto eurow. Alarmowani policisća młodostneju w bliskosći lepichu a jeji zaso při wěži nastajichu.

Ćežka zražka blisko Worklec

Worklecy. K ćežkemu wobchadnemu njezbožu bě njedźelu popołdnju na křižowanišću mjez Worklecami a Smječkecami dóšło. 61lětna wodźerka VWja njeje tam předjězbu z Róžanta bližaceje so 84lětneje šoferki Peugeota wobkedźbowała. Při zražce so VW zwróći a jeho ­wodźerka kaž tež sobujěduca so ćežko zraništej. 84lětna wodźerka Peugeota a jeje 90lětna sobujěduca so snadnje zraništej. Wšitke štyri žony dowjezechu k lěkarskemu zastaranju do chorownje. Cyłkownu wěcnu škodu trochuje policija na něhdźe 15 000 eurow. Wobě znjezboženej awće dyrbjachu wotwlec dać.

Wjele pjenjez zhubił

Oderwitz. Muž z Oderwitza w Zhorjelskim wokrjesu je so zašłe dny z woporom wobšudnikow stał a wjele pjenjez zhubił. Wón bě do bitcoinow inwestował. Skućićeljo jemu w mailce napowědachu, zo je pječa něchtó přistup na jeho konto dóstał. Tohodla měł muž bitcoiny na ­wěsćiše konto přepokazać. Tole wón tež činješe a wobšudnikam při tym do paslow stupi. Woni mjenujcy zamóženje dale přepokazachu, tak zo muž hižo žadyn přistup k njemu nima. Škoda ma wobjim šěsćcyfroweje sumy.