Wandalojo po puću byli

Niska. W nocy na pjatk su w Niskej wandalojo na wjacorych dróhach, kaž na Mužakowskej, Budyskej a Rothenburgskej, zachadźeli. Policiji je cyłkownje 21 wozjewjenjow wo móranjach dóšło. Wěcna škoda wučinja po prěnich trochowanjach něhdźe 18 850 eurow. Potrjechene su mjez druhim radnica, krajnoradny zarjad, nakupowanske wiki, mnohe jězdźidła, bydlenske domy a murje kaž tež wobchadne znamjenja. Skućićeljo wužiwachu čornu, čerwjenu kaž tež žołtu ­barbu a zawostajichu zdźěla přećiwo wustawje so měrjace symbole abo napisy. Decernat statny škit so z padami zaběra.

Wuchowar žiwjenja počesćeny

Wojerecy. Zastojnicy policije a wohnjoweje wobory su srjedu 13lětneho hólčeca jako wuchowarja žiwjenja počesćili. Finn Elias běše 23. septembra wobkedźbował, kak z bydlenja na Starej Berlinskej we Wojerecach kur z wokna stupa a informowaše hnydom wohnjowu woboru. Jako wobornicy zhromadnje z policiju bydlenje wočinichu zwěsćichu, zo běše 74lětny muž wobjed na kachlach přismudźić dał. Jeho dyrbjachu z podhladom zajědojćenja kura dla do chorownje dowjezć. Finn Elias přija dobropis a dósta wjedźenje po policajskim ­rewěrje.

Awto pokradnjene a namakane

Budyšin. Paduši su so na Leibnitzowej w Budyšinje w nocy na njedźelu do wosoboweho awta typa Hyundaj zadobyli a z nim wotjěli. Wobsedźer móžeše pozdźišo swoje jězdźidło z pomocu techniki na parkowanišću při Schliebenowej zwěsćić. Tam steješe wone njezamknjene a njewobškodźene.

Zadobywarjow lepili

Kubšicy. Młodaj mužej w starobje 16 a 24 lět staj njedźelu rano w Kubšicach škleńcu nakupowanišća ze železnej žerdźu rozbiłoj a so do njeho zadobyłoj. ­Hara napadny wobydlerjej, kotryž poli­ciju informowaše. Jako zastojnicy přijědźechu, so paduchaj z pokradnjenymi ­cigaretami a žiwidłami w kupnicy schowaštaj. Z pomocu policajskeho psa pak jeju spěšnje namakachu.