Konjacy zapřah znjezbožił

Pančicy-Kukow. Wobchadne njezbožo njewšědneho razu je so druhi dźeń noweho lěta pola Pančic-Kukowa na pólnym puću Trjebjenja z Chróšćanskeho směra stało. Tam bě skupina jěcharjow kaž tež konjacy zapřah na swojim nowolětnym jěchanju po puću. Z dotal njeznateje přičiny so konjacy zapřah, na kotrymž sedźeše dohromady šěsć wosobow, zwróći. Štyri wosoby so zranichu. Hižo prjedy hač wuchowanscy pom­ocnicy přijědźechu, běštej so dwě zranjenej wosobje z městna njezboža ­zminyłoj, kaž w rozprawje Zhorjelskeje policajskeje direkcije rěka. 75lětneho muža, kotryž bě konjacy zapřah wodźił, dowjezechu z helikopterom do chorownje. 52lětnu žonu tohorunja w chorowni lěkarsce zastarachu. Konjej so ničo stało njeje. Policija nětko přepytuje, kak je k njezbožu dóńć móhło a hač njeje snano alkohol při tymle jěchanju wěstu rólu hrał.

Wobšudnikam njewěrili

Budyšin. We Wojerecach a w Budyšinje su njeznaći njedźelu wječor spytali, ludźom pjenjezy wulišćić. Při telefonje wudawachu so jako policisća a powědachu, zo je rumunska cwólba po puću a zo chce so do bydlenjow zadobyć. Jako so wobšudnicy ludźi prašachu, kelko pjenjez doma maja, kedźbliwi wobydlerjo telefonat skónčichu.

Kamin pokradnyli

Njezdašecy. Zahrodowy domčk bě minjene dny cil paduchow w Njezdašecach. Tam pokradnychu mjez druhim kamin, wuheń z wocla, ručicy za durje, boiler za ćopłu wodu a dalše wěcy. Škoda wučinja něhdźe 12 500 eurow.

Na hładkej dróze znjezbožiłoj

Hórki. Zamjerznjene dróhi su sobotu wječor we wobłuku Budyskeje policajskeje direkcije k wjacorym wobchadnym njezbožam wjedli. Tak je 49lětny wodźer Mercedesa něhdźe w 19.30 hodź. na puću z Chrósćic do Hórkow z jězdnje zajěł a do dweju štomow prasnył. Na jeho awće nasta wjace hač 20 000 eurow škody. Šofera a jeho 48lětnu sobujěducu dowjezechu snadnje zranjeneju k dalšemu lěkarskemu zastaranju do chorownje.

Kulow. Na hładkej dróze je něhdźe w samsnym času tež 24lětny wodźer VWja w Kulowje znjezbožił. Wón započa so na dróze Při měšćanskej hrjebi suwać a suny so do dweju wosoboweju awtow. Přiwołani policisća pytnychu, zo bě młody muž alkohol pił a naměrichu pola njeho 0,80 promilow. Dale jěć wón wězo njesmědźeše. Jeho jězbnu dowolnosć sej ­zastojnicy wobchowachu.

Wjeje škody nastało

Kulow. 21lětny ­wodźer VWja Passata je w nocy na njedźelu w Kulowje kontrolu nad swojim jězdźidłom zhubił. Wón ­zrazy do wosoboweho awta a suny je do garaže. Nimo toho so při zražce wobchadne znamjo a płót ležownosće skóncowaštej. Po prěnim trochowanu nasta něhdźe 85 000 eurow škody.