Policija (29.04.25)
Wopity hišće dale pić chcył
Łaz. Pokiw wo po wšěm zdaću pjanym šoferu je policiju njedźelu popołdnju we Łazu dóstała. Tam je wodźer Dacije tankował a nochcyše na to jenož bencin, ale tež alkoholiske napoje zapłaćić. To pak wón njemóžeše, dokelž pjenježne karty njefungowachu. Tak sydny so muž, kotryž bě pječa hižo chětro natutkany, do swojeho jězdźidła, zo by pjenjezy wobstarał. Te sej wot znateho wupožči a swój dołh zapłaći. Policija pak bě mjeztym tež na městnje. Pola muža naměrichu 1,86 promilow alkohola w kreji.
Policija (25.04.25)
Pytaja swědkow njezboža
Chrósćicy. Wodźer mopeda je srjedu rano na dróze mjez Chrósćicami a Wudworjom bjez wobdźělenja dalšich wosobow znjezbožił. 38lětny poda so k lěkarskemu přepytowanju do chorownje. Při přepruwowanju městnosće policisća zwěsćichu, zo bě na dróze wolij. Dalše tajke zanjerodźenje zwěsćichu we Worklecach. Nětko pytaja swědkow njezboža a dalšich, kotřiž su snano wobkedźbowali, štó je pola Chrósćic a we Worklecach wolij zhubił. Pokiwy přijimuja na Kamjenskim policajskim rewěrje pod 03578/ 35 20.
Policija (24.04.25)
Kolesowar ćeknyć chcył
Budyšin. Zastojnikam Budyskeho policajskeho rewěra je wutoru wječor krótko do 23 hodź. kolesowar na Mosće měra napadnył, dokelž tam trochu njewěsće jědźeše. Jako chcychu policisća muža kontrolować, tón nadobo mócnje do pedalow teptaše, zo by jim wućeknył. Najprjedy jědźeše po dróze Při pólnym hrodźiku. Na to pak muž znjezboži, nichtó druhi wobdźěleny njebě. Pola njeho naměrichu 1,74 promilow alkohola w kreji.
Policija (22.04.25)
Drohe koleso pokradnyli
Budyšin. Ani jutrownička njebě paducham w Budyšinje swjata. W času mjez připołdnjom a 18.00 hodź. pokradnychu woni z pincy na Tuchorskej droze koleso typa Specialized. Kaž policija zdźěli, bě jězdźidło něhdźe 8 000 eurow hódne.
Alkoholizowaneho šofera lepili
Wěteńca. Dobry čuch mějachu policisća w nocy na póndźelu blisko Wěteńcy. Krótko do połnocy kontrolowachu tam 30lětneho wodźerja VW Golfa a zwěsćichu, zo młody muž alkoholizowany za wodźidłom sedźi. Dale jěć wón wězo njesmědźeše, ale dyrbješe sobu na policajski rewěr přińć. Tam naměrichu pola njeho 0,54 promilow alkohola w kreji. Muž změje nětko pokutu płaćić, dóstanje dypki w Flensburgu a budźe so swojeho awta chwilu wzdać dyrbjeć.
Policija (16.04.25)
Njezbožo so w haće skónčiło
Kulow. Zbožo w njezbožu měješe wutoru rano muž w Kulowje. 82lětny bě na Młynskej z dotal njeznateje přičiny na lěwy bok jězdnje zajěł. Na kromje Měšćanskeho hata so jeho jězdźidło strašnje nachiliło. Kaž policija rozprawja, je wuměnkar po wšěm zdaću z awta do wody padnył. Dokelž swědka spěšnje jednaše, móžeše wona muža wuchować. Hewak drje by so wón zatepił. Přiwołane wuchowanske mocy 82lětneho skónčnje z wody wućahnychu a jeho do chorownje dowjezechu.
Policija (15.04.25)
Zapakowane kolesa namakali
Bukecy. Minjene měsacy je policija wuchodnje Budyšina wjacore kolesa namakała. Wone ležachu w přirowach w Delnjej Kinje, Kubšicach a Bukecach a běchu hišće originalnje zapakowane. Jedna so wo kolesa markow Versiliana a Frejus. Nětko pytaja swědkow, kotřiž su minjene tydźenje něšto podhladneho wobkedźbowali. Pokiwy přijimuje policija pod telefonowym čisłom 03591 3560.
Policija (11.04.25)
„Kóń“ na jězdni stał
Zhorjelc. Swědk je w nocy na štwórtk na zwjazkowej dróze B 6 w Zhorjelcu konja na jězdni wuhladał a policiju informował. Skoćo popadnyć njebě ćežko, dokelž jednaše so wo wulke plyšowe zwěrjo. Njeznaći běchu je po wšěm zdaću jako žort na puć stajili. Zastojnicy konika sobu wzachu a wotjědźechu. Policija prosy, so tajkich akcijow wzdać.
Policija (10.04.25)
Wobšudnistwu zadźěwała
Kamjenc. Dospołnje prawje zadźeržała je so minjene dny młoda žona z Kamjenca. 23lětna chcyše w awtowym domje w Göttingenje online awto kupić. Jako bě sej wona z předawarjom přezjedna, dyrbješe wona kupnu sumu zapłaćić. Za to dósta IBAN-čisło z Nižozemskeje. Jako na to najprjedy raz pjenjezy njepřepokaza, pósłachu jej wobšudnicy IBAN-čisło z Madźarskeje. Nětko bě Kamjenčanka dospołnje zadźiwana a so w awtowym domje nadrobnišo wobhoni. Při jeje rešerši zwěsći, zo běchu to po wšěm zdaću wobšudźerjo. Młoda žona wšitke dotalne jednanja cofny a pad pola policije přizjewi.
Policija (07.04.25)
Na awtodróze mórali
Słona Boršć. Kedźbliwi šoferojo policiju w nocy na njedźelu informowachu, zo při awtodróze A 4 mjez Słonej Boršću a Hornim Wujězdom něchtó škitne sćěny pomóra. Na městnje zwěsćichu zastojnicy dwě wosobje, kotrejž pěši ćeknyštej. 22lětneho hišće w bliskosći dosahnychu. Wón swój njeskutk hnydom přizna. Dalši 20lětny so sam wot so k městnu njeskutka wróći a móranje tohorunja přizna. Wobaj běštaj wjacore metry wulke pismiki na sćěny napryskałoj a tak něhdźe 5 000 eurow škody načiniłoj. Jedyn z njeju steješe pod wliwom drogow.
Policija (04.04.25)
Trawusyčak kradnyli
Rakecy. Nimale 1 700 eurow škody načinichu njeznaći, kotřiž so w nocy na srjedu na ležownosć w Rakecach zadobychu. Tam pokradnychu nimo wšelakich gratow trawusyčak. Ležownosć drje bě z płotom wobdata, ale nic zamknjena, tak zo žana dalša škoda njenasta.
