Policija (17.09.26)
Wuměnkarka smjertnje znjezbožiła
Kamjenc. 74lětna žona bě wčera připołdnju na statnej dróze S 94 wot Porchowa do Kamjenca po puću. 200 metrow před křižowanišćom z S 95 směr Macherowu w Kamjencu zajědźe wona na lěwy bok jězdnje a zrazy do napřećo přijěduceho nakładneho awta. Zatłusnjenu šoferku dyrbjachu z awta wuswobodźić. Wona hišće na městnje njezboža wudycha. Swědkojo, kotřiž su tole wobkedźbowali, měli so pod čisłom 03578 3670 přizjewić.
Policija (16.09.26)
Njezbožo tragiski wukónc měło
Wojerecy. Ćežke wobchadne njezbožo je so wčera něhdźe w 19 hodź. na zwjazkowej dróze B 97 mjez Wojerecami a Njedźichowom stało. Z dotal njeznateje přičiny je tam wosobowe awto frontalnje do napřećo přijěduceho nakładneho awta zrazyło. 77lětny wodźer wosoboweho awta so při tym tak ćežko zrani, zo hišće na městnje njezboža wudycha.
Policija (15.09.26)
Grat pokradnyli
Běła Woda. Zahrodkownišćo bě minjeny kónc tydźenja cil paduchow w Běłej Wodźe. Kaž policija rozprawja, zadobychu so njeznaći namócnje do garaže a pokradnychu wšelaki grat, kiž měješe cyłkownu hódnotu něhdźe 5 000 eurow. Běłowodźanska kriminalna słužba so nětko z padom zaběra.
Moped a diesel sobu wzali
Krušwica. Paduši běchu w nocy na njedźelu pola Krušwicy po puću. Najprjedy zadobychu so do garaže. Z njeje pokradnychu moped typa Simson a znački motorskeho MZ. Po tym měrjachu so na bager, kiž steješe na twarnišću. Z njeho wuklumpachu paduši diesel a spakosćichu kabl. Rubizna je po trochowanju policije něhdźe 5 200 eurow hódna. Nimo toho nasta něhdźe tysac eurow wěcneje škody.
Policija (14.09.26)
Muž hižo dale płuwać njemóhł
Niža Wjes. Wot pjatka popołdnju pytachu wohnjowi wobornicy a policisća w Nižej Wsy 86lětneho muža, kotryž njebě so z wody wjace na pobrjóh wróćił. Hač do njedźele popołdnja muža hišće namakali njeběchu, hačrunjež běchu samo z helikopterom za nim pytali. Wokoło 15 hodź. pak bě potom jasne, zo je muž wudychał, wšako jeho ćěło z wody wućahnychu. Wo tym rozprawještej dźensa, póndźelu, rano Sakske nowiny a nowiny Tag24. Přiwuznych muža su po informacijach rěčnika policije hižo informowali. Zwotkal wón pochadźeše, dotal hišće wozjewili njejsu.
Policija (11.09.26)
Do štoma zajěła
Njeswačidło. 79lětna žona je srjedu popołdnju ze swojim Renaultom znjezbožiła, jako z Njeswačidła do Sernjan jědźeše. Z dotal njeznateje přičiny zajědźe wona nalěwo z jězdnje a zrazy do štoma. Seniorka poćerpi lochke zranjenja a dyrbješe so w chorowni lěkować. Wěcna škoda na wosobowym awće wučinja něhdźe 10 000 eurow.
Policija (08.09.26)
Bjez jězbneje dowolnosće po puću
Malešecy. Zastojnicy Budyskeho policajskeho rewěra su njedźelu krótko do připołdnaj w Hućinje šofera awta marki Seat bjez jězbneje dowolnosće lepili. Policisća zakazachu jemu dale jěć.
Dźěćo přewidźał
Wojerecy. 64lětny wodźer motorskeho je njedźelu popołdnju na dróze Ferdinanda von Schill we Wojerecach znjezbožił. Muž rjekny, zo běše hólčeca, kotryž mjez awtami za swojim bulom běžeše, přepozdźe wuhladał a tuž nahle zaborzdźił. Na to ze swojeje mašinu padny a so lochce zrani. Na jězdźidle nasta škoda we wysokosći 3 000 eurow.
Napity wobchad wohrozył
Wojerecy. Napity Wojerowčan je so sobotu w nocy na Budyskej aleji wosrjedź dróhi stupił, tak zo dyrbjachu awta sylnje borzdźić. Při tesće zwěsćichu policisća něhdźe 2,4 promile alkohola.
Policija (07.09.26)
Šoferomaj na škodu
Kamjenc. Na křižowanišću Wojerowska/ Wuchodna dróha w Kamjencu bě sobotu popołdnju njezbožo mjez młodymaj šoferomaj wosoboweju awtow. 18lětny šofer awta marki Ford njeje předjězbu 19lětneje šoferki awta marki Škoda wobkedźbował. Tak zrazyštaj do so, při čimž so šoferka lochce zrani. Na jězdźidłomaj je škoda něhdźe 20 000 eurow nastała. Na to dyrbjachu wobě awće wotwlec. Wobaj wobdźělenaj staj němskeho pochada. Zastojnicy policije přepytuja njezbožo přećiwo wodźerjej Forda njekedźbliweho zranjenja ćěła dla.
Policija (04.09.26)
Awće do so zrazyłoj
Łuty. Dokelž bě sej 59lětna šoferka pječa za někotre sekundy wusnyła, zajědźe wona na Karla Liebknechtowej we Łutach na wopačnu jězdnju. Při tym koliděrowaše jeje awto z Hondu 65lětneje. Zraniłoj drje so žonje njejstej, nasta pak wěcna škoda něhdźe 20 000 eurow. Hišće na městnje njezboža sćazachu zastojnicy 59lětnej jězbnu dowolnosć.
Policija (03.09.26)
Šofer pod wliwom alkohola
Budyšin. Krótko po połnocy su policisća wutoru muža při powšitkownej kontroli wobchada z 0,62 promilemi alkohola w kreji lepili. Dokelž so wón přećiwo procedurje wobaraše, kotruž zastojnicy w tajkim padźe poprawom přewjeduja, sudnik přikaza, zo ma so mužej krej wotewzać. Z awtom muž wězo dale jěć njesmědźeše.
Žona z bydlenja nochcyła
Mužakow. Wutoru nawječor zazwoni muž na policiju, dokelž žona hižo jeho bydlenje wopušćić nochcyše. Jaku ju zastojnicy pozdźišo z bydlenja wotwjesć spytachu, so wona spjećowaše a kopny wo durje kupjele. Při tym nasta wěcna škoda. Tež po tym so 48lětna ze wšej mocu wobaraše, zhromadnje z policistami z bydlenja hić. Němce wumjetuja nětko kaženje domjaceho měra, wobškodźenje wěcow kaž tež spjećowanje přećiwo zastojnikam.
Wodźer konop konsumował
Wulke Rědorjecy. Při powšitkownej kontroli wobchada su zastojnicy wutoru muža na e-scooteru lepili, kotryž bě cannabis konsumował. Jězba bě za njeho nablaku nimo.
Policija (01.09.26)
Drohi šat pokradnyli
Ćisk. Do składa běchu so njeznaći minjene dny w Ćisku zadobyli. Njekmanicy skóncowachu při tym wjacore durje a wokna. Paduši pokradnychu wjacore kartony z DVDjemi kaž tež drohi njewjesćinski šat. Spakosćene wěcy su něhdźe 8 000 do 10 000 eurow hódne. Při zadobyću naparachu paduši na domskim něhdźe 4 700 eurow škody. Kriminalna policija pad nětko přepytuje.
Tři wukazy zajeća naraz
Wojerecy. Při powšitkownej kontroli wobchada zastojnicy policajskeho rewěra we Wojerecach minjenu njedźelu zwěsćichu, zo předleža přećiwo turkowskemu mužej tři wukazy zajeća. Zo njeby do jastwa trjebał, dyrbješe muž na městnje pokutu někotrych stow eurow zapłaćić. Po kontroli smědźeše ze swojim awtom dale jěć.
Policajske awto do sorny zrazyło
Nowe Demjany. Jěducy z Nowych Demjan (Neu-Diehmen) směr Wjazońcu je policist njedźelu rano zahe njezbožo zawinował. 30lětny zajědźe na S 119 do sorny, kotraž tam po puću běžeše. Nasta wěcna škoda 1 000 eurow. Sorna nablaku zahiny. Policist so zranił njeje. Po njezbožu móžeše hišće z awtom dale jěć. Policija pad registrowaše.
