Policija (05.08.26)
Z traktorom do lampy zrazył
Němcy. 18lětny šofer traktora bě póndźelu wječor na statnej dróze S 95 pola Kulowa po puću. Jako na kromje Němcow wotboči, zrazy z připowěšakom do nadróžneho wobswětlenja. Lampa so tak ćežko wobškodźi, zo dyrbjachu ju wottwarić. Kaž policija zdźěli, wučinja škoda něhdźe 5 000 eurow.
Policija (30.07.26)
Kolesowar awto zadźeržał
Budyšin. Ćěkaceho šofera je wutoru w Budyšinje kolesowar zadźeržał. 51lětny šofer bě ze swojim Hyundaijom z dwórnišća do směra na Póstowe naměsto jěł a při pósće najskerje přewysokeje spěšnosće dla kontrolu nad jězdźidłom zhubił. Najprjedy prasny wón do parkowaceho Seata a po tym na lěwym boku do BMWja. Na to chcyše so wón zminyć, to pak so nimokuli. Na Karla Marxowej zadźerža jeho kolesowar, z tym zo so ze swojim kolesom wosrjedź puća prěki stupi. Dohromady nasta na jězdźidłach něhdźe 10 000 eurow škody. Po dorěčenju ze statnym rěčnistwom sej přiwołani policisća jězbnu dowolnosć italskeho jězdźerja wobchowachu. Nimo toho změje so wón za to zamołwić, zo je z městna njezboža ćeknył.
Policija (29.07.26)
Wandalojo na Lubijskej horje
Lubij. Woblubowany wulětny cil domoródnych a dowolnikow je so w nocy na póndźelu z městnom njeskutka stał. Na Lubijskej horje su njeznaći tiketowy awtomat skóncowali. Z njeho wzachu pjenježnu kasetu, w kotrejž bě po informacijach Zhorjelskeje policajskeje direkcije něhdźe tysac eurow. Nimo toho přerězachu skućićeljo při wjacorych latarnjach milinowe kable. Dohromady načinichu něhdźe 15 000 eurow wěcneje škody. Policija je wšelake slědy zawěsćiła. Kriminalna słužba Žitawa-Horni kraj pad dale přepytuje.
Policija (28.07.26)
Kolesowar ćežko znjezbožił
Pančicy-Kukow. Ćežko zranił je so njedźelu popołdnju kolesowar w Pančicach-Kukowje. Kaž policija rozprawja, je 70lětny na dróze Při klóštrje swoje koleso ćišćał, jako so wón wo kromu puća zakopny a padny. Alkoholowy test zwěsći pola njeho 2,06 promilow alkohola w kreji. Wuchowanske mocy dowjezechu jeho do chorownje.
Policija (27.07.26)
Njeznaći muža wobšudźili
Wojerecy. 28 000 eurow je 54lětny muž pola Wojerec zašłe dny zhubił. Po tym zo bě wón wot wobšudnikow pozdatnu mejlku swojeje banki dóstał, přeradźi wón sensibelne daty swojeho konta. Z nimi njeznaći wjacore razy pjenjezy z konta Wojerowčana wotzběhnychu. Policija pad přepytuje.
Policija (20.07.26)
Wuměnkarjej pjenjezy zhubiłoj
Kamjenc. Z woporom wobšudnikow běštaj pjatk wječor wuměnkarjej-mandźelskaj pola Kamjenca. Skućićeljo na njeju zazwonichu a jimaj napowědachu, zo bě jeju syn ćežke wobchadne njezbožo zawinił. Wobšudnicy žadachu sej pjenjezy za kawciju. Bjez podhlada na wobšudnistwo přepodaštaj mandźelskaj cuzemu čłowjekej před swojimi chěžnymi durjemi něhdźe 25 000 eurow. W tym zwisku policija wospjet namołwja, zo njech wšitcy při tajkich a podobnych telefonatach kedźbliwi su. Najlěpje je, zo telefonat nablaku skónčiš a policiju informuješ. Wšojedne kotru stawizničku něchtó při telefonje powěda, nichtó njeměł cuzym ludźom swoje pjenjezy přewostajić.
Policija (16.07.26)
Na zapławjenej dróze znjezbožił
Trjebjeńca. Sylny dešćik njeje so předwčerawšim jenož wo někotre zapławjene pincy postarał, ale takrjec tež wobchadne njezbožo zawinił. Krótko do 17 hodź. bě na zwjazkowej dróze B 6 do směra na Trjebjeńcu (Steindörfel) 54lětny wodźer Škody po puću. Dokelž bě dróha połna wody, zajědźe muž z jězdnje, zrazy do dweju štomow a so přewali. Alarmowana wohnjowa wobora dyrbješe znjezboženeho z jeho awta wuswobodźić. Jězdźidło wuchowanskeje słužby dowjeze muža do chorownje. Wěcnu škodu trochuje policija na něhdźe 50 000 eurow. Zastojnicy policije njezbožo wobdźěłachu.
Policija (14.07.26)
Kedźbu před wysokej danju
Połčnica. Štóž chce swoje zamóženje rozmnožić, dyrbi so před wobšudnikami na kedźbu brać. Tole je nětko žona w Połčnicy bolostnje nazhoniła. Kaž policija zdźěli, je wona hižo spočatk junija na po wšěm zdaću seriozny poskitk reagowała, při kotrymž slubichu jej wysoku dań. Wona inwestowaše něhdźe 60 000 eurow. Jako chcyše sej minjeny kónc tydźenja pjenjezy wupłaćić dać, so wšitko jako wobšudnistwo wopokaza a žona přizjewi so pola policije. Při tym so wukopa, zo bě wona wobšudnikam tajne daty wo swojim konće přeradźiła. Kriminalna policija pad přepytuje.
Policija (13.07.26)
Bjez dowolnosće a z alkoholom
Rakecy. Za wjacore delikty zamołwić změje so 40lětny wodźer Opela, kotrehož policija sobotu w Rakecach kontrolowaše. Najprjedy wón žanu jězbnu dowolnosć předpołožić njemóžeše, dokelž žanu njewobsedźeše. Dale zwěsćichu pola njeho 0,66 promilow alkohola w kreji. A skónčnje tež drogowy test pozitiwnje na amfetaminy a konop reagowaše.
Policija (09.07.26)
Wuměnkarku wobšudźili
Kamjenc. Z woporom wobšudnikow je so wutoru popołdnju wuměnkarka pola Kamjenca stała. Njeznaći běchu na nju zazwonili a jej napowědali, zo je bratrowča ćežke wobchadne njezbožo zawiniła. Wobšudnicy žadachu sej kawciju a rentnarka přepoda před swojimi chěžnymi durjemi njeznatej wosobje 5 000 eurow. Policija w tym zwisku wospjet namołwja, podhladne telefonaty hnydom skónčić a policiju informować. Wšojedne wo kotru stawiznu so jedna – njedawajće cuzemu čłowjekej pjenjezy abo drohoćinki!
