Serbska rada wusud připóznawa

Podstupim. Braniborska rada za serbske naležnosće je so dźensa z wusudom wyšeho zarjadniskeho sudnistwa w Berlinje rozestajiła, w kotrymž běše skóržbje wjacorych komunow přećiwo přirjadowanju k serbskemu sydlenskemu rumej přizwoliło. Ze zjawneho stejnišća wuchadźa, zo nochce, byrnjež z wšelakimi argumentami procesa přezjedna njebyła, dale přećiwo wusudej prawnisce postupować.

Za wučbnicy wjac płaćić

Berlin. Za nakup wučbnicow dyrbjachu kupcy lětsa w juniju wjace pjenjez nałožić hač w smažniku loni. Statistiski zwjazkowy zarjad (Destatis) zdźěla, zo su so płaćizny za wučbnicy wo 2,3 procenty zwyšili. Zešiwki a rysowanske bloki płaćachu porno tomu 0,3 procenty mjenje.

Bencin w Čěskej zaso dróši

Sudnistwo: Rozsud sejmika płaći

Budyšin. Sakske wyše zarjadniske sudnistwo je skóržbu čłonki wokrjesneho sejmika přećiwo wobzamknjenju gremija kónc meje wotpokazało. Wo tym krajnoradny zarjad wčera informowaše. Z tym smě wokrjes Kamjensku porodźernju hač do 31. decembra financować. Hač Krajny zarjad za wobchad za to trěbnemu skrótšenju busowych linijow při­zwoli, hišće jasne njeje.

Serb z nowym nadawkom

Kamjenc. Město Kamjenc ma noweho nawodu twarskeho zarjada. Wot spočatka septembra René Bětnar tele zastojnstwo přewozmje. Zašłe lěta je studowany architekt ze Šunowa jako kubłar a nawoda Ralbičanskeho horta w nošerstwje Serbskeho šulskeho towarstwa skutkował. Dotal je zastojnstwo nawody twarskeho zarjada nětčiši Kamjenski wyši měšćanosta Michael Preuß wukonjał.

Pomnik so nawróći

Jědnaće groblow zawrěli

Lubnjow. Duboweho pućowanskeho přadnika (Eichenprozessionspinner) dla su někotre groble w Błótach zawrjeli. Cyłkownje jědnaće wodźiznow to potrjechi, zdźěli policija nětko na platformje X. Zawěsćenske naprawy tam tuchwilu přesadźić njemóža. Zaměr zawěranjow je, ludźi před strašnymi włosami insektow škitać.

Ličba wobydlerjow spaduje

Kamjenc. Sakska ma dale a mjenje wobydlerjow. Po informacijach statistiskeho zarjada ze sydłom w Kamjencu bydleše kónc minjeneho lěta hišće 4 026 599 wosobow w swobodnym staće. To běchu 0,4 procenty respektiwnje 15 823 wobydlerjow mjenje hač lěto do toho. Tež komuny maja stajnje měnje wobydlerjow. W Njebjelčicach je ličba wobydlerjow wo 2,9 procentow woteběrała.

Namjet zakonja wotpokazali

Wjesnjanostu napominali

Malešecy. Wotrjad krajnoradneho zarjada Budyšin za prawniski dohlad nad gmejnami je Malešanskemu wjesnjanosće Matthiasej Seidelej (CDU) z disciplinariskim jednanjom hrozył, jeli w zwisku z planowanym twarom zakładneje šule dale prawa gmejnskeje rady ignoruje. Nimo toho je financowanje twara wokomiknje njewěste. Wo tym informuje Steffen Lehmann, předsyda frakcije AfD.

Bombu wuspěšnje znješkódnili

Choćebuz. Bomba z Druheje swětoweje wójny, kotruž běchu dźěłaćerjo spočatk tydźenja na twarskej ležownosći při Choćebuskim dwórnišću namakali, je znješkódnjena. Něhdźe 3 000 ludźi dyrbješe wčera kónčinu, hdźež 250 kilogramow ćežka bombu ležeše, wopušćić. Tež tramwajki, ćahi a busy njesmědźachu tam jězdźić.

Dalši nakład „Małeje wjery“