Krótkopowěsće (12.02.26)
Zběrataj pjenjezy za nowy film
Drježdźany. Na platformje GoFundMe prosytaj filmowc a kameramuž Julius Guenzel kaž tež molerka a grafikarka Maja Nagelowa wo financielnu podpěru. Dźěłowy titul štwórteho filma w rjedźe „Landnahme – zebrana zemja“ rěka „insel – huzaroc hede“ a zaběra so z lěsnej kupu, kotraž bu lětsa z woporom wotbagrowanja. W cyłku chcetaj 13 000 eurow nazběrać.
Jasne dobyće za Magdeburg
Magdeburg. Mjetarjo SC Magdeburga su prěnju dypkowu hru w zwjazkowej lize dobyli. Dotal njeporaženy načolnik zwjazkoweje ligi přesadźi so w načolnej hrě přećiwo TBV Lemgo Lippe 36:32. Islandčan Gísli Kristjánsson bě ze sydom wrotami najlěpši mjetar SCM. Zakitowar titula Liški Berlin wčera přećiwo mustwu HSG Wetzlar suwerenje 41:27 dobychu.
Bayerojo koło dale
Mnichow. Zwjazkowy koparski ligist FC Bayern Mnichow steji w połfinalu pokala DFB. Mustwo trenarja Vincenta Kompanyja přewiny wčera wječor RB Lipsk w štwórćfinalu 2:0. Wrota za domjacych docpěštaj Harry Kane a Luiz Díaz. Połfinalnej partiji wotmějetej so 21. a 22. apryla.
Krótkopowěsće (11.02.26)
Awdienca live na sćelaku
Rom. Skupina serbskich družkow z jich hotowańčemi kaž tež wjacori serbscy duchowni přebywaja tuchwilu w Romje (SN rozprawjachu). Dźensa su so na generalnej awdiency bamža Leja XIV. wobdźělili. Tutu bě sćelak EWTN live přenjesł. Na kónc awdiency bě Drježdźansko-Mišnjanski biskop Heinrich Timmervers bamža w mjenje putnikow postrowił.
Žurnalisća z woporom njeskutkow
Berlin/Drježdźany. 82 njeskutkow přećiwo žurnalistam z politiskim pozadkom w Sakskej su w běhu lěta 2025 pola Zwjazkoweho kriminalneho zarjada přizjewili. Sakska je z tym w cyłoněmskim přirunanju na druhim městnje. Jenož w Berlinje bě wjace padow, dohromady 406. Informaciju je zwjazkowe knježerstwo na małe naprašowanje frakcije Lěwicy podało.
Planuja dobywanje litiuma
Krótkopowěsće (10.02.26)
7,5 milionow za powołanske šule
Drježdźany. Sakske kultusowe ministerstwo podpěruje z dohromady 7,5 milionami eurow powołanskošulske centrumy w Zhorjelcu, Žitawje a Běłej Wodźe. Dźěl sumy su srědki EU. „Dźakowano tutym inwesticijam móžemy powołanske šule w našim wokrjesu woprawdźitym narokam zawodow přiměrić“, zdźěli Zhorjelski krajny rada Stephan Meyer (CDU).
Trumpa dla WM bojkotować?
Drježdźany/Brüssel. Skupina 19 zapósłancow Europskeho parlamenta sej wot europskeho zwjazka kopańcy UEFA žada, bojkot lětušeho koparskeho swětoweho mišterstwa pruwować. Tute so nimo Kanady a Mexika přewažnje w USA wotměje. Hdyž USA z namocu přećiwo druhim statam hroža, njemóžeš tam kopańcu hrać, jako njeby so ničo stało, praji Drježdźanski zapósłanc Matthias Ecke (SPD).
Wjace aku-ćahow w Sakskej
Krótkopowěsće (09.02.26)
Čornakec wostanje předsydka
Budyšin. Na hłownej zhromadźiznje Towaršnosće k spěchowanju Serbskeho ludoweho ansambla (SLA) zašły pjatk su předsydstwo pod nawodom Jěwy-Marje Čornakec znowa jednohłósnje wuzwolili. W diskusiji rozestajachu so tež kritisce z lětušim programom wječorneho ptačeho kwasa. Do 75. róčnicy załoženja SLA 2027 chcedźa ansambl na přikład při wudaću aktualizowaneje chroniki podpěrać.
Policija dale njeslědźi
Lubij. Skućićelow, kotřiž běchu w adwenće hodowny štom w Lubiju podrězali, njeje policija wuslědźiła. Policija je přepytowanje zakónčiła, tuž wostanje njeskutk najprjedy raz bjez konsekwencow. Poslednje słowo pak ma statne rěčnistwo, kiž wo tym rozsudźi, hač so pad dale wobjednawa. Krótko do štwórteho adwenta běchu njeznaći w nocy wupyšeny štom podrězali, čehoždla běchu wobydlerjo chětro rozhorjeni.
Zaběraja so z wodu
Krótkopowěsće (06.02.26)
Kaulfürstowa přewozmje Rozhlad
Budyšin. Slawistka Juliana Kaulfürstowa budźe wot apryla zamołwita redaktorka za kulturny časopis Rozhlad. Wona angažowaše so wosebje za dokumentaciju a wožiwjenje slepjanšćiny a dźěłaše mjez druhim jako rěčna motiwatorka ZARI, syće za serbsku rěč a regionalnu identitu. Hižo 2018 bu jej z Dieterom Reddom myto za serbsku rěč, Myto Zejlerja, wot sakskeje ministerki za wědomosć a wuměłstwo spožčene.
Krajny sejm podpěra teleskop
Drježdźany. Na namjet frakcije Zelenych je Sakski krajny sejm wčera wobzamknył, požadanje Astrocentruma Łužicy wo zaměstnjenje Einsteinoweho teleskopa w našim regionje podpěrać. Franziska Schubert, łužiska frakciska předsydka Zelenych, rěčeše wo „jednym z najbóle ambicioněrowanych projektow slědźenja w Europje. Krajne knježerstwo widźi „jónkrótnu šansu“.
Mrětwa wutupjena
Krótkopowěsće (05.02.26)
Symbol kónčiny rozbuchnyli
Janšojce. Wuwozny móst F60 w Janšojskej brunicowej jamje su fachowcy dźensa připołdnju rozbuchnyli. Z tym zakónči so kapitl Łužiskich hórnistwowych stawiznow. Wuwozny móst je symbol brunicoweho rewěra. Akciju móžachu sej zajimcy live w interneće wobhladać. Na płoninje Janšojskeje brunicoweje jamy nastanu w přichodźe jězory kaž tež wulke parki z wětrnikami a solarnymi připrawami.
Awtodróha A4 často zatykana
Drježdźany. Šoferojo na awtodróhach w Sakskej dyrbjachu loni wjele sćerpnosće měć. Kaž awtomobilny klub ADAC wozjewi, bu loni 15 904 haćenjow zwěsćenych. Na 22 866 kilometrach běchu awtodróhi zatykane. Wobě ličbje stej jasnje stopnjowanje porno lětu 2024. Předewšěm dyrbjachu šoferojo na zwjazkowej awtodróze A4 wokoło Połčnicy, Siebenlehna, Budyšina-wuchod a Zhorjelca wjele chwile měć.
Kónc z kamjentnym wuhlom
Krótkopowěsće (04.02.26)
Zapósłanca AfD wotwjedli
Drježdźany. Cłownicy su dźensa zapósłanca AfD w sakskim krajnym sejmje Jörga Dornaua z plenarneje žurle wotwjedli. Po informacijach nowiny „Bild“ wjedźechu woni jeho do pódlanskeje rumnosće. Lipšćanske statne rěčnistwo zdźěli, zo přepytuja cłownicy přećiwo njemu. Jemu wumjetuja, zo wón wopačne informacije poda. Dornau wobhospodarja ratarski zawod w Běłoruskej.
Dalši pad tuberkulozy
Zły Komorow. W Złym Komorowje běchu fachowcy zawčerawšim pad tuberkulozy pola dźěsća zwěsćili. Wot dźensnišeho chce zarjadnistwo za strowotu 130 ludźi prewentiwnje testować, zo móhli rozpřestrěću chorosće zadźěwać. Tež w Budyskim wokrjesu bu w januaru hižo pad tuberkulozy zwěsćeny.
Šěsć procentow mjenje
Krótkopowěsće (03.02.26)
Horst Gallert njeboh
Budyšin. Bywši krajny rada Budyskeho wokrjesa Horst Gallert je tele dny w starobje 88 lět zemrěł. Wot lěta 1992 do 2001 je so wón rozsudnje za wuwiće Budyskeho wokrjesa zasadźował. „Njezapomnite je wosebje jeho zasadźenje za kulturu, přewažnje za Němsko-Serbske ludowe dźiwadło“, krajny rada wokrjesa Udo Witschas a jeho předchadnik w zastojnstwje Michael Harig (wobaj CDU) wčera hódnoćeštaj.
Wo strategiji rozmyslowali
Wojerecy. Na wčerawšej rewěrowej konferency we Wojerecach diskutowaše něhdźe 20 wobdźělnikow z wobłukow komunow, politiki, hospodarstwa, wědomosće a ciwilneje towaršnosće wo přichodnym postupowanju hladajo na změnu strukturow w brunicowych kónčinach. Sakske ministerstwo za infrastrukturu a krajne wuwiće bě na nju přeprosyło. W srjedźišću konferency steješe ewaluacija a přichodna strategija.
Historisku chorhoj nabyli
Krótkopowěsće (02.02.26)
Wostanu jednanjakmani
Zhorjelc. Zhorjelski wokrjes wodychnje. Sakska krajna direkcija je jemu dodatny etat přizwoliła. Najebać budget we wobjimje 841 milionow eurow pak je połoženje nadal napjate. Zhorjelski wokrjes so hižo dlěje z financielnymi ćežemi bědźi. Přizwolenje dodatneho etata bě jenož z wuwzaćnym rjadowanjom móžne.
Prawicarske pady přepytowali
Drježdźany/Lipsk. Statny škit je loni jědnaće padow z ekstremistiskim prawicarskim pozadkom na sakskich wysokich šulach přepytował a to w Drježdźanach a Lipsku. Tole zdźěli sakske ministerstwo za wědomosć na naprašowanje frakcije Lěwicy w Sakskim krajnym sejmje. Na Lipšćanskej uniwersiće bě to mjez druhim akcija z plakatami tak mjenowaneje Sachsengarde.
Na kursaj so přizjewić
Budyšin. Zajimcy za rěčny kurs čěšćiny w Praze (wot 16. julija do 13. awgusta) abo w Čěskich Budějovicach (wot 2. awgusta do 24. awgusta) njech w Rěčnym centrumje WITAJ hač do 15. měrca swoje přizjewjenske podłožki wotedadźa. Formular a dalše informacije su na internetnej stronje přistupne.
Mjetarjo finale přěhrali
Krótkopowěsće (30.01.26)
Sprjewiny hotel bórze zawru
Budyšin. Dom něhdyšeho Sprjewineho hotela kónc februara dokónčnje zawru. To je Budyski krajnoradny zarjad zdźělił. Dwanaće lět su tule ćěkancow hospodowali, tuchwilu je jich hišće 150, mjez nimi 55 Ukrainjanow. Požadarjo azyla dóstanu městno w druhich domach, kotrež wokrjes wužiwa. Ukrainjenjo móhli w bydlenskich domach kwartěr namakać.
Swójbna zběrka so nawróćiła
Choćebuz. Archiw swójby hrabje Hermanna von Pücklera-Mužakowskeho je so po 80 lětach zaso do Rogeńskeho parka w Choćebuzu nawróćił. Do toho bě zběrka něhdźe 400 dokumentow z 16. do 20. lětstotka w Podstupimskim Braniborskim krajnym archiwje składowana. Z tym je 400 lět swójbnych stawiznow z manuskriptami knihow, zrěčenjemi k mandźelstwam, priwatnymi listami atd. zaso w Choćebuzu.
Pacientam lěki słać
