Krótkopowěsće (23.12.25)
Sotra nětko lěpje přełožuje
Budyšin. Přełožowanska aplikacija „sotra“ dźěła wotnětka z nowym programom za přełožki z němčiny do hornjoserbšćiny. Kwalita hornjoserbskich tekstow so z tym polěpši, piše rěčny centrum WITAJ, kotryž sotru wobhospodarja, w nowinskej zdźělence. Tež ze zestajenymi słowami móže sotra nětko lěpje wobchadźeć.
Saněrowanje budźe dróše
Korzym. Ponowjenje termalneje kupjele w Korzymje pokročuje, wo tym informuje krajnoradny zarjad w nowinskej zdźělence. Nowy planowanski běrow je swoje dźěło zahajił a někotre změny namjetował. Jich dla cyłkowne kóšty za projekt wo tři miliony na něhdźe 29 milionow eurow stupaja. Nalěto 2026 prěnje dźěła zahaja, kónc 2029 ma wšo hotowe być.
Přemało lěkarjow
Krótkopowěsće (22.12.25)
Wjace wobchada do hód
Zhorjelc. Minjenu sobotu bě awtodróha A 4 we Łužicy sylneho dohodowneho wobchada dla na 18 kilometrach zatykana. Přičina běchu hranične kontrole Pólskeje. Wjele dojězdźowarjow a dowolnikow na druhe dróhi wuwiny. Policija wobkedźbowaše kopjenje wobchada na zwjazkowymaj dróhomaj 6 a 115 kaž tež w Zhorjelcu. Tohodla wujězd Kodrecy (Kodersdorf) nachwilnje zawrě.
Hodowny štom zaso steji
Lubij. Hodowny štom na Starym torhošću w Lubiju, kotryž su njeznaći w nocy na pjatk powalili, zaso steji. Na přeprošenje Zhromadźenstwa wabjenja za město je so njedźelu 850 ludźi na adwentnym spěwanju wobdźěliło. Kameradojo wohnjoweje wobory su dochody z předanje tykanca a horceho wina za štom darili, dokelž buchu při njeskutku Ochranowske hwězdy wobškodźene.
Šulerjo za chorownju darili
Krótkopowěsće (19.12.25)
Tunl do směra Zhorjelc hotowy
Budyšin. Sčasom do hodownych prózdninow su južnu rołu tunla pod Limasom wčera za šoferow wotewrěli. Fachowcy za wobchad z toho wuchadźeja, zo budźe to jasne wolóženje za wochad. Do směra Zhorjelca stejitej nětko dwě jězdnej k dispoziciji. Do směra Drježdźan pak je něhdźe hač dosrjedź januara jenož jedna jězdnja swobodna. Nimale dwě lěće su tunl pod Limasom ponowjeli.
Załožbu prawnisce připóznali
Njebjelčicy. Załožbowy zarjad Sakskeje krajneje direkcije je zawčerawšim załožbu Wnučkokmanosć ze sydłom w Njebjelčicach prawnisce připóznał. Dohromady 54 zajimcow bě ju lětsa 10. decembra załožiło. Jeje předsyda je něhdyši Njebjelčanski wjesnjanosta Tomaš Čornak. Załožba chce mjez druhim komunalne projekty na dobro přichodnych generacijow iniciěrować a podpěrować.
Nowu intendancu wobkrućili
Krótkopowěsće (18.12.25)
Přichod Łužicy rozjimali
Budyšin. Na druhej regionalnej konferency wuchodneje Sakskeje su zastupjerjo hospodarstwa, komunow a wědomosće wčera wo tym wuradźowali, kak móhł so region „centralny stołp europskeje industrijneje a inowaciskeje politiki“ stać. Tole přeje sej Zhorjelski krajny rada Stephan Meyer, kotryž je so ze swojim Budyskim kolegu Udom Witschasom a ministerskim prezidentom Michaelom Kretschmerom na konferency wobdźělił.
Ideje za wozrodźenje rěče
Choćebuz. „Best Practice für die Niederlausitz? Internationale Erfahrungen, Methoden und Ansätze zur Revitalisierung bedrohter Sprachen“ je titul dźesateho zešiwka, kiž je Serbski institut w rjedźe Sorabistiske źěłowe papjery wudał. Publikacija zjima slědźenje Anastasije Kostiučenko mj. dr. wo naprawach a teorijach, kotrež móhli z přikładom za planowanje rewitalizacije delnjoserbšćiny być.
Čěscy wikowarjo radšo w Žitawje
Krótkopowěsće (17.12.25)
Łužica je „Net Zero Valley“
Drježdźany/Podstupim. Po wčerawšim pisomnym přihłosowanju hospodarskeju ministrow Sakskeje a Braniborskeje, Dirka Pantera a Daniela Kellera (wobaj SPD) je Łužica prěni Net Zero Valley Europy. Tole je wosebity region za hospodarske wuwiće technologijow bjez wustorkowanja klimje škodźacych płunow. Dokładniše informacije wo projekće na stronje: www.netzerovalley.eu.
Posledni wagon zawod wopušćił
Zhorjelc. Posledni dwuposchodowy wagon je wčera produkcisku halu francoskeho předewzaća Alstom w Zhorjelcu wopušćił. Klětu w měrcu chce Alstom wšitke dźěle zawoda nowemu mějićelej, brónjenskemu koncernej KNDS, přepodać. Wot dohromady 700 sobudźěłaćerjow je 170 nowe dźěło w Budyskej wotnožce Alstom našło. KNDS je připowědźił, něhdźe 350 dźěłaćerjow přewzać.
Čěski adwent w serbskich šulach
Krótkopowěsće (16.12.25)
Manufaktura hižo njeprodukuje
Drježdźany. Po 24 lětach su dźensa w škleńčanej manufakturje VW produkciju awtow zakónčili. Elektroawto modela ID.3 GTX bě poslednje ze 166 000 na kromje wulkeje zahrody w sakskej stolicy zhotowjenych wozydłow. Stejnišćo wostanje centrum za dodawanje awtow. W přichodźe chce so Drježdźanska Techniska uniwersita tu w kooperaciji z koncernom VW wo inowaciju starać.
Zaso „módry jazyk“ zwěsćili
Mišno. We wokrjesu Mišno su pola howjada tak mjenowanu chorosć módreho jazyka zwěsćili. To je wčera sakska ministerka za socialne, strowotu a towaršnostnu zhromadnosć Petra Köpping (SPD) zdźěliła. We wobkruhu 150 kilometrow płaća wobmjezowanja při wikowanju. Ministerka poruča, skót dokładnje wobkedźbować. Najlěpši škit je šćěpjenje, wone pak ma so na serotyp 8 měrić.
Přezmjezne dźěło počesćene
Krótkopowěsće (15.12.25)
Poskitk derje přiwzali
Drježdźany. Něhdźe 25 serbskich dźěći bě so sobotu na poskitku towarstwa Stup dale wobdźěliło a pod nawodom Susan Budarjec w sakskej stolicy zhromadnje poprjančki pjekło. Wo tym towarstwo informuje. Po pječenju sej dźěći mjez sobu dariki wuměnichu a sej zhromadnje zaspěwachu.
Z ćahom direktnje do Pólskeje
Lipsk/ Wojerecy. Němska železnica ma nowy jězbny plan. Wot wčerawšeho płaća wjacore změny. Tak wobsteji wotnětka na přikład direktny zwisk z Lipska do Wrócławja a Krakówa. Po puću ćah pólskeje železnicy PKP tež we Wojerecach zastanje. Tónle zwisk poskićuja dwójce wob dźeń. Jězba z Wrócławja do Wojerec traje połdra hodźiny, z Krakówa do Wojerec pjeć a poł hodźiny. Do Lipska jědźe ćah połdra hodźiny dlěje.
Tumulty do parady hórnistwa
Krótkopowěsće (12.12.25)
„Domojnikow“ rozžohnowali
Wulke Zdźary. Wobdźělnicy prěnjeho lětnika intensiwneho kursa serbšćiny Domoj we Wulkich Zdźarach su swoje certifikaty přijimali. Pjećo z nich złožichu zašłe dny w tamnišim rěčnym hnězdźe pruwowanje za schodźenk B1, pjećo dalši za B2. W mjenje projekta ZARI, kotryž bě intensiwny kurs organizował, so rěčni trenarjo Jadwiga Brězanowa, Julian Nyča a Florian Kaulfürst ze swojimi chowancami rozžohnowachu.
Projekt na dobro muzeja zakónčili
Budyšin. Spěchowanske towarstwo Serbskeho muzeja je wčera we wobłuku swojeje lětušeje hłowneje zhromadźizny projekt „Korjenje zemje – Stražowarki ze Slepoho“ oficialnje zakónčiło. Z nim bě srědki za nakup zběrki fotografijow Karle Pohl organizowało, kotruž muzejej dari. Wjetšina wobrazow su portrety žonow ze Slepjanskeho regiona. Jedyn z nich su jako motiw za nowu hodownu pohladnicu muzeja wuzwolili.
Dźiwje kóčki so nawróćili
Krótkopowěsće (11.12.25)
Šula chorosće dla zawrjena
Radwor. Radworska zakładna šula je dźensa a jutře zawrjena. Tole wobkrući nawodnica šule Angela Rynčowa. Přičina toho je chorobny staw influency dla mjez wučerjemi a šulerjemi. Zamołwići chcedźa strach natyknjenja wobmjezować a tuž su so za tele postupowanje rozsudźili. Nuzowe zastaranje je zaručene. Póndźelu ma wšitko zaso po planje běžeć.
Pomoc přećiwo prawicarjam
Drježdźany/Budyšin. Na internetnej stronje kulturbuero-sachsen/dokumente je w updaće nowostkow interview z hłownej jednaćelku Domowiny, Judit Šołćinej, wozjewjeny. Wona rozkładuje, kak je so třěšny zwjazk na mobilny poradźowanski team wuchod kulturneho běrowa Sakskeje wobroćił. Tam su po nadpadach prawicarjow na serbskich młodostnych profesionelnu podpěru dóstali.
Z Drježdźan do Tirola lećeć
Krótkopowěsće (10.12.25)
Wjace požadarjow za wójsko
Drježdźany. W Sakskej je so lětsa hač do 30. nowembra štwórćina wjace młodostnych za słužbu w Zwjazkowej woborje přizjewiła, hač loni – dohromady 2 400. W Sakskej je ličba požadarjow jasnje wyša hač zwjazkowy přerězk. Tón je porno 2024 jenož wo wosom procentow stupał. Cyłkownje je lětsa 52 900 požadarjow.
W busach z kartku zapłaćić
Budyšin/Zhorjelc. W nimale wšitkich busach Zaměroweho wobchadneho zwjazka Hornja Łužica-Delnja Šleska (ZVON), kotrež su w Zhorjelskim a wuchodnym Budyskim wokrjesu po puću, móža sobujěducy swoje jězdźenki nětko tež z pjenježnej kartku zapłaćić. Modernizowanje systema zapłaćenja w busach płaći 1,3 miliony eurow.
Ukrainske dźěći wuznamjenjene
