Amokowy běh w Biskopicach
Biskopicy. Amoka w šulskim kompleksu na Cyrkwinskej w Biskopiach dla su dźensa w 9.45 hodź. policiju alarmowali. 16lětny Němc je z nožom po twarjenju běhał, při čimž je wosomlětnu šulerku ćežko zranił. Ju do chorownje dowjezechu, wona je stabilna, Anja Leuschner ze Zhorjelskeje policajskeje direkcije zdźěla. Młodźenc je so podał, bu zajaty a je tež w medicinskim hladanju. Policija je so wo wuknjacych, personal a staršich starała.
Zwjazk podpěru poskići
Berlin/Choćebuz. Po tym, zo jewjachu so na šuli w Bórkowach prawicarske přeńdźenja, tež Zwjazk so nětko z temu zaběra. Tak připowědźi zamołwite ministerstwo za swójby, zo planuja zetkanja z partnerami za demokratiju w južnej Braniborskej. Cil je dalše strategije za skrućenje demokratije w regionje wudźěłać.
Stolětna tradicija wohrožena
Klětu móža dźěłać započeć
Drježdźany. Prěni dorostowi medicinarjo, kiž su w modelowym projekće přećiwo njedostatkej domjacych lěkarjow w Madźarskej studowali, móža wot kónca 2024 w Sakskej dźěłać započeć. Dotal su hišće wšitcy wobdźělniče a wobdźělnicy w studiju abo w dalekubłanju na fachoweho lěkarja, kaž Kasolěkarske zjednoćenstwo informuje. Projekt za studij mediciny w Pécsu su 2013 zahajili.
NGG: Alarm w kuchni
Budyšin. Alarm w kuchni je Dźěłarnistwo cyroba-chłošćenje-hosćency (NGG) za Budyski wokrjes wuwołało. 50 jobow móhło so w gastronomiskich kuchnjach hnydom wobsadźić. Telko ma tudyša agentura za dźěło w poskitku. Hosćo pytnu kalamitu personala. NGG pleduje za měsačnu mzdu 3 000 eurow za wšěch, kiž w gastronomiji a hoteleriji po wukubłanju dale w cyłočasnym jobje dźěłaja.
Studijne kapacity rozšěrjeć
Swjedźeń „Serbja-lěćo-słónco“
Bad Gandersheim/Northeim. Z koncertom serbskeho punka Pawoła „Geigerzähler“ Nagela je so swjedźeń „Serbja-lěćo-słónco“ wčera wječor na Delnjosakskej krajnej zahrodniskej přehladce w Bad Gandersheimje zakónčił. Přihladowarjow přewšo zawjeseliłoj stej tam runje tak Serbska rejwanska skupina Ćisk a cyłk Serbska reja. Wjace wo swjedźenju čitaće jutře.
Wopor přewjele zarjadowanjow
Dešno. Temowy kónc tydźenja wo rjemjesle w srjedźowěku wčera a předwčerawšim w Dešnjanskim muzeju pod hołym njebjom Stary lud bu wopor nadposkitka kulturnych zarjadowanjow. We wsy je młodźina kokota łapała, dokal je tójšto ludźi přichwatało, a ze stron muzeja mějachu so hišće na Domizniskim a drastowym swjedźenju w Bórkowach wobdźělić. Ličba zajimcow, kiž je do muzeja přišła, bě přewšo skromna.
Njetopyrje w chorowni
Plany za koporowe podkopki
Drježdźany. Sakska zahaji dźensa jednanje za rjadowanje rumow za koporowe podkopki na krajnej mjezy pola Slepoho. Tam chce předewzaće KSL kopor wudobywać. Planowe podłožki su hač do 29. septembra w gmejnomaj Slepom a Sprjewinym Dole kaž tež w Běłe Wodźe wupołožene, Krajna direkcija Sakska zdźěla. Wobydlerjo móža hač 6. oktobra stejišća, nastorki, wobmyslenja a pokiwy k předewzaću zapodać.
Tankowanje pola nas najdróše
Mnichow/Drježdźany. Po wuhódnoćenju płaćiznow na 14 000 tankownjach po cyłej Němskej je ADAC zwěsćił, zo je tankowanje w Braniborskej a Sakskej najdróše. W Braniborskej dyrbiš na přikład za liter diesela přerěznje 1,811 eurow płaćić, w Sakskej 1,796 (a za super E10 1,872). Najtuńšo móžeš w Porynsko-Pfalcowskej tankować: Tam sej za liter diesela přerěznje 1,728 žadaja.
Zrozumjenje za wosy měć
„Ćežke šulske lěto“ w Sakskej
Drježdźany. K nowemu šulskemu lětu su 1 120 nowych wučerjow za sakske šule přistajili. Wo tym informowaše dźensa w sakskej statnej kencliji kultusowy minister Christian Piwarz (CDU). „Bychmy sej hišće wjac přeli, ale pobrachowacych požadanjow dla to nažel móžno njebě“, praješe minister. Tohodla „stejimy znowa před ćežkim šulskim lětom, zaručenje wučby wostanje wulke wužadanje.“
Baselitz zaso w Albertinumje
Drježdźany. Po wosom lětach wróći so Georg Baselitz do Drježdźanskeho Albertinuma. W rumnosći, předwidźanej za njeho, budu jeho twórby zaso widźeć, rjekny direktorka Hilke Wagner powěsćerni dpa. Muzej pokazuje swój wobstatk z Němskich Pazlic pochadźaceho wuměłca składnostnje jeho 85. narodnin, kiž běchu 23. januara. Dźěła su „ze wšěch periodow tworjenja“.
Hribam dale woda pobrachuje
Sakske komuny w nuzy
Drježdźany. Financne połoženje komunow w Sakskej je problematiske – to wuchadźa z wotmołwy nutřkowneho ministra Armina Schustera (CDU) na naprašowanje zapósłanca Mirka Schultze (Lěwica), kotraž SN předleži. Tak běchu Lipsk a wokrjesaj Budyšin a Zhorjelc kónc junija hišće bjez přizwoleneho aktualneho etata. Budyski wokrjes je mjeztym wuwzaćne zrjadowanje docpěł.
Zeleni žadaja sej wotmołwu
Wojerecy. Zapósłanča Sakskeho krajneho sejma Petra Čagalj Sejdi (Zwjazk 90/Zeleni) žada sej „wujasnjenje sakskeho ministerstwa nutřkowneho nastupajo wotsunjenje Pakistanjana direktnje z Wojerowskeho strowotniskeho zarjada“. Ministerstwo njeje pječa ničo wo terminje wědźało, kotryž policija za wotsunjenje wužiwaše. Zeleni chcedźa přikazy policiji k wotsunjenju zasadnje ponowić.
Wjace zawodnych insolwencow
Wuknjacych sensibilizować
Drježdźany. Přećiwo mobbingej a cybermobbingej prewentiwnje skutkować a šule lěpje na tajke pady přihotować chcedźa z nowym programom wot spočatka noweho šulskeho lěta w Sakskej. Z nim „chcemy wuknjacych za tutu temu sensibilizować, zo k tomu scyła hakle njedóńdźe. Trěbna je za to dobra rjadowniska klima“, rjekny šef chorobneje kasy technikarjow w Sakskej Alexander Krauß wčera při předstajenju programa w Drježdźanach.
Předewzaćelske myto wuwołane
Budyšin. 28. hornjołužiske předewzaćelske myto je wuwołane, kaž Marketingowa towaršnosć Hornja Łužica-Delnja Šleska zdźěla. Wokrjesaj Budyšin a Zhorjelc chcetej lětsa znowa firmy za jich wusahowacy angažement při temje „wudźeržliwe předewzaćelske jednanje“ počesćić. Namjety móža so hač do 17. septembra zapodać, požadanski formular je pod přistupny.
Kokainowu posyłku wotkryli
Jan Hrjehor jenički požadar
Budyšin. 45lětny Jan Hrjehor, nawoda Wyšeje šule Slepo, je jenički požadar za wólby štwórteho serbskeho naměstnika ze Sakskeje w radźe Załožby za serbski lud. Wólbny wuběrk Domowiny je požadanske podłožki minjeny pjatk pruwował a kandidaturu, kotruž Serbski Sokoł podpěra, wobkrućił. Wólby budu 22. septembra na posedźenju Zwjazkoweho předsydstwa Domowiny w Trjebinje.
Serbskej programaj dožiwili
Budyšin. Słónčnej wječoraj wabještej kónc tydźenja mnohich ludźi do Sundowner-bary na zahrodźe Serbskeho ludoweho ansambla. Tam zabawještej hosćinu serbskej cyłkaj. Pjatk zaspěwa muski kwartet PoŠtyrjoch někotre štučki a sobotu hip-hopowa trójka Nowa Doba.
Budyski tydźeń šacha nimo
Najwjace hwězdźinow sobotu
Lipsk/Drježdźany. Žnjenc je hwězdźinam najaktiwniši měsac. Tež lětsa hodźa so wone zaso na nócnym njebju wobkedźbować. Kóžde lěto zanuri so zemja při wobkruženju słónca do mróčele Perseidow. Tuta wobsteji ze zbytkow kometa 109/Swift-Tuttle. Najwjace hwězdźinow budźe w nocy wot soboty na njedźelu mjez 23 a 3 hodź. widźeć.
IGBCE z poskitkom njespokojom
Grodk. Prěnje tarifowe jednanja za 7 200 dźěławych LEAG njejsu wčera w Grodku žadyn wuslědk wunjesli. Hladajo na dobru hospodarsku situaciju koncerna wobsteji industrijne dźěłarnistwo IGBCE na naslědnym a jasnym zwyšenju mzdow. LEAG pak je jenož jónkrótne płaćenje poskićiła. Njepolěpša-li dźěłodawarjo poskitk jasnje, připowědźi nawoda jednanjow IGBCE Holger Nieden akcije do druhich tarifowych jednanjow.
Ukrainje simulator poskića
Špatny WLAN wuknjacych trapi
Berlin. Špatny abo pobrachowacy WLAN mjenowaše 87 procentow woprašanych 14- do 19lětych młodostnych w reprezentatiwnym woprašowanju za Digitalny zwjazk Bitcom najnuzniši problem swojeje šule, jasnje před pobrachowacymi wučerjemi z 59 procentami.
Silicijowy zawod předała
Čorna Pumpa. Württembergska skupina Schmidt je zawod za produkciju silicija w Čornopumpskim industrijnišću na US-předewzaće Group14 Technologies předała. Nowy wobsydnik připowědźi, zo chce wšitkich 13 sobudźěłaćerjow přewzać a ličbu tutych srjedźnodobnje samo wo pjeć króć powjetšić. Produkowany silicij chce zhotowjerjam baterijow a akuwow dodawać. Tajki zawod předewzaća Altech ma w susodstwje nastać.
Dźeniki w Čěskej wohrožene?