Krótkopowěsće (20.07.23)

Donnerstag, 20. Juli 2023 geschrieben von:

Lawicu pytali

Berlin. W južnym Berlinje je policija dźensa twochnjene rubježne zwěrjo pytała. Po wšěm zdaću jedna so wo lawicu. Swědkojo běchu pola Kleinmachnowa wobkedźbowali, kak je wona dźiwje swinjo moriła. Zwotkel lawica je, njeje znate. W zwěrjencach a cirkusach žana njepobrachuje. Wobydlerjow su z warnowanskej app na móžne strachu skedźbnili.

Prezidij Domowiny so zešoł

Choćebuz. Do swojeho posedźenja su wčera čłonojo prezidija Domowiny lětne zetkanje ze župnym předsydstwom Delnja Łužica přewjedli. Tema běchu namjety župy k dźěłowym směrnicam třěšneho zwjazka a plan za rewitalizaciju rěče. Na lětuši dźeń Saksow deleguja Serbski kulturny turizm z.t. a Serbski folklorny ansambl Wudwor. Skupina Astronawt pojědźe na serbski wječor do Wrócławja.

Serbske temy na konferency

Krótkopowěsće (19.07.23)

Mittwoch, 19. Juli 2023 geschrieben von:

Smědźa zaso brunicu wudobywać

Waršawa. Pólske wyše zarjadniske sudnistwo je wčera rozsudźiło, zo smě wobhospodar PGE w brunicowej jamje Turjej zaso brunicu wudobywać. Skoržili stej mjez druhim město Žitawa a wobswětowa organizacija Greenpeace z Čěskeje a Němskeje, dokelž mějachu wobmyslenja nastupajo wobswětoškit.

Hrimanja a sylne spadki móžne

Drježdźany. Wobydlerjo w Sakskej maja so w nocy na njewjedra nastajić. Tak su lokalnje hrimanja a sylne zliwki móžne. Kaž meteorologojo Němskeje wjedroweje słužby dźensa zdźěla, wočakuja z blakami tež sylny wichor. Temperatury přichodne dny budu trochu niše. Tak leža jutře mjez 21 do 24 stopnjemi celsiusa. Zajutřišim dyrbja ludźo z dešćom ličić.

Čěski „Colt“ Ukrainu wubróni

Praha/Ottawa. Kanadiske knježerstwo je wozjewiło, zo w zwisku z wojerskej pomocu přepoda wojowacej Ukrainje 21 000 nadběhowych třělbow, 38 mašinskich třělbow kaž tež 2,4 miliony projektilow. Tute brónje a municiju doda předewzaće Colt Canada – jedna ze zamórskich filialow čěskeje firmy Colt CZ Group (do lěta 2022 znateje jako Česká zbrojovka).

Krótkopowěsće (18.07.23)

Dienstag, 18. Juli 2023 geschrieben von:

Dale škody přez hórnistwo

Turjej. Zeleni sej žadaja, zo ma so w Braniborskej zaso městno za wujednanje z LEAG a LMBV nastupajo škody přez hórnistwo instalować. Njedźelu su sej ludźo na přeprošenje ewangelskeje cyrkwje na wobchodźenje zetkali, zo bychu sej wotpowědny škody chěžow a wěže wohnjoweje wobory wobhladali. Dotalne městno je kónc 2022 dźěłać přestało, po tym zo njeje je kraj hižo financował.

Lětsa z nowymi stacijemi

Zhorjelc. Załožba za wuměłstwo a kulturu w Hornjej Łužicy přewjeduje lětsa znowa akciju „Wuměłstwowy bus Hornja Łužica“. Je to mjeztym dźewjate wudaće. Lětsa přeprošuja organizatorojo zdźěla na nowe zarjadnišća. Tak wobdźěli so na přikład konsumowa galerija w knježim domje w Zarěču. Kartki za bus móžeće sebi online pod www.kunstbus-ol.de kupić.

Chcedźa gurmejow nawabić

Krótkopowěsće (17.07.23)

Montag, 17. Juli 2023 geschrieben von:

Smolerjec kniharnja wotewrjena

Budyšin. Smolerjec kniharnja je wot dźensnišeho, 17. julija, w času wot 11 do 17 hodźin zaso wotewrjena. Nětko wobsteji móžnosć, so w kniharni rozhladować a sej tohorunja knihi z druhich nakładnistwow kupić a skazać. Nawodnica kniharnje Annett Šołćic kupcow zaso po zwučenym wašnju poradźuje. Zdobom hodźa so tež terminy za antikwariski nakup dojednać.

Nowa redaktorka Rozhlada

Budyšin. Wot 17. julija přewozmje Hańžka Wjeselic z Drježdźan nawod redakcije Rozhlada. Wona naslěduje mjez druhim redaktorow Katrin Čornakec a dr. Viktora Zakara. Jako studowana sorabistka a wuměłča ma 27lětna nazhonjenja na polu online-redaktorstwa, připódla pisa beletristiske twórby a zajimuje so za přirodu.

Na campusu zaso dźěłaja

Radwor. Cyłkownje dźesać dźěći z Radworja, Budyšina, Lutobča a Hórki wobdźěla so dźensa a jutře na prózdninskim campusu experiMINT w Radworju. Dr. André Mirtschink spřistupnja jim robotiku, při čimž sej mjez druhim małke awto natwarja. W běhu prózdninow stej dalšej poskitkaj planowanej.

Alcaraz porazy Đokovića

Krótkopowěsće (14.07.23)

Freitag, 14. Juli 2023 geschrieben von:

Wučerjej šulu wopušćiłoj

Bórkowy. Po tym zo stej wučerjej šulu w Bórkowach wopušćiłoj, sej dźěłarnistwo wučerjow žada, połoženje na kubłanišću rozrisać. Wučerjej stej wohroženjow prawicarskeje sceny dla rozsudźiłoj, z šule woteńć. Zwjazkowy prezident Frank-Walter Steinmeier skedźbni na indirektny zwisk mjez prawicarsko-ekstremistiskimi padami w Bórkowach a sylnej AfD.

Hollywood stawkuje

Los Angeles. Po zwrěšćenym jednanju dźěłarnistwa dźiwadźelnikow a zjednoćenstwa studijow zahaji so dźensa stawk. Přičina je nimo wotpokazowaneho zwyšenja mzdow „pobrachowace rjadowanje w zwisku z kumštnej inteligencu“. Dokelž paralelnje tež awtorojo stawkuja, „je přichodnje lědma móžno, w USA telewizijne serije kaž tež filmy produkować“.

Železniski zwisk ponowjeny

Krótkopowěsće (13.07.23)

Donnerstag, 13. Juli 2023 geschrieben von:

Nochcetaj w Bórkowach wostać

Bórkowy. Wučerjej, kotrajž běštaj prawicarske podawki na šuli „Mina Witkojc“ w Bórkowach wozjewiłoj (SN rozprawjachu), chcetaj kubłanišćo w Błótach wopušćić. To staj powěsćerni dpa wobkrućiłoj. Přičina je, zo staj njepřećelskosćam z prawicarskeje sceny wustajenaj. Tak bě srjedu dokoławokoło šule třiceći nalěpkow z jeju wobličom a namołwu widźeć, zo njech so zminjetaj do Berlina.

Planuja kooperaciju z UEFA

Flensburg. Federalistiska unija europskich narodnych mjeńšin (FUEN) planuje, swoju klětušu Europeadu z paralelnje so wotměwacym Europskim koparskim mišterstwom muži w zhromadnej kampani zwjazać. „Njeje pak hišće jasne, na kotre wašnje“, praji zjawnostna rěčnica FUEN Merle Bornemann a doda: „Za kampanju smy projektne městno wupisali.“

Milan Kundera njeboh

Krótkopowěsće (12.07.23)

Mittwoch, 12. Juli 2023 geschrieben von:

Budar dalšich sydom lět direktor

Budyšin. Direktor Załožby za serbski lud, Jan Budar, budźe dalšich sydom lět swoje zastojnstwo wukonjeć. Dźensa dopołdnja je wón wotpowědne podlěšenje swojeho zrěčenja w Budyskim Serbskim domje podpisał. Hižo 23. meje je załožbowa rada wobzamknyła, zrěčenje po­dlěšić. Budarja su w aprylu 2016 do funkcije powołali, wón dźěła wot 1. oktobra 2016 jako załožbowy direktor.

Zamołwity na wulkej łódźi

Budyšin. Syman Hejduška poda so srjedź awgusta jako hudźbny nawoda na turistisku łódź předewzaća „Mein Schiff“. Štwórć lěta budźe wón zamołwity za programy a koordinaciju wuměłskich poskitkow na jewišćach. Hórčan so wot spočatka přichodneho měsaca z teamom, kiž bu za jězbu po Srjedźnym morju z Malty do Dubaija angažowany, dwě njedźeli na nowy nadawk přihotuje.

Móža projekt spěchować

Krótkopowěsće (11.07.23)

Dienstag, 11. Juli 2023 geschrieben von:

Pućować a so wočerstwjeć

Budyšin. Poskitk Serbskeho šulskeho towarstwa, sej do rěčneho lěhwa w čěskich Jetřichovicach dojěć, je 25 młodostnych přiwzało. Nawodnica lěhwa je Michaela Młynkec. Wčera rano je so bus z Radworja a Chrósćic do susodneho kraja podało. Młodostni tam hač do 17. julija přebywaja a chcedźa zhromadnje z třomi kubłarjemi w Čěskej Šwicy pućować a so wočerstwić.

Prěni rozrost ludnosće po 2016

Drježdźany. Ličba wobydlerjow w Sakskej je so wo něhdźe 40 000 ludźi powyšiła. Po podaću Sakskeho krajneho statistiskeho zarjada jedna so wo „prěni rozrost po lěće 2016“. Hłowny faktor je „připućowanje Ukrainjanow“. Přiwšěm zarjad nadal prognosticěruje, zo „cyłkowna ličba ludnosće w swobodnym staće hač do lěta 2028 mjezu 4 milionow ludźi podkroči“.

Zajim za rjemjesło dale přiběra

Krótkopowěsće (10.07.23)

Montag, 10. Juli 2023 geschrieben von:

Sakska rybarstwo spěchuje

Drježdźany. Sakska je dźensa spěchowanje inwesticijow w akwakulturje a rybarstwje kaž tež za přezdźěłanje a zwičnjenje rybow a rybjacych wudźěłkow zahajiła. Za to trěbna wobnowjena a rozšěrjena spěchowanska směrnica natwari na dotalne spěchowanje hatarstwa a rybarstwa. Swobodny stat 7,4 miliony eurow přewostaja za přiměrjenje na změnu klimy, naprawy ke klimowej neutraliće a inowatiwne technologije a wudźěłki.

Nabožny tydźeń zahajeny

Budyšin. W nimale wšitkich serbskich katolskich wosadach je so dźensa nabožny prózdninski tydźeń zahajił. Najwjac wobdźělnikow maja w Chrósćicach, hdźež přizjewi so 180 dźěći. Wjeršk tydźenja budźe srjedu, hdyž putnikuja dźěći do Róžanta. Horcota organizatorow lětsa znowa jara wužaduje.

Radnica jako narodny pomnik

Krótkopowěsće (07.07.23)

Freitag, 07. Juli 2023 geschrieben von:

Dorostowe myto Helli Stoletzki

Podstupim. Wuměłču Hellu Stoletzki wuznamjeni kulturna ministerka Anja Schüle (SPD) z Dorostowym spěchowanskim mytom za tworjace wuměłstwo Braniborskeje njedźelu na hrodźe Neuhardenberg. Jeje molowanje a grafiske tworjenje stej bytostnje rysowanej wot předstajenja a kritiskeho woprašowanja traděrowanych předstawow serbskich identitow, rěka we wobkrućenju.

Namołwu k pruwowanju pósłali

Zły Komorow. Społnomócnjeni za serbske naležnosće braniborskeho knježerstwa kaž tež braniborskich wokrjesow su Budyskeho krajneho radu Uda Wićaza (CDU) wčera w lisće namołwili, lětsa wobzamknjene přikrótšenje městna społnomócnjeneje za serbske naležnosće tudyšeho wokrjesa „wobšěrnje“ pruwować .

Pogačar etapu dobył

Cauterets. Kolesowarski profi Tadej Pogačar je druhu a poslednju etapu přez Pyreneje na 110. tour de France dobył. Słowjenc přesadźi so na hórskej etapje w Cauterets-Cambasque a přizjewi so w duelu ze zakitowarjom titula Jonasom Vingegaardom. Dana bu na 6. etapje ze 24 sekundami zastatkom druhio.

Serbska debata

Neuheiten LND