Krótkopowěsće (21.01.26)
Uniwersita bórze bóle serbska
Choćebuz. Braniborska techniska uniwersita Choćebuz-Zły Komorow a Serbski institut podpisatej přichodnu póndźelu kooperaciske zrěčenje. „Serbska perspektiwa ma so při slědźenju a we wučbje uniwersity bóle widźomna stać“, ze zdźělenki wuchadźa. Hižo do toho je uniwersita připowědźiła, zo zahaji lětsa nazymu wukubłanje wučerjow za serbšćinu na zakładnych šulach.
Rěčne pruwowanja złožić
Budyšin. Rěčny centrum WITAJ poskićuje prawidłownje móžnosć, pruwowanja za certifikat hornjoserbšćiny po Zhromadnym europskim referencnym ramiku za rěče złožić. Lětsa wotměja so pruwowanja 7. měrca w Budyšinje. Přizjewjenski formular, informacije wo pruwowanjach a zwučowanske nadawki steja na internetowej stronje www.sprachzertifikat-sorbisch.de.
Wěstota zaso zaručena
Krótkopowěsće (20.01.26)
Serbskej poskitkaj we Wojerecach
Wojerecy. Šulerjo zakładneje šule Handrij Zejler budu přichodnu póndźelu z rěčnej motiwatorku Mariju Šołćic w domje Domowiny składnostnje ptačeho kwasa ptački pjec. Kaž županka Gabriela Linakowa po posedźenju župneho předsydstwa dale informowaše, chce wona z městožupanku Lubinu Dučmanowej srjedu, 11. februara, w 14.30 hodź. we Wojerowskej měšćanskej bibliotece serbske basnje dwurěčnje předstajić.
Tuberkuloza w Kamjencu
Kamjenc. Při rutinowym lěkarskim přepytowanju na Powołanskošulskim centrumje w Kamjencu je so wustajiło, zo je so wosoba z tuberkulozu natyknyła. Dale so wukopa, zo ma zhromadneho přebytka dla zwiski do Wojerec. Strowotniski zarjad přewjeduje dźensa a jutře prewentiwne přepytowanja na městnje.
Smjertnej padaj w radnicy
Krótkopowěsće (19.01.26)
Vogt njeje wěrnosć prajił
Budyšin. Słyšenje fachowcow na wuradźowanju měšćanskeje rady je wunjesło: Starši dźěći w pěstowarnjach swobodnych nošerjow njejsu diskriminowani. Wyši měšćanosta Karsten Vogt je loni financnemu měšćanosće Robertej Böhmerej wumjetował, zo maja z přinoškami lěpši personelny kluč měšćanskich pěstowarnjow sobu financować. To pak njetrjechi, wobkrući krajnoradny zarjad.
Zaso so nawróćili
Radebeul. Swoju inscenaciju „Won do swěta“ je Němsko-Serbske ludowe dźiwadło wčera posledni raz předstajiło, a to na Sakskich krajnych jewišćach w Radebeulu. Na dohromady dźesać serbskorěčnych předstajenjach je NSLDź wupućowanje ewangelskich Serbow pod nawodom Jana Kiliana pokazało. Z tutej hru zahori režiserka Esther Undisz cyłkownje něhdźe 1 200 přihladowarjow.
Awstriske ludowe skupiny
Krótkopowěsće (16.01.26)
Wo mjeńšinach so rozmołwjeli
Berlin. Wo aktualnych temach domoródnych narodnych mjeńšin Němskeje je wčera parlamentariski kruh „mjeńšiny“ zapósłancow zwjazkoweho sejma wuradźował. Hosćej běštaj předsyda mjeńšinoweje rady Dawid Statnik a nawoda mjeńšinoweho sekretariata Roman Kühn. Tema bě mjez druhim planowane zapisanje narodnych mjeńšin do zakładneho zakonja.
Wuběrk za widźomnosć Serbow
Budyšin. W Budyskim Serbskim domje je so wčera wuběrk Domowiny za widźomnosć Serbow w hospodarstwje skonstituował. Jemu přisłuša šěsć čłonow kaž tež poradźowacy čłon. Carolin Měršowa bu jednohłósnje za předsydku wuzwolena, dr. Hartmut Leipner ju zastupuje. Wuběrkownicy so wo tym dojednachu, zo lětsa zaso hospodarski forum zarjaduja.
117 mio. za wutwar interneta
Krótkopowěsće (15.01.26)
Přistajeni Rhenus stawkowali
Kamjenc. Sobudźěłaćerjo zawoda za logistiku Rhenus w Kamjencu su wčera stawkowali. Hladajo na tarifowe jednanja spytachu z tym čisć na dźěłodawarja wukonjeć. Dźensa je přichodny termin jednanjow. Předewšěm sej dźěłaćerjo w Kamjencu žadaja, zo dóstanu samsnu mzdu kaž přistajeni stejnišća w Kamjenicy. Rhenus dźěła w Kamjencu za Accumotive.
Wutwar železnicy zanjechaja
Berlin. Ani jenički z projektow za wutwar železniskich čarow w sakskej Łužicy njebudźe w lěće 2038 wotzamknjeny, hdyž so wudobywanje brunicy a z tym změna strukturow skónčitej. Tole kritizowaše zapósłanča Lěwicy Caren Lay na zakładźe wotmołwy zwjazkoweho knježerstwa na naprašowanje Lěwicy. To potrjechi tež elektrifikaciju mjez Drježdźanami a Zhorjelcom a Kamjencom a Hóznju (Hosena).
Wjace mzdy za wučerjow?
Krótkopowěsće (14.01.26)
Dźěło parlamenta zeznać
Budyšin. Kathrin Michel, łužiska zapósłanča SPD w zwjazkowym sejmje, přeprošuje młodostnych, ju w tydźenju wot 15. do 20 měrca při jeje parlamentariskim dźěle w Berlinje přewodźeć. Za hospitaciski tydźeń móža so zajimowani zastupjerjo młodźinskich zwjazkow hač do 18. januara z mejlku na přizjewić.
Kamjenjak mjez spěchowanymi
Drježdźany. Kulturna załožba Sakska chce sydom projektow we wjesnych kónčinach podpěrać. Za to staji dohromady 250 000 eurow k dispoziciji, kiž maja w běhu třoch lět dóstać. Z tym chce załožba jich wjelelětny angažement spěchować a jim móžnosć dać, so dale wuwić. Nad spěchowanjom wjeseli so mjez dr. Njebjelčanske towarstwo Kamjenjak, kiž chce wuměłske formaty z němsko-serbskim kulturnym dźěłom zwjazać.
Najstarša karta Čěskeje zapisana
Krótkopowěsće (13.01.26)
Mjeńšiny do zakładneho zakonja
Berlin. Předsyda mjeńšinoweje rady Dawid Statnik je so na nowolětnym přijeću zwjazkoweho prezidenta Franka Waltera Steinmeiera wobdźělił. Připóznaće pak njesmě symboliski akt wostać. Zaměr mjeńšinoweje rady je, zo so awtochtone narodne mjeńšiny do zakładneho zakonja přiwozmu. Z tym ma so škit, widźomnosć a runoprawne wobdźělenje mjeńšinow w Němskej zesylnić.
W brunicowej jamje so paliło
Wochozy. Techniskeho defekta dla je so we Wochožanskej brunicowej jamje wčera běžaty pas w bjezposrědnym susodstwje wudobywanskeho bagera zapalił. Zawodna wohnjowa wobora kaž tež wobornicy wokolnych gmejnow pak móžachu tomu zadźěwać, zo woheń na bager přeskoči. Dweju hórnikow dowjezechu podhlada zajědojćenja sylneho kura dla do chorownje.
Sakska kooperuje ze Sardinskej
Krótkopowěsće (12.01.26)
Dwubój mjez CDU a AfD
Zły Komorow. Alexander Erbert (CDU) a Antje Ruhland-Führer (AfD) staj druhe rozsudne koło wólbow krajneho rady wokrjesa Hornje Błóta-Łužica docpěłoj, kotrež so 25. januara wotměje. Erbert je 48,8 proc. hłosow zdobył, Ruhland-Führer 43,6. Na třećim městnje wčerawšich wólbow běše dr. Evgeni Kivman strony za škit zwěrjatow. Na wólbach wobdźěli so 43,1 procent 190 000 wólbokmanych.
Na lěsnym pućiku znjezbožił
Wjazońca. W lěsu pola Wjazońcy je 23lětny minjeny tydźeń te swojim awtom smjertnje znjezbožił. Jězdźidło bě do wjacorych štomow zrazyło, kotrež běchu pódla lěsneho puća składowane, informowaše nětko Zhorjelska policajska direkcija. Njezbožo bě so štwórtk wječor abo pjatk rano stało. Swědk je policiju zazwonił, dokelž bě pjatk připołdnju awto nadešoł. Policija pad přepytuje.
Sakska Lěwica sylnje rozrostła
Krótkopowěsće (09.01.26)
Nowak: Serbska rada přećicha
Podstupim. Měto Nowak, čłon braniborskeje serbskeje rady, je w zjawnym lisće kritizował, zo gremij swoje prawo, w parlamenće serbsku poziciju zjawnje zastupować, přemało wužiwa. Wo tym je serbski program RBB rozprawjał. Tak njejsu so w aktualnej debaće wo změnje strukturow słowa jimali. Předsyda gremija Marcus Końcaŕ w RBB zwurazni, zo je přezjednosć Serbow to najwažniše.
SAB spěchuje twar bydlenjow
Drježdźany. Pjeć milionow eurow sakske ministerstwo za infrastrukturu a wuwiće kraja lětsa za twar klimje napřećo neutralnych bydlenjow k dispoziciji staja. Hač do 15. apryla měli bydlenske towaršnosće, drustwa, priwatni inwestorojo a zhromadźenstwa wobsedźerjow namjety za saněrowanje abo nowotwar bydlenjow pola Sakskeje natwarneje banki (SAB) zapodać. Wo spěchowanju jury we wobłuku směrnicy rozsudźi.
Natwarja skład za milinu
Krótkopowěsće (08.01.26)
Influenca wužaduje klinikum
Budyšin. Ličba na gripu schorjenych pacientow na stacijach Hornjołužiskich klinikow (OLK) jara spěšnje stupa. W běhu tydźenja je so wjace hač podwojiła. Z Budyskeje wotnožki dyrbja pacientow sčasami do druhich domow klinikuma přepołožić. „Žołma influency je jara dynamiska a podźěl chutnych schorjenjow je njewšědnje wysoki“, praji lěkarski direktor OLK dr. Frank Weder.
Hotowostnu słužbu wobchowaja
Varnsdorf. 1. januara su we wjacorych čěskich městach hotowostnu lěkarsku słužbu lutowanja dla wotstronili. We Varnsdorfje chcedźa ju dale wobchować, a to byrnjež měšćanska chorownja kriterije regiona za financnu podpěru snadneje ličby nuznje hladanych dla njespjelnjała. Radnica budźe hotowostnu słužbu nadal ze swójskeho budgeta podpěrać. Klětu liča z wudawkami wjace hač 700 000 eurow.
Grotheer prěni raz na podiju
