Krótkopowěsće (09.09.25)
Saněruja Zhorjelske dwórnišćo
Zhorjelc. Na Zhorjelskim dwórnišću su ze zaróštowanjom južneje fasady 110 lět stareho, historiskeho hłowneho twarjenja wčera druhu saněrowansku fazu zahajili. Zwjazk, kraj Sakska a Němska železnica dohromady 33,5 milionow eurow do wulkoprojekta inwestuja. Mjez druhim chcedźa wokna na 1 250 kwadratnych metrow wulkej třěše wuměnić kaž tež woclowe nošaki ponowić a zesylnić.
Poslednje přihoty na nowej uni
Podstupim/Choćebuz. „Rozmołwjamy so z poslednimi požadarjemi za dohromady 80 městnow z profesuru na nowej Mediciniskej uniwersiće Łužica“, to zdźěli braniborska ministerka za wědomosć Manja Schüle (SPD) wčera w nowinskej zdźělence. Požadarjo pochadźeja mjez druhim z USA, Južneje Koreje, Awstralskeje a dalšich europskich krajow. Cyłkownje 36 studowacych mediciny wuknje w lětušim zymskim semestrje na uniwersiće.
Słuchohra tež jako stream
Krótkopowěsće (08.09.25)
Hišće žadyn nowy wjesnjanosta
Njeswačidło. 327 hłosow je Martin Scholze z Bóšic po informacijach gmejnskeho zarjada na wólbach wjesnjanosty Njeswačidła wčera dóstał (49 procentow). 889 z 1 877 wólbokmanych (47 proc.) je drje so wobdźěliło, jenož 667 hłosow pak bě płaćiwych. Ludźo napisachu 56 dalšich mjenow na wólbny lisćik. Najwjac hłosow zdoby Juliane Mazalla z Łuha (105). Druhe wólbne koło budźe 28. septembra.
Mjezynarodny sympozij zahajili
Mały Wjelkow. „Kulturne herbstwo zwjazuje a twori přichod“ rěka mjezynarodny sympozij, kotryž město Budyšin wot dźensnišeho do zajutřišeje srjedy w Małowjelkowskej sotrowni wuhotuje. Program wopřijima přednoški wo stawiznach a wuznamje tamnišeje bratrowskeje jednoty, diskusije na podiju a wodźenja kaž tež ekskursiju do Niskeje. Patronatstwo wukonjeja wulkopósłancy Němskeje, Danskeje a Čěskeje.
Wokrjesny zwjazk BSW załožili
Krótkopowěsće (05.09.25)
Rozsudźa wo premjerje
Chrósćicy. Připowědźeneho měnjateho wjedra dla Towarstwo Cyrila a Metoda hač do pózdnjeho popołdnja rozsudźi, hač so premjera pasionskeje hry „Sćěhuj mje!“ dźensa wječor kaž planowane wotměje. W 17.30 hodź. rozsud na internetnej stronje www.posol.de/pasion-2025 a na Instagramje pasion_chroscicy wozjewja.
Böhmer w komisiji
Budyšin/Drježdźany. Budyski měšćanosta dr. Robert Böhmer (bjezstronski), kiž je w měsće za financy, porjad, kubłanje a socialne zamołwity, je wotnětka z eksternym čłonom noweje enquetoweje komisije za komunalne etaty Sakskeho krajneho sejma. Wona wěnuje so polěpšenju finančneje situacije gmejnow a městow. Powołany bu Böhmer wot frakcije AfD, kotraž bě wutworjenje komisije namjetowała.
Nadźijeja so myta
Krótkopowěsće (04.09.25)
Přistup do muzejow wolóžić
Choćebuz. Město Choćebuz chce dźěćom a młodostnym přichodnje přistup do muzeja wolóžić. Tak měli sej woni darmotnje wustajeńcy w Měšćanskim muzeju a w Serbskim muzeju wotkryć móc. Za to maja so wustawki změnić, wo čimž maja zapósłancy měšćanskeje rady na swojim posedźenju w septembrje rozsudźić. Płaćizny za dorosćenych měli so moderatne powyšić, město Choćebuz nětko zdźěli.
Wjac njewobjednanych padow
Drježdźany. Sakske statne rěčnistwa maja po naprašowanju dpa wjele njewobjednanych jednanjow. Wuwiće w swobodnym staće je dynamiske, němski zwjazk sudnikow zdźěli. Kónc lěta 2021 zwěsćichu statne rěčnistwa nimale 30 000 njewobjednanych padow. Porno tomu bě jich jeničce w prěnim połlěće 2025 hižo něhdźe 46 000, štož je rozrost wo 54 procentow.
Pradomiznu Słowjanow wotkryli
Krótkopowěsće (03.09.25)
Přinoški móža hižo zapodać
Großhennersdorf. Za klětuši filmowy festiwal Nysa smědźa zajimcy hač do kónca lěta swoje přinoški zapodać. Produkcija filmow dyrbjała w jednym z třoch krajow – w Němskej, Pólskej a Čěskej – być, festiwalna direkcija zdźěli. Wot 26. do 31. meje so krótke filmy abo dokumentacije mjez sobu wubědźuja.
Přewjedu naprašowanja
Budyšin. Wobchadny zaměrowy zwjazk ZVON chce sobujěducych busow abo ćahow w Hornjej Łužicy přichodne tydźenje ličić a so jich naprašować. Wot wuslědkow wočakuje zwjazk informacije wo wućeženju wobchadnych zwiskow a wužiwanju tiketow. Wone su zakład za to, zo móža zamołwići lěpše poskitki přihotować. Wosoby, kotrež naprašowanja přewjedu, maja sobujěducym swój wupokaz pokazać.
Wospjet stawkowali
Krótkopowěsće (02.09.25)
AfD je w Ohornje dobyła
Ohorn. W Ohornje su zawčerawšim noweho wjesnjanostu wolili. Kandidat AfD André Kämpfe je wólby dobył. Wón měješe jenož mało hłosow wjace hač jeho konkurent Uwe Baldauf (njestronjan). Kämpfe dósta 531 hłosow wolerjow, Baldauf pak 519. Wólbne wobdźělenje wučinješe 55 procentow. Zastojnstwo ma so na čestnohamtsce wukonjeć.
Dalša kandidatka w Njeswačidle
Njeswačidło. Na wólbnym lisćiku za wólby noweho wjesnjanosty njedźelu w Njeswačidle steji jenož jedyn kandidat: Martin Scholze ze susodneje gmejny Bóšicy. W tajkim padźe maja wolerjo prawo, dalše mjeno na lisćik napisać. Juliane Mazalla z Łuha, mać třoch dźěći a rěčnica na wěrowanjach a chowanjach, je nětko zwólniwosć zwurazniła, so wolić dać.
Překwapjenka za „šwejkologow“
Krótkopowěsće (01.09.25)
Ludźo ze stejnišćom zwjazani
Čorna Pumpa. Něhdźe 17 850 hosći bě zawčerawšim na dnju wotewrjenych duri na 70lětne wobstaće industrijneho parka w Čornej Pumpje zhladowało. Ličba wotbłyšćuje wusku zwjazanosć ludźi ze stejnišćom a je dobry signal z Łužicy, su sej organizatorojo zarjadowanja přezjedni. Hesło dnja bě „Zańdźenosć zetka přichod“. W industrijnym parku je 120 předewzaćow zaměstnjenych.
Za zachowanje lěsa
Rowno. Skupina Serbska reja je wčera na zarjadowanju wobswětoweje skupiny Choćebuz we wohroženym lěsu pola Rownoho hudźiła a spěwała. Mnozy přitomni, mjez kotrymiž běchu wjacore swójby, su sobu spěwali a rejowali. Fararka Slepjanskeje wosady Jadwiga Malinkowa bě na němsko-serbsku nutrnosć přeprosyła. Mjez štomami běchu grafiki wuměłče Maje Nageloweje wustajene.
Bio-zawody so předstaja
Krótkopowěsće (29.08.25)
Dale a wjac chorhojow
Wjazońca. Před radnicu we Wjazońcy wisaja wot wčerawšeho chorhoje Němskeje, Sakskeje a gmejny. Tole wobkrući nam Dominik Hampel, předsyda frakcije AfD w gmejnskej radźe, kotraž je to zawčerawšim na namjet AfD z 13 hłosami a jednym hłosawzdaćom rozsudźiła. Přikład bě radźe wobzamknjenje wokrjesa za šule jako „wuznaće k domiznje a Zwjazkowej republice Němskej“, tak Hampel.
Realne mzdy stupaja
Kamjenc. Přistajeni w Sakskej móža sej wot swojich dochodow wjace popřeć. Přerězna realna mzda je wot apryla hač do kónca junija porno předchadźacej dobje w lěće 2024 wo 2,2 procentaj stupała, krajny zarjad za statistiku w Kamjencu dźensa zdźěli. Trend stupacych realnych mzdow dale traje.
Wubědźowanje zahajene
Budyšin. Marketingowa towaršnosć Hornja Łužica-Delnja Šleska je zawčerawšim namołwu za Hornjołužiske předewzaćelske myto wozjewiła. Ćežišćo wubědźowanja su lětsa fachowcy. Za myto móža so předewzaća přizjewić abo namjetować, kotrež z dobrymi idejemi a zmužitosću přeswědčeja a ludźi z tym zahorjeja. Myto spožčeja hižo wot lěta 1996.
Krótkopowěsće (28.08.25)
SŠT ma nowu jednaćelku
Budyšin. Serbske šulske towarstwo (SŠT) ma nowu jednaćelku. Kaž je předsydka Katharina Jurkowa na naprašowanje Serbskich Nowin wobkrućiła, je zrěčenje podpisała. Manuela Wóscyna, 42lětna mać z Chrósćic, kiž tuchwilu hišće w swobodnym hospodarstwje dźěła, přewozmje nowy nadawk srjedź septembra. Wona budźe zdobom jednaćelka projektneje towaršnosće Lucija.
Frakcija CDU dale a bliša AfD?
Budyšin. Powěsć, zo je frakcija CDU w Budyskim wokrjesnym sejmiku zaso Matthiasa Grahla jako předsydu woliła a Mirko Pink zastojnstwo złožił, je nimo přihłosowanja tež kritiske komentary zbudźiła. Grahl wospjet zjawnje za wjac kooperacije z AfD pledowaše. Něhdyši předsyda Budyskeho DGB Bernhard Sonntag so praša, hač so CDU „nětko hišće bóle njedemokratam přiwači“.
Nowy poskitk železnicy
Krótkopowěsće (27.08.25)
Brechowa dźiwadło wopytała
Budyšin. Społnomócnjena sakskeho statneho knježerstwa za naležnosće Serbow Franziska Brechowa je wčera Němsko-Serbske ludowe dźiwadło wopytała. Intendant Lutz Hillmann a zarjadniski direktor Ronald Kohrs jej dźiwadło předstajištaj a mjez druhim zhromadne dźěło ze serbskimi institucijemi a financne naležnosće dźiwadła wuswětlištaj.
Liča z wjace nadpadami wjelkow
Drježdźany. Fachowcy za wjelki liča z tym, zo w přichodnych tydźenjach nadpady rubježnych zwěrjatow na domjacy skót přiběraja. Přičina toho je biologija wjelkow, wšako maja w nalěću a lěću młodźata. W pózdnim lěću a nazymje trjebaja dale a wjac picy, čehoždla potom tež nadpady na domjacy skót přiběraja. Krajny zarjad za wobswět, geologiju a ratarstwo tuž plahowarjow skotu namołwjeja, zo wěstotne naprawy za škit dodźerža.
Europske spěchowanske srědki
