Krótkopowěsće (26.06.26)
Inwestuja do kubłanja
Radeberg. Na bywšej ležownosći Eschebach w Radebergu nastawa moderna wotnožka Humboldtoweho gymnazija, hdźež ma přichodnje 500 šulerkow a šulerjow wot 5. do 7. lětnika wuknyć. Zakładny kamjeń za projekt Budyskeho wokrjesa su tam wčera połožili a z tym inwesticiju we wysokosći 23,3 milionow eurow zahajili. 12,1 milion eurow dochadźa ze spěchowanskich srědkow Sakskeje, 11,2 milionaj ma wokrjes Budyšin zwjesć.
Algi w spjatym jězorje
Budyšin. Budyski strowotniski zarjad tuchwilu wot kupanja při Budyskim spjatym jězorje wotradźa. Při kontrolach su sylne rozmnoženje módreje mokricy (Blaualge) zwěsćili. Na nje móhli wosebje dźěći a sensibelni ludźo reagować. Wosebje njeměli so ludźo kupać, hdźež je woda jasnje zelena. Na tutych městnach njeměli so dźěći ani hrajkać. Dalše poskitki při jězorje pak hodźa so wužiwać.
Chinjanam zrěčenje wupowědźa
Krótkopowěsće (25.06.26)
Próstwu přiwzali
Drježdźany. Sakski krajny sejm je na swojim wčerawšim posedźenju próstwu CDU, Zelenych a Lěwicy přiwzał. Strony zasadźuja so za to, serbsku rěč a kulturu dale skrućić. Sakske knježerstwo měło w tym zwisku dalše zawjazki z Europskeje charty regionalnych a mjeńšinowych rěčow přewzać, w próstwje rěka. Dohromady dźesać zapósłancow, mjez nimi Marko Šiman, je próstwu zapodało.
Forum wuměłstwa a wědy zahajili
Galway. Organizacija Society for Artis-tic Research je wčera z mjezynarodnym forumom za wuměłstwowe slědźenje swoju 17. konferencu w Galwayju zahajiła. Uniwersita irskeho města je hač do jutřišeho z hosćićelku najwjetšeho zetkanja swojeho razu, kotrež wěnuje so poćaham minorizowanych abo wot wotemrěća wohroženych rěčow a slědźenja. Mjez wjace hač 150 wobdźělnikami je serbska wuměłča a wědomostnica Karoline Krawcec ze swojim autoetnografiskim projektom „rěč/ryć“.
Wulka nasćěnowa mólba
Krótkopowěsće (24.06.26)
Žadaja sej wutwar čary
Grodk. Łužiske komuny so za wutwar železniskeje čary z dwěmaj kolijomaj mjez Zhorjelcom a Choćebuzom zasadźuja. Redukowanje na čaru z jenož jednym kolijom nochcedźa zamołwići akceptować. Hladajo na změnu strukturow po wudobywanju brunicy je čara za hospodarske wuwiće nuznje trěbna, Łužiski kruh wčera wozjewi. Komuny so boja, zo njemóže Sakska prózdnych kasow dla naprawu w połnej měrje zwoprawdźić.
Přepytowanje zakónčene
Zhorjelc. Wobšěrne kriminalnotechniske přepytowanje sypnjeneho doma w Zhorjelcu je zakónčene. Wěcywustojni su płunowody pruwowali. Z prěnich dopóznaćow wuchadźa, zo bě eksplozija měšeńcy płuna a powětra z přičinu njezboža. Defekt na płunowodach Zhorjelskich měšćanskich zawodow je wuzamknjeny. W pincy sypnjeneho domskeho su kriminalnotechniscy fachowcy dźěle płunowodow zawěsćili.
Praha w mobilnej hrě
Krótkopowěsće (23.06.26)
Choćebuz: pjenjezy njedosahaja
Choćebuz. Na cyłoněmskim akciskim dnju „komuny na limiće“ je so wčera tež město Choćebuz wobdźěliło. Zhromadnje ze stami komunow su zastupjerjo města na dramatiske financielne połoženje skedźbnili. Choćebuski wyši měšćanosta Tobias Schick (SPD) na to pokaza, zo drje město srědki ze zakonja za změnu strukturow dóstawa, za wšědne nadawki pak pjenjezy njedosahaja.
Tunl w nocy zawrjeny
Zhorjelc. Šoferojo dyrbja so na awtodróze mjez Zhorjelcom a Budyšinom znowa na haćenja nastajić. Mjez tunlom a Wósporkom přihotuja twarnišćo, dokelž je dróha dodźeržana. Tuchwilu je jenož jedna jězdna k dispoziciji. Zamołwići rozsudźichu, zo haćenje hnydom za hladanje tunla wužija, štož je we wěstych wotstawkach trěbne. Tuž budźe tunl pod Limasom hač do 26. junija stajnje w nocy zawrjeny.
Zwjazk z nowej jednaćelku
Krótkopowěsće (22.06.26)
Wobaraja so lutowanju
Choćebuz. Marburgski zwjazk lěkarjow Berlin/Braniborska je zhromadnje z dźěłarnistwom Verdi a personalnej radu medicinskeje uniwersity Łužica w Choćebuzu k tomu namołwjał, dźensa připołdnju před zachodom kliniki protestnu akciju přewjesć. Samsny čas je so tajke zarjadowanje na klinikumje w Frankfurće nad Wódru wotměło. Akcija měri so přećiwo nowemu zakonjej zwjazkoweho knježerstwa, po kotrymž maja chorownje lutowanske naprawy zwoprawdźić. Hospodarska situacija chorownjow móhła so z tym přiwótřić.
Namjety za myta zapodać
Budyšin. Namjety za wuznamjenjenje z Mytom Domowiny, Mytom Domowiny za dorost a čestnym znamješkom Domowiny móža zajimcy mytowanskemu wuběrkej hišće hač do 30. junija zapodać. Móžno je to na adresu Domowiny w Budyšinje abo z mejlku. Ludźo měli za to wotpowědny formular wužiwać. Mytowanske zarjadowanje budźe lětsa 9. oktobra w Budyšinje.
Přibrjóh Nysy přetwarja
Krótkopowěsće (19.06.26)
Ze situaciju njespokojom
Budyšin. Předsydstwo Budyskeje župy Jan Arnošt Smoler je na swojim wčerawšim posedźenju mjez druhim połoženje na Radworskej zakładnej šuli wobjednało. Čłonojo maja za njerozumne, zo zasadźi so w přichodnym 1. lětniku ze skupinu serbskich šulerjow němska wučerka. Runje w 1. lětniku je serbska wučerka wažna wosoba. Župa chce nětko přihoty za lětniki přesahowacu wučbu podpěrać. W nowym šulskim lěće tónle princip hišće njenałožuja.
Maja hišće swobodne městna
Budyšin. Serbske šulske towarstwo (SŠT) na to skedźbnja, zo su hišće swobodne městna za prózdninske lěhwo we Wodowych Hendrichecach, kotrež wotměje so wot 17. do 26. julija. Dźěći 4. do 8. lětnika smědźa sobu jěć. Přizjewjenja su na homepage SŠT abo telefonisce pod 03591/550 214 móžne.
Wuwiwaja nowy tarif
Krótkopowěsće (18.06.26)
Rozestajenje traje
Budyšin. Wyše zarjadniske sudnistwo w Budyšinje dyrbi so z wobzamknjenjom wokrjesneho sejmika w naležnosći porodźernje w chorowni swj. Jana w Kamjencu zaběrać. Na zeńdźenju sejmika kónc meje radźićeljo rozsudźichu, porodźernju financielnje podpěrać. Wokrjesna radźićelka Drježdźanskemu zarjadniskemu sudnistwu skóržbu přećiwo tomu zapoda a zwrěšći. Nětko spyta wona to w Budyšinje. Hač k rozsudej njemóže so wobzamknjenje sejmika přesadźić.
Na wopory zběžka spominali
Budyšin. Na wopory ludoweho zběžka 17. junija 1953 su wčera sakska justicna ministerka prof. Constanze Geiert (CDU), zapósłanc sakskeho krajneho sejma Marko Šiman (CDU), Budyski měšćanosta za financy Robert Böhmer, přirjadnica Budyskeho krajneho rady dr. Romy Reinisch kaž tež Budyscy měšćanscy radźićeljo na Budyskim rownišću „Nuklaca hórka“ spominali. Tež w Budyšinje je tehdy něhdźe 600 ludźi za wjace demokratije a lěpše dźěłowe wuměnjenja demonstrowało.
Z Vietnama do Wojerec
Krótkopowěsće (17.06.26)
Chorowni kooperujetej
Zhorjelc. Nawodnistwje Zhorjelskeje chorownje swj. Carolusa a tamnišeho klinikuma stej so wčera na krutu zhromadnu kooperaciju dojednałoj. Z njej chcetej předewzaći strowotniske zastaranje w měsće kaž tež w Zhorjelskim wokrjesu trajnje zawěsćić. Zaměr kooperacije mjez druhim je, poskitki wobeju stejnišćow zmysłapołnje mjez sobu wothłosować a na wysokim niwowje dale wjesć.
Ze situaciju njespokojom
Budyšin. Institut za wične slědźenje MAS z Lipska a firma Procesni psychologojo z Łužicy stej so w měrcu a aprylu něhdźe tysac wobydlerjow łužiskich wokrjesow we wobłuku Łužiskeho monitora woprašowałoj. Mjez druhim so wobhonichu, kak spokojom su ludźo ze swojej žiwjenskej situaciju. Wuslědki wotbłyšćuja negatiwne wuwiće: Jenož hišće 66 procentow woprašowanych je ze situaciju spokojom. Loni bě to 79 procentow.
Pancery na awtodróze
Krótkopowěsće (16.06.26)
Rěče mjeńšinow lěpje škitać
Berlin. Zwjazkowa rada je na swojim posedźenju minjeny pjatk próstwje Schleswigsko-Holsteinskeje, Sakskeje, Braniborskeje a Delnjeje Sakskeje wotpowědowała, regionalne a mjeńšinowe rěče w markowym prawje Europy lěpje škitać. Konkretnje dźe wo zapřijeća abo rěčne wobroty, kotrež su w charće regionalnych a mjeńšinowych rěčow Europy škitane.
Namołwjeja k akciskemu dnjej
Bórkowy. Komunalne načolne zwjazki su zhromadnje k akciskemu dnjej „komuny na limiće“ 22. junija w Bórkowach namołwjeli, dokelž je financna situacija městow, wokrjesow a gmejnow dramatiska. Tak mjenowanych dobrowólnych nadawkow dla maja dźeń a mjenje pjenjez k dispoziciji. Mjez nimi je tež turizm, kotryž je w Bórkowach najsylniši hospodarski faktor.
Nowe pišćele w katedrali
Krótkopowěsće (15.06.26)
Dorostowi rejwarjo so předstajili
Budyšin. Swoju zakónčacu galu su rejwarki a rejwarjo dorostoweho studija Serbskeho ludoweho ansambla (SLA) wčera w Budyšinje předstajili. Rejowanske skupiny „Łužičanki“ z Chrósćic a Radworja kaž tež „Łužiska rapsodija“ pokazachu na žurli SLA program „Mały ptačk“. Na dwěmaj předstajenjomaj je něhdźe 80 dźěći a młodostnych z wjesołymi rejemi w pisanych kostimach publikum zawjeseliło.
300 lět Serbski seminar
Praha. Dźensa před třomi lětstotkami bu w Praze zakładny kamjeń Serbskeho seminara połoženy. Dom bu pozdźišo jako Seminarium Budissinorum ad s. Petrum pomjenowany a bě třeći serbski konwikt w měsće. Kapacita předchadźacych njeje za ličbu zajimcow studija katolskeje teologije hižo dosahała. Z někotrych žórłow wuchadźa, zo bu zakładny kamjeń 15. pražnika połoženy. Za dokładnym datumom ma so dale slědźić.
Awta z Chiny njewitane
