To a tamne (12.06.26)
Dokelž je so 65lětna Italčanka sama wo swoje pozdatne prawo postarała, dyrbi nětko na 18 lět do jastwa. Wona je mjenujcy 52lětneho muža, kiž bě ju wobkradnył, přejězdźowała. Jako bě muž žonje w lěće 2024 tošu pokradnył, wona jemu sćěhowa. Jeho dosćahnywši stłóči jeho z awtom na sćěnu. Po tym zjědźe tak často přez njeho, doniž so hižo njehibaše. Na to samo wulěze, pječa zo by zwěsćiła, hač je rubježnik woprawdźe mortwy. Sudnistwo města Lucca w Toskanje žonu mordarstwa dla zasudźi. Wobsedźerka pobrjóžneje kupjele pak smě pokutu w domjacym aresće wotsedźeć.
To a tamne (11.06.26)
Konop steji tež tele dny zaso w srjedźišću wosebitych wikow w Berlinje. Dźesaty raz zarjaduja tam lětsa mjenujcy wiki pod mjenom Mary Jane. Zarjadowarjo wočakuja hač do njedźele něhdźe 75 000 wopytowarjow. W halach samych wopytowarjo konop konsumować njesmědźa, jenož zwonka nich. Nimo toho je alkohol za čas wikow kruće zakazany, wšako je moto wikow „Cannabis first“. Na wiki pušća ludźi hakle nad 18 lětami. Małolětni nimaja přistup, byrnjež dorosćeni pódla byli.
W Sewjerorynsko-Westfalskej je policija wjacore domske přepytała. Tam přepytuja mjenujcy wjacore pady jebanstwa, w kotrychž běchu so ludźo jako policisća abo sobudźěłaćerjo bankow wudawali. Dohromady su ludźi pječa wo něhdźe 500 000 eurow zjebali. Wjacorych podhladnych su hižo zajeli.
To a tamne (10.06.26)
Předmjenje Sophia a Noah běštej tež w lěće 2025 statistisce najwoblubowanišej mjenje. Wo tym informuje Towaršnosć za němsku rěč (GfdS), kotraž wuhódnoća za swój report daty němskich stawnistwow. Hižo w lětomaj 2023 a 2024 stej tejle předmjenje na čole statistiki stałoj. Mjez najwoblubowanišimi w lisćinje su holče mjena Mia, Lina a Ella kaž tež hólče mjena Matteo, Theo a Leo.
Statny minister za kulturu Wolfram Weimer (njestronjan) wobdźěli so dźensa w Barcelonje na poswjećenju najwyšeje cyrkwinskeje wěže swěta. Dokónčenje natwara hłowneje wěže bazliki Sagrada Familia po wjace hač 144 lětach je wosebity podawk, wón w interviewje z moderatorom Jörgom Thadeuszom přeradźi. Nimo toho je wón přewšo hordy, zo je wulki swjaty křiž wěže bayerski twarc fasadow Gartner zhotowił.
To a tamne (09.06.26)
Jako policist předrasćeny chcyše sej 19lětny młodostny w spěšniku z Kassela do Berlina jězdźenku zalutować. Konduktor pak jemu stawiznu wo słužbnej jězbje wšelakich njejasnych wuprajenjow dla tak prawje wotkupić nochcyše. Tohodla informowaše přichodny policajski zarjad. Jako prawi zastojnicy młodeho skućićela na Hannoverskim dwórnišću wočakowachu, spyta tón ćeknyć. Po krótkej přesćěhańcy wšak jeho popadnychu a zajachu.
Wulki łós (Elch), kotryž je na łukach a w lěsach podłu awtodróhi A 10 kołowokoło Berlina po puću, je minjene dny wo spodźiwanje mjez šoferami a jich sobujěducymi zadźiwał. Tuta, po cyłym swěće najwjetša družina jelenjow w Němskej poprawom zadomjena njeje. Po wobkedźbowanjach fachowcow stej w Braniborskej tuchwilu dwě zwěrjeći po puću. Łosy přichadźeja z Pólskeje sem. Tam je wjetša populacija žiwa.
To a tamne (08.06.26)
Nowy hinduistiski templ su wčera po dwaceći lětach planowanja a natwara w Berlinskim měšćanskim dźělu Neukölln poswjećili. Twarjenje ze swojej 17 metrow wysokej kupolu je najwjetši templ dohromady něhdźe 100 000 hinduwow w Němskej. Na swjatočnosći wobdźělištaj so mjez druhim Berlinska senatorka za hospodarstwo Franziska Giffey (SPD) a indiski wulkopósłanc Ajit Gupte.
Na swojej pytanskej wuprawje za zhubjenym w lěsnym pasmje zapadnje wulkoměsta Orléans je sobotu helikopter francoskeje policije znjezbožił. Jedyn zastojnik při tym zemrě, dalšaj so ćežko zraništaj. Policisća běchu wjacore hodźiny z helikopterom po puću. Přičiny njezboža dotal znate njejsu. Młodostneho, za kotrymž běchu slědźili, su mjeztym namakali.
To a tamne (05.06.26)
Do nuzoweje přijimarnje kliniki we hessenskim Wolfhagenje je předwčerawšim šěsć kruwow doběžało. Dohromady bě wosom skoćatow z pastwy ćeknyło, policija zdźěla. Hižo na parkowanišću chorownje su pomocnicy kruwje popadnyli. Wšě dalše pak so na puć do twarjenja nastajichu. Po tym, zo po nuzowej přijimarni brodźachu, doběžachu sej přez schody samo do druheho poschoda.
W Japanskej je so bar w fabrice schował, po tym zo bě čłowjeka nadpadnył. Dlěje hač 24 hodźinow spytachu ludźo zwěrjo wottam wotwjesć, štož pak so jim njeporadźi. W běhu časa samo wobkedźbowachu, kak bar wodu z honača pije. W nocy sej wón potom wokno wočini a wućekny. Bruny bar drje je jara mudre zwěrjo. Najebać to bědźi so Japanska přiběrajcy z agresiwnymi barami. Loni je 13 ludźi žiwjenje bara dla přisadźiło.
To a tamne (04.06.26)
Wjelrybu „Timmy“, kotraž bě wot kónca měrca wjacekróć před němskim přibrjohom tčaca wostała, chcedźa dźensa před danskej kupu Anholt obducěrować. Při tym móža zajimowani samo přihladować. Procedura w Danskej ničo njewšědneho njeje. Dohromady šěsć hodźinow ma trać, doniž nochcedźa eksperća wozjewić, na čim je mórski cycak naposledk zahinył.
Před něhdźe lětom běchu njeznaći w Kölnje spytali, postawu sławneje trikoweje figury myše zapalić. Policija pak nadal njewě, štó złóstnicy běchu. Hačrunjež běchu fota wobstražowanskich kamerow wozjewili, njejsu zastojnicy dotal pokiwy dóstali, kotrež woprawdźe dale pomhaja. Někotre z nich přiwšěm pruwuja. Jeli pak ničo njewunjesu, dyrbja přepytowanje nachwilnje zakónčić, rjekny rěčnik policije.
To a tamne (03.06.26)
Z njewšědnym stuntom je wopity muž minjenu sobotu policistow a pasantow w nutřkownym měsće Koblenza překwapił, jako na motorowu hawbu pomałku jěduceho policajskeho awta skoči a přez třěchu dozady kročo elegantnje zaso z jězdźidła stupi. Krótko po tym jeho zastojnicy w bliskim restawranće pod přikleskom hosći zajachu. Wón bě so prosće za najkrótši puć k cilej rozsudźił, wotmołwi 31lětny na prašenje za přičinu swojeho stunta.
Piwo na Oktoberskim swjedźenju w Mnichowje so tež lětsa zaso podróši. Po informacijach města płaći potom karan chmjeloweje brěčki 14,80 do 15,90 eurow, štož woznamjenja porno lońšemu stopnjowanje wo 2,38 procentow. Płaćizna piwa je kóžde lěto wažna diskusijna tema mjez wopytowarjemi swjedźenja, kotraž so sčasami na politikum rozwiwa.
To a tamne (02.06.26)
Štyrjoch so tepjacych z rěki Ruhr wuchowała je angažowana kolesowarka w Bochumje. Po informacijach policije běchu najprjedy tři žony při swójbnym grilowanju na přibrjoze rěki do wody padnyli. Přiwuzny chcyše jich wuchować. Dokelž pak runja žonam płuwać njezamóže, tčeše spěšnje sam w nuzy. Připadnje nimo jěduca kolesowarka – lěkarka – na blaku zapřimny, wšitkich z wody wućahny a zahaji naprawy prěnjeje pomocy.
Dowolowa łódź „Hondius“, na kotrejž běchu před něšto tydźenjemi třo pasažěrojo infekcije z hanta-wirusom dla zemrěli, je wot přichodneho kónca tydźenja zaso na morjach swěta po puću. Zamołwići nižozemskeje łódźernje Oceanwide Expeditions zdźěleja, zo su fachowcy łódź dokładnje wurjedźili a desinfikowali, tak zo su nižozemske strowotniske zarjady dowolnosć za dalše wužiwanje dali.
To a tamne (01.06.26)
Škleńca wody k wječeri běše přičina lěta trajaceho juristiskeho rozestajenja mjez turistku a italskim luksusowym hotelom w Dolomitach. Nětko je sudnistwo prašenje, hač ma žona prawo na darmotnu škleńcu wody z honača k jědźi, zakónčiło. Po wusudźe hosćo w restawrantach a hotelach tajke prawo nimaja.
Seniorku z rolatorom wuhladachu zastojnicy policije w Euskirchenje na foće błyskača, nad čimž so njemało dźiwachu. W powěsći na Instagramje woni zdźělichu, kak běše ke kurioznemu wobrazej dóšło: Žona běše runje na chódniku podłu dróhi po puću, kotraž je na tempo 30 km/h wobmjezowana, jako přismali transportne awto ze spěšnosću 42 km/h, kotrehož dla běše radarowa kamera zaskočiła. Awto pak je jenož w pozadku widźeć.
