To a tamne (06.11.26)
Wjace hač 3 000 ptačich pawkow su zastojnicy na mjezynarodnym lětanišću peruskeje stolicy Lima w kófrach němskeju a pólskeho staćana namakali. Zhromadnje chcychu do Němskeje lećeć. Pućowacych nachwilnje zajachu, zdźěli peruske knježerstwo. Podhladni běchu pawki w nohajcach schowali. Transportowali běchu jeja a hižo wurosćene pawki, zdźěli ekspertka na městnje Cora Suárez.
Znajmjeńša jónu wob tydźeń nimale kóždy druhi dorosćeny w Němskej připołdnju drěma. Tole je wuslědk reprezentatiwneho woprašowanja Roberta Kochoweho instituta (RKI). Najwjace ludźi popřeje sej připołdniši spar jónu abo dwójce wob tydźeń. Jim slěduja ći, kotřiž wšědnje připołdnju spja. Wobdźěliło bě so dohromady 8 000 ludźi, 45 procentow z nich připołdnju spi.
To a tamne (05.11.26)
Nimale dospołnje z kumštnej inteligencu (KI) generowany chinski kinowy film z titulom „Sanxingdui: Future Past“ so tamnišemu publikumej scyła njelubi. Science-fiction-pask bě dotal 1,7 milionow Yuan (něhdźe 230 000 eurow) do kasow přinjesł. W interneće so přihladowarjo mjez druhim njerealistisku mimiku a lědma zrozumliwe jednanje kritizuja. Film bě KI pječa po idejach ludźi generowała.
Něšto tydźenjow do spočatka adwenta započinaja so města pomału na dohodowne wiki přihotować. Tak su w Drježdźanach a Lipsku hižo hodownej štomaj nastajili. Ludźom pak so wonej scyła njelubitej. W Drježdźanach hórša so mjez druhim přez to, zo jědla hižo prawy wjeršk nima. W Lipsku pak bě so při transporće štoma ze Sauerlandskeje wulka hałuza wobškodźiła.
To a tamne (04.11.26)
Byk Achilleo a wosoł Patroclo stej mjez slědźerjemi uniwersity w Pisy zadźiwanje budźiłoj. Hačkuli móhłoj sej muskej skoćeći w swojej wokolinje bjeze wšeho partnerku swójskeje družiny wuzwolić, pěstujetej hižo dlěši čas mjezsobny lubosćinski poćah. Wo tym rozprawjeja italscy wědomostnicy w fachowym časopisu Current biology. „Matej intensiwne seksuelne interakcije a dobre wobstajne mjezsobne socialne styki“, woni podšmórnu.
Spisowaćel a moler Janosch je wčera w starobje 95 lět w swojim domje na španiskej kupje Teneriffje zemrěł. To nawoda nakładnistwa, w kotrymž su jeho knihi wuchadźeli, Bernhard Feil wčera w nowinskej zdźělence w nadawku swójby zdźěli. Janoschowe ilustrowane dźěćace knihi wo tigrje a baru drje su po wšěm swěće znate. Dohromady je wón 150 w 40 rěčach wušłych knihow spisał.
To a tamne (03.11.26)
Namócneho zadźerženja napřećo šulerjomaj dla steji Choćebuski wučer dźensa před tamnišim hamtskim sudnistwom. W lěće 2023 běše wón tehdy dwanaćelětneju hólcow ćělnje nadběhował. Při tym jednoho z njeju tak sylnje zrani, zo dyrbjachu jeho do chorownje dowjezć. Po informacijach towarstwa Perspektiwa wopora mataj šulerjej migraciski pozadk. Při přepytowanju pada so wujewi, zo měješe nadpad wučerja tež rasistiski motiw.
Padaj z jehličkami preparowanych plackow, kiž běchu dźěći na swjedźenju Halloween dóstali, je nětko tež sakska policija registrowała. Wo podobnych padach běchu minjene dny tež w druhich zwjazkowych krajach, mjez druhim w Durinskej, Bayerskej abo Saksko-Anhaltskej, rozprawjeli.
To a tamne (02.11.26)
Swětowe mišterstwa w lodohokeju 2027 přewjedu w Němskej, a to w městach Düsseldorf, Mannheim kaž tež Gelsenkirchen. Wčerawša powěsć Němskeho lodohokejoweho zwjazka (DEB) pak fanow lodohokeja nětko šokuje: Zwjazk přemysluje wo tym, zo wuhotowanje swětowych mišterstwow zaso wróći. Přičina toho je rozsud mjezynarodneho sportoweho sudnistwa Cas w minjenym tydźenju. Tutón dowoli ruskim lodohokejistam zaso wobdźělenje na swětowych turněrach.
Z jehličkami preparowane placki su we wjacorych zwjazkowych krajach w měškach ze słódkosćemi nadešli, kotrež běchu sej dźěći na halloweenswjedźenju nahromadźili. Mjez druhim w Durinskej, Bayerskej a Nižosakskej přepytuja nětko zamołwite zarjady pady pospyta strašneho zranjenja ćěła dla.
To a tamne (30.10.26)
Jeničce 46 centimetrow dołha je zawěra železniskeho přechoda w měšćanskim dźělu Weidenpesch w Kölnje. Wšědnje so mólička zawěra něšto razow za pěškow začinja a zaso wotewěra. Na Google maps běchu připrawu wóndano „najmjeńšu železnisku zawěru Němskeje“ mjenowali. Wuska zawěra pak žadyn zmylk njeje, zdźěli Stephan Anemüller, kotryž bě ju w nadawku Kölnjanskich wobchadnych zawodow planował.
Finska powěsćernja STT po nimale 140 lětach dźěłać přestanje. Po wjelelětnych financielnych problemach předewzaće swoju powěsćowu a wobrazowu słužbu po 31. měrcu 2027 hižo dale njepowjedźe, wone wčera zdźěli. Serwis rozšěrjenja nowinskich zdźělenkow pak nadal wobsteji. Agenturu běchu w lěće 1887 załožili. Něhdźe 90 dźěłowych městnow šmórnu.
To a tamne (29.10.26)
Polarne wjelki su wčera wosomlětnu holcu w parku dźiwiny w braniborskim Želmju (Baruth/Mark) nadpadnyli a ćežce zranili. Po informacijach krajnoradneho zarjada wokrjesa Teltow-Fläming běše so wona zhromadnje z dalšimaj holcomaj na wosebitym poskitku, přewodźowanju hladarjow při wšědnym dźěle, wobdźěliła. Při napojenju polarnych wjelkow wone holcu z dotal njeznatych přičin nadběhowachu. Přitomna hladarka spěšnje zapřimny a tak hóršemu zadźěwaše.
Serijoweho mordarja a kanibala su wěstotne organy w Ugandźe zajeli. Wo tym rozprawja tamniši nawoda wójska Muhozi Kainerugaba na portalu za krótkopowěsće X. Prawdźepodobnje je wobwinowany w běhu 15 lět we wšelakich regionach kraja dohromady 38 ludźi morił a někotrych z nich jědł. Kainerugaba připowědźi zjawny proces a wotprawjenje muža.
To a tamne (28.10.26)
Winowe kubło hród Wackerbarth w Radebeulu chce bórze kumštnu inteligencu (KI) zasadźować, a to na turistiskich wodźenjach po winicach a kuble. Wona ma rozłožowanja turistiskich wjednikow za mjezynarodnych hosći live přełožować. KI je zdobom kmana, ludźom z wobmjezowanym słuchom přełožki direktnje na słuchanski nastroj přenjesć.
Beate Zschäpe, w zwisku z mordarstwami prawicarskeje skupiny NSU zasudźena teroristka, wostanje znajmjeńša hač do lěta 2035 w jatbje. Wčera je wyše krajne sudnistwo w Mnichowje jeje minimalnu dobu jatby wobkrućiło a zdobom próstwu wo wusadźenje chłostanja na pruwowanje wotpokazało. Přećiwo rozsudej móže so zasudźena na wyše sudnistwo powołać. Tutón wotmysł pak jeje prawiznicy nimaja.
To a tamne (27.10.26)
Ze suchim lodom a selu w mróčelach chce Indoneziska katastrofalnym wohenjam w lěsach a na kraju na kupomaj Borneo a Sumatra wotpomhać. Lokalna agentura za meteorologiju, klimatologiju a geofyziku (BMKG) je na woběmaj kupomaj dohromady 15 lětadłow wupósłała, kotrež maja kumštne spadki wuwabić. Dołhož ludźo na dešć čakaja, wojuja wohnjowi wobornicy dale přećiwo wohenjam, kotrež hižo wjacore měsacy zachadźeja.
Rapper Jay-Z budźe w februarje 2027 wjeršk spektakla w přestawce połčasa Super Bowla, finala footballoweje ligi w USA. Tole zdźělichu Apple Music, NFL a zawod Roc Nation, kotryž bě Jay-Z załožił. Finale, kotrež sej kóžde lěto miliony ludźi po cyłym swěće wobhladuja, wotměje so klětu 14. februara w SoFi-stadionje w Kaliforniskej.
