To a tamne (05.08.26)
Mnichowski awtotwarc Sono Motors je kónc julija insolwencu přizjewił. Předewzaće běše dla swojeho wizionarneho elektroawta z mjenom Sion znate, kotrehož karoserija ze solarnych bańkow wobsteji. Zamołwitym pak so poradźiło njeje, awto w seriji produkować. Předewzaću zbywa nětko mnoho nowych techniskich wuwićow a patentow, kotrež chce zajimcam předać.
Nowy wirus, kotryž je dotal w Africe, Awstralskej a Aziji rozšěrjeny, je so do Europy zadobył. Tuchwilu rozmnoža so wón mjez stadłami howjadow na juhu Němskeje. Inficěrowane skoćata maja zymicu a židlawu, dejki dawaja tohodla tež mjenje mloka. W něhdźe 100 ratarskich zawodach w južnobadenskim regionje su wirus, kotryž kuntwory přenošuja, zwěsćili. Schorjene skoćata pak su infekciju přetrali. Za čłowjeka je wirus njestrašny.
To a tamne (04.08.26)
Prěnja wot kumštneje inteligency (KI) stworjena filmowa dźiwadźelnica rěka Tilly Norwood. Wona přewozmje hłownu rólu w filmje „Misaligned“, kotrehož produkciju Londonska firma KI-Studio Particle 6 bórze zahaji. Film kategorije comedy-drama je hybridna produkcija, na kotrejž so nimo digitalnje stworjenych dźiwadźelnikow tež woprawdźići hrajerjo wobdźěla, tak zamołwići.
Chorosć z mjenom Cyclopsoriasis ze sylnej židlawu rozšěrja so tele dny w USA. Jedna so wo infekciju ćeńkeho črjewa, kotruž zawinuje parazit Cyclospora cayetanensis. Wón čuje so w zanjerodźenej wodźe w ćopłych klimatiskich kónčinach derje. Hačrunjež Cyclopsoriasis smjertna chorosć njeje, stej minjeny tydźeń w zwjazkowym staće USA Michiganje dwě wosobje na jeje sćěhach zemrěłoj.
To a tamne (03.08.26)
To a tamne (31.07.26)
Na swojorazny spektakl so ludźo lěto wob lěto we Wótšowcu (Bischdorf) blisko Lubnjowa zetkawaja: Z kolesami jědu po wuskich deskach přez wjesny hat. Jězdnja je při tym jenož 15 centimetrow šěroka, rozprawja organizator Fritz Heinze. Na wšěch 35 entuziastow so kóžde lěto wubědźuje. Najwjace z nich padnje znajmjeńša jónu ze swojim kołom do wody. Dotal běchu so stajnje jenož mužojo na tym wobdźělili. Lětsa pak je prěni raz tež žona mjez „sportowcami“. Na wšěch 1 500 hosći wočakuja we wjesce z něhdźe 200 wobydlerjemi.
Na wšěch 450 000 ludźi bě wustajeńcu sławneje japanskeje wuměłče Yayoi Kusama w Kölnskim muzeju Ludwig wopytało. Tole je w stawiznach doma najwuspěšniša wustajeńca wšěch časow. Hač do njedźele pisane twórby molerki hišće pokazuja.
To a tamne (30.07.26)
Wopušćene awto, kotrehož warnowanske lampki běchu hišće zaswěćene, nadeńdźe policija wčera, srjedu, na awtodróze 94 w Hornjej Bayerskej. Muž a žona, kotrajž běštaj z awtom po puću na lětanišćo w Mnichowje, běštaj je prosće stejo wostajiłoj. Awto bě so skóncowało a muž dyrbješe nuznje swoje lětadło dosćahnyć. Trampujo běštaj so na dalši puć nastajiłoj. Policiju wo tym informowałoj njeběštaj.
Za 26 400 dolarow su črije Justina Bibera přesadźili, kotrež měješe wón na swojim wustupje w połčasnej přestawce finala swětoweho koparskeho mišterstwa wobute. Tole zdźěli awkciski dom Chritie’s. Sneakery marki SKYLRK, kotraž Biberej słuša, běchu beige z róžojtym detailom na pjaće. Po wuprajenjach awkciskeho domu bě Biber tule kombinaciju barbow w koparskim stadionje prěni raz prezentował.
To a tamne (29.07.26)
Z přetwarjenym bobbycarom je Marcel Paul z Hessenskeje spěšnosć 149,875 km/h docpěł. To je nowy rekord. W Awstriskej po dróze horu dele smalo polěpši wón swój dotalny rekord, kotryž bě lěta 2022 z 130,72 km/h nastajił. Na 2,4 kilometry dołhej čarje wučinješe spadowanje hač do 16 procentow.
Jutře, štwórtk, je dźeń, na kotrymž su ludźo na zemi wšě resursy přetrjebali, kotrež zamóže zemja w běhu jednoho lěta produkować. Tak mjenowany dźeń přećeženja zemje organizacija Global Footprint Network lěto wob lěto znowa wuličuje. Wot jutřišeho su ludźo „na kredit“ žiwi, je-li tole w ekologiskim zmysle docyła móžno. Čłowjek wužiwa wjace kraja za skót a pastwy, wjace wodźiznow za rybarjenje a lěsy, hač ma poprawom k dispoziciji. Zdobom při tym wjace wuhlikoweho dioksyda nastawa.
To a tamne (28.07.26)
67, Crashout, Digga, Du bist gut genug, Gute Käse, Macker, Peak, Ragebait, Schere a Süper su lětuši kandidaća za „młodźinske słowo lěta“. Wot dźensnišeho hač do 20. awgusta smědźa młodostni mjez jědnaće a 20 lětami na webstronje nakładnistwa Langenscheidt wuzwolić, kotry z tychle namjetow je jim najlubši. Na zakładźe wothłosowanja wuzwoli nakładnistwo potom jónu wob lěto najpopularnišu flosklu.
Před mjedwjedźom, kotryž pječa po lěsach brodźi, běchu zarjady ludźi w Allgäuju warnowali. Nětko su eksperća zawostanki pozdatneho bara přepytowali a zwěsćili, zo bě to we woprawdźitosći šwinc, kiž bě swoje slědy zawostajił. Bayerski krajny zarjad za wobswět je swoje warnowanje tuž zaso cofnył. Sranty šwinca běchu 21. julija našli a do Senckenbergoweho instituta w Hessenskej pósłali.
To a tamne (27.07.26)
W sewjernej Pólskej, njedaloko města Toruń, we wsy Konotopie rosće jedna z najwjetšich sakralnych statuwow w Europje. Plastika Bolosćiweje Maćerje Božeje budźe hišće wyša hač znata Jězusowa statua pola města Świebodzin. Sama swjata Marija je 40 metrow wysoka, jeje stejadło potom hišće 55,6 metrow – tak budźe to najwjetša swjata Marka w Europje. Priwatny projekt wuškrěwanskeho miliardara Romana Karkosika a jeho mandźelskeje Grażyny twarja po jich słowach „jako podźakowanje“.
We Venedigu su testowu fazu zastupneho pjenjeza do města zakónčili. Dohromady su wot spočatka lěta wjace hač pjeć milionow eurow zasłužili. Město zdźěli, zo su sej wot dohromady 650 000 wopytowarjow za jedyn dźeń w měsće dźesać eurow žadali. Za tych, kiž su sej tiket zahe dosć knihowali, bě popłatk tuńši.
To a tamne (24.07.26)
Urin psow w gmejnje Chiasso w šwicarskim kantonje Tessin po cyłym měsće smjerdźi. Wot awgusta nimaja wobydlerjo jenož howna swojich štyrinohačow zrumować, ale tež wodu sobu nosyć, zo bychu z njej łuže urina wotstronili. W prěnich tydźenjach chce zarjad za porjad ludźi napominać, hdyž přikaz njedodźerža. Po tym hrozy jim pokuta 100 frankow (něhdźe 107 eurow).
Hnězdo aziskich šeršenjow ma so dźensa prěni raz w Braniborskej wotstronić. Nadawk maja fachowcy ze specialnym wuhotowanjom w Eisenhüttenstadće wukonjeć. Dotal njebě w Braniborskej žanoho dopokaza aziskich šeršenjow. Inwaziwna družina wohrožuje mnohotnosć zwěriny, předewšěm mjedowe pčołki.
To a tamne (23.07.26)
Wjelk je we wokrjesu Sprjewja-Nysa při wobchadnym njezbožu zahinył. Zwěrjo je wčera rano mjez Hochozu a Prjawozom (Fehrow) před awto běžał. Škoda zražki wučinja něhdźe 5 000 eurow. Šoferka njemóžeše ze swojim jězdźidłom dale jěć.
Zo bychu angažement hłowno- a čestnohamtskich čłonow wohnjoweje wobory, pomocnych organizacijow a Techniskeho pomocneho skutka, wojakow Zwjazkoweje wobory, rezerwistow a mocy policije a justicy hódnoćili, su CSU a Swobodni wolerjo w Bayerskej krajnemu sejmej chwatnu próstwu zapodali. Zaměr je, „Bayerski dźeń uniformy“ zawjesć. Tutón ma so jónu wob lěto na dobrowólnej bazy pod patronatom statneho knježerstwa a w dorěčenju ze zwjazkami dźěłodawarjow wotměwać.
