To a tamne (24.01.20)

Freitag, 24. Januar 2020 geschrieben von:

Wosebje swědomity hólčec je swoju mać w Rostocku porjadnje nastróžił. Kaž policija zdźěli, bě mać zastojnikow w 2.30 hodź. informowała, zo je 13lětny syn ze šulskej tobołu preč. Pachoł bě papjerku z informaciju zawostajił, zo je hižo po puću do šule. W Rostocku běchu wčera wot ranja w třoch warnowanske stawki připowědźene. Hólc so tuž boješe, zo dypkownje do něšto kilometrow zda­leneje šule njepřińdźe. Wokoło sedmich sekretarka wottam zdźěli, zo je hólc doběžał.

Dospołnje bjez muži wostanje lětuša jury­ wubědźowanja rjanolinkow „Miss Germany“ we wólnočasnym parku Rust, kaž organizatorojo zdźěleja. Woni wotpowěduja tak swojemu nowemu narokej: Hódnoćić nochcedźa jenož wonkowny wobraz kandidatkow, ale tež jich woso­binu, charakter a žiwjensku stawiznu. Dobyćerku wuzwola 15. februara.

To a tamne (23.01.20)

Donnerstag, 23. Januar 2020 geschrieben von:

Lěni listonoš je w Japanskej listy doma składował, město toho zo by je roznošował. To bě jemu „přewulka dračina“, kaž 61lětny policistam wuzna. Zastojnicy běchu na wšě 24 000 posyłkow w domje listonoša­ njedaloko Tokija namakali. Prawdźepodobnje bě muž hižo wjele lět tak dźěłał. Hakle při internej kontroli so to nětko wukopa. Zamołwići pósta posyłki přiwšěm hišće roznošuja a so pola škodowanych zamołwjeja.

Z wosebitym infomobilom chcedźa w zwjazkowej stolicy wopytowarjow sławneje East-Side-Gallery, dźěla bywšeje Berlinskeje murje, wo stawiznach objekta informować. Dotal poskićachu jenož wodźenja. Nětko móža so něhdźe štyri miliony wopytowarjow, kotřiž kóžde lěto podłu murje chodźa, lěpje wobhonić. Załožba Berlinskeje murje, kotraž je wot lěta 2018 za East-Side-Gallery a za kubłanske dźěło wokoło historiskeje městnosće zamołwita, infomobil wobhospodarja.

To a tamne (22.01.20)

Mittwoch, 22. Januar 2020 geschrieben von:

Swojorazny Porsche zbudźa w Mnichowje diskusije. Sportowy wóz wupada mjenujcy na prěni napohlad kaž policajske awto. Hakle při dokładnišim wobhladanju widźiš, zo njejedna so wo słužbne jězdźidło, ale je jenož napodobnjene. Na motorowej­ hawbje a na durjach steji na neonomódrym pozadku „Police“. Mnichowska policija z awtom žadyn problem­ nima, dołhož njejstej „Polizei“ a bayerski wopon na nim widźeć.

Awto z Habole wućahnyła je wohnjowa wobora w sewjerobraniborskim Mildenbergu. 45lětny šofer bě swój Pkw na parkowanišću při přistawje wotstajił, bjeztoho zo by ručne borzdźidło přićahnył. Awto­ jědźeše po skłoninje dele, zjědźe do rěki a so skónčnje podnuri. Wohnjowa wobora skaza nurjakow a kran. Po hodźinach móžachu Pkw z rěki wućahnyć. Cyłkowna škoda njeje hišće znata.

To a tamne (21.01.20)

Dienstag, 21. Januar 2020 geschrieben von:

Zasrěbnjenje šofera za wodźidłom transportera je w Porynsko-Pfalcy někotre nje­zboža zawinowało. Na kóncu běchu sydom awtow a wabjenska tafla wobdźělenych a škoda 100 000 eurow načinjena. 37lětny bě so při jězbje zasrěbnył a kontrolu nad wodźidłom zhubił. Transporter zrazy do wabjenskeje tafle, kotraž padny na dwě awće. Jězdźidło wlečeše taflu za sobu a wobškodźi dalše awta. Policija pyta nětko za swědkami njewšědneho njezboža.

Wopity šofer je w Lipsku z awtom na wobchadnej kupje do ample zrazył. Spyta drje ćeknyć, policisća pak jeho dosa­hnychu. Test dycha wunjese 1,3 promile alkohola. Při dokładnišim přepruwowanju personalijow zastojnicy zwěsćichu, zo běchu 49lětnemu wodźerjej awta hižo před dnjemi jězbnu dowolnosć sćazali, po tym zo běchu jeho pjaneho za wodźi­dłom lepili.

To a tamne (20.01.20)

Montag, 20. Januar 2020 geschrieben von:

Šěsć ponyjow nachwilnje zajała je policija we Werdauwje pola Zwickauwa. Zwěrjata běchu z pastwy ćeknyli a „zaměrnje do směra na policajsku stražu běželi“, kaž policija zdźěla. Jako běchu ponyje dwór rewěra docpěli, su zastojnicy jenož hišće wrota za nimi zawrěli. Konje wostachu w „aresće“, doniž wobsedźer njepřińdźe a je tam njewotewza.

Trjebany konopej je so pola noweho wobsedźerja w staće USA Michiganje jako přewšo drohotny wopokazał. Jako chcyše muž z dźowku chětro twjerde zawki wutřasć, namakaštaj wonaj w nich 43 000 dolarow (38 000 eurow). Wot wikowarja trjebanych meblow zhoništaj wonaj wo dotalnej wobsedźerce: Wnučka bě po smjerći swojeho dźěda stary konopej preč dała, bjeztoho zo by wo schowanych pjenjezach wědźała. Nowaj wobsedźerjej staj jej pjenjezy přewostajiłoj.

To a tamne (17.01.20)

Freitag, 17. Januar 2020 geschrieben von:

Z płatowymi měškami z Němskeje chcedźa w Awstralskej młodźatam pomhać, kotrež buchu při lěsnych wohenjach zranjene. Gertje Forlong zběra samošite měški, zo by je wuchowanskim stacijam za zwěrjata pósłała. 44lětna ma w Mühlheimje nad rěku Ruhr wobchod za płaty. Po jeje internetnej namołwje je so cyły rjad pomocnikow přizjewił a jej mjeztym wjace hač sto měškow pósłał.

Z twarožkom policajske awto wobškodźili su w Berlinje-Neuköllnje. Do toho běchu zastojnikow nócneje hary dla k bydlenju wołali. Po tym wuhladachu zastojnicy 20 centimetrow wulku wužłobinu na třěše awta a wotłamanu škričkowu antenu. Wjetši kruch twarožka ležeše pódla awta. Štó bě jón ze šesteho poschoda ćisnył, njemóžachu bohužel zwěsćić.

To a tamne (16.01.20)

Donnerstag, 16. Januar 2020 geschrieben von:

Za kompjuterom na čas zabył a k tomu hišće alarm zawinił je dźewjećlětny wopytowar­ wobchoda za elektroniku w Saarbrückenje. Hólc bě sej při kom­pjuteru hrajkał. Jako přistajeny po swjatoku swěcu hasny a alarmowy system zapiny,­ wudyri nadobo alarm. Hakle nětko­ jemu napadny, zo je hišće něchtó we wobchodźe.

Nuznik za psy maja wot najnowšeho na Helsinkskim lětanišću. Wobhospodarjer lětanišća Finavia je dwaj tajkej zarjadował. Tak reaguja na naprašowanja mnohich pasažěrow, hdźe móhli psy swoju nuzu wotbyć. „Wobłuki, w kotrychž móža štyrinohače na nuznik hić, su na sewjero­europskich lětanišćach hišće jara rědke“, rěčnica zdźěli. Přiwšěm njeje myslička cyle­ nowa: W Americe su tajke městnosće samo předpisane, zo móhli serwisowe psy pasažěrow, na přikład tajke, kotrež slepych přewodźeja, na nuznik hić.

To a tamne (15.01.20)

Mittwoch, 15. Januar 2020 geschrieben von:

Prědowanje do fitnesoweho studija wusyłała je cyrkwinska wosada mylnje něšto­ dnjow w sewjerorynsko-westfalskim Solingenje. Mikrofonaj duchowneho a sportoweho trenarja w susodnym studiju běštej na samsnu frekwencu nastajenej. Ludźo w studiju so tuž njemało dźiwachu, jako słyšachu přez wótřerěčaki dźěle prědowanja. Wosada je problem mjeztym rozrisała a frekwencu změniła.

120 kilometrow před policiju ćěkał je w Bayerskej 60lětny smalak z Berlina. Policisća chcychu jeho awto na awtodróze A 92 pola Mnichowskeho lětanišća kontrolować. Muž pak spyta ćeknyć. Při tym jědźeše zdźěla do wopačneho směra – a to ze 180 km/h. Pola Wörtha zrazy do policajskeho awta. Wón njeměješe žanu jězbnu dowolnosć, a awto njebě zawěsćene. Nimo toho předležeše wukaz zajeća přećiwo mužej.

To a tamne (14.01.20)

Dienstag, 14. Januar 2020 geschrieben von:

Lětadło-knihownja steji wot najnowšeho w sobu najstrašnišej štwórći stolicy Mexika-města. Tamniše zarjadnistwo bě 20 lět staru wusłuženu Boeing 737 kupiło a přetwarić dało. Hłowny zaměr je, ludźom a wosebje dźěćom knihi a elektroniske medije zbližić a tak kriminalitu pomjeńšić. W lětadle maja nimo knihow tež e-booki, słuchoknihi a kompjutery. Internet na naměsće, hdźež Boeing 737 steji, móža darmotnje wužiwać.

29 lět bjez jězbneje dowolnosće z awtom jězdźił je muž w Radebergu. Wukopało je so to nětko po wobchadnym nje­zbožu. Přewulkeje spěšnosće dla bě muž z awtom z dróhi zajěł, do štoma prasnył a so snadnje zranił. Jězbnu dowolnosć wšak policistam pokazać njemóžeše, tu běchu jemu hižo 1991 jězdźenja pod wliwom alkohola dla wotewzali. Wo nowu so wón ženje prócował njebě.

To a tamne (13.01.20)

Montag, 13. Januar 2020 geschrieben von:

Na awtodróze pěši po puću był je 27lětny w Bayerskej, z čimž zawini zasadźenje policije. Jako jeho wobsadka policajskeho awta njedaloko Mnichowa wuhlada a zadźerža, muž zastojnikam rozłoži, zo chce do swojeje pólskeje domizny běžeć. Po informacijach policije bě wón chětro wopity. Policisća wzachu jeho sobu hač k přichodnemu wotpočnišću, hdźež tež jeho awto steješe. Přewodnik Polaka tam hižo na njeho čakaše­.

Ćeknjena kokoš je so w sewjerobraniborskim Reckezinje njedaloko Perleberga wo skóržbu postarała. 66lětnemu plahowarjej kokošow běchu wjacore twochnyli. Jako muž na ležownosći susodki jednu z nich popadny, njeměješe 52lětna žona žane zrozumjenje za to a je muža ranjenja domjaceho měra dla wobskoržiła. „Tajki pad dotal hišće njemějachmy“, w policajskej rozprawje rěka.

Anzeige