To a tamne (13.05.26)
Mäc Geiz – wobchod za tunje produkty – je tutón tydźeń próstwu wo insolwencu zapodał. Předań w dohromady 180 filialach pak ma tuchwilu pokročować, zdźěla zamołwići na internetnej stronje předewzaća, kotrež ma w Saksko-Anhaltskim Landsbergu swoje sydło a w kotrymž něhdźe 1 200 ludźi dźěła. Jako přičinu za rozsud mjenuja zasadnu zdźeržliwosć kupcow w časach hospodarskeje njewěstosće.
Howjada z pastwy pokradnyli su paduši w Braniborskej – a to hižo trěći raz w běhu minjenych tydźenjow. Njeskutk sta so tónraz we wjesce Grano we wokrjesu Sprjewja-Nysa. Potrjecheny plahowar zhubi 31 howjadow. W zdźělence powěsćernje dpa zwurazni prezident Krajneho burskeho zwjazka Henrik Wendorff, zo ma za prawdźepodobne, zo skućićeljo zwěrjata do wukraja wjezu a je tam zarězaja.
To a tamne (12.05.26)
Tójšto drohoćinkow je dźěćo pěstowarskeje skupiny na hrajkanišću w Berlinje našło. W pěskowym kašćiku w měšćanskim dźělu Wilmersdorf wuhrjeba wone slěbornaki, złoćane debjenki, kruch złota, luksusowe časniki a 6 000 eurow hotowych pjenjez, zdźěli policija w socialnych medijach. Kriminalna policija nětko přepytuje, hač su namakane wěcy dźěl rubjenstwa.
Před zawrjenymi durjemi hłowneho twarjenja stejachu póndźelu studenća Berlinskeje Techniskeje Uniwersity. Wjednistwo uniwersity běše je kónc tydźenja po přepruwowanskim terminje techniskich njedostatkow dla njejapcy zawrěć dyrbjała. Hižo dawno běše po dešćach z wjercha twarjenja woda kapała. Jako „srjedźnu katastrofu“ wopisa situaciju Berlinska senatorka za wědomosć Ina Czyborra (SPD).
To a tamne (11.05.26)
48 pokradnjenych howjadow je bur z Raduša pjatk policiji přizjewił. Cyłkowna škoda wučinja něhdźe 75 000 eurow. Kriminalna policija pad padustwa dla přepytuje. Wona zdźěli, zo dotal žanych dopokazow za to njeje, zo bě skót z pastwy twochnył. Tole njeje lětsa prěni pad rubjenstwa howjadow z pastwy w Braniborskej. W aprylu běchu burej we wokrjesu Łobjo-Halštrow 70 skoćatow pokradnyli.
Dokelž swój njeskutk rubjenstwa jako livestream na platformje TikTok wozjewištaj, poradźi so policiji w Stuttgarće, porik paduchow spěšnje zajeć. Wjacori swědkojo běchu zastojnikow pjatk wječor telefonisce na to skedźbnili, zo wobkedźbuja skućićelow online při rubjenju e-bika. Policija spěšnje zapřimny, tak zo muži w starobje 23 a 36 lět bórze po tym zaja.
To a tamne (08.05.26)
Swój bydlenski dom smě spěwarka Melanie Müller nadal wobsedźeć. Wčera chcychu domske na nanućenym přesadźowanju předać. Za něhdyše dwórnišćo w měšćanskim dźělu Wahren pak njejsu ani jenički poskitk dóstali. Jednanje tuž nachwilnje zastaja, rozsudźi hamtske sudnistwo. Domske z 1 572 kwadratnych metrow wulkej ležownosću je něhdźe 800 000 eurow hódne.
Najwjetši hóčkowany mamut swěta su po wjacorych měsacach dźěła nětko w muzeju w Essenje zjawnosći předstajili. Mamut wobsteji z dohromady 1600 małych hóčkowanych kwadratow, za kotrež běchu 25 000 metrow wołmy předźěłali. Na projekće bě mnoho ludźi sobu skutkowało. Prehistoriski cycak je 2,66 metrow wysoki, 4,20 metrow dołhi a 1,37 metrow šěroki. Z tym je samo wjetši, hač bě planowane.
To a tamne (07.05.26)
Ćah hercow z Oberlichtenauwa zapiska bórze před kralowskim publikumom. Wot 13. meje přebywaja hudźbnicy w Norwegskej a hudźa tam zhromadnje z tamnišim kralowskim hercowskim ćahom. 17. meje, na narodnym swjatku Norwegskeje, zapiskaja na nadróžnej paradźe, kotruž sej tradicionalnje tež kral Harald V. wobhlada.
50 000 US-dolarow poskićujetej ameriski sćelak Fox a job-portal Indeed fanej, kiž je zwólniwy, sej wšě 104 hry lětušeho swětoweho mišterstwa kopańcy wobhladać. Dźěłać ma entuziast kopańcy na Times Square w New Yorku. Nimo toho, zo ma sej wšě hry wobhladać, słuša do nadawkow fana tež, wobsahi za socialne syće produkować. Wosebje wužadace je dźěło potom, hdyž so dwě hrě paralelnje wotměwatej, štož pak so hakle na kóncu mišterstwa stanje.
To a tamne (06.05.26)
Ze šansonom „La Bohème“ Charlesa Aznavoura staj francoski prezident Emmanuel Macron spěwajo a armeniski premierminister Nikol Pašinjan za bijadłom hosći statneho banketa w Jerjewanje překwapiłoj. Něšto pozdźišo so jimaj na křidle hrajo armeniski prezident Wahagn Chačaturjan přidruži. Na bankeće wobdźělichu so zastupjerjo 40 europskich statow.
W dešćowej role tčaceje kóčki dla bě wobydler póndźelu wohnjowych wobornikow w Neustadće pola Coburga na pomoc wołał. Na kreatiwne wašnje woni swój słužbny nadawk wuspěšnje spjelnichu. Dokelž běše roła do murje zatwarjena, kotruž zastojnicy njetrjebawšo rozbić nochcychu, pomhachu sej z wosebitym srěbakom. Zatłusnjene zwěrjatko su na kóncu wuspěšnje wuchowali, to pak njebě kóčka, ale kuna.
To a tamne (05.05.26)
Pod hashtagom „Wopušćimy X“ su frakcije a strony SPD, Zwjazka 90/Zelenych a Lěwicy zwjazkoweho sejma internetnu platformu za krótkopowěsće X Elona Muska demonstratiwnje wopušćili. „Mjezsobna wuměna je zakład politiskeje debaty. Platforma X pak přisporja dale a bóle jenož desinformaciju“, rěka w zdźělence zastupjerjow stronow. Na druhich platformach socialnych medijow pak wostanu strony nadal prezentne, woni wuzběhnychu.
Hačrunjež płaćizny kakawa hižo wjacore měsacy spadowali, njejsu wulke zežiwidłowe koncerny swoje płaćizny za wudźěłki ze šokolady znižili. To praji nawoda drobnowikowanskeho koncerna REWE Lionel Souque w rozmołwje z magacinom „Der Spiegel“. Jako špatny přikład mjenuje w tutym zwisku konkretnje marki Milka, Lindt a Mondelēz.
To a tamne (04.05.26)
39lětneho podhladneho je awstriska policija wčera w zwisku ze zajědojćenymi škleńčkami jědźe za ćěšenki firmy Hipp w awstriskim zwjazkowym kraju Salzburg zajała. Tuchwilu jeho hišće přesłyšuja. W běhu dnja chcedźa muža do jastwa Eisenstadt na wuchodźe Awstriskeje dowjezć. Za dalšej zajědojćenej škleńčku policija nadal slědźi. Hač je skućićel w padźe wudrěwanja sam jednał abo hač měješe pomocnikow, tuchwilu jasne njeje.
Za něhdźe 56 miliardow dolarow chce předewzaće Gamestop, kiž je so na widejowe hry specializowało, eBay přewzać. Gamestop hižo něhdźe pjeć procentow akcijow eBay wobsedźi. Šef předewzaća Ryan Cohen zdźěli, zo chce wón eBay – najwjetše online-wikowanišćo swěta za trjebane twory – ke chutnišemu konkurentej předewzaća Amazon přetwarić.
To a tamne (30.04.26)
Jehnjatko Henry je najmłódši sobudźěłaćer gmejnskeho zarjada w Čornym lěsu. Šefina radnicy gmejny Enzklösterle Sabine Zenker so wšědnje wo nje stara. Jako dźak ju jehnjo na wšěch jeje terminach přewodźa. Dokelž młodźo hižo mać nima, jemu nětko wjesnjanostka kóždu druhu hodźinu mloko dawa. Mało spara wona za swojeho „synka“ rady akceptuje.
Na awtodróze A 4 w směrje na Drježdźany je wčera popołdnju jězdźidło wójska USA z awtokranom hromadu zrazyło. Kak je k njezbožu blisko přijězda Frankenberg dóšło, policija hišće njewě. Wona pak pad nětko přepytuje. Šofer jězdźidła so lochce zrani. Awtodróha bě w směrje na Drježdźany wjacore hodźiny zašlahana. Škodu trochuja eksperća na něhdźe 50 000 eurow. Nawječor bě jězdnja zaso swobodna.
To a tamne (29.04.26)
Dokelž je sej priwatnje z wojerskim helikopterom wójska USA wulećał, dyrbi sej zakitowanski minister Pete Hegseth tójšto kritiki lubić dać. Hegseth bě so „z přećelom“ a někotrymi pilotami wójska USA zetkał. Hłowny hósć bě hudźbnik Kid Rock, „patriot a podpěraćel našich wojakow“, Hegseth internetnje piše. Kaliforniski guwerner Gavin Newsom nima za to zrozumjenje: Čehodla dyrbja dawkipłaćerjo wulět Kida Rocka „w sto milionow dolarow drohim helikopteru“ financować?
Dźesać dulow złota chce gmejna Bannewitz pola Drježdźan towarstwam a iniciatiwam rozdźělić. Kaž komuna ze 11 000 wobydlerjemi zdźěla, ma 30 towarstwow ze sensacionalneje namakanki lěpšiny měć. Mjez nimi su wohnjowa wobora, póstniske, hudźbne a rejwanske towarstwa. Gmejnscy dźěłaćerjo běchu złoto w oktobru našli, jako trawu syčechu.
