Smječkecy (SN/StŠ). „Z wulkim swjedźenjom za wšitkich chcemy jubilej 125 lět cyrkej w Smječkecach wot dźensnišeho hač do njedźele woswjećić. Za małych a wulkich, starych a młodych hosći smy mnoho spřihotowali. Tuž přińdźće rady a swjećće z nami“, praji z posměwkom mjezwoči, ale zdobom napjata Elisabeth Bauer. Zhromadnje z Bettinu Scholze z Pančic-Kukowa ma wona wotežki kónca tydźenja w rukach. „Na jubilej smy mjenje abo bóle připadnje storčili. Mój syn Matthias je w rozmołwje narěznył, zo wobsteji naša cyrkej lětsa 125 lět. To smy so tróšku stróžili, ale potom hnydom do planowanja dali“, tak Elisabeth Bauer.

Hakle spočatk zašłeho lětstotka, jako so Smječkečanske hojenske kupjele k woblubowanym­ kupanišćam wuwichu a lěto a wjace hosći do wsy přiwa­bichu, rosćeše potrjeba, wobydlerjow a hosći tež dušepastyrsce zastarać. Drježdźanski architekt Woldemar Kandler dósta tehdy nadawk, w Smječkecach cyrkej natwarić. 28. meje lěta 1901 – swjatki póndźelu – su nowotwar na hórce Winicy swjatočnje poswjećili.