Serbskosć wažny wobstatk přichoda

Mittwoch, 12. Mai 2021 geschrieben von:

Serbskosć a šansy Łužicy nastupajo strukturnu změnu stejachu w srjedźišću rozmołwy społnomócnjeneho zwjazkoweho knježerstwa za wuchodnu Němsku Marca Wanderwitza (CDU) ze zastupnikami Serbow a Domowiny.

Budyšin (SN/JaW). Połdra hodźiny traješe dźěłowa rozmołwa z Marcom Wanderwitzom wčera w Budyskim Serbskim domje. Na wuradźowanju pod hesłom „Dwurěčna Łužica – regionalna jónkrótnosć; změna strukturow jako wužadanje a šansa; wuznam serbšćiny w hospodarstwje a na dźěle“ wobdźělichu so nimo předsydy Domowiny Dawida Statnika zapósłanc Sakskeho krajneho sejma Marko Šiman, prezident sakskeho třěšneho zwjazka rjemjeslnikow Roland ­Ermer, čłonka Zwjazkoweho předsydstwa Domowiny Marja Michałkowa, prěni přirjadnik Budyskeho krajneho rady Udo Wićaz (wšitcy CDU), direktor Załožby za serbski lud Jan Budar a referent ­Domowiny za hospodarske a infrastrukturne naležnosće Pětr Brězan.

Njeje so bojał za sprawnosć wustupować

Mittwoch, 12. Mai 2021 geschrieben von:

Horliwy Serb, wuběrny prědar a wobrotniwy organizator, farar Clemens Hrjehor, na prawdu Božu wotešoł

Zrudźaca powěsć rozšěrja so po Łužicy, haj po cyłym Drježdźansko-Mišnjanskim biskopstwje, zo je minjenu njedźelu nawječor w Kamjenskej chorowni serbski měšnik Clemens Hrjehor w starobje 68 lět zemrěł. Horliwy Serb a dušepastyr z přeswědčenja, wuběrny prědar, wučer wšěch generacijow a wobrotniwy organizator njeje hižo mjez nami.

Ze 14 lětami so rozsudźił

Rodźeny we Worklecach přežiwi wón prěnje lěta žiwjenja we Wudworju. Za čas jeho zažneho dźěćatstwa přećahny swójba do Budyšina, hdźež je wotrostł. Wot časa dźěćatstwa běše njechabłaca kruta wěra do Boha jeho wobstajne kredo.

Wo SLA wurjadnje wuradźuja

Dienstag, 11. Mai 2021 geschrieben von:

Budyšin (SN/JaW). Załožbowa komisija je na swojim wuradźowanju 6. meje planowane rozjimanje přichoda a naležnosćow Serbskeho ludoweho ansambla (SLA) z dnjoweho porjada přichodneje załožboweje rady 20. meje šmórnyła. Wo tym, informowaše čłon rady Bjarnat Cyž Zwjazkowe předsydstwo Domowiny minjeny pjatk. Jako přičinu mjenowaše wón wobstejnosće w SLA, „kiž su z wotchadom Judith Kubicec nastali a kotrež towaršnika SLA, Załožbu za serbski lud, zaběraja a tuž tež załožbowu radu. Wšako dźe wo rozsudy nastupajo personalije a přichod institucije.“

Nowej městnje za Domowinu

Montag, 10. Mai 2021 geschrieben von:

Budyšin (SN/JaW). Katrin Suchec-Dźisławkowa je nowa referentka za nalež­nosće kubłanja a spěchowanja dorosta Domowiny. To su čłonojo Zwjazkoweho předsydstwa Domowiny minjeny pjatk w Budyšinje a online na swojim poslednim posedźenju do nowowólbow gre­mi­ja 12. junija w njezjawnym dźělu rozsudźili. Wo tym informuje nowinski rěčnik Marcel Brauman w zdźělence.

Jubilej njewupadnył

Montag, 10. Mai 2021 geschrieben von:
Kajke běchu to rjane swjedźenje, kotrež su so minjene lěta w Kukowje při tamnišim pomniku wotměli. Syły ludźi su tam kóžde lěto spočatk meje ze wšěch kónčin přichadźeli a rjanu serbsku zabawu při mejemjetanju dožiwili. Za mnje najzajimawše stajnje bě, holcy a hólcy z wjesołymi wobličemi na swjedźenišćo kročachu a tam swoje reje zanjesechu. Wječorna zabawa wšak bě runjewon legendarna, runje tak kaž njedźelne rańše piwko z lóštnymi štučkami muzikantow a ze słódnym wobjedom. Zo to runje lětsa k 30. jubilejej tak móžno njebě, je wězo škoda. Ćim wjetši kompliment słuša młodźinskemu towarstwu Pančicy-Kukow, zo su na hinaše wašnje na róčnicu spominali a mejski nyšpor­ wuhotowali. Wulka ličba wjesnjanow drje je so při tym podobnje na spo­dobne swjedźenje zašłych lět dopominała kaž ja. A z wotpowědnymi formulacijemi je na kóncu přiwšěm hišće trochu mejemjetanskeje hudźby zaklinčało. Tak jubilej tola wupadnył njeje. Marian Wjeńka

Jubilej trochu hinak zmóžnili

Montag, 10. Mai 2021 geschrieben von:

Pančicy-Kukow (SN/MWj). Nic k mejemjetanju jako wulkemu wjesnemu swje­dźe­njej, ale k nyšporej takrjec jako narunanje koronoweje pandemije dla zhromadźi so sobotu popołdnju tójšto wobydlerjow při Kukowskim pomniku za padłych swětoweju wójnow. Hudźbnje a słownje wuhotowałoj stej jón młodostni Šołćic a Šnajdrec swójby hromadźe z fararjom Tomaszom Dawidowskim. Na te wašnje spominachu na 30lětnu tradiciju mejemjetanja na tymle městnje. Do swojich modlitwow zapřijachu tohorunja wopory pandemije, ale runje tak dźakownosć za rjanu tradiciju mejemjetanja.

Rozsudźa w juniju

Donnerstag, 06. Mai 2021 geschrieben von:

Budyšin (SN/JaW). Hač wotměje so lětsa alternatiwny swjedźeń k narunanju korony dla wotprajeneho Mjezynarodneho folklorneho festiwala „Łužica“, chce Domowina kónc junija rozsudźić. To zdźěli wčera nowinski rěčnik Marcel Brauman po wuradźowanju jeje wjednistwa z regionalnymi rěčnicami a referentami Domowiny. Jako přičinu podawa třěšny zwjazk tuchwilne połoženje koronapandemije dla. Njewěstosć, što budźe scyła móžno, nuzuje Domowinu hakle planować, „hdyž budźe jasne, kotre postajenja płaća“. Referent za hospodarske a infrastrukturne naležnosće Pětr Brězan skedźbni na to, „zo měli kulturne ćělesa ze wšěch regionow Łužicy zapřijeć. Při­wšěm so swjedźeń jenož wotměje, njebudźe-li hižo wobmjezowanjow kaž wotstawk, nahubnik a zakaz alkohola“, rěka w nowinskej zdźělence Domowiny.

Bjarnatej Cyžej gratulowali

Dienstag, 04. Mai 2021 geschrieben von:
Bywši jednaćel Domowiny Bjarnat Cyž swjeći dźensa doma w Nowej Jaseńcy sydomdźesaćiny. Pod wuměnjenjemi koronapandemije móžeše wón mnohich gratulantow witać­. Mjez nimi běchu regionalna rěčnica Domowiny za teritorij Budyskeje župy­ „Jan Arnošt Smoler“ Katja Liznarjec a zastupjer župneho předsydstwa Jurij Łušćan­ski (na foće) kaž tež naslědnik w zastojnstwje jednaćela Marko Kowar, Zala Cyžowa a Katharina Jurkowa z Kamjenskeje župy „Michał Hórnik“. Jubilar je dale kruće w serbskim žiwjenju zakótwjeny. Foto: Feliks Haza

Ze žonjacej mocu do wuspěšneho přichoda

Donnerstag, 29. April 2021 geschrieben von:

Jědnaće žonow a jedyn muž tworja nowe předsydstwo župy „Michał Hórnik“ Kamjenc

„Kamjenska župa so wobstajnje dale wo­młodźa. A to je derje tak.“ Tole zwěsći Měrko Šmit na hłownej a wólbnej zhromadźiznje župy minjeny pjatk w Chróšćanskej „Jednoće“, hdźež je jako nawoda zhromadźizny delegatow wo přiwzaću dweju młodźinskeju klubow wothłosować dał.

Jednohłósnje su delegaća młodźinskej klubaj Konjecy-Šunow a Pančicy-Kukow jako pjaty a šesty do župy přiwzali. „Smy loni wo přistup k Domowinje prosyli, dokelž smy serbski klub a hajimy serbske nałožki a tradicije. Nimo toho mamy wjacore swójske zarjadowanja w běhu lěta, kaž na přikład swjedźeń němsko-serbskeho přećelstwa DSF-party. Tak dopo­kazujemy, zo móža němscy a serbscy młodostni wuběrnje mjez sobu wuńć“, wujasni zastupnik Konječansko-Šunowskeho kluba Chrystof Hrjehor. Za Pančičansko-Kukowski klub rozłoži Richard Hawš, zo su jón před lětomaj załožili, zo bychu „sylnišu zhromadnosć hajili a čłonow hromadu wjedli. Tak pokazujemy, zo móžemy zhromadnje něšto zahibać.“

Padłych wojakow wopominali

Mittwoch, 28. April 2021 geschrieben von:
Kóžde lěto 28. apryla wopominaja zastupnicy Domowinskeje župy „Michał Hórnik“ Kamjenc zhromadnje z pólskimi přećelemi ze Żar při pomniku na Chróšćanskej Fulkec hórce pólskich wojakow, kotřiž běchu kónc Druheje swětoweje wójny we wokolinje při ćežkich wojowanjach padnyli. Koronapandemije dla njemóžachu so pólscy přećeljo kaž hižo loni na dźensnišim zarjadowanju wobdźělić. Tak spominaše ­připołdnju horstka Domowinjanow na rjekow, mjez druhim předsyda Domowiny Dawid Statnik, nowa a bywša županka Kamjenskeje župy Diana Wowčerjowa a Zala Cyžowa kaž tež Chróšćanski wjesnjanosta Marko Kliman (CDU) a čłonka župneho předsydstwa Katharina Jurkowa (wotlěwa). Foto: Feliks Haza

Anzeige