Přewjedu dźěłarničku molerjow

Freitag, 24. Mai 2019 geschrieben von:

Njechorń (SN/MiR). Dom Měrćina Nowaka-Njechorńskeho ze žiwjenjom pjelnić je a wobstajny zaměr Domowiny. Wšako je wuměłc po smjerći wšo swoje namrěwstwo narodnej organizaciji Serbow přewostajił. W jeho domskim přebywaja rady skupiny dźěći a młodostnych, kotřiž dožiwja tam dźeń połny zajimawosćow. Spěchowanski kruh za serbsku ludowu kulturu chce tam wot 14. do 16. junija molersku dźěłarničku přewjesć, kotruž Maja Nagelowa nawjeduje. Maksimalnje dwanaće zajimcow móže so wobdźělić. Narěčani čuć měli so wšitcy, kiž hižo dlěje moluja, ale tež ći, kotřiž chcedźa so w tym wuměłstwje wuspytać. Kaž projektowa managerka Domowiny Sonja Hrjehorjowa zdźěla, wjeseli so spěchowanski kruh na mnohich zajimcow a so nadźija, „zo duch Měrćina Nowaka wšěch wobkuzła. Zawěsće dožiwja wobdźělnicy zhromadnje kreatiwne dny w duchu Njechorńskeho.“

Namjety za serbsku radu zapodać

Freitag, 24. Mai 2019 geschrieben von:

Budyšin (SN/JaW). Zwjazkowe předsydstwo Domowiny namołwja župy, čłonske towarstwa a zwjazki Domowiny kaž tež dalše serbske towarstwa a zwjazki w Sakskej, zapodać třěšnemu zwjazkej namjety za nominowanje štyrjoch kandidatow za lětuše wólby Rady za serbske naležnosće Swobodneho stata Sakskeje za dobu wot lěta 2019 do 2024. Zwjazkowe předsydstwo je zdobom wobzamknyło, zo maja wšitke namjety a trěbne podłožki za kandidaturu hač do 15. awgusta zarjadej Domowiny předležeć, kaž z nowinskeje zdźělenki třěšneho zwjazka wuchadźa. Dale dósta prezidij nadawk trěbne kroki za nominaciju kandidatow koordinować. Zwjazkowe předsydstwo planuje wo kandidatach za wólby serbskeje rady w septembru rozsudźić. Posrědkować ma namjety Sakskemu krajnemu sejmej, kotryž chce w nowembrje radu štyrjoch zastupnikow na namjet Domowiny a jednoho ze stron komunow w krajnym sejmje wolić­.

Na slědach Drjewjanow

Donnerstag, 23. Mai 2019 geschrieben von:

Kubłanska wuprawa SŠT lětsa do Hannoverskeho Wendlanda wjedła

Ze stawizniskeje wučby wěmy, zo su so w 6./7. lětstotku słowjanske kmjeny w krajinje mjez Wódru/Nysu a Łobjom/Solawu zasydlili. W běhu lětstotkow su so tute połobsko-słowjanske kmjeny přez wójny, namóc, zakazy rěče a přirodnu asimilaciju deciměrowali resp. přeněmčili. Zwostali smy my Serbja w Hornjej a Delnjej Łužicy.

W krajinje, kotraž so Wendland mjenuje, bydlachu hač do 17./18. lětstotka Drjewjenjo (Słowjenjo). Zo bychmy so ze stawiznami tohole połobsko-słowjanskeho kmjena, jeho rěču, kulturu, architekturu a žiwjenskim wašnjom bliže zeznajomili, smy so my seniorojo Serbskeho šulskeho towarstwa lětsa w krasnej meji na swoju wjace­dnjowsku kubłansku jězbu do Wendlanda nastajili. Stawiznar Werner Měškank z Choćebuza njeje přihotowanski wuběrk při planowanju a organizowanju wuprawy jenož poradźował a podpěrał, ale je so z nami sobu na jězbu do Wendlanda podał.

1. dźeń

Gremij a bazu wědomje zbližić

Dienstag, 21. Mai 2019 geschrieben von:

Zwjazkowe předsydstwo Domowiny a čłonojo Domowiny na bazy měli lěpje do rozmołwy přińć. Wo tym a dalšich temach je zwjazkowe předsydstwo minjeny­ pjatk debatowało.

Wochozy (SN/JaW). Zwjazkowe předsydstwo Domowiny je na posedźenju minjeny pjatk we Wochozach na wotbagrowane łužiske wsy spominało. „Kónc wotbagrowanja wsow je wotwidźeć. Tak spjelnjamy žadanje našeho programa ‚Domowina 2025‘ wo dołhodobny a rjadowany wustup z wudobywanja a zmilinjenja brunicy“, rjekny předsyda Domowiny Dawid Statnik, kaž z nowinskeje zdźělenki třěšneho zwjazka wuchadźa. Samsnym słowam kaž loni na wopominanskim dnju na Rownjanskim Njepilic statoku Statnik doda, zo je Miłoraz „poslednja wjes w Sakskej, kotraž ma so brunicy dla přesydlić“. Jasne słowa nańdźe gremij nastupajo Prožym. Hišće njeje jasne, što ze wsy sewjernje Blunja budźe. Pjatk wuprajichu so přitomni tuž „za bórzomne wujasnjenje, kajke su plany předewzaća Łužiska energija a hórnistwo AG, zo njebychu potrjecheni wobydlerjo žiwi dale w njewěstosći wo swójskim přichodźe byli“, rěka w zdźělence.

Wušiknosć layouterki a redaktorow wobdźiwali

Dienstag, 21. Mai 2019 geschrieben von:

Kruty termin w dźěłowym planje Budyskeje župy „Jan Arnošt Smoler“ je wuprawa ze šulerjemi 4. lětnika , kotřiž na šulach­ w Barće, Bošecach, Bukecach a Rakecach serbšćinu wuknu. Jich lětuši cil bě Budyšin.

Budyšin (SN/at). 40 šulerjow je dźensa do redakcije Serbskich Nowin přišło, zo bychu wo dźěle serbskich nowinarjow zhonili. Wulke wjeselo mějachu Bartske dźěći na staciji fotografija, wšako su so někotre z nich na wobrazach z njedźelneho mejemjetanja we wsy spóznali. Stajachu pak zdobom někotre praktiske prašenja: Čehodla je wulka wobrazowka za wobdźěłanje fotow ze sćinidłom wuhotowana? Fotowy redaktor na to jenož njewotmołwi, ale je runje tak demonstrował, što wšo kompjuterowy program zmóžnja. Bošečanscy šulerjo wobdźiwachu wušiknosć layouterki, hdyž, bjez­toho zo na tastaturu hlada, teksty pisa. A dyrbješe to hnydom hišće raz pokazać. Wšitcy su na tej staciji sćěhować móhli, kak so najprjedy strona, na to cyła nowina z tekstami a fotami pjelni.

Nowe mjeno za serbsku wubranku

Montag, 20. Mai 2019 geschrieben von:

Nastupajo přibliženje třěšneho zwjazka serbskich towarstwow Domowiny a Serbskeho sejma započina so něšto hibać.

Wochozy (SN/JaW). Čłonojo Zwjazkoweho předsydstwa Domowiny su na wuradźowanju minjeny pjatk we wopytowarskim centrumje Wochožanskeho parka błudźenkow wobzamknyli, „zastupjerjow na dźěłowu rozmołwu přeprosyć. Rozmołwa ma słužić mjezsobnej wuměnje pozicijow.“ To zdźěli nowinska rěčnica Domowiny Borbora Felberowa po wuradźowanju. Gremij sćěhowaše namjet předsydy Domowiny Dawida Statnika, kiž tak swoje přilubjenje spjelni ze sejmarjemi rěčeć chcyć, kotrež bě na hłownej zhromadźiznje třěšneho zwjazka 30. měrca w Chrósćicach dał.

Z pjenjezami njemóžeš wšitko rjadować

Donnerstag, 16. Mai 2019 geschrieben von:

Choćebuz (SN/JaW). Njerunowaha mjez Hornjej a Delnjej Łužicu běše jedne z ćežišćow wčerawšeho 77. serbskeho blida w Choćebuzu. K zazběhej poda dr. Pětš Šurman w krótkim přednošku stawizniske wuwiće poćahow Hornich a Delnich Serbow. Mjez hosćimi rozmołwy běštaj tohorunja předsyda a jednaćel Domowiny Dawid Statnik a Marko Kowar.

Serbske motiwy zwobraznili

Mittwoch, 15. Mai 2019 geschrieben von:
Wotpohlad dźěłarnički za keramiku zańdźenu sobotu běše serbske motiwy zwobraznić. Na přeprošenje Spěchowanskeho kruha za serbsku ludowu kulturu zetka so tuž šěsć ludowych wuměłcow w muzeju něhdyšeje Margarećineje hěty we Wulkej Dubrawje k wuměłskemu tworjenju. Tam nasta pod nawodom Heleny Palmanoweje cyły rjad zajimawych eksponatow. Po zakónčenju poskitka hódnoćachu wobdźěl­nicy dźěłarničku jako jara płódnu a wuspěšnu. Nadźěłane eksponaty nětko pod wobkedźbowanjom fachowcow muzeja schnyja. Potom budu glazěrowane a palene. Pozdźišo chcedźa je wustajić. Foto: Helena Palmanowa

Přeprošuja zaso do Njechornja

Freitag, 10. Mai 2019 geschrieben von:

Budyšin (kl/SN). Předsydstwo župy „Jan Arnošt Smoler“ je na swojim wčerawšim posedźenju wo namjetach za lětuše Myto­ Domowiny a za čestne znamješko rěčało. Zdobom wšitke Domowinske sku­piny a towarstwa w župje namołwja, podać swoje namjety za wosoby, kotrež so nadměru za serbske narodne žiwjenje angažuja.

22. junija zarjaduje župne předsydstwo znowa dźeń wotewrjenych duri w Domje Měrćina Nowaka w Njechornju. Wopytowarjo změja składnosć, sej domicil wuznamneho serbskeho wuměłca wobhladać a po šćežkach Měrćina Nowaka wokoło jeho ródneje wsy pućować. Wšitcy čłonojo župneho předsydstwa k poradźenju dnja aktiwnje přinošuja. Domowinska skupina postara so wo kofej a tykanc. Z dnjom wotewrjenych duri ma so dom zjawnosći bóle spřistupnić.

Na Jana Pawoła Nagela spominali

Donnerstag, 09. Mai 2019 geschrieben von:
Wčera by serbski komponist Jan Pawoł Nagel 85. narodniny swjećił. Składnostnje toho počesćichu jeho čłonojo spěchowanskeho towarstwa Zetkanišćo Dom Zejlerja a Smolerja při rowje. Nagel (1934–1997) bě iniciator a wot lěta 1994 hač do swojeje smjerće prěni předsyda spěchowanskeho towarstwa. Załoženje Łazowskeho Domu Zejlerja a Smolerja je sobu jeho wulka zasłužba. Dalša bě wutworjenje Załožby za serbski lud, jako bě předsyda Domowiny. Zdobom bě wón jedyn z najpłódnišich komponistow swojeho časa. Nagelowe 400 twórbow wopřijima sinfonije, komornu hudźbu, pišćelowe kompozicije, wokalnu hudźbu a reje. Foto: Andreas Kirschke

Anzeige