Nowa brošurka

Donnerstag, 02. Juli 2020 geschrieben von:
Budyšin (SN). W nowej brošurce dokumentuje Domo­wina w hornjoserbskej, delnjoserbskej a němskej rěči swjatočnosć k 75. róčnicy swojeho wozrodźenja, kotruž je 10. meje w Chrósćicach wotměła. Na městnje tehdyšeho historiskeho podawka spominaše połsta lu­dźi – telko, kaž bě we­ wonych dnjach po pła­ćiwych postajenjach korony dla dowo­lene. Bě to prěnje serbske zarjadowanje po fazy „lock­down“ a tak tohorunja historiske. 34stronska dokumentacija je pod https://www.domowina.de/hsb/mediateka/publikacije/ přistupna.

Podpěra župomaj w srjedźnej Łužicy

Mittwoch, 01. Juli 2020 geschrieben von:
Tale powěsć zwjesela wosebje serbske towarstwa na teritoriju župow „Handrij Zej­ler­“ a „Jakub Lorenc-Zalěski“: Jednaćel Domowiny Marko Kowar witaše dźensa no­wu projektnu sobudźěłaćerku třěšneho zwjazka za srjedźnu Łužicu, Marku Suchec­, do domu Domowiny we Wojerecach. Tam ma 36lětna z delnich Sul­šec swoje dźěłowe městno, zo by so mjez druhim wo zakótwjenje serbšćiny w projektach we Wojerowskej a Slepjanskej kónčinje starała. Dotal je Marka Suchec jako sobudźěłaćerka za serbsku rěč a kulturu w Čornochołmčanskim Krabatowym młynje dźěłała. Z jeje přistajenjom Domowina swoje mocy dale regionalizuje, zo by Serbstwo w Delnjej, srjedźnej a Hornjej Łužicy skrućiła. Foto: Marcel Brauman

Prašenja młodostnych wostanu

Dienstag, 30. Juni 2020 geschrieben von:

Tradicionalnemu mejemjetanju w Hornjej Łužicy su wobmjezowanja koronapandemije dla zadźěwali. Tež nastupajo žnjowe nałožki, kaž stej to łapanje abo zabiwanje kokota, su sej młodostni w delnjołužiskich wsach njewěsći. Njedawno­ je so braniborska Rada za naležnosće Serbow z temu zaběrała.

Podstupim (SN/at). W cyłkach delnjo­łu­ži­skeje wjesneje młodźiny bědźa so hladajo na koronapandemiju lětsa z pra­šenjo­maj, kotrejž jim hewak žane hło­­wybo­lenje njenačinjatej: Wotmějemy swoje tradicionalne žnjowe nałožki? A kotre wuměnjenja mamy za to spjelnić?

Kaž radźićel a župan župy Delnja Łu­žica Wylem Janhoefer wuwjedźe, njeje dotal rjadowane, kak maja młodostni swoje zarjadowanja financować. Pod nor­mal­nymi wobstejnosćemi zaruča předań zastupnych lisćikow za wječorne reje wšitke kóšty tajkeho žnjoweho swjedźenja. Po tuchwilu płaćiwym braniborskim postajenju wo zadźerženju w dobje ko­ronapandemije pak su reje na žurli dale zakazane. Předsydka rady Kathrin Šwjelina młodostnych namołwi kreatiwni być, zo bychu swoje zarjadowanje zaručili.

W zhromadnym dźěle z Domowinu a Budyskim Serbskim institutom je Dźěłarnička přichod Łužica nowu ­brošurku wudała. Z nadrobnym wopisowanjom serbskosće we Łužicy chcedźa wjace ludźi do Łužicy wabić.

Mužakow (SN). Dźěłarnička přichod Łužica je njedawno pod titulom „Lausitz Łužyca/Łužica Die Sorben/Wenden – verbinden die Lausitz“ nowu brošurku wudała. Kaž Domowina w nowinskej informaciji piše, kroča wudawaćeljo – towaršnosć Hospodarski region Łužica – „z njej po nowych pućach“. Wšako móža so nětko zajimcy „zwonka Łužicy, ale tež naši susodźa we Łužicy, kotřiž Serbow hišće njeznaja, na nazorne a přehladne wašnje w internetnje přistupnej brošurce wo Serbach wobhonić“, zdźěli nowinski rěčnik Domowiny Marcel Brauman.

Namołwje so přizamknyli

Montag, 29. Juni 2020 geschrieben von:

Drježdźany/Njebjelčicy (SN/at). Na demonstraciju składnostnje słyšenja w Sak­skim krajnym sejmje wo přichodźe wot wotbagrowanja wohroženych wsow Pödelwitz, Obertitz a Miłoraz namołwja BUND Sakskeje hromadźe ze zwjazkarstwom „Wšitke wsy wostanu“ a Ende Gelän­de Drježdźany na protest jutře w 13 hodź. před parlamentom w sakskej krajnej stolicy.

Sydom čłonow Serbskeho sejma je so na­mołwje přizamknyło. Woni žadaja sej mjez druhim zachowanje tych třoch wsow, kotrež maja so do strukturneje změny zapřijeć, klimowu sprawnosć město wotškódnjenja brunicowym koncernam. Runje tak je sejmarjam wažne wobydlerjow před emisijemi Wochožanskeje jamy škitać, zachować wysoki lěs Rownjanskich burskich lěsow, škitać tři lěsne biotopy, wuchować mjezyłuku za skót. Zachować maja so z wida Serbskeho sejma dale Miłoraska dróha, přirodne wódne zastaranje w přirodoškitnymaj kónčinomaj Slepjanski Stary wulki hat a Trjebinski zwěrjenc. Jich žadanja poćahuja so zdobom na zawjedźenje lětneho monitoringa wody w Slepjanskej gmejnje.

Bjarnatej Cyžej so dźakowali

Freitag, 26. Juni 2020 geschrieben von:

Budyšin (SN/JaW). Zhromadne dźěło čłonskich słowjanskich narodnych mjeńšin w Federalistiskej uniji europskich mjeńšin FUEN so krok po kroku norma­lizuje. Wo tym informuje Domowina w medijowej zdźělence.

Zastupnicy dźěłoweje skupiny słowjanske mjeńšiny (ASGM) wuradźowachu tón tydźeń online. Jedne z ćežišćow wuradźowanja běchu přihoty na FUEN-kongres a zetkanje dźěłoweje skupiny słowjanskich mjeńšin w oktobrje. „Matic Germovšek, korutanski Słowjenc a ko­ordinator dźěłoweje skupiny, rozprawješe tež wo postupach noweje internet­ne­je strony a brošurce wo słowjanskich mjeńšinach w Europje, kotraž leži nětko w rukach FUEN“, w zdźělence dale rěka. Zdobom dźakowachu so na digitalnym wuradźowanju wuraznje Serbam, Do­mowinje a předewšěm Bjarnatej Cyžej, „kiž je lěta dołho jako rěčnik skupiny jeje dźěławosć bytostnje přewodźał a zmóžnjał“. Referent Domowiny za kulturu a wukraj Clemens Škoda so wjeseli, „zo je normalne skutkowanje Słowjanow w FUEN pod wuměnjenjemi pandemije zaso zahajene.“

Domowina chce so ze Serbskim sejmom zetkać

Freitag, 26. Juni 2020 geschrieben von:

Slepo (SN/JaW). Nastupajo zbliženje Domowiny a Serbskeho sejma počina so pomału něšto hibać. To wujewi minjene wuradźowanje Zwjazkoweho předsydstwa Domowiny w Slepom. Kaž předsyda třěšneho zwjazka Dawid Statnik informowaše, přihotuja zetkanje. Poprawom chcychu je přichodny měsac wotměć, štož pak njepóńdźe. Wšako maja tež w Do­mowinje koronapandemije dla nastate zastatki w dźěle nachwatać. „Přihotujemy tuž zetkanje ze zastupnikami sejma skerje za awgust“, předsyda připowědźi.

Tež přichodne lěto – lěto župow – nastupajo ma třěšny zwjazk zastatk nachwatać. Kaž referent Domowiny za nutřkowne naležnosće Werner Sroka zdźěli, „móžachmy proces powołanja čłonow do přihotowanskeho wuběrka zakónčić. Prěnje wuradźowanje bě hižo planowane, njejsmy pak je korony dla přewjedli. Mamy je tuž ručež móžno nachwatać.“

Prózdniny přihot kopolakow njehaća

Donnerstag, 25. Juni 2020 geschrieben von:

Serbske wólbne kopolaki přihotuje předsydstwo župy „Handrij Zejler“, zo móhło pozicije kandidatow k wólbam wyšeho měšćanosty Wojerec nastupajo serbske naležnosće sčasom zhonić.

Wojerecy (pi/SN). Domowinska župa „Handrij Zejler“ chce kandidatam za wólby wyšeho měšćanosty Wojerec 6. septembra sčasom zjawne prašenja k serbskim naležnosćam sposrědkować. Zajimcy maja hišće chwile hač do štwórtka, 2. julija, zo bychu swoju kandidaturu přizjewili. Najebać wulke šulske prózdniny chcedźa čłonojo župneho předsydstwa na posedźenju 22. julija serbske wólbne kopolaki rozjimać a schwalić. Kaž župa informuje, je so gremij na tele postu­powanje na wuradźowanju wčera wječor w bróžni domu Domowiny we Wojerecach dorozumił.

Zwjazkowe předsydstwo Domowiny je so na swojim zetkanju minjeny pjatk w Slepom tež kubłanskim temam wěno­wało a dwě personalnej naležnosći zrjadowało.

Slepo (SN/JaW). Prezidij Zwjazkoweho předsydstwa Domowiny je zaso kompletny. Minjeny pjatk wuzwolichu z jeničkim hłosawzdaćom Delnjoserba Maksimiliana Hasackeho do gremija. „Wjeselu so, zo sym młodeho čłowjeka za sobudźěło zdobyć móhł. To budźe zawěsće wobohaćenje za gremij a wšitkich jeho čłonow“, rjekny předsyda Domowiny Dawid Statnik. Hasacki dźěła jako referent w Choćebuskim kompetencnym centrumje zwjazkoweho wobswětoweho ministerstwa za škit klimy w industriji, kotraž wjele energije přetrjebuje. „Sym jara wjesoły, zo sym we Łužicy dźěło našoł. Nětko chcu tež wjac zamołwitosće přewzać“, Delnjoserb zwurazni.

Wotškódnjenje, za čo?

Montag, 22. Juni 2020 geschrieben von:
Prašace so mjezwoča wuhladach minjeny pjatk na wuradźowanju Zwjazkoweho předsydstwa Domowiny w Slepom, jako bě rěč wo přesydlenju Miłoraza. Přećiwk je, zo maja na jednym boku tych, kiž dadźa so dočasnje přesydlić, a na tamnym tych, kotřiž chcedźa wostać. Na zbywacych žadyn ćišć njewukonjeja, ale tež ći dyrbja prjedy abo pozdźišo won. To pak je přichod, kaž bě słyšeć. „Wšako bagry najzašo za 20 lět přińdu.“ Za dwaceći lět? To wšak hižo dwě lěće žanu brunicu w Němskej wjac wudobywać nochcedźa, kak ma to hić? Tež ja mějach naraz tójšto njewidźomnych prašakow na čole. A jako Slepjanski wjesnjanosta Reinhard Bork hišće rjekny, zo móhł so koncern LEAG rozsudźić Miłoraz njewotbagrować a sej to wotškódnić dać, běchu te hišće wjetše. Za čo měł koncern hišće wotškódnjenje dóstać, po tym zo je sej z łužiskej brunicu wulki profit nakopił? Za to, zo wostanje Miłoraz jako wjes rozwalinow stejo? Tón strach hrozy. Janek Wowčer

Anzeige