Přeprošuja na Božu mšu
Róžant. Serbske šulske towarstwo přeprošuje wšitkich wučerjow, kubłarjow kaž tež něhdyšich a přichodnych pedagogow jutře, wutoru, we 18 hodź. do Róžeńčanskeje cyrkwje na Božu mšu składnostnje spočatka noweho šulskeho lěta. Po tym budźe zhromadna rozmołwa na zahrodźe.
Spěwaja na Tuchorju
Budyšin. Instrumentalna skupina Consonare organizuje jutře, 11. awgusta, we 18 hodź. wječorne spěwanje na Budyskim Tuchorju pódla cyrkwje, jeli so dešćuje w cyrkwi. Wobdźělnicy spěwaja němske a serbske spěwy. Zarjadowanje je darmotne. Dary za Tuchorsku cyrkej pak witaja.
Wjele zabawow za kóždeho
Tójšto spokojnych wopytowarjow na Sernjanskim wjesnym swjedźenju
Sernjany. Wulkotne wjedro, wurjadny swjedźeń a jenož zbožowne mjezwoča wot najmłódšich hač k najstaršim wopytowarjam – takle móžeš lětuši wjesny swjedźeń w Sernjanach zjimać. Tam wšak dźiwaja stajnje na to, zo so wulět do małeje delanskeje wsy za kóždu generaciju wudani. Pjatk wječor zahajichu swjedźeń z wubědźowanjom wohnjowych woborow, kotrež dobychu domjacy kameradojo. Wječor wjerćeše potom DJ Romano Meinert swoje tačele – rejowanišćo běše stajnje połne. Tak bě to wuběrny start do kónca tydźenja.
Sobotu po připołdnju přewjedźechu w małej arenje koparski turněr ze sydom mustwami, kotryž Róžeńčenjo dobychu. Popołdnju sydaše kofej a tykanc. Jón wopytachu přewažnje wuměnkarjo tak mjenowaneho Meli-zetkanja. Tute zetkanja stajnje zaso w Sernjanach organizuja. Wječor postara so DJ Ronny wo měšanu hudźbu we wulkim stanje. W techno-róžku mějachu lubowarjo wótreje basoweje hudźby tohorunja wulke wjeselo. Wjacore sta ludźi wječor w Sernjanach zličichu.
Jubilej města hódnje woswjećili
Wosrjedź Minakała lětsa a klětu něštožkuli změnja
Minjene dny su w Minakale započeli busowe zastanišćo na tamny bok puća přepołožić. We wsy pak hišće wjace planuja, kaž wot wjesnjanostki zhonichmy.
Minakał (UM/SN). Něhdźe dwaj měsacaj wostanje w Minakale Klukšanska dróha při bywšej šuli połojčnje zawrjena. Tam twarja nětko nowe busowe zastanišćo ze seklu za zawróćenje busa. „Tale naprawa woznamjenja wjace, hač zo jenož zastanišćo tak přetwarja, zo wone hižo žane zadźěwki njezměje. To wšak je so tež hižo w druhich wsach Radworskeje gmejny stało“, wjesnjanostka Madelaine Rynčowa rozłoži.
Znowa přewšo wuspěšni běchu kónc tydźenja serbscy jěcharjo ...
Přeprošujetaj na nóclěh w hrodźe
Mila Dźisławkec w našej redakciji
Wosrjedź najwjetšeje horcoty je so 19-lětna Mila Dźisławkec z Dobrošic póndźelu tydźenja do redakcije Serbskich Nowin podała, zo by nam tři njedźele w dźěle poboku była. Loni złoži maturu na Serbskim gymnaziju w Budyšinje a dźěłaše po tym najprjedy w Chróšćan starowni swjateje Ludmile. Wot nowembra hač do julija skutkowaše jako aupair w Norwegskej a Nižozemskej, doniž njeje so zaso do Łužicy nawróćiła. Nětk chce Mila najprjedy w domiznje wostać, lěto dźěłać a nazhonjenja we wšelakich powołanjach nazběrać. Hakle potom so wo studij abo wukubłanske městno požada.
Wězo wužiwa tež swój wólny čas na kreatiwne wašnje, mjez druhim moluje. Nimo toho wěnuje so wolejbulej a so rady wuchodźuje.
Pola nas ma wšědny dźeń kaž redaktorka: Wona wobdźěla so na rańšej konferency, planuje nowinu sobu, přejima nadawki za rešerše a pisa aktualne artikle. Jeje prěni wjetši projekt běše přinošk składnostnje róčnicy Chróšćan zběžka. W teksće rozprawješe wo tym, kak so něhdyši šulerjo 5. lětnika lěta 2001 na turbulentny měsac dopominaja a što dźensa wo tym mysla.
Sławnu serbsku zašłosć naspomnja
Přichodny tydźeń budźe we wsy Vilémov na sewjeru Čěskeje njedaloko sakskeje mjezy tradicionelne putnikowanje, kiž je stawiznisce tež ze Serbami zwjazane a lětsa změje 200. róčnicu swojeje eksistency.
Vilémov. (SN/LuNo) „Na swjedźenju Marije donjebjeswzaća 15. žnjenca je do Vilémova hižo w 18. a 19. lětstotku wjele procesionow dochadźało. Mjez druhimi tež bohata ličba katolskich Serbow“, tak pisaja w starych chronikach. Podaća rěča wo wopyće tysacy Serbow. A čehodla poprawom nic, wšako njeje to daloko – po puću z Budyšina jenož 30 kilometrow běžiš. „Serbja běchu w narodnej drasće a wosebje žony su ze swojimi wulkimi bantami zajim a kedźbnosć budźili“, steji w knihach dale.
Krótkopowěsće (10.08.26)
Serbski sejm chce zaso dialog
Budyšin. Nawjazujo na interview z Janom Malinkom (SN 30.7.) wuži Serbski sejm „přiležnosć, swoju wolu k dialogej z Domowinu znowa a zjawnje zwuraznić“, tak rěčnik dr. Stanisław Nawka. Woni bychu so wjeselili, by-li Jan Malink tajki dialog moderěrował. Hladajo na prekernu situaciju serbskeho ludu je wažne, zo so wo wšelakich wobsahach rozmołwjeja, kaž na přikład wo zachowanju a dalewuwiću serbšćiny we Łužicy.
Serbsku rěč nawuknyli
Budyšin. Dohromady 40 wosobow w starobje 21 do 74 lět z dźesać krajow je so na lětušim lětnim kursu serbšćiny wobdźěliło. Woni zeznachu tež Łužicu, wšako pućowachu po bliskej krajinje. 23 kursistow bě so na pruwowanju wo certifikat wobdźěliło. Pruwowanja přewjedowachu wot niwowa A1 hač do C1 po zhromadnym europskim referencnym ramiku.
Na Berlinske wopory spominali
Zela steja znowa w srjedźišću
Pančicy-Kukow (SN/MWj). Tradicionalnje njedźelu po swjedźenju Marije donjebjeswzaća přeprošujetej Křesćansko-socialny kubłanski skutk a klóšter Marijina hwězda na zelowu njedźelu do klóšterskeje zahrody. Lětsa budźe to njedźelu, 16. awgusta. Wot 14 hodź. poskića hosćom tam pisany program. Drježdźanska kapała Brass ConAction postara so z hitami z 1980tych, 1990tych a 2000tych lět wo zabawnu hudźbu. Serbski folklorny ansambl Wudwor prezentuje tradicionalne reje w modernej interpretaciji. Za dźěći změja kreatiwne poskitki kaž tež skakanski hród přihotowany. Na zelowych a přirodowych wikach poskića přewažnje regionalni producenća zela, přirodne wudźěłki a rjemjeslniske zajimawosće. Při stejnišću zežiwjenskeho a zeloweho centruma wopytowarjo zhonja, kak mnohostronsce hodźa so zela w kuchni, za swójske derjeměće a za přirodnu kosmetiku wužiwać.
