Wjele pjenjez za kulturny dom

Montag, 25. März 2024 geschrieben von:

Twarske kóšty so podwojili – na měšćansku kasu so lědma wuskutkuje

Biskopicy (UM/SN). Za komunalny a kulturny centrum, kiž ma w něhdyšim Biskopičanskim kulturnym domje nastać, je měšćanska rada wažne wuhibki stajiła. Z jednym napřećiwnym hłosom wobzamknychu radźićeljo cyłkowny koncept financowanja. Kaž twarska nawodnica města Heidi Hofmann-Mäder a Sebastian Pietsch z ležownostneho zarjada rozłožištaj, twarske kóšty wot spočatnje planowanych 16,2 milionaj eurow na 30,2 milionaj eurow rozrostu. Štož zda so eksorbitantne podróšenje być, pak so na měšćansku kasu njewuskutkuje. Dokelž nětko ze spěchowanjom 95 procentow z hornca za změnu strukturow liča, wučinja podźěl města aktualnje 1,6 milionow eurow. Při prěnim wobličenju bě wón runje tak wulki, dokelž wuchadźachu hišće ze snadnišim spěchowanjom.

Prazwěrjenc wabi z nowosćemi

Montag, 25. März 2024 geschrieben von:

Dypkownje do jutrow zahaji Mało­wjelkowski prazwěrjenc swoju lětušu sezonu. W nim maja tež lětsa nowosće, kotrež su hódne, sej je přichodny čas wobhladać.

Mały Wjelkow (SN/MWj). Lubowarjo dinosawrierow su so načakali. Po zymskej přestawce Małowjelkowski prazwěrjenc wot dźensnišeho zaso wopytowarjow wita. „Hač do 3. nowembra móža so mali a wulcy wopytowarjo na fascinowacu časowu jězbu wot spočatka wšeho žiwjenja na zemi hač do swěta hoberskich pra­zwěrjatow podać“, wjeseli so Kai Kaufmann, jednaćel Budyskeje wobdźělenskeje a wobhospodarjenskeje towarš­nosće (BBB), kotraž mjeztym dlěje hač 20 lět prazwěrjenc wobhospodarja. Při tym čaka na wopytowarjow wjele wjesela a action. Najwažniše su wězo prazwěrjata, kotrež móžeš w jich originalnej wulkosći wobdźiwać, kaž tyrannosaurus rex abo 15 metrow wysoki brachiosaurus.

W kruhu swójby jutrowne jejka debić steješe sobotu na programje w Rownjanskim Njepilic statoku. Přijěli běchu mjez druhim Franziska Koryzna z dwójnikomaj Mayu a Maylu z Radworja a jeju wowka Gabi z Wojerec (wotprawa). Tak kaž něhdy na burskich statokach sedźachu tři generacije hromadźe a so dojutrownej zaběrje wěnowachu. Najdalši puć pak měještej holcy z Wiesbadena, kotrejž za čas jutrownych prózdnin pola wowki w Slepom přebywatej. Foto: Jost Schmidtchen

Přihotuja wólby Serbskeho sejma

Montag, 25. März 2024 geschrieben von:

Chrósćicy (SN/mb). Wšitke městna za wulkim blidom w Krawčikec hosćencu běchu hodźinu po spočatku zarjadowanja wobsadźene – tež zašły pjatk wšak bě někotrych paralelnych terminow. Wo planowanych druhich wólbach do Serbskeho sejma informowaše zapósłanc Tomaš Čornak. Prěni raz bě so gremij 2018 skonstituował. Woliło bě jón 836 ludźi. Křesćan Žur je tehdom sobu hłosy wuličował. Tež zašły pjatk w Chrósćicach bě přitomny, hdyž Čornak cil za přichodne wólby sformulowa: dwaj do štyri tysac wolerjow. Dźeń do toho su plan za wólby w delnjoserbskim Drjenowje předstajili.

Krótkopowěsće (25.03.24)

Montag, 25. März 2024 geschrieben von:

Wo jutrach w Serbach zhonili

Radebeul. Zastupjerjo towarstwa Serbski kulturny turizm wobdźělichu so předwčerawšim na lětušich jutrownych wjeselach Hoflößnitz. Na stejnišću stej Annelie Rölke a Franc Golchert hosćom debjenje jutrownych jejkow pokazali. Zodbom pak zhonichu wopytowarjo wo poskitkach, zarjadowanjach a temach kołowokoło jutrownički we Łužicy.

Wosebite myto do Žitawy

Žitawa. Abiturientka Helena Krügar zdoby sej ze swojim přepytowanjom k stabiliće wšelakich pjerkobulow wosebite myto wubědźowanja „Młodźina slědźi 2024“. 18lětna přepytowaše w krajnym wubědźowanju zadźerženje nowych hybridnych a karbonowych pjerkobulow w přirunowanju ze zwučenymi. Jury chwaleše splećenje wědomostneho naroka ze sylnym praktiskim poćahom.

Uwe Nostitz nowy prezident

Policija (22.03.24)

Freitag, 22. März 2024 geschrieben von:

Njezbožo z třomi zranjenymi

Bukecy. Na Karla Marxowej w Bukecach su srjedu popołdnju tři awta do so zrazyli. Při tym so jedna wosoba zrani. 20lětny wodźer VW Polo zajědźe, prawdźe­podobnje dokelž njebě kedźbował, na před nim jěducy Seat. Tón suny so tohodla do Fiata před nim jěduceho 54lětneho. Při njezbožu so sobujěduca w VW zrani. Njezbožo zawinowa wěcnu škodu něhdźe 15 000 eurow. Po tym zo bě policija njezbožo registrowała, ­rumowaše nadróžna słužba Seat a Fiat z puća. Wonej­ běštej wobě dospołnje skónco­wanej.

Přednošk wo překasancach

Freitag, 22. März 2024 geschrieben von:
Njeswačidło. Na přednošk profesora dr. Wesche na temu „Wužiwajće krajiny w Sakskej na dobro překasancow“ su zajimcy póndźelu, 25. měrca, w 19 hodź. do přiro­doškitneje stacije w Njeswačidle pře­prošeni. Přizjewjenja za zarjadowanje přijimuja pod abo telefonisce pod 035933 30077. Zastup płaći na dorosćeneho 2,50, potuńšeny jedyn euro.

W bibliotece jejka debili

Freitag, 22. März 2024 geschrieben von:
Na dźěłarničku serbskich jutrownych jejkow běchu wčera, štwórtk, rěčnaj motiwa­toraj Marija Šołćic a Lucian Kaulfürst kaž tež Wojerowska měšćanska biblioteka ­přeprosyli. Motiwatoraj rozłožowaštaj nazornje wšelakore techniki wóskowanja ­jejkow. Nimo toho běštaj tež někotre debjene jejka k wobhladanju sobu přinjesłoj. Zajimcy móžachu so naposledk tež sami w debjenju wuspytać. Rěčni motiwatorojo Domowiny skića z tajkimi a podobnymi poskitkami lochki přistup k serbskim ­rěčnym rumam a je tak dale a bóle šěrja. Foto: Gernot Menzel

Poslednje dźěła do jutrow

Freitag, 22. März 2024 geschrieben von:
Stajnje do jutrow ma šwalča Petra Kupcyna we Worklecach ruce połnej dźěła: ­Křižerske suknje maja so došić, knefle přišić a sekle za wopuše koni wušiwać. Pisany wuběr wudźěłkow ma mišterka swojeho powołanja we wobchodźe na předań. ­Někotre wěcy, kaž čornje wušiwane sekle abo cylindry, wona tež wupožčuje. Cyle ­nowe w jeje poskitku su lětsa tež kwětki, kotrež móža sebi křižerjo prědku na ­konjacy grat přičinić. Su-li hišće wobstaranja trěbne, njech maja so do spěcha: ­Jutrownička so bliži. Foto: SN/Bojan Benić

Šula přechodnje w hrodźe

Freitag, 22. März 2024 geschrieben von:

Jednohłósnje za wukwartěrowanje wyšeje šule do knježeho domu

Worklecy (SN/AN). Wjesnjanosta gmejny Worklecy Clemens Poldrack witaše wčera wječor na wuradźowanje gmejnskeje rady w tamnišej wyšej šuli nimo radźićelow mjez druhim hosći z komornistwa a personalneho zarjada zarjadniskeho zwjazka Při Klóšterskej wodźe Katrin ­Kernowu, Andreju Lukašowu a Gabrielu Mikelowu kaž tež zastupjerku ratarskeho kubła Worklecy Valletta GmbH Elviru Schoffcynu. Přewjele dypkow drje na dnjowym porjedźe njesteješe. Hłowne ćežišćo tworješe pak rozsud wo zaměstnjenju wyšeje šule za čas přetwara, kotryž ma so najzašo w nazymje započinać. „Po kalkulaciji financielnje najznjesli­wiša opcija za gmejnu je přesydlenje do knježeho domu“, rozjima Clemens Poldrack, na čož radźićeljo jednohłósnje tomu přizwolichu. „Fachowe rumnosće a sportownju móhli šulerjo a šulerki tež za čas přetwara šule dale wužiwać. Planowane su někotre přetwarjenske naprawy, kotrež chce Valletta GmbH po zaměstnjenju šule dale wužiwać, kaž na přikład sanitarne naprawy w prěnim poschodźe.

Serbska debata

Neuheiten LND