SKI z předźěłanym logom
Krótkopowěsće (15.04.26)
Wjace rěčnikow, wyši prestiž
Choćebuz. Po wobšěrnej wědomostnej analyzy Serbskeho instituta (SI) je so prestiž delnjoserbšćiny polěpšił a ličba rěčnikow stupała. Wjetšina delnjoserbsce rěčacych su mjeztym wuknjacy a noworěčnicy. Na internetnej stronje SI zdarma přistupna studija nasta we wobłuku projekta SROKA, awtorojo su Julija Běrinkowa, dr. Lutz Laschewski a Sophie Rädel z wotrjada za regionalne wuwiće a škit mjeńšinow.
Čary spěšnišo wutwarić
Berlin/Drježdźany. Sakski ministerski prezident Michael Kretschmer (CDU) je sej na posedźenju sakskeho kabineta w Berlinje wot Zwjazka spěšniši wutwar železniskich čarow do Pólskeje a Čěskeje žadał. Wosebje skedźbni na spěšny kolijowy zwisk do Prahi. „Češa čakaja. Nimaja zrozumjenje za to, zo so pola nas ničo njehiba. Mamy statne zrěčenje“, Kretschmer wuzběhny.
Ličba wopytowarjow stabilna
Škit zwěrjatow jako disciplina skótneje mediciny
Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow prócuja. K tomu přinošować chce naša serija z pokiwami z weterinarneje mediciny. (78)
Najmjenje ludźi zwjazuje wobraz skótneho lěkarja z hamtskim dźěłom. Praktikowacy lěkar stara so wo zwěrjo, z chorosću trapjene, zo by je hojił. Pozadk schorjenja lěkar doskónčnje njeznaje. W někotrymžkuli padźe je zrudna wěrnosć, zo je zwěrjo njedosahaceho zastaranja, zanjechanja abo samo čwělowanja přez wobsedźerja dla schorjeło. Přičiny špatneho dźerženja skotu su mnohe, kaž na př.: lěnjosć, přežadanje abo prosće njewěda.
W Němskej je poměrnje krutych regulow we wobchadźenju ze zwěrjatami. A tola so skót kóždy dźeń škoduje: přez namóc w rězarnjach (Schlachthof), přez zranjenja špatneho stawa chlěwow, přez infekcije pobrachowaceho wuhnojenja, přez zeschnyće (Abmagern) słabeje picy dla atd.
Za jubilej zwučowali
Radźićeljo wuradźuja
Worklecy. Přichodne posedźenje Worklečanskeje gmejnskeje rady wotměje so štwórtk, 16. apryla, w 19 hodź. w horće „K wódnemu mužej“. W zjawnym dźělu zaběraja so radźićeljo z aktualnym stawom saněrowanja wyšeje šule „Michał Hórnik“ a rozsudźa wo dalšich twarskich nadawkach za nju. Nimo toho póńdźe wo hospodarski plan 2026 a wo prašenje, po kotrym puću radźićeljo přichodnje podłožki za swoje wuradźowanja dóstanu.
Pančicy-Kukow. Tohorunja štwórtk w 19 hodź. zetkaja so čłonojo gmejnskeje rady Pančicy-Kukow na wuradźowanje w awli „Šule Ćišinskeho“. Tež woni chcedźa lětuši hospodarski plan wobzamknyć a wo wužiwanju srědkow z tak mjenowaneho Sakskeho fondsa rozsudźić. We wobłuku twarskich naležnosćow změja mj. dr. podłožki za přetwar a saněrowanje tykowaneho domu na blidźe.
Wodźenje po hrodźišću
Policija (14.04.26)
Kontrolu nad awtom zhubiła
Bluń. Po wšěm zdaću wulke dźiwje zwěrjo bě njedźelu wječor přičina wobchadneho njezboža pola Blunja. Na B 156 bě 19lětna wodźerka awta ze Zabroda přijěła, jako zwěrjo puć přeprěči. Młoda žona spyta so jemu instinktiwnje wuwinyć, zhubi při tym kontrolu nad jězdźidłom a zrazy do telefonoweho sćežora. Tón padny na awto a te so na kromje puća zwróći. 19lětna so na zbožo njezrani, na awće pak nasta něhdźe 16 000 eurow škody. Dale wona z nim hižo jěć njemóžeše, tak zo dyrbjachu je wotwlec. Dróha bě nachwilnje dospołnje zawrjena.
Wotstronja škody
Změja noweho sobudźěłaćerja
Hamorska gmejna prócuje so dale wo projektaj strukturneje změny
Hamor (AK/SN). 1. julija móže Hamorska gmejna noweho sobudźěłaćerja za strukturnu změnu přistajić. Tole je wjesnjanosta Hendryk Balko (Hamorske wolerske zjednoćenstwo) na wčerawšim posedźenju gmejnskeje rady zdźělił. Nowe dźěłowe městno je na štyri lěta wobmjezowane a financuje so po 90 procentach ze spěchowanskeho fondsa za strukturnu změnu. Za personalne a wěcne wudawki dóstanje Hamorska gmejna w tym času dohromady 665 000 eurow. Sobudźěłaćer ma strukturnu změnu na dobro komuny sobu přewodźeć. Wotpowědne wupisanje je gmejna hižo na swojej internetnej stronje wozjewiła.
Pytaja žonopowu kralownu
Budyšin (MWJ/SN). Město Budyšin pyta tuchwilu reprezentatiwnu wosobinu za cyle wosebite čestnohamtske skutkowanje. We wobłuku lětušich žonopowych tydźenjow chcedźa 29. awgusta 2. Budysku žonopowu kralownu krónować, zdźěli měšćanske zarjadnistwo w nowinskej informaciji.
Žonopowa kralowna přewozmje na dwě lěće wuznamnu rólu jako pósłanča města Budyšina kaž tež tradicionalneho Budyskeho žonopa. W tutej funkciji reprezentuje wona region na mnohich zarjadowanjach na regionalnej a nadregionalnej runinje. Na te wašnje přinošuje wona k pozitiwnemu wonkownemu wobrazej sprjewineho města, w nowinskej zdźělence dale rěka. Ze zastojnstwom su najwšelakoriše zjawne wustupy kaž tež wobdźělenje na hospodarskich, kulturnych a towaršnostnych zarjadowanjach zwjazane. Dale steja zetkanja z wosobinami zjawneho žiwjenja na programje. Žonopowa kralowna wotbłyšćuje při tym identitu, tradicije a žiwjenske wašnje sprjewineho města.
