Budyšin. Towarstwo Přećeljo Smolerjec kniharnje přeprošuje štwórtk, 29. oktobra, na literarny wječor pod hesłom „Haš­kec mać a pater Liborius“. Wot 19 hodź. předstaja čłonki a čłonojo towarstwa „šibałe powědki a wjesołe štučki, wupytane ze Serbskeje protyki, Šeršenja, z Paternostra a druhdźe“. Wo hudźbne wobrubjenje postara so Syman Hejduška. Zastup w Smolerjec kniharni je darmotny.

Předstaji kraje Azije

Pančicy-Kukow. Singapur, Malajzija a kupa Borneo steja w srjedźišću přichodneho přednoška Domowinskeje skupiny Pančicy-Kukow srjedu, 28. oktobra, w 19 hodź. w awli Šule Ćišinskeho. Čłon skupiny Andreas­ Hanuš rozprawja wo wulkich metropolach swěta, wo přirodowědnych zajimawosćach a wo rozdźělnych nabo­žinach w tutym dźělu Azije. Nimo skupinarjow su tež wšitcy dalši zajimcy wutrobnje přeprošeni. Na přednošku budźe mały wuběr napojow na předań.

Rownjanski Njepilic statok znowa z čiłym hosćićelom był

Rowno (JoS/SN). Porjadnu kermušu su minjenu njedźelu na Rownjanskim Njepilic statoku swjećili. Mnoho hosći bě přichwatało, zo bychu rjane popołdnjo dožiwili. Nimo swěrnych znatych witachu tež tójšto nowych wopytowarjow. Předsyda spěchowanskeho towarstwa Manfred Nikel widźi w tym přiběracy zajim­ serbske tradicije zachować, kaž to na Njepilic statoku hižo wjele lět pod hesłom­ „Kak to jo było“ činja. Tež młodźi ludźo z dźěćimi běchu njedźelu mjez wopytowarjemi.­ Při telko ludźoch bě w rumnosćach domu lědma hišće městna.

Tak kaž druhdźe zwjazuja tež w Rownom z kermušu dźak za dobre žně. Te wšak lětsa tak bohate njeběchu, kaž běchu­ so nadźijeli. Hladajo na sad ani wulce wo žnjach rěčeć njemóžeš. „Za­daniło pak so je, zo smy wows w lěću stajnje derje z wodu zastarali. Na te wašnje smy swój projekt, z kotrymž pěstowarskim dźěćom a šulerjam zakładneje šule ratarske dźěła a tradicije zbližimy, wuspěšnje zakónčili“, Manfred Nikel­ rozprawješe.

Ralbičanske wjesne towarstwo je minjenu sobotu swojich čłonow a jich swójby na zhromadne pućowanje k cyganskej studni přeprosyło. Tójšto čłonow je přeprošenje sćěhowało a zhromadnje wotměnjawe popołdnjo w přirodźe dožiwiło. Pućowanje běštaj Achim Měrćink a Weronika Pašcyna organizowałoj.

Dźěl čary wjedźeše po jednej z no­wowupisanych pućowanskich šćežkow gmejny Ralbicy-Róžant. Tute wobydlerjow přeprošuja, sej swoju blišu wokolinu znowa wotkrywać. Po puću zhonichu wobdźělnicy tójšto zajimaweho z regionalnych stawiznow, při historiskich měznikach pak nadrobnosće wo něhdyšej hranicy mjez sakskim a pruskim kralestwom. Pućowanje zwjazowaše pohibowanje, domiznowědu kaž tež towaršliwu zhromadnosć a skićeše rjanu składnosć, swójsku wokolinu z noweje perspektiwy zeznać. Halena Jancyna

Nowy Miłoraz (AK/SN). W Nowym Miłorazu na kromje Slepoho su ludźo mału zjawnu kupjel lětsa derje wužiwali. Na to Slepjanska gmejna wróćo zhladujo w swojim aktualnym hamtskim łopjenje skedźbnja. Dohromady zličichu něšto wjace hač tysac wopytowarjow. Kupanska sezona je so 8. junija zahajiła a traješe hač do 2. septembra.