Krótkopowěsće (13.10.25)
Krabat w srjedźišću stał
Čorny Chołmc. Lubina Hajduk-Veljkovićowa je k zakónčenju lětušeho Krabatoweho tydźenja w Krabatowym młynje w Čornym Chołmcu wčera popołdnju z knihi „Krabat a Čorny mišter“ čitała. Literarny wědomostnik dr. Willi W. Barthold přednošowaše wo mytosu Krabata, wo jeho žórłach w serbskej tradiciji powěsćow a wo jeho literarnym dalewuwiću. Mjez hosćimi bě tež wuměłča Siggiko.
Wjelčica zahinyła
Halštrowska Hola. Jedna z najstaršich wjelčicow po cyłej Sakskej je srjedź septembra w Halštrowskej Holi zahinyła. Sakski krajny zarjad za wobswět, ratarstwo a geologiju zdźěli, zo je Berlinski Leibnizowy institut po přepytowanju přirodnu smjerć zwěsćił. Wjelčica bu 13 lět stara.
Wjeršk reformaciskeho dnja
Na nazymske wiki
Koćina. Kóždolětne nazymske wiki ke Kulowskej kermuši wotměja so jutře, sobotu, wot 10 hodź. w Krabatowym mlokowym swěće w Koćinje. Regionalni wikowarjo wjesela so na prawje wjele wopytowarjow.
Domchowanka z koncertom
Ptačecy. Z nutrnosću a koncertom woswjeća njedźelu, 12. oktobra, w Ptačecach pola Wojerec domchowanku. Tole zdźěli motiwatorka za serbsku rěč Maria Šołćic. Nutrnosć započnje so w 14 hodź. we wjesnej cyrkwi. Tomu přizamknje so wubědźowanje wo krala kirbsow. W hosćencu započnje so w 15.30 hodź. koncert spěwneje skupiny Přezpólni. K tomu poskića kofej a tykanc. Štóž rady spěwa, je wutrobnje přeprošeny.
Předstaja knihu wo Malešecach
Rjany blečk na historiskim městnje
Hodźij je nětko wo rjany blečk bohatši. Tam je městno nastało, hdźež móžeš so přijomnje posydnyć a wodychnyć. Areal pak ma zajimawe stawizny, na kotrež je hódne so dopominać.
Hodźij (ES/SN). Na ležownosći lěta 1584 natwarjeneho bywšeho hosćenca „Ke krajnemu sudnistwu“ w Hodźiju je njedawno zelenišćo z wuplestrowanym rondelom a ławkami nastało. Na ponowjenych zbytkach murje je nětko zaso připrawjena tafla z wobrazom Justicije, ze spodźiwnej rjadku pismikow „D. K. A. Z. St. W. P. L. Gr.“, lětoličbu 1864 a z němskim hrónčkom „Dieses Gasthaus steht in Gottes Hand – zum Landgericht wird es genannt“. Što so za tym chowa?
W starym hrodźe wjele noweho
Z posedźenja Radworskeje gmejnskeje rady
Radwor (SN/MkWj). W lěće 2028 budźe Radworski hród prawdźepodobnje dotwarjeny. Tole je wobsedźer Florian Heilbronner předwčerawšim, srjedu, na posedźenju gmejnskeje rady wobkrućił. W swojim krótkim wobrazowym přednošku rysowaše wobsedźer hrodu zdobom wšelake twarske wužadanja, ale tež nowe dopóznaća wo stawiznach barokneho twara. Tak naspomni z Berlina pochadźacy Heilbronner dobre kontakty k potomnikam swobodneho knjeza von Welck, kiž bu 1945 wuswojeny. Jeho swójbni bydla dźensa na zapadźe, ale tež wokoło Drježdźan.
Dohlad do herbstwa Serbow dóstali
Krótkopowěsće (10.10.25)
Chmelíka nachwilnje zajeli
Wětošow. Mjezynarodny wukaz zajeća přećiwo wobhospodarjej słowjanskeho hrodźišća w Radušu, Davidej Chmelíkej (SN su rozprawjeli), bu cofnjeny. Wutoru su jeho nachwilnje zajeli, tak braniborske generalne statne rěčnistwo w „Lausitzer Rundschau“. W tym zwisku je Chmelík zdźělił, hdźe bydli. Hamtske sudnistwo Zły Komorow na to připowědźi, Chmelíka na sudnistwo w čěskich Klatovach kazać.
Zakónča winowe žně
Drježdźany. Sakske winowe zawody swoje žně wina tute dny zakónča. Wunošnych spadkow a horcych lěćnych dnjow dla su je lětsa hižo w awgusće zahajili. Winicarjo su z wunoškami a kwalitu wina jara spokojom. Na winowym kuble Hród Prošicy (Proschwitz) blisko Mišna su lětsa 500 000 kg wina našćipali, to je 25 procentow nad přerězkom.
Wjac kapaliny do lětadła
„Njeskutk“ a woprawdźitosć
Kak je so napis „Maršal Konjew“ wot Ralbičanskeje šule zhubił
W stawiznach Ralbičanskeje noweje, mjeztym poł lětstotka wobstejaceje šule, je so zakorjeniła wopačnosć: „Čestne mjeno ‚Maršal Konjew‘ bu w nócnej akciji wot šulskeho twarjenja wotstronjene“. Tule wopačnosć su dožiwili swój čas wšědnje do šule přichadźacy wučerjo. Mjez nimi bě na přikład w Kamjencu bydlacy wučer matematiki Jurij Šołta. Za rozeznawanje wot Jurja Šołty Nowowješćanskeho, kiž wuwučowaše serbšćinu a rušćinu, rěkaše tón druhi Jurij Šołta Kamjenski abo mate-šołta.
Woprawdźitosć
Wone popołdnjo, jako so tón „njeskutk“ na šulskim twarjenju wotměwaše, dźěłach doma w zahrodźe. Njedopomnju so hižo, kak běch wo tym zhonił. Wostajiwši wšeho wzach swoju kameru a doběžach k šuli. Tam nańdźech „hrěšnikow“ při jeju „njeskutku“. Běštaj to šulski domownik Józef Wowčerk (dawno njebohi) a wjesnjan Jurij Wjesela – wobaj wušiknaj na wšě móžne rjemjeslniske ručne dźěła. Wotstroništaj mjeno wot fasady šule.
Yücel w Kulturnej fabrice
Wojerecy. Deniz Yücel, němsko-turkowski žurnalist, publicist a bywši předsyda PEN-kluba Němskeje, je pjatk, 10. oktobra, z hosćom rjadu „Grit mit ...“. W 19 hodź. chce so we Wojerowskej Kulturnej fabrice z filmowču a wědomostnicu dr. Grit Lemkowej mjez druhim wo swojim zhladowanju „na najnowše stawizny Němskeje“ rozmołwjeć. Při tym budźe wosebje wo rasizmje rěčeć. Zarjadowanje móža zajimcy bjezpłatnje wopytać, pjenježne dary pak njewotpokazuja.
Na oktoberski swjedźeń
Koslow. Koslowske wjesne towarstwo „K Žorawej“ přeprošuje na swój lětuši oktoberski swjedźeń sobotu, 11. oktobra. Wot 18 hodź. zaklinči hudźba z diskoteku Pristolis a wjesna młodźina wita hosći z pisanym programom poskitkow na jewišću w swjedźenskim stanje. Nimo toho chcedźa zwěsćić, štó ma při tomboli najwjetše zbožo. Štóž hač do 19 hodź přińdźe, zapłaći tři eura za zastup. Po tym płaći zastup pjeć eurow.
Wotewru wustajeńcu
Policija (09.10.25)
Koči hajzl wina był
Wojerecy. Dokelž je w bydlenskim domje na Wojerowskej Schweitzerowej wutoru chětro smjerdźało, zawołachu wobydlerjo policiju. Zastojnicy zwěsćichu, zo bě zanjerodźeny koči hajzl wina. Wobsedźerka dyrbješe nuznik wurjedźić.
